Jeova Ej Uake Jar Eo Ej Itok Jen Juõn Buru Emol

“Bwe ren jela bwe Kwe wõt, im etõm Jeova, Kwo eo eutiejtata ion aolepen lõlin.”​—SAM 83:18.

1, 2. Ta eñjake eo elõñ armij rar ione, im ta kajitõk ko jemaroñ kajitõk kaki?

JET yiõ ko remotlok, juõn kõra ear lukkun inebata kin juõn jorran ear walok ilo jikin eo an. Kinke ear ridtolok ilo kabuñ in Catholic, ear kebake juõn pris ñõn an bõk jibõñ, ak pris eo ear makoko in konono iben. Inem kõra eo ear jar ñõn Anij: “Ijaje wõn kwe . . . , ak ijela kwo ber. Joij im jibõñ iõ ñõn jela kajjeõm!” Ejjabto tokelik, dri Kennan ro an Jeova rar lolok im kainemõn e im lelok jelalokjen eo ear bukote. Ijellokin men ko jet, rar katakin e bwe ãt eo etan Anij ej Jeova. Ear lap an bwilõñ ke ear katak kin men in. Kõra eo ear ba: “Baj lemnok mõk, eñin kar Anij eo iar kõnan jela kake jen ke iar ajiri!”

² Elõñ rar bareinwõt bõk ejja eñjake in wõt. Ien eo jinointata rej kab lo etan Jeova ej ñe rej riiti buk in Sam 83:18. Ilo Baibel eo, eon in ej ba: “Bwe ren jela bwe Kwe wõt, im etõm Jeova, Kwo eo eutiejtata ion aolepen lõlin.” Bõtab, kwonañin ke kar lemnok etke kar je buk in Sam 83? Ta men ko renaj iun armij otemjej ñõn air kile bwe Jeova ej Anij eo emol? Ta eo jemaroñ katak jen ennan eo ilo sam in? Jenaj etale kajitõk kein ilo katak in.a

Jumae Eo Nae Armij Ro An Jeova

3, 4. Wõn eo ear kine buk in Sam 83, im ta uõta eo ear kwalok kake?

³ Ekkar ñõn nan ko tujinoin Sam 83 ej kemelele bwe ej “Juõn al. Sam an Esaf.” Bwelen armij eo ear kine sam in kar itok jen baamle eo an Esaf jen bwijin Livai, juõn dri kajõñjõñ ebuñbuñ ilo ien iroij eo an Kiñ Devid. Dri jeje sam eo ej akwelap iben Jeova ñõn an emmakit im jojomare Iroij Potata eo an im ñõn kwalok etan ñõn armij ro. Alikar bwe kar kine sam in elikin an kar Solomon mij. Etke? Kinke iomin iroij eo an Devid im Solomon, kiñ eo an ailiñ in Tair ear jab kijirãte ailiñ in Israel. Ilo ien eo kar kine Sam 83, armij ro ilo ailiñ in Tair rar oktõk im jumae ailiñ in Israel im kobalok iben dri kijirãt ro air.

⁴ Dri jeje sam ear kõlajrõk etan ailiñ ko joñoul me rar karõk ñõn kokkure armij ro an Anij. Dri kijirãt rein rar ber ibelakin Israel, im kar kõlajrõk ir ilo wãwen in: “Mo ko im nuknuk an Idõm, im ro dri Ismael, Moab im ro dri Hegar, Gibal, im Ammõn, im Amalek; Pilistia iben ro dri Tair: Assiria bareinwõt ej koba ibeir.” (Sam 83:​6-8) Ta men eo ear walok ilo ien ko remotlok dri jeje sam ear konono kake? Jet rej ba bwe dri jeje sam ear konono kin ien eo ke ailiñ ko an Ammõn, Moab, im Tol Sier rar koba iben dron ñõn tõrinaek Israel ilo ran ko an Jihoshapat. (2 Kron. 20:​1-​26) Ro jet rej tõmak bwe ej konono kin aolepen ien ko me dri ailiñ ko rar kijirãte ailiñ in Israel.

5. Ta tokjen eo dri Kristian ro ranin rej bõk jen Sam 83?

⁵ Jekron kar ta wãwen eo ear walok ilo ien eo, ealikar bwe Jeova Anij ear kakõrmol e ñõn an je sam in ke ailiñ eo an ear ber ilo kauwatata. Sam in ej bareinwõt letok nan in rejañ ñõn dri korijer ro an Anij ranin, ro im rar jelmae elõñ jumae jen dri kijirãt ro me rekõnan kokkure ir. Im men in enaj kakajur kij kin ta eo enaj walok ilo ran ko rej ebaktok ñe Setan, ak Gog jen ailiñ in Megog, enaj tel jar in tõrinae eo an ñõn bõktok kokkure eo eliktata nae aolep ro rej kabuñ ñõn Anij ilo jitõb im ilo mol.​—Riit Ezekiel 38:​2, 8, 9, 16.

