Kwoj Konono Ke “Kajin Erreo” Ilo Jejjet Im Jimwe?

Kwoj Konono Ke “Kajin Erreo” Ilo Jejjet Im Jimwe?

“Inem inaj lelok ñan armij ro oktak eo ñan juõn kajin erreo, bwe aolep ren maroñ kir etan Jehovah.”—ZEPH. 3:9, NW.

1. Ta menin letok eo ekanuij emõn Jehovah ear letok ñan kij?

MENIN letok eo kin kajin ear jab walok jen armij ak, jen an eindein, ear itok jen Ri Kõmanman eo an armij, Jehovah Anij. (Ex. 4:11, 12) Ear lelok ñan armij eo moktata, Adam, maroñ eo jab ñan konono wõt ak bareinwõt ñan kine nan ko rekãl im ilo wãwen in ear lõñlok oran nan ko an. (Jen. 2:19, 20, 23) Men in kar juõn menin letok ekanuij emõn! Ear kamaroñ armij ñan air kennan ibben Jemeir ilañ im bõktok aibujuij ñan etan.

2. Etke ejako an armij ro konono kin juõn wõt kajin?

² Iloan 1,700 yiõ ko moktata in an armij mour, ir otemjej rar konono juõn wõt kajin, “juõn wõt ainikeir.” (Jen. 11:1) Inem ear walok ri jumae eo Nimrod. Einjuõn jen nan in jiroñ ko an Jehovah, armij ro rejjab bokake rar kobatok ibben don ilo jikin eo kar naetan tokelik Babel, kinke rar kõnan bed wõt ilo juõn wõt jikin. Rar jino kalek juõn em eutiej im lap, jab bwe ren lelok nebar ñan Jehovah, ak ñan “kabuñbuñ” etair make. Inem Jehovah ear bwokwoj kajin eo jinoin an ri jumae rein im kõmman bwe ren konono elõñ kain kajin ko. Kin men in, ir otemjej rar jebliklok ilo aolepen mejen lal.—Read Jenesis 11:4-8.

3. Ta eo ear walok ke Jehovah ear bwokwoje wãwen an ri jumae ro ilo Babel kennan?

³ Rainin, elõñ thousand kajin ko, jet rej ba bwe elõñlok jen 6,800, rej konono kake ilo lal in. Kajjojo ian kajin kein wãwen karõkan lemnak ko rej oktak jen don. Inem ealikar bwe, ke Jehovah Anij ear bwokwoje an ri jumae ro kennan, ear jolok jen ememej eo air kajin eo rar konono kake mokta. Ear jab baj likit ilo lemnak ko air wõt nan ko rekãl ak bareinwõt ear ukõt wãwen air lemnak im wãwen air karõk nan ko. Jejjab bwilõñ kin etke rar naetan jikin kwelok eo “Bwok” ak Babel! (Jen. 11:9) Ekaitoktoklimo, bwe Bible eo wõt ej letok juõn kamelele ekajuburu kin jinoin an lõñ kain kajin ko jej loi rainin.

Juõn Kajin Erreo, im Kãl

4. Ta eo Jehovah ear kanan kake bwe enaj walok ilo ien kein ad?

⁴ Jekdon ewi joñan an kabwilõñlõñ bwebwenato eo ilo Bible kin an kar Anij emmakit im bõprae men eo ear walok ilo Babel, ak ewõr juõn men elaplok an kaitoktoklimo im aorõk emwij an walok ilo ien kein ad. Ikijen ri kanan Zephaniah, Jehovah ear kanan: “Inem inaj lelok ñan armij ro oktak eo ñan juõn kajin erreo, bwe aolep ren maroñ kir etan Jehovah, im bwe ren maroñ karejar ñan e aerã ñan aerã.” (Zeph. 3:9, NW) Ta kajin in erreo, im ewi wãwen jemaroñ katak ñan konono kake ilo jejjet im jimwe?

