Anõk Jesus Kabuñ ñan Anij ilo Wãwen eo ej Buñburuen Kake

Ilo yokwe Anij ej kir aolep “jen ailiñ otemjej, im ian bwij otemjej, im driloabjen otemjej, im konono otemjej” ñan air kabuñ ñan e. (Rev. 7:​9, 10; 15:​3, 4) Ro rej bõk kir in remaroñ lo “wõleo an Jeova.” (Sam 27:4; 90:​17) Einwõt ri jeje sam, rej kalaj ainikeir ñan kaibujuij Anij, im ba: “Jen kabuñ im barikrik; jen bukwelõlõ iman Jeova amuij Dri kõmõnmõn.”​​—Sam 95:6.

Kabuñ eo Jehovah Ej Lukkun Kaorõke

Ke ej make wõt nejin Anij, ear lap ien ibben Jesus ñan an katak kin lemnak ko an Jemen, nan in kaiñi im kien ko an. Kin men in, Jesus ear maroñ tel armij ñan kabuñ eo emol. Ear ba: “Ña ial, im mol, im mour: ejelok armij ej itok ñõn Jema, elañe jab kin Iõ.”​​—Jon 1:​14; 14:6.

Jesus ear likit juõn joñok emõn kin kõttãik kij ñan Jemen. Ej ba: “Ejelok Aõ mõke kõmõnmõn; bwe einwõt Jema e ar katakin Iõ, men kein Ij konono.” Inem ej wõnmanlok wõt im ba: “Ien otemjej Ij kõmõn men ko rej kabuñburuen.” (Jon 8:​28, 29) Ilo wãwen et ko Jesus ear kabuñburuen Jemen?

Juõn wãwen ej bwe Jesus ear lelok aolepen mour eo an ñan Jemen, im eñin ej melelen kabuñ ñan Anij. Jesus ear kwalok juõn kõtan elukkun ebak ikõtairro Jemen ikijen an bokake E, kõmõnmõn Ankilan, meñe ear iion eñtan. (Pil. 2:​7, 8) Mõttan eo eaorõk ilo kabuñ eo an Jesus kar ikijen an jerbal ilo kijejeto ñan kõmman ri kalor ro. Kin men in, ro rar tõmak ilo e ekoba ri jab tõmak ro rar naetan Ri kaki. (Mat. 22:​23, 24; Jon 3:2) Bareinwõt, Jesus ear kajerbal elap ien ko an im kajur eo an ñan jibañ ro jet. Kin an lelok e make ñan kõmmane men in, ear dik an ien ñan e make, ak ear mõnõnõ ñan karejar ñan ro jet. (Mat. 14:​13, 14; 20:​28) Jekdon ñe ej boub, aolep ien Jesus ear kõmman ien ñan konono ibben Jemen ilañ ilo jar. (Luk 6:​12) Anij ear lukkun kaorõk an Jesus kabuñ ñan e.

Jej Aikwij Lukkun Kate ñan Kabuñburuen Anij

Jehovah ear kile mwil ko mwilin Nejin im ear mõnõnõ kake. (Mat. 17:5) Meñe Satan Devil eo bareinwõt, ear kile mwilin Jesus. Kin men in, Jesus ear erom ri kijirãt eo elap an Satan. Etke? Kinke jen jinoin ñan ien eo ejelok kar armij ear bokake Anij ilo likieo im ilo wãwen eo me Anij ekõnan im ej tellokin bõke. Devil eo ear kõnan kabõjrak Jesus jen an kabuñ ñan Jehovah.​​—Rev. 4:​11.

Ilo an kate ñan kokkure Jesus, Satan ear wõnmae ñan melejoñ e. Ear bõk Jesus ñan “juõn tol e kanuij utiej, im kaluij E kin ailiñ in lõl otemjej, im air aibujuij.” Inem ear ba: “Men kein otemjej I naj lewoj ñõn Yuk, elañe Kwo naj bero im kabuñ ñõn iõ.” Ewi wãwen an kar Jesus emmakit? Ear ba: “Kwon ilok, Setan: bwe ar je, Kwon kabuñ ñõn Iroij am Anij, im kwon jerbal ñõn E wõt.” (Mat. 4:​8-​10) Aet, Jesus ear kile bwe ej einwõt menin kabuñ ñan ekjap ñan buñbedo ñan Satan, jekdon ta tokjen eo enaj walok. Ear makoko in kabuñ ñan jabdewõt ijellokin wõt Jehovah.

Ñan kij, Satan emaroñ jab letok aolep ailiñ ko an lal im aibujuij ko air ñan kij bwe jen kabuñ ñan e. Ak ej kate wõt ñan kokkure kabuñ eo emol me Ri Christian ro rej lelok ñan Anij. Devil eo ekõnan bwe jen kabuñ ñan bar juõn armij ak juõn men.​​—2 Kor. 4:4.