Men eo Elaptata ear Lemnok Kake

6, 7. (a) Ta eo dri jeje sam ej jar kake ilo nan ko jinoin ilo Sam 83? (b) Ta men eo elaptata an kar dri jeje sam lemnok kake?

⁶ Dri jeje Sam ej kwalok eñjake ko an ilo jar: “O Anij kwon jab ikõñ; Kwon jab kejeklokjen im jab kakije, O Anij. Bwe lo ro dri jumae Yuk rej iruij; im ro dri kijirãt Yuk r’ar leliñlok bõrair. Rej bebe kake mon nae ro drom . . . Bwe r’ar bebe iben dron im burueir wõt juõn; rej kõmõn bujeir nae Yuk.”​—Sam 83:​1-3, 5.

⁷ Ta men eo elaptata an kar dri jeje sam lemnok kake? Emol, ear lukkun inebata kin kauwatata ko remaroñ walok ñõn e im family eo an. Ak, men eo ear jar kake kar ikijen an dri kijirãt ro katton etan Jeova im nan in kalelñoñ ko nae armij ro an Anij. Jen kate kij ñõn bõk ejja lemnok in emõn, ke jej kijenmij iomin ran kein eliktata im rebin an jukjuk im ber in enana.​—Riit Matu 6:​9, 10.

8. Ta kar mejenkajjik eo an dri kijirãt ro ke rar jumae Israel?

⁸ Dri jeje sam ej kwalok nan ko an dri kijirãt ro an Israel ke rej ba: “Komin itok, im jen bukwelok ir bwe ren jab juõn ailiñ, bwe armij ren jab bar kememej etan Israel.” (Sam 83:4) Elap wõt an kar dri ailiñ ko kijirãte armij ro an Anij! Ak ear wõr bar juõn unin an dri ailiñ ko jumae Israel. Rar ankwõnak enen Israel im kimjãje im ba: “Jen bõk mo ko imõn Anij ñõn kim mõke bwe ren am.” (Sam 83:12) Juõn men einwõt in enañin ke walok ilo ran kein ar? Aet!

“Eneo Enem Ekkwojarjar”

9, 10. (a) Ilo ien ko etto, ta kar eneo ekwojarjar an Anij? (b) Ta jerammõn ko dri kabit ro im “s̃ip” ro jet rej lõñliñ kaki?

⁹ Ilo ien ko etto, eneo ekwojarjar an Anij kar Enen Kalimur eo. Kememej al in anjo eo me dri Israel ro rar al kake elikin air kar bõk lomor jen Ijipt: “Kin am kejbaroke kallimur eo am, kwar tel armij ro kwar lomoren ir, kin kajur eo am, kwar tel ir ñõn eneo enem ekkwojarjar.” (Ex. 15:13, UBS) Tokelik ilo “eneo” ear ber, tempel eo, jar in pris ro, im jikin kwelok in Jerusalem ak tron eo an Jeova, ijo kiñ ro jen lain eo an Devid rar jijõt ion. (1 Kron. 29:23) Eñin unin, Jisõs ear naetan Jerusalem “jikin kwelok an Kiñ laplap.”​—Mat. 5:​35.

¹⁰ Ak ta kin ran kein ar? Ilo yiõ eo 33, juõn ailiñ ekãl ear lotak im kar naetan “Israel an Anij.” (Gal. 6:​16) Ailiñ in, me ej ejaak in dri kabit ro jein im jãtin Jisõs Kraist ear kajejit jerbal eo me ailiñ in Israel ear likjõp in kõmõne, eñin bwe ren dri kennan ro an Anij. (Ais. 43:10; 1 Pit. 2:9) Jeova ear kwalok ejja kalimur eo wõt ñõn ir einwõt ear kwaloke ñõn Israel eo etto: “I naj air Anij, im re naj ro droõ.” (2 Kor. 6:16; Liv. 26:12) Ilo yiõ eo 1919, ke Jeova ear kõmõn juõn kõtan emõn iben bwen dri kabit ro, ilo ejja ien in wõt, rar ber ilo “eneo” ilo kõkkar. (Ais. 66:8) Jen yiõ ko ilo 1930, elõñ million “s̃ip” ro jet rar kobalok ibeir. (Jon 10:16) Kin an Jeova korlok im kejbãrok dri Kristian ro ilo ran kein, rej kamol kin jime in Iroij potata eo an Jeova. (Riit Sam 91:​1, 2.) Men in elap an kaillu Setan!