5. Ta in “kajin erreo,” im ta tõbrak ko rar walok jen kajin in eoktak?

⁵ Kajin eo erreo ej mol eo kin Jehovah Anij im karõk ko an rej bed ilo Nan eo an, Bible eo. “Kajin” in ej kitibuj juõn melele ejimwe kin mol eo kin Ailiñ in Anij im wãwen enaj kaibujuij etan Jehovah, kamol an jimwe iroij bõtata eo an, im bõktok jerammõn ko rej ñan indio ñan armij ro rej tiljek. Ta tõbrak ko rej walok jen kajin in eoktak? Emwij jiroñ kij bwe armij ro renaj “kir etan Jehovah” im naj “karejar ñan e aerã ñan aerã.” Jab einwõt wãwen ko ilo Babel, oktak in ñan kajin eo erreo ear bõktok aibujuij ñan etan Jehovah im burukuk ñan armij ro an.

Katak Kajin eo Erreo

6, 7. (a) Ta eo ej kitibuji ilo an juõn katak juõn kajin ekãl, im ewi wãwen men in ej jerbal ñan katak kin kajin eo erreo? (b) Ta eo jenaj etale kiõ?

⁶ Ñe juõn ej bojak in katak juõn bar kajin, elõñ men ko ej aikwij kõmmani jen an baj kememej nan ko rekãl. Katak juõn kajin ekãl ej kitibuj katak juõn wãwen lemnak ekãl, wãwen karõk lemnak ko. Melele im kejak ko remaroñ oktak ilo bar juõn kajin. Wãwen ba nan ko rekãl emaroñ aikwij bwe en oktak wãwen am kajerbal mõttan ko ilo loñim, einwõt lo eo. Men in ej einlok wõt ñe jej jino katak kajin eo erreo kin mol eo an Bible. Elaplok men ko jej aikwij kõmmani jen ad baj katak kin jet wõt katak ko relap ilo Bible eo. Ñan ad lukkun katak kajin in ekãl, men in ej kitibuj ad kajimwe im ukõt wãwen lemnak ko ad.—Read Dri Rom 12:2; Dri Epesõs 4:23.

⁷ Ta eo enaj jibañ kij ñan jab baj melele wõt kajin eo erreo ak bareinwõt ñan lukkun jelã konono kake ilo jejjet im jimwe? Einwõt ej alikar ñe jej katak jabdewõt kajin, ewõr jet kõl ko rebidodo me remaroñ jibañ kij ñan ad lukkun jelã konono kajin eo kin mol eo ilo Bible. Jen etale jet ian buñten nee ko rebidodo me armij ro rar kajerbali ñan air katak bar juõn kajin im lale wãwen buñten nee kein remaroñ jibañ kij ñan katak kajin in ekãl ilo kõkkar.

Jelã Konono Kajin eo Erreo ilo Jejjet im Jimwe

8, 9. Ta eo jej aikwij kõmmane elañe jej kõnan katak kajin eo erreo, im etke men in elukkun aorõk?

⁸ Kanuij Roñjake. Ilo jinoin, juõn kajin ekãl emaroñ lukkun bin melele kake ñan juõn eo ejañin kar roñ kake mokta. (Ais. 33:19) Ak ñe ej katak ñan liñõre men eo ej roñjake, enaj jino in kile jet nan ko im wãwen eo ñan karõki. Ilo ejja wãwen in wõt, emwij rejañ kij: “Emõn jen kalaplok ar kejbãrok men kein j’ar roñjaki ñe j’ab elãlok jen ir jabrewõt ien.” (Hib. 2:1) Elõñ alen, Jesus ear kakabilek ri kalor ro an: “Eo eor lojiliñin, en roñlokjen.” (Mat. 11:15; 13:43; Mark 4:23; Luk 14:35) Aet, jej aikwij “roñjake im jela kake” ta eo jej roñ ñan ad maroñ wõnmanlok ilo ad melele kajin eo erreo.—Mat. 15:10; Mark 7:14.

⁹ Roñjake ej kitibuj ad kalmenlokjen, ak elap tokjen ñe jej kate kij. (Luk 8:18) Ñe jej bed ilo kwelok ko an Christian, jej ke kalmenlokjen kin men ko rej kwalok kake, ak jej mad? Elukkun lap tokjen ñan ad roñjake ta eo rej kwaloke. Elañe jab, jemaroñ oktak im roñjamõn.—Hib. 5:11.

