Komin Eddeklok ilo Jelãlokjen Eo Ejejjet Ilo “Mõnõnõ”
AOLEP ri karejar ro an Jehovah rej bukõt buñburu eo an. Kinke jekõnan kabuñburuen Anij, jej mõnõnõ ñan kakajurlok tõmak eo ad im kõmmani jerbal ko ad rekwojarjar ilo kijejeto. Bõtab, ri jilek Paul, ej kareilok kij ñan juõn kauwatata emaroñ walok, eo me ear jelet jet ian Ri Jew ro ilo ran ko an: “Bwe ij kennan kin ir, bwe eor kijejeto ñõn Anij ibeir, a e jab ekar ñõn jela.” (Rom. 10:2) Alikar, tõmak eo ad im kabuñ eo ad kin Jehovah en jab aikwij bedbed wõt ion eñjake. Jej aikwiji jelãlokjen eo ejejjet kin Ri Kõmanman eo ad im ankilan.
Ilo jeje ko jet an Paul, ear kwalok bwe mwil eo Anij ej buñburuen kake ej ekkejel ibben mõnõnõ eo ad ñan bõk jelãlokjen. Ear jar bwe ri kalor ro an Christ, ren “obrõk kin jela” ankilan Anij. Inem air “etetal en tellokõn Iroij [Jehovah] im kabuñburuen ilo men otemjej” ilo air “jebar leen ilo jerbal ko remõn otemjej, im edreklok ilo jela Anij.” (Kol. 1:9, 10) Etke aikwij eo ad kin jelãlokjen eo ejejjet elap an aorõk? Im etke jej aikwij kalaploke?
Bedbedin Tõmak
Jemaroñ kile bwe bedbedin tõmak eo ad ej jelãlokjen eo kin Anij im ankilan ekkar ñan Bible eo. Elañe ejelok jelãlokjen rot in ejejjet, tõmak eo ad ilo Jehovah enaj einwõt juõn em emõkaj an jorrãn jen ibwijleplep eo kinke juõn ri bwebwe ear kaleke ion bok. Paul ej rejañ kij ñan jerbal ñan Anij ilo kõmmanwa im ñan ‘kõkãle ad lolãtãt.’ (Rom. 12:1, 2) Ekkeini ad katak Bible emaroñ jibañ kij ñan kõmmane men in.
Ewa, juõn regular pioneer ilo Poland, ear ba: “Elañe iar jab keini aõ katak Nan in Anij, enaj kar bõjrak aõ eddeklok ilo jelãlokjen eo ejejjet kin Jehovah. Makitkit ko aõ einwõt juõn Christian enaj kar mõkaj an diklok, im tõmak eo aõ ilo Anij enaj kar mõjnolok im kokkure kõtan eo aõ ibben Anij.” En jab eindein ibbed! Lemnak kin wanjoñok eo an juõn emaan eo me ear kalaplok jelãlokjen eo an ejejjet kin Jehovah im kabuñburuen.
“O E Nañin Lap Aõ Yokwe Kiõm!”
Al in emejaja eo ilo Sam 119 ej kwalok kin eñjake ko an ri jeje sam kin kien ko, nan in kakememej ko, nan in jiroñ ak kaiñi ko, nan in kakien ko, im jemlokin bebe in ekajet ko an Jehovah. Ri jeje sam ear je nan kein: “I naj kalõñliñ iõ ilo kien ko Am. . . . Nan in kennan ko Am men in mõnõnõ iba.” Ear bareinwõt jeje: “O e nañin lap aõ yokwe kiõm! I kalomõnlokjen kake iomin aolepen ran.”—Sam 119:16, 24, 47, 48, 77, 97.
