Tiljek Wõt Ikijen Am Karejar kin Aolepen Buruõm

“I naj etal ilo mol eo Am: Kwon kadrebijik buruõ bwe en mijõk etõm.”​—SAM 86:11.

1, 2. (a) Ekkar ñan Sam 86:​2, 11, ta eo enaj jibañ kij ñan debij ad tiljek ñan Jehovah ilo ien jej jelmae melejoñ ko ak kabo ko? (b) Ñããt eo elap an aorõk bwe jen kakajurlok tiljek eo ad ñan Jehovah?

ETKE jet Ri Christian ro me rar tiljek iumin elõñ yiõ ko rebin kin matõrtõr ak kalbuj rar oktak im buñ ak reel kin arõk mweiuk? Uak eo ej wawa ion ta eo ej bed ilo buruõd. Sam 86 ej kamelele bwe tiljek ej ekkejel ibben juõn buru eyu. Ri jeje sam, David, ear jar: “Kwon kejbãrok aõ bwe ña dru wãnik; O Kwe aõ Anij, kwon lomoren korijerõm in ij liki Kwe.” Ear wõnmanlok im jar: “Kwon tel iõ, O Jeova ilo Am ial; I naj etal ilo mol eo Am: Kwon kadrebijik buruõ bwe en mijõk etõm.”​​—Sam 86:​2, 11.

² Elañe jejjab liki Jehovah kin aolepen buruõd, inebata ko im men ko jet remaroñ kabwer kij jen ad tiljek wõt ñan Anij eo emol. Kõnan ko rekibbon rej einlok wõt bomb ko rej noji ilo ial ko jej etetal ie. Meñe jaar tiljek wõt ñan Jehovah ilo ien ko rebin, jemaroñ lorak ilo aujid ko an Satan. Elap an aorõk ñan ad tiljek wõt ñan Jehovah kiõ, mokta jen ad iion melejoñ ko ak kabo ko! “Kwon kanuij kejbãrok buruõm elap jen men otemjej,” Bible eo ej jiroñ kij. (Ken. 4:​23) Elõñ men ko raorõk jemaroñ katak jen bwebwenato eo an ri kanan eo jen Judah me Jehovah ear jilkinloke ñan King eo an Israel, Jeroboam.

“I Naj Lewoj Ajenkij”

3. Ewi wãwen Jeroboam ear emmakit ñan nan in ekajet eo ri kanan eo an Anij ear kwaloke?

³ Pijaik mõk men in ilo lemnak eo am. Ri kanan eo an Anij ej kab kwalok juõn nan in ekajet elap ñan King Jeroboam, eo ear kajutak kon in cow eo me rar kabuñ ñane ilo bwij ko joñoul bwijin Israel. King eo ekanuij in illu. Ej jiroñ ri tarinae ro an bwe ren jibwe ri kanan eo. Ak Jehovah ej bed wõt ibben ri karejar eo an. Ilo kabwilõñlõñ, ke king eo ej jitõñe ri kanan eo kin pein ear jab maroñ bar nukiji kinke ilo mõkaj ear mij pã eo me ear jitõñe kake. Im bareinwõt lokatok eo rar kajerbale ñan kabuñ wan ear bedakilkil. Ilo mõkaj, mwilin Jeroboam ear oktak. Ej akwelap ñan ri kanan eo an Anij: “Kwon akwelap ñõn Jeova am Anij kin joij, im jar kin iõ, bwe En bar kemour peiõ.” Ri kanan eo ej jar, im pein king eo ear bar rol ñan mokta.​​—1 Kiñ. 13:​1-6.

4. (a) Etke menin lelok eo an king eo ekar juõn melejoñ elap kin tiljek eo an ri kanan eo? (b) Kar ta uak eo an ri kanan eo?