11. Ta mejenkajjik eo elaptata an dri kijirãt ro an Anij?

¹¹ Iomin ien kein eliktata, Setan ear kamakit ro dron ion lõl ñõn jumae bwen dri kabit ro im s̃ip ro jet mõtair. Eñin men eo ear walok ilo turilik in Europe iomin kien Nazi im turear in Europe iomin kien eo an Russia. Men in ear bareinwõt walok ilo ene ko jet, im enaj bar walok, elaptata ilo tõrinae eo eliktata an Setan (Gog in Megog). Ilo tõrinae in, dri jumae ro rar ankwõnake jikin im men ko mweien armij ro an Jeova, einwõt an kar dri kijirãt ro mokta kõmõne. Bõtab, ien otemjej mejenkajjik eo elap an Setan kar bwe en kijbil armij ro an Anij bwe ejelok armij en kememej ãt eo Anij ear letoke, dri kennan ro an Jeova . Ewi wãwen an Jeova emmakit ñõn jumae rot in kin iroij potata eo an? Jen bar etale nan ko an dri jeje sam.

Juõn Joñok kin Anjo eo an Jeova

12-14. Ta anjo ko ruo relap rar walok ilo jikin ko rebakelok Megido me dri jeje sam ear jeje kaki?

¹² Lemnok mõk kin tõmak eo ekajur an dri jeje sam ikijen maroñ eo an Jeova ñõn ukot karõk eo an dri kijirãt ro. Ej kobaik ilo sam in kin anjo ko ruo relap an Israel nae dri kijirãt ro ilo jikin eo ebak ñõn jikin kwelok eo elap an Megido, me ej ber ilo ene biken wõt juõn iturin tol ko. Ilo ien rak, ñe ebããte River Kaishon, kwomaroñ lo loan ial in river eo ilujen eneo im ñe ewõt ej kaibiji eneo. Bwelen eñin kar unin rej bar naetan jikin in “dren ko an Megido.”​—Ekaj. 4:​13; 5:​19.

¹³ Enañin joñoul mail ko jen Megido eber tol More. Ijin, ilo ran ko an dri Ekajet Gideon, jar in tõrinae ko an ro dri Midian, ro dri Amelek, im ro nejin rear rar koba iben dron ñõn tõrinaek Israel. (Ekaj. 7:​1, 12) Im oran jar in tõrinae eo an Gideon ear driklok ñõn jilubuki wõt emaan ro, ak kin jibõñ eo an Jeova rar maroñ anjo ion juõn jar elap in dri kijirãt ro. Ewi wãwen? Ilo air lor nan in tel ko an Anij, rar kabole kamp eo an dri kijirãt ro air ilo boñ im jibwe jãbi ko air me kijeek urur ko rej nojak iloan. Ilo ejja ien eo wõt, rar uk jilil ko air im lamij im ba: “Jãji eo an Jeova im an Gideon!” Men in ear kabwok dri kijirãt ro im rar oktõk im mõn dron; ro rar ellã im mour rar ko im kijone River Jordan. Ilo ien in, elõñlok dri Israel ro rar kobalok ibeir ñõn lukworkwore dri kijirãt ro. Koba in aolep, kar mõn 120,000 jar in dri kijirãt ro.​—Ekaj. 7:​19-​25; 8:​10.

¹⁴ Im enañin emen mail ettolok jen tol eo ilo More, eber tol Tebor. Ijin, dri Ekajet Berak ear kokweloktok 10,000 dri tõrinae ro an Israel ñõn tõrinaek jar eo an Jebin, kiñ in Hezor ilo Kenean, eo Sisera ej tel ir. Ear or ibeir jariot ko elõñ jãji mãl ko ie ilo whil ko. Kin an jabwe kein tõrinae ko iben dri Israel ro ke rar kweloklok ilo Tol Tebor, men in ear karel jar in tõrinae eo an Sisera bwe en dreloñ ilo jikin eo. Inem, “Jeova e ar kejorran Sisera, im jariot ko an otemjej.” Bwelen, juõn wutliplip ear walok ilo idriñ im kõmõn bwe whil ko ren rumlok ilo birikõt kin an ibweptok dren jen River Kaishon. Inem dri Israel ro rar mõn aolepen jar in tõrinae eo an dri kijirãt ro.​—Ekaj. 4:​13-​16; 5:​19-​21.

15. (a) Ta eo dri jeje sam ear jar kake bwe Jeova en kõmõne? (b) Armagedõn, eo ej etan tõrinae eo eliktata an Anij, ej kakememej kij kin ta?

¹⁵ Dri jeje sam ej akwelap iben Jeova bwe en kõmõn eindrein ñõn ailiñ ko rar kalelñoñ dri Israel ro ilo ran ko an. Ej jar: ‘Kwon kõmõn ñõn ir einwõt ñõn Midian, im einwõt ñõn jar in tõrinae eo iomin Sisera, im Jebin i river Kais̃õn: Ro r’ar joko i Endor; r’ar erom einwõt kubwe ñõn ene.’ (Sam 83:​9, 10) Ekaitoktoklimo bwe, etan tõrinae eo eliktata an Anij nae lõl eo an Setan ej Armagedõn (melelen “Tol in Megido”). Ãt in ej kakememej kij kin tõrinae ko relap me rar walok ilo jikin ko rebakelok Megido. An kar Jeova bõk anjo ilo tõrinae kein ilo ien ko remotlok ej kamol bwe enaj anjo ilo tõrinae in Armagedõn.​—Riit Reveles̃õn 16:13-​16.

