Ruaklok ñõn Anij
“Anij Ejjab Ettolok Jen Kajjojo Iad”
Jerbal 17:24-27, UBS
ÑE JEJ keiri menin kõmõnmõn ko otemjej ilõñ im lõl, emol armij ro redrik im mõjino. Bwelen kwar lemnok ibõm mõke, ‘Emol ke bwe armij ro remaroñ bõk juõn kõtan ebak iben Anij eo Eutiejtata?’ Emaroñ walok men in elañe Jeova Anij ekõnan bwe jen kebake e. Ekõnan ke? Jemaroñ lo uak eo ekainemõn ilo nan ko rewejepedik an dri jilik Paul ñõn lõmaro remeletlet ilo Atens, einwõt kar je ilo Jerbal 17:24-27. Lale men ko emen Paul ear kwalok kaki kin Jeova.
Moktata, Paul ej ba bwe Anij ear “kõmõnmõn lõl im men ko otemjej ie.” (Eon 24) Aibujuij eo im oktak ko ikõtan menin kõmõnmõn ko rekajju jen dron me rej kalõñliñ kij, ej kalikar bwe dri Kõmõnmõn eo ar ej lemnok kin kij im ej yokwe kij. (Dri Rom 1:20) Enaj kar juõn menin bwebwe ñõn lemnok bwe Anij eo ej yokwe en kar beek ñõn katoanlok e jen menin kõmõnmõn ko an.
Kein karuo, Jeova “ej lelok mour im menono im men otemjej ñõn armij otemjej.” (Eon 25) Jeova ej dri Letok men ko jej Aikwiji ñõn mour. (Sam 36:9) Kõto, dren, im mõña ko me elap air aurõk ñõn mour rej menin letok ko jen dri Kõmõnmõn eo ar. (Jemes 1:17) Elañe Anij elap an joij, ejime ke ñõn ar lemnok bwe ej bõprae kij jen ar jela kajen im ruaklok ñõn e?
Kein kajilu, Anij “ear kõmõnmõn ri ailiñ ko otemjelok jen juõn wõt armij.” (Eon 26) Jeova ejjab lemnok kin okõtõn armij ro im ejelok kalijeklok iben. (Jerbal 10:34) Eñin ej biktokin Jeova. Ear kõmõnmõn “juõn wõt armij,” Adam, eo me aolepen ailiñ ko im bwij ko rar itok jen e. Im ej ankil an Anij ñõn “lomoren armij otemjej.” (1 Timote 2:4) Inem ien eo emõn ñõn ruaklok ñõn e ej bellok ñõn kij meñe eoktõk unokan kilir, ailiñ eo ar, ak mõnit ko ar.
Eliktata, Paul ej kwalok mol eo me jemaroñ liki: Jeova “ejjab ettolok jen kajjojo iad.” (Eon 27) Meñe e kanuij utiej, Jeova epojõk aolep ien ñõn ro emol burueir im rekõnan ebake e. Nan eo An ej kalimur ñõn kij bwe, ejjab etolok, ak “ej ebak ñõn ir otemjej rej kir ñõn E.”—Sam 145:18.
Ealikar jen nan ko an Paul bwe Anij ekõnan bwe jen ruaklok ñõn e. Bõtab Paul ej kemelele bwe Anij ej ebake wõt ro im rej mõnõnõ in “bukõt e” im “jatole.” (Eon 27) Juõn book in kemelele ñõn dri ukok ro an Baibel ej ba bwe “nan kein jimor rej kwalok bwe eor maroñ ñõn kõtõbrak juõn kõnan.” Ñõn wanjoñok: Pijaik am ber ilo juõn room emarok, im kwoj kajeoñ in bukot kejem eo, kinke kwoj iminene kin men ko iloan kwo jela bwe kwonaj lo kejem eo. Eindrein, elañe jej kate kij ñõn bukot Anij im jatol e, jemaroñ liki bwe jenaj lo jerammõn kin ar kate wõt kij. Paul ej kalimur ñõn kij bwe jenaj “lo E.”—Eon 27.
Kwo kõnan ke ebake Anij? Elañe kin tõmak kwoj jino “bukõt” Anij im “jatole,” kwonaj lo jerammõn. Ejjab bin ñõn bukot Jeova, kinke “Anij ejjab ettolok jen kajjojo iad.”