⁴ Inem Jeroboam ear ba ñan ri kanan eo an Anij eo emol: “Kwon itok iba ñõn kabijukniõ, im kakije, im I naj lewoj ajenkij.” (1 Kiñ. 13:7) Ri kanan eo enaj et kiõ? Elikin an kar kwalok juõn nan in ekajet nae king eo, emaroñ ke bõk nan in karuwainene eo jen e? (Sam 119:113) Ak emõnlok ke ñan an karmijete nan in kir eo an king eo, meñe ej kwalok an buromõj iman mejen armij? Ewõr maroñ ibben Jeroboam ñan lelok menin lelok ko elap wõnãir ñan ro jeran. Elañe ear wõr ilo buruen ri kanan eo an Anij juõn kõnan ñan arõk mweiuk, menin lelok eo an king eo emaroñ kar juõn menin aujid. Bõtab, Jehovah ear jiroñ ri kanan eo: “Kwon jab mõña bred ak irak dren, im jab jeblaklok ilo ial eo kwar itok ie.” Inem ri kanan eo ear uak ilo alikar: “Elañe kwoj letok jibilkwon mweo imõm. I jamin dreloñwoj, im I jamin mõña bred ak irak dren ilo jikin in.” Kin men in ri kanan eo ej illok jen Bethel ilo bar juõn ial. (1 Kiñ. 13:​8-​10) Ta eo jemaroñ katak jen ri kanan eo kin bebe eo ñan tiljek wõt kin juõn buru eyu?​​—Rom. 15:4.

“Jen Jokõne Kaki”

5. Ewi wãwen arõk mweiuk ej juõn men emaroñ jelet tiljek eo ad?

⁵ Jemaroñ lemnak bwe arõk mweiuk ejjab maroñ jelet tiljek eo ad, ak ilo mol emaroñ. Inem jej liki ke kallimur eo an Jehovah bwe enaj letok men ko jej aikwiji? (Mat. 6:​33; Hib. 13:5) Jemaroñ ke jokane wõt ilo ad jab bõk mweiuk ko “remõnlok” ellã jen joñan ad maroñ? (Read Dri Pilippai 4:​11-​13.) Jenaj mõnõnõ ke ñan jolok jerammõn ko ilo ad karejar ñan Anij ñan bõk men ko jekõnan kiõ wõt? Jej likit ke bwe jerbal eo ad ñan Jehovah en moktata ilo ad mour? Uak ko ad rej wawa ion elañe jej karejar ñan Anij kin aolepen buruõd ak jab. Ri jilek Paul ear jeje: “A mwilin ekwojarjar kab jokõne, elap air nawõnan. Bwe j’ar jab bõktok jabrewõt ñõn lõl in, im bareinwõt je ban bõklok jabrewõt jen e; A elañe eor mõña im nuknuk ko iber, jen jokõne kaki.”​​—1 Tim. 6:​6-8.

6. Kain “ãjinkij” ak jeramman rot ko remaroñ litoki ñan kij, im ta eo emaroñ jibañ kij bebe elañe jenaj bõki ak jab?

⁶ Ñan wanjoñok, boss eo ad emaroñ letok juõn jerbal eutiejlok im elap wõnãn me ekoba bar jerammõn ko jet. Ak bõlen jej lemnak bwe enaj laplok ad kõmman jããn elañe jej emmakit ñan bar juõn ailiñ ak ene ñan kabuk jerbal. Ilo jinoin, juõn emaroñ lemnak bwe men kein rej jerammõn ko rej itok jen Jehovah. Ak mokta jen ad kõmmane juõn bebe, emõn bwe jen etale unin jekõnan kõmmane men in. Men eo elap jej aikwij lemnak kake ej, “Ewi wãwen bebe in enaj jelet kõtan eo aõ ibben Jehovah?

7. Etke eaorõk ñan jolok kõnan eo kin arõk mweiuk?

⁷ Lal eo an Satan ejjab bõjrak jen an kowõnmanlok kõnan eo kin arõk mweiuk. (Read 1 Jon 2:​15, 16.) Mejenkajjik eo an Satan ej ñan kõmman bwe en nana buruõd. Kin men in, jenaj aikwij ekkõl wõt bwe jen kile im bojak ñan jolok jen buruõd kõnan eo kin arõk mweiuk. (Rev. 3:​15-​17) Ear jab bin ibben Jesus ñan karmijete menin lelok eo an Satan kin ailiñ ko otemjej an lal. (Mat. 4:​8-​10) Ear kakkõl: “Komin lale, im kejbãrok kom jen jabrewõt arõk mweiuk: bwe an armij mour e jab kin an lõñ men ko an.” (Luk 12:​15) Ad tiljek wõt enaj jibañ kij atartar ion Jehovah im jab ilo kij make.