Nan kein “kalõñliñ” im “kalomõnlokjen” rej kwalok aikwij eo ñan bõk ien ñan lukkun lemnak kin Nan in Anij im lañliñ kake. Nan kein rej kalikar an kar ri jeje sam lap an yokwe katak kin kien Anij. Yokwe in an kin kien Anij ear jab baj walok jen eñjake wõt. Ak ear walok jen juõn kõnan emũlal ñan ‘kalmenlokjen’ kin kien Anij, ñan bõk melele kin nan ko an Jehovah. Jemaroñ kile jen lemnak eo an bwe ear kõnan katak ñan lukkun jelã kajjen Anij im ankilan.
Elukkun alikar bwe yokwe eo an ri jeje sam kin Nan in Anij ear itok jen mũlalin buruen. Jemaroñ kajitõk ibbed make: ‘Ewõr ke ibba bareinwõt yokwe eo emũlal kin Nan in Anij? Ij lañliñ ke ilo aõ readi im etale Bible eo kajjojo ran? Ij niknik ke in readi Nan in Anij im jar mokta jen aõ kõmmane?’ Elañe jej ba aet ñan kajitõk kein, jej kalikar bwe jej “edreklok ilo jela Anij.”
Ewa ear ba: “Aolep ien ij kajeoñ kakõmõnmõnlok wãwen aõ katak ibba make. Jen ien eo iar bõk book eo ‘Lo Eneo Emon’ (‘See the Good Land’), iar kajerbale enañin aolep ien ñe ij katak. Iar kajeoñ in kalaplok aõ kajerbale book eo Melele kin Jeje Ko (Insight on the Scriptures) im kamelele ko jen book ko jet.”
Lemnak bareinwõt kin wanjoñok eo an ruo ri belele, etan emaan eo ej Wojciech im etan kõrã eo ibben ej Malgorzata, rein ruo ear lõñ eddo ko ilo family eo airro. Ewi wãwen air maroñ kobaik ien air katak Bible ibbeir make ibben jerbal ko jet air? “Kim kajjojo kar kõmman ien ñan katak Nan in Anij joñan wõt am maroñ. Inem, ilo ien kimij katak ibben don im bwebwenato kajjojo ran, kimij kennan kin katak ko relap kimar loi me rekaitoktoklimo im rar kamakit kim.” Kin air lukkun etale katak ko ibbeir make men in ear kalañliñ ir im jibañ ir ñan ‘eddek ilo jelãlokjen eo ejejjet.’
Bõk Juõn Lemnak Ejimwe Ñe Kwoj Katak
Einwõt Ri Christian ro, jej tõmak bwe ej ankilan Anij ñan “lomoren armij otemjej, im bwe ren item jela mol.” (1 Tim. 2:3, 4) Melele in ej kalikar aorõkin read Bible im ad kate ñan “jela kake.” (Mat. 15:10) Juõn wãwen ñan kõtõbrak men in ej bwe jen bõk juõn lemnak ejimwe. Eñin kar lemnak eo an Ri Beria ro ilo ien etto ke Paul ear kwalok kin news eo emõn ibbeir: “Bwe emõkõj air bõk nan im mõnõnõ, im bukot ilo Jeje ko ran otemjej, bwe ren jela men kein remol ke jab ke.”—Jerb. 17:11.
Kwoj anõk ke joñok eo an Ri Beria ro ilo am mõnõnõ in katak ibbam make im jab mad kin men ko ejelok tokjeir? Juõn Ri Christian emaroñ kate ñan anõk Ri Beria ro, meñe ilo ien ko remotlok ear jab mõnõnõ in katak ibben make. Bareinwõt, jet armij rej kadiklok ien air read im katak ñe rej rittolok, bõtab juõn Christian ejjab aikwij lor kõnan ak wãwen in. Jekdon ewi dettan juõn armij, ak emaroñ kate wõt ñan an jumae menin kamad ko ak kabo ko. Im ñe kwoj read, kwomaroñ lukkun kõnan bukõt kamelele ko me kwomaroñ bwebwenato kaki ibben ro jet. Ñan wanjoñok, kwomaroñ ke bwebwenato ñan eo beleõm ak ñan juõn Ri Christian kin men ko kwar readi ak katak kaki ilo ien eo kwar katak ibbam make? Ilo am kõmmane men in, katak kein renaj bin ilo lemnak eo am im buruõm im ilo ejja ien eo wõt enaj jelet ro jet ilo juõn wãwen emõn im jimwe.