Jesus Christ ear kamol an tiljek wõt meñe ñan mij. Ikijen an debij an tiljek ñan Anij, Jesus ear kaibujuij Jehovah ilo juõn wãwen me ejelok armij ear kwalok. Einwõt Ri Christian ro remol rainin, jej kate kij ñan lor mour eo etiljek an Jesus ikijen ad likit ad kabuñ ñan Anij bwe en moktata jen men otemjej. Emol, men eo eaorõktata ibbed ej kõtan eo ad emõn ibben Anij.

Jerammõn Ko Jen Ad Kabuñburuen Anij

Kowõnmanlok “kabuñ erreo im jab etton” iman mejen Anij ej bõktok elõñ tokjen ko remõn. (Jem. 1:​27) Ñan wanjoñok, jej mour ilo juõn ien me elõñ wõt im lõñ armij rej “anij lo burueir, dri arõk mweiuk, dri jualõñlõñ” im “rej drike emõn.” (2 Tim. 3:​1-5) Bõtab, iloan dolul eo an Anij, ewõr jerammõn eo ibbed ñan kobalok ibben armij ro rerreo, ro me rej kate ir ñan debij kien ko an Anij kin kabuñ ñan e. Ejjab ke juõn menin kalañliñ?

Ikijen ad debij ad erreo, ewõr ibbed jerammõn eo kin juõn bõklikit erreo. Jekõnan drebij bõklikõt eo erreo ikijen ad jerbale bedbedin kien ko rewãnik an Anij im ad bokake kien ko an Caesar me rejjab idaptõk ibben kien ko an Anij.​​—Mark 12:17; Jerb. 5:​27-​29.

Kabuñ kin aolepen ad ej bõktok bar juõn kain jerammõn. Ñe jej likit bwe kõmanman ankil an Anij en men eo moktata ilo mour eo ad jen kij make, enaj wõr tokjen mour eo ad im kajuburuõd. Ijellokin ad ba: “Jen mõña im irak, bwe ilju je mij,” ewõr ibbed kejatdikdik eo kin mour indio ilo juõn paradise ion lal me ejamin likjap.​​—1 Kor. 15:32.

Ilo book in Reveles̃õn ej kalikar kin juõn ien ñe ro rej debij juõn kõtan emõn ibben Jehovah renaj rõlok jen “iñtan eo elap.” Kamelele eo ej ba bwe “Eo ej jijet ion tron eo enaj bed ibbeir im kejbarok ir.” (Rev. 7:​13-15, UBS) Ejelok bar juõn ej jijet ion throne eo ijellokin wõt Jehovah Anij, E ej make wõt emõn ijoko otemjej ilañ im ilal. Kajeoñ lemnak mõk kin lañliñ eo enaj walok ñe enaj karuwaineneik yuk einwõt juõn an ri lolok ñan imõn kabbed eo an, im enaj kejbãrok yuk bwe en ejelok jorrãn ej walok ñan yuk. Im meñe kiõ, jemaroñ lañliñ kin kejbãrok im kea eo an.

Bareinwõt, aolep ro me rej kabuñ ñan e ilo wãwen eo ej buñburuen kake, rej pijaik ir einwõt ro rej tel ir ñan “unin dren ko dren in mour.” Dennin mour kein rej jutak kin aolep menin letok ko me Jehovah ej kõmmani ñan ad bõk mour indio. Emol, ikijen binmour eo an Christ, “Anij enaj kamõraik drennin kemjalal otemjej jen mejeir.” (Rev. 7:​17) Armij renaj bõk jibañ ñan air erom wãppen, naj bõktok elap lañliñ ñan ro ewõr jerammõn eo ibbeir ñan jokwe ilo lal ñan indio. Meñe kiõ, ri kabuñ ro remõnõnõ an Anij rej lamõj kin lañliñ elap, kwalok kamolol jen burueir ñan Jehovah im rej kabuñ ñan e ibben ro rej bed ilañ, ro me rej al: “Relap im men in bwilõñ ko, men in kõmõn ko Am, O Iroij, Anij ekajur otem kajur. Rewãnik im remol ial ko Am, Kweo kiñ in ailiñ ko. Wõn e jamin mijõk, O Iroij, im kaibujuij etõm, bwe kwe wõt kwo kwojarjar: bwe dri ailiñ otemjej re naj itok im kabuñ iman mejõm, bwe emwij kalikar kõmõn ko Am rewãnik.”​​—Rev. 15:​3, 4.

[Pija eo ilo peij 27]

Ta eo Satan ej letok ñan kij bwe jen kabuñ ñan e?