10, 11.(a) Ijellokin ad lukkun roñjake, bar ta eo jej aikwij kõmmane? (b) Bar ta eo ej kitibuj ilo ad konono kajin eo erreo?

¹⁰ Kajeoñe ro emelak air konono. Ro rej katak juõn kajin ekãl rej rejañ ir ñan air jab baj lukkun roñjake wõt ak bareinwõt kajeoñ anõk, ak kajeoñe, wãwen an ro emelak air konono ba nan ko im wãwen air konono. Men in ej jibañ ri katak ro bõprae ir jen air ba nan ko ilo jab jimwe me tokelik emaroñ kõmman bwe en bin an ro jet melele ta ko rej ba. Ilo ejja wãwen in wõt, jej aikwij katak jen ro retijemlok ilo “katakin” kin kajin eo ekãl. (2 Tim. 4:2) Kajitõk jibañ. Kwon mõnõnõ in bõk kajimwe ko ñe juõn ej kajimwe wãwen am kennan.—Read Dri Hibru 12:5, 6, 11.

¹¹ Konono kajin eo erreo ej kitibuj jab baj tõmak wõt mol eo im katakin ro jet kake ak bareinwõt bwe kõmman ko ad ren ekkar ñan kien ko an Anij im nan in kaiñi ko an. Ñan jibañ kij kõmmane men in, jej aikwij kajeoñe ro jet. Men in ej kitibuj ad kajeoñe tiljek im kijejeto eo air, ekoba aolepen wãwen air mour, einwõt kar Jesus. (1 Kor. 11:1; Hib. 12:2; 13:7) Elañe jej kate kij kõmmane men in, enaj kaburukuk armij ro an Anij, im kõmman bwe ren konono kajin eo erreo ilo juõn wõt wãwen.—1 Kor. 4:16, 17.

12. Ewi wãwen kakememej ej koba ilo katak juõn kajin ekãl?

¹² Kiili. Ro rej katak juõn kajin ekãl rej aikwij likit elõñ men ko ilo ememej eo air. Men in ej kitibuj kememej nan ko rekãl im wãwen ba nan ko. Ñan Ri Christian ro, kememej emaroñ juõn kein jibañ ekajur ñan an juõn jelã kajin eo erreo. Aet enaj emõn ñan ad kememej etan book ko ilo Bible ekkar ñan lajrak ko air. Jet rar kõmman bwe en air mejenkajjik ñan kememej nan ko ilo jet eon ko ilo Bible eo. Jet rar lo bwe ewõr tokjen ñan air kiili al in kwelok ko, etan bwij ko an Israel im ri jilek ro 12, im kadkad ko kadkadin leen jitõb. Ilo ien ko etto, elõñ Ri Israel ro rar katak ñan air kememej aolep sam ko. Ilo ran kein, juõn ladik jidikdik ear kememej elõñlok jen 80 eon ko ilo Bible nan kin nan mokta jen ke ear jiljino yiõ dettan. Jemaroñ ke kortokjen kabel in eaorõk?

13. Etke bar elij elukkun aorõk?

¹³ Elij ej jibañ ñan ad kememej, im bar elij nan in kakememej ko relap tokjeir ilo ad katak einwõt Ri Christian ro. Ri jilek Peter ear ba: “I naj pojõk in kakememej kom kin men kein, meñe kom jela kajeir, im bin wõt ilo mol eo ej ber ibemi.” (2 Pit. 1:12) Etke jej aikwij nan in kakememej ko? Kinke rej kamũlallok melele eo ad, kadebakbaklok lemnak eo ad, im kakajurlok bebe eo ad ñan ad bokake Jehovah. (Sam 119:129) Ad etale ien otemjej kien im nan in kakabilek ko an Anij ej jibañ kij etale kij make im jibañ kij tarinaik manit eo ñan ad “dri roñjake eo ej meloklok.” (Jem. 1:22-25) Elañe jejjab wõnmanlok im kakememej kij make kin mol eo, men ko jet renaj kareel buruõd im jemaroñ bõjrak jen ad konono kajin eo erreo ilo jimwe ak jejjet.

14. Ta eo enaj jibañ kij ñe jej katak kin kajin eo erreo?

¹⁴ Read ilo ellaj. (Rev. 1:3) Jet ri katak ro rej katak juõn kajin ekãl ibbeir make ilo ejelok ainikien. Men in ejjab bõktok tokjen ko remõn. Ilo ejja wãwen in wõt, ñe jej katak kajin eo erreo, jet ien jej aikwij konono ilo juõn ainikien edik ñan jibañ kij liñor men eo jej readi. (Read Sam 1:1, 2.) Men in ej kõmman bwe men eo jej readi en bed wõt ilo lemnak ko ad. Ñan konono ilo jidik wõt ainikien ej ekkejel ibben kalmenlokjen. Ikijen mõñã, meme ej juõn menin aikwij ñan ad bõk tokjen jen mõñã eo jej kañe, eindein bareinwõt ñan ad melele kin men eo jej readi, jej aikwij kalmenlokjen kake. Jej bõk ke ien ñan ad kalmenlokjen kin men eo jej katak kake? Elikin ad konono Bible eo, jej aikwij lukkun lemnak kin ta eo ej kab mwij ad readi.

15. Ewi wãwen jemaroñ katak “wãwen karõk nan ko” ilo kajin eo erreo?

¹⁵ Etale wãwen karõk nan ko. Elap tokjen ñan ad katak kilen karõk nan ko, ak kien ko kin kajin eo ekãl jej katak kake. Elañe jej kõmmane men in jenaj maroñ konono kake ilo wãwen eo ejejjet. Einwõt juõn kajin ewõr wãwen karõke nan ko ie, eindein kajin eo erreo kin mol eo ilo Jeje ko ewõr “wãwen nan ko remol” ie. (2 Tim. 1:13) Jej aikwij anõk “wãwen” in.

16. Ta abañ eo jej aikwij anjo ion, im ewi wãwen jemaroñ kõmmane men in?

¹⁶ Jab bõjrak in kõmman wõnmanlok. Juõn armij emaroñ bwe an katak juõn kajin ñan an baj jelã bwebwenato ak tokelik ej bõjrak jen an kõmman wõnmanlok. Juõn abañ einwõt in emaroñ walok ñan ro rej konono kajin eo erreo. (Read Dri Hibru 5:11-14.) Ta eo emaroñ jibañ kij ñan ad anjo ion abañ in? Kwoj aikwij mõnõnõ in kalaplok am jelã elõñ nan ko, im kate yuk ñan am katak kajin in. “Jen jab bed wõt ilo katak ko rekkar ñõn ajiri, ak jen wõnmanlok ñõn katak ko rekkar ñõn ro reritto ilo mour in Christian. Jen jab bar eliji katak ko kin oktaklok jen jerbal ko rewan kab kin tõmak ilo Anij; kin baptais kab likit bã ko ion, kin jerkakbije an ri mij, kab ekajet eo ñõn indrio.”—Heb. 6:1, 2.

17. Etke ekkeini ad katak elap an aorõk? Kameleleiki.

¹⁷ Karõk im kajejjet ien katak ko. Ien katak ko rekadu im emakijkij ad kõmmane emõnlok jen ñe jej jolok juõn ien aetok. Katak ilo ien ko ñe eruj kamelij eo am im ejelok men ko rej kamad yuk. Katak juõn kajin ekãl ej einwõt ñe kwoj kõmmane juõn ial ibulen mar ko. Enaj bidodo ad kile ial eo ñe ekutkut ad kajerbale. Ñe etto ad jab etetal ilo ial eo, ejjab to mar ko renaj bar kalibubuiki. Inem elap an aorõk ñan ad kamineneik kij konono kajin eo ñan jelã kake! (Dan. 6:16, 20) Ñe jekõnan konono kajin eo erreo kin mol eo ilo Bible, jej aikwij jar “im ekil ñõn men in ilo niknik.”—Ep. 6:18.

18. Etke jej aikwij konono kajin eo erreo ilo jabdewõt ien emõntok?

¹⁸ Kennan aolep ien! Jet ro im rej katak juõn kajin ekãl remaroñ jenliklik jen air kennan kinke rej jook ak mijak in kõmman bwid. Men in enaj bõprae air kõmman wõnmanlok. Ñe jej katak juõn kajin, elukkun aorõk bwe jen kajerbale bwe en jimwe wãwen ad konono. Ñe elap an armij eo kajerbal kajin eo ekãl ej katak kake, enaj laplok an eñjake an jokane ilo an kajerbale. Kij bareinwõt jej aikwij konono kajin eo erreo ilo jabdewõt ien emõntok. “Armij kin buruen ej tõmak ñõn wãnik; im kin loñin ej kwalok ñõn mour.” (Rom. 10:10) Jejjab baj “kwalok” wõt ilobwilij ilo ien eo jej baptais ak jej bareinwõt kõmmane men in ñe jej konono kin Jehovah ilo jabdewõt ien ebellok, ekoba ilo ien eo jej jerbal in kwalok nan. (Mat. 28:19, 20; Hib. 13:15) Kwelok ko an Christian rej letok ñan kij ien ñan ad kwalok nan ko ralikar, aorõk im jejjet ilo kajin eo erreo.—Read Dri Hibru 10:23-25.

Kajerbal Kajin eo Erreo ilo Burukuk ñan Kaibujuij Jehovah

19, 20. (a) Ta men eo ekabwilõñlõñ emwij an Ri Kennan ro an Jehovah kõtõbrake ilo ran kein ad? (b) Ta bebe eo am?

¹⁹ Emaroñ lukkun kar kairujruj ñan bed ilo Jerusalem ilo jibboñin Sunday eo, ilo alliñ in Sivan 6, ekkar ñan calendar an Ri Jew ilo yiõ eo 33. Ilo jibboñtata, moktalok jidik jen 9:00 awa, ro rar kobatok ilo bo eo ilõñ, ilo kabwilõñlõñ rar “jino air kennan ilo elõñ kain kajin.” (Jerb. 2:4) Rainin, ro karejaran Anij ejelok maroñ ibbeir ñan konono elõñ kajin ko ilo kabwiloñloñ einwõt kar ri jilek ro mokta. (1 Kor. 13:8) Mekarta, Ri Kennan ro an Jehovah rej kwalok kin ennan eo emõn kin Ailiñ eo ilo elõñlok jen 430 kajjojo kajin ko.

²⁰ Elap ad kamolol bwe jekdon ta kajin eo jej konono kake, kij aolep ilo burukuk jej konono kajin eo erreo kin mol eo ilo Bible! Ilo juõn wãwen, men in ej oktan men eo ear walok ilo Babel. Kin juõn wõt kajin, armij ro an Jehovah rej bõktok aibujuij ñan etan. (1 Kor. 1:10) Jen bebe ñan ad wõnmanlok wõt im jerbal ilo “aerã ñan aerã” ibben ro jeid im jatid maan im kõrã ibelakin lal ke jej katak ñan kennan juõn wõt kajin ilo jimwe, ñan nebar Jemed ilañ, Jehovah.—Read Sam 150:1-6.

Ewi Wãwen Kwonaj Uak?

• Ta in kajin erreo?

• Ad konono kajin erreo ej kitibuj ta?

• Ta eo enaj jibañ kij ñan ad kennan kin kajin eo erreo ilo jejjet im jimwe?

[Bo̦o̦k eo ilo peij 23]

Kõmõnmõnlok Am Konono kin Kajin eo Erreo ikijen Am

◆ lukkun roñjake.

Luk 8:18; Hib. 2:1

◆ kajeoñe ri konono ro rewejepedik.

1 Kor. 11:1; Hib. 13:7

◆ kiili im eliji.

Jem. 1:22-25; 2 Pit. 1:12