Juõn Ri Kanan E Lõllab “Ear Riõp Ñõn E”

8. Ewi wãwen kar melejoñe tiljek eo an ri kanan eo an Anij?

⁸ Enaj kar emõn wõt elañe ri kanan eo an Anij ear wõnmanlok ilo ial eo an ñan kabijuknen. Bõtab, ilo mõkaj ear iion bar juõn melejoñ. Bible eo ej kamelele bwe “juõn dri kanan e lõlap, e ar jokwe i Betel,” im “juõn ian lõmaro nejin e ar item kennanek e” aolep men ko rar walok ilo ran eo. Ke ear roñ kin ennan eo, lõllab eo ear kajitõk ibben lõmaro nejin ñan keboje ass eo bwe en wõnmae ri kanan eo an Anij. Ejjabto tokelik, ear lo ri kanan eo im ej kakije iumin juõn wijki ekilep im ear ba ñan e: “Kwon itok iba ñõn kabijukniõ im mõña bred.” Ke ri kanan eo an Anij emol ear jab etal ibbenlok, lõllab eo ear ba: “Ña bareinwõt dri kanan einwõt kwe; im juõn enjel e ar konono ñõn iõ kin nan an Jeova, im ba, Kwon kajeblaktok e ibõm ñõn mweo imõm, bwe en mõña bred im irak dren.” Ak Jeje ko rej ba: “A e ar riõp ñõn e.”​​—1 Kiñ. 13:​11-​18.

9. Ta eo Bible ej ba kin armij ro retao, im rej kokkure ta?

⁹ Jejjab jelã ta unin an lõllab eo kar kõmman eindein, ak jejelã bwe ear riap. Bõlen mokta lõllab eo ear juõn ri kanan etiljek ñan Jehovah. Bõtab, ilo ien in ear jerbal ilo etao. Jeje ko ilo Bible rej kananaik mwil rot in. (Read Jabõn Kennan Ko 3:​32.) Kain armij rot in rej kokkure kõtan eo air make ibben Jehovah im ekkã air kokkure kõtan eo an ro jet ibben Jehovah bareinwõt.

“E Ar Jeblak Iben” Lõllab Eo

10. Ewi wãwen ri kanan eo an Anij ear uak ñan nan in kir eo an lõllab eo, im kar ta jemlokin?

¹⁰ Ri kanan eo jen Judah en kar maroñ jelã aujid eo an ri kanan eo e lõllab. Emaroñ kar kajitõk ibben make, ‘Etke Jehovah ear aikwij jilkintok juõn enjel ñan bar juõn armij kin nan in jiroñ ko rekãl bwe en kwalok ñan ña?’ Ri kanan eo en kar maroñ kajitõk ibben Jehovah ñan kalikar ñan e kin nan in jiroñ kein. Bõtab, Jeje ko ilo Bible rejjab kwalok bwe ear kõmmane men in. Jen an eindein, “e ar jeblak iben [lõllab eo], im e ar mõña bred ilo mweo imõn, im e ar irak dren.” Jehovah ear jab mõnõnõ ibben. Ke ri kanan eo ear illok ilo ial eo an lok ñan Judah, juõn lion ear loe im mõne. Ear juõn jemlok ekaburomõjmõj ñan jerbal eo an einwõt juõn ri kanan!​​—1 Kiñ. 13:​19-​25.a

11. Ta joñok eo emõn Ahijah ear likiti?

¹¹ Ijo turãjet, ri kanan Ahijah, eo kar jilkinloke ñan kabit Jeroboam bwe en king, ear tiljek wõt mae ien an bwijwõlã. Ke Ahijah ear lõllab im bilo, Jeroboam ear jilkinlok lio belen ñan kajitõk ibben kin ajiri eo nejiiro enañinmij. Ilo beran Ahijah ear kanan bwe ajiri eo nejin Jeroboam enaj mij. (1 Kiñ. 14:​1-​18) Elõñ jerammõn ko Ahijah ear bõki im juõn iair kar ikijen an jibañ je Nan eo an Anij ekakõrmol. Ewi wãwen? Priest eo etan Ezra ear kajerbal jeje ko an.​​—2 Kron. 9:​29.

12-14. (a) Ta katak ko jemaroñ bõki jen bwebwenato eo kin ri kanan eo an Anij? (b) Kwalok juõn wanjoñok kin aikwij eo ñan kalmenlokjen im jar kin nan in kakabilek ko jen Bible eo elder ro rej litoki.

¹² Bible eo ejjab kamelele kin unin an ri kanan eo kar jab kajitõk ibben Jehovah mokta jen an jeblak ibben lõllab eo ñan mõñã im idak. Emaroñ ke bwe lõllab eo ear jiroñ e kin men ko ear mõnõnõ in roñjaki? Ta eo jemaroñ katak jen men in? Jej aikwij lukkun tõmak bwe men ko Jehovah ej ba bwe jen kõmmani rewãnik im jimwe. Inem jekdon ta eo enaj walok jej aikwij jek ilo buruõd ñan lori wõt.

¹³ Ikijen nan in kakabilek ko, jet armij rej roñjake im lore wõt men ko rekõnan roñ. Ñan wanjoñok, juõn ri kwalok emaroñ bojak in bõk juõn jerbal emaroñ kañ ien ko an me ear karõk ñan bed ibben family eo an im makitkit ko an Christian. Bõlen ear kebake juõn elder ñan bõk jibañ ñan kõmman juõn bebe emõn. Mokta, elder eo emaroñ jino ilo an ba bwe ej mõnõnõ in jibañ ak ejjab kunan jiroñ brother eo kin ewi wãwen en kabwe aikwij ko an family eo. Inem elder eo emaroñ kakememej brother eo kin menin kauwatata ko kin mour in Christian eo an elañe enaj bõk jerbal eo me ej iten bõke. Brother eo enaj ke kememej nan in ijjino ko wõt an elder eo, ak enaj lukkun kalmenlokjen kin nan in kakkõl ko ear kwaloki tokelik? Alikar bwe brother eo ej aikwij beek kin men eo ej emõntata ñan mour in Christian eo an.

¹⁴ Lemnak mõk kin bar juõn bwebwenato. Juõn sister emaroñ kebak juõn elder im kajitõk elañe emaroñ etal jen leo belen me ejjab bed ilo mol eo. Ejelok bere bwe elder eo enaj kamelele bwe ej an sister eo make bebe elañe enaj etal jen leo belen ak bedwõt ibben. Inem emaroñ eliji ibben lio nan in kakabilek eo ilo Bible kin men in. (1 Kor. 7:​10-​16) Sister eo enaj lor ke men ko elder eo ej kwalok kaki? Ak emwij ke an kõmman bebe kadede ñan illok jen leo belen? Enaj juõn menin meletlet bwe en jar im kalmenlokjen kin nan in kakabilek ko jen Bible eo ñe ej kõmman bebe eo an.

Kwon Ettã Buru

15. Ta eo jemaroñ katak jen bwid eo an ri kanan eo an Anij jen Judah?

¹⁵ Bar ta jemaroñ katak jen bwid eo an ri kanan eo jen Judah? Jabõn Kennan Ko 3:5 ej ba: “Kwon liki Jeova kin aolepen buruõm, im kwon jab atartar ion jelalokjen eo am.” Ijellokin an atartar ion Jehovah einwõt ear kõmmane ilo ien ko lok mokta, ilo ien in ri kanan eo jen Judah ear liki jelãlokjen eo an make. Bwid eo an ear tellok e ñan mij im ear luji juõn ãt emõn ibben Anij. Bwebwenato in ej kwalok aikwij eo elap ñan ettã buru im tiljek wõt ñan Jehovah.