Jar Bwe Jeova en Jojomare Iroij Potata eo An

16. Ewi wãwen kar ‘kobrõk turin mejen dri kijirãt ro kin jok’ ranin?

¹⁶ Ilo ‘ran kein eliktata,’ Jeova ear bõprae aolep jibarbar ko ñõn kokkure armij ro an. (2 Tim. 3:1) Tokjen men in, ear kõmõn bwe dri jumae ro ren jok. Sam 83:16 ear kwalok kin men in ke ear ba: “Kwon kobrõk turin mejeir kin jok, bwe ren bukot etõm, O Jeova.” Ilo elõñ ailiñ ko, dri jumae ro rar jab lo tõbrõk ilo jibarbar ko air ñõn kabwijrõk dri kennan ro an Jeova jen air kwalok nan im kwelok. Kijenmij eo air ear jibõñ ro emol burueir ñõn air ‘bukõt etan Jeova.’ Ilo elõñ ailiñ ko me ear lap air matõrtõre dri kennan ro an Jeova, ranin elõñ buki tausan rej korijer ñõn Jeova ilo mõnõnõ ilo jikin kein. Men in ear juõn anjo elap ñõn Jeova, ak menin kajokok ñõn dri kijirãt ro an!​—Riit Jeremiah 1:​19.

17. Ta wãwen eo ekauwatata armij ro rej jelmae, im ta nan ko jenaj kememeji?

¹⁷ Ilo mol, jejela bwe dri kijirãt ro renaj wõnmanlok wõt in jumae kij, ak jejamin bwijrõk jen ar kwalok kin nuuj eo emõn ñõn aolep ekoba dri jumae ro. (Mat. 24:14, 21) Bõtab, mõtõn jidrik ien eo emõn me ebellok kiõ ñõn an dri jumae ro ukwelok im bõk lomor naj jemlok. Kokwojarjar ãt eo etan Jeova elaplok an aurõk jen lomor eo an armij. (Riit Ezekiel 38:23.) Ilo ien eo ñe ailiñ ko otemjej renaj kweloklok iben dron ñõn kokkure armij ro an Anij einwõt kar kanan kake, jenaj kememej nan kein ilo jar eo an sam: “Ren jok im lelñoñ ñõn in drio, aet ren kaiur ir im ren joko.”​—Sam 83:17.

18, 19. (a) Ta eo ej ber iman dri jumae ro kin iroij potata eo an Jeova? (b) Ñe Jeova ej jojomare iroij potata eo an ewi wãwen men in enaj jelet yuk?

¹⁸ Eor juõn jemlok ekajokok ej ber iman ro eutiej burueir me rej jumae iroij potata eo an Jeova. Kin air “jab bokake gospel” eo, Nan in Anij ej kwalok bwe renaj “iñtan ilo kokkure in drio” ilo Armagedõn. (2 Tes. 1:​7-9) Kokkure eo air im an naj dri kabuñ ro remol an Jeova bõk lomor, men kein renaj kein kamol bwe Jeova wõt ej Anij eo emol. Ilo lõl eo ekãl, jejamin meloklok anjo in elap. ‘Ro remõn im ro renana me renaj jerkakbiji’ naj katak kin anjo in elap an Jeova. (Jerb. 24:15) Ilo lõl eo ekãl renaj lo kein kamol eo ealikar bwe ej menin meletlet ñõn ar mour iomin iroij potata eo an Jeova. Im ro etã burueir ibwiljin rein enaj mõkaj air kile bwe Jeova wõt ej Anij eo emol.

¹⁹ Jemeruij ilõñ eo elap an yokwe kij ear keboj juõn ilju elap an aibujuij ñõn dri kabuñ ro an retiljek! Men in ejjab kamakit yuk ke ñõn jar bwe ejjabto jen kiõ Jeova en letok uak eo eliktata ñõn jar eo an dri jeje sam, bwe “[dri kijirãt ro] ren jok . . . im ren joko. Bwe ren jela bwe Kwe wõt, im etõm Jeova, Kwo eo eutiejtata ion aolepen lõlin”?​—Sam 83:17, 18.

[Kamelele Eo Itulal]

Kwomaroñ ke Kemelele?

• Ke kar je Sam 83, ta abañ eo dri Israel ro rar jelmae?

• Armij eo ear je Sam 83 ear lukkun lap