Anõk joñok eo an ri karejar eo an Anij Ezra, ikijen am katak, bwe “e ar kabin buruen in kabukot kien Jeova.” (Ezra 7:10) Ewi wãwen am maroñ kõmmane men in? Kwomaroñ bukõt juõn jikin emõn im ejelok keroro ie ñan am katak. Inem, kwon jijet im jar ñan Jehovah kin tel im meletlet eo an. (Jem. 1:5) Kajitõk ibbam make, ‘Ta eo ij kõtmene ñan aõ katak ilo ien eo ij katak ibba make?’ Ñe kwoj read, kajeoñ bukõt point ko. Emõn ñe kwoj jei point kein ak kakõlleik mõttan ko me kwokõnan kememeji. Lemnak kin ewi wãwen kwomaroñ kajerbal point kein ñe kwoj kwalok nan, kõmman bebe ko, ak ñe kwoj rejañ ri tõmak ro mõttam. Ilo jemlokinlok ien katak eo am, ilo tukadu etale ta ko kwar katak kaki. Men in enaj jibañ yuk ñan debij men ko kwar katak.
Ewa ej kamelele kin wãwen an kõmmane men in: “Ñe ij readi Bible eo, ij kajerbal nan in kamelele ko jen book eo ej kõlajrake book ko an Ri kennan ro an Jehovah etan ej Watch Tower Publications Index im Watchtower Library eo ilo CD-ROM ak katak ko me jej bukõti ilo computer im ij je point ko me imaroñ kajerbali ilo jerbal in kwalok nan.”
Iumin elõñ yiõ, jet rar mõnõnõ in kalaplok air katak kin Anij. (Ken. 2:1-5) Meñe eindein, elõñ eddo ko air im ebin air karõk ien ñan katak ibbeir make. Elañe men in ej walok ibbam, ta oktak ko kwomaroñ kõmmani ñan kõtõbrak men in?
Ewi Wãwen Aõ Maroñ Lo Ien?
Kwomaroñ errã bwe ebidodo ñan karõk ien ñan kõmmani men ko me kwoj mõnõnõ kaki. Elõñ rar lo bwe juõn wãwen ñan jibañ kij katak ibbed make kin aolepen buruõd ej ilo ad likit juõn mejenkajjik emol, einwõt readi aolepen Bible eo. Emol, emaroñ lukkun bin ñan readi bwebwenato ko kin menmenbwij in family ko etto ilo Bible, tibdikin kamelele ko kin temple eo ilo ien ko etto, ak mõttan kanan ko me rejjab ekkar ak jitõñlok ñan mour ilo kajjojo ran. Kajeoñ in bõk buñten nee ko rekeie me renaj jibañ yuk ñan tõbar mejenkajjik eo am. Ñan wanjoñok, mokta jen am etale mõttan eo ilo Bible me ebwe an bin melele kake, kwomaroñ read kin bwebwenato ko im tokjen ko air. Jemaroñ lo kamelele kein ilo book eo “Jeje ko Otemjej Emwij Letok kin Kakõrmol An Anij” (“All Scripture Is Inspired of God and Beneficial”), eo me rar kõmmane ilo enañin 50 kajin ko.
Emenin jibañ ñan pijaiki ilo lemnak eo am kin men eo kwoj readi jen Bible eo. Emaroñ jibañ yuk ñan lo kar kain armij rot rar bed ilo ien ko etto im ta wãwen ko rar walok. Kajerbal wãwen kein enaj kõmman bwe ien katak ko am ren lukkun kamõnõnõ im wõr tokjeir. Inem, enaj laplok am kõnan kõmman ien ñan am katak. Enaj bidodolok ñan kejbãrok manit eo ñan read Bible kajjojo ran.