16, 17. Ta eo enaj jibañ kij bwe jen tiljek wõt ñan Jehovah?

¹⁶ Kõnan ko an buruõd me rekibbon ekkã air telbiloik kij. Buruen armij “ejelã mon jen men otemjej.” (Jerm. 17:9) Ñan ad tiljek wõt ñan Jehovah, jej aikwij wõnmanlok wõt im kate kij ñan wutik armij eo emor ekoba kõnan eo ñan wãlok im liki kij make. Im jej aikwij kõnak armij ekãl, “eo ekar ñõn Anij emwij kõmõne ekal ilo wãnik im kwojarjar in mol.”​​—Read Dri Epesõs 4:​22-​24.

¹⁷ Jabõn Kennan Ko 11:2 ej ba, “Meletlet ej bed iben ro retã.” Ad atartar ion Jehovah ilo ettã buru ej jibañ kij ñan bõprae ad kõmmani bwid ko relap. Ñan wanjoñok, kin ad ebwer, men in emaroñ kõmman bwe en bin ad kõmmani bebe ko remõn. (Ken. 24:​10) Jemaroñ mõk in bõk kunad ilo jet ian jerbal ko rekwojarjar an Ri Christian im lemnak bwe men ko jaar kõmmani iumin yiõ ko relõñ rebwe. Im jemaroñ ba bwe ej ien an baj ro jet bõk kunair. Ak bõlen jemaroñ kõnan bwe mour eo ad en einwõt armij ro ibelakid. Bõtab, ad ‘kate wõt kij’ im “kijejeto ien otemjej ilo [ad] jerbal ñõn Iroij” enaj kejbãrok buruõd.​​—Luk 13:24; 1 Cor. 15:58.

18. Ta eo jemaroñ kõmmane elañe jejjab lukkun jelã ewi bebe eo ejimwe?

¹⁸ Jet ien, jenaj aikwij kõmmane bebe ko rebin, im jemaroñ jab jelã ewi bebe eo ejimwe. Ilo ien rot kein jenaj lemnak ke bwe emõnlok ad make kamadmõde abañ ko? Ñe jej iion wãwen rot kein, enaj menin meletlet ñan kajitõk jibañ jen Jehovah. Jemes 1:5 ej ba: “Elañe jabrewõt iami ej aikwij meletlet, en kajitõk kin e iben Anij, eo Ej wujlep ñõn armij otemjej.” Jemed ilõñ enaj letok jitõb kwojarjar eo an ñan jibañ kij kõmmane bebe ko remõn.​​—Read Luk 11:​9, 13.

Jek ilo Buruõm ñan Tiljek Wõt

19, 20. Ta eo jemaroñ jek ilo buruõd ñan kõmmane?

¹⁹ Ilo yiõ ko rebin elikin an kar Solomon ellok jen kabuñ eo emol, ien kein rar lukkun melejoñe tiljek eo an armij ro don Anij. Emol bwe elõñ iair rar ebbururu ilo juõn wãwen. Mekarta, jet armij rar tiljek wõt ñan Jehovah.

²⁰ Kajjojo ran, jej jelmae bebe im jokãlet ko me rej melejoñe tiljek eo ad. Kij bareinwõt jemaroñ kamol bwe jej armij ro retiljek. Jemaroñ eindein ikijen ad tiljek wõt ñan Jehovah aolep ien im karejar ñan e kin juõn buru eyu im liki bwe enaj wõnmanlok wõt im kajerammõn ro don retiljek.​​—2 Sam. 22:26.

[Kamelele ko itulal]

Ewi Wãwen Kwonaj Uak?

• Etke jej aikwij jolok jen buruõd kõnan eo ñan arõk mweiuk?

• Ta eo enaj jibañ kij bwe jen tiljek wõt ñan Jehovah?

• Ewi wãwen ettã buru enaj jibañ kij ñan tiljek wõt ñan Anij?

[Pija ko ilo peij 9]

Ebin ibbam ke ñan jumae menin kabo ko?

[Pija ko ilo peij 10]

Kwonaj ke jar im kalmenlokjen kin nan in kakabilek ko jen Bible eo?