Meñe nan in rejañ kein remaroñ jibañ kij kajjojo, ta eo juõn family emaroñ kõmmane meñe reboub? Etke komij jab jijet ibben don im bwebwenato kin tokjen ko me remaroñ itok jen ami katak Bible ibben don einwõt juõn family? Jen bwebwenato eo ami, emaroñ walok lemnak ko rekeie, einwõt mejinmour in jibboñ kajjojo ran ak ñe jab bõlen jet ran, ñan etale mõttan Bible eo. Ak bõlen ñe kwoj bwebwenato ibben family eo am kwonaj lo aikwij eo ñan ukõt ien ñan katak ibben don. Ñan wanjoñok, jet family ko rar lo bwe elap an keie ñan etale unin tel eo an ran eo ak ñan readi mõttan Bible eo elikin wõt air mõñã. Mokta jen an jabdewõt jino karreoik table eo ak etal in kõmmane bar juõn men, family eo ej bwebwenato kin Jeje ko ilo Bible eo iumin 10 ak 15 minute ko ak readi Bible eo ekkar ñan lajrak in konono Bible eo. Ilo jinoin, emaroñ bin, bõtab ejjabto emaroñ oktak im juõn manit rej keini in kõmmane einwõt juõn family im elukkun kamõnõnõ.
Wojciech im Malgorzata rej kamelele kin ta eo ear jibañ family eo airro: “Ilo ien ko remotlok, kimar kajerbal ien ko am ñan makitkit ko ejelok tokjeir. Kimar kõmmane juõn bebe ñan kadiklok ien ko kimar kajerbali ñan jilkinlok e-mail ko. Kimar bareinwõt kadiklok ien ko kimar kajerbali ñan menin kamõnõnõ ko im karõk juõn ran im awa ñan am katak.” Emol, family in ear jab ajlok kin oktak kein rar kõmmani, im enaj bar eindein ibben family eo am.
Eddeklok ilo Jelãlokjen eo Ejejjet Elap an Aorõk!
Lukkun katak kin Nan in Anij emaroñ jebar leen “jerbal ko remõn.” (Kol. 1:10) Ñe kwoj kalikar men in ilo mour eo am, wõnmanlok eo am enaj alikar ñan ro otemjej. Kwonaj juõn eo me elap an melele kin mol ko ilo Bible. Bebe ko am enaj laplok air jokkin wõt juõn im kwonaj bojak ñan jibañ ro jet, im rõlok jen manit ko rejõkkar me ekkã an wõr ibben ro ejelok air jelã ak jidik wõt air jelã. Elaptata, kwonaj ebakelok Jehovah. Enaj wõr am kamolol emũlal kin kadkad ko an, im men in enaj menin kamol ñe kwoj jiroñ ro jet kin e.—1 Tim. 4:15; Jem. 4:8.
Jekdon ewi joñan dettam ak iminene eo am, kate yuk ñan wõnmanlok wõt ilo am bukõt Nan eo an Anij ilo lañliñ im keini am lukkun katak kake kin juõn lemnak emõn. Kwomaroñ liki bwe Jehovah ejamin meloklok kate ko am. (Hib. 6:10) Enaj lukkun kajerammõn yuk.
[Bo̦o̦k eo ilo peij 13]
ÑE JEJ “EDREKLOK ILO JELA ANIJ”. . .
Jej kakajur tõmak eo ad ilo Anij im etetal ilo wãwen eo ej kabuñburuen Jehovah.—Kol. 1:9, 10
Jej bõk lolokjen, eo ej maroñ eo ñan kile im kõmman jokãlet ko remeletlet.—Sam 119:99
Jej bõk elap mõnõnõ ilo ad jibañ ro jet ñan ruaklok ñan Jehovah.—Mat. 28:19, 20
[Pija ko ilo peij 14]
Bukõt juõn jikin emõn im ejelok keroro ie ñan am katak emaroñ juõn men ebin kõmmane, bõtab elap an aorõk
[Pija eo ilo peij 15]
Jet family ko rej readi mõttan Bible eo elikin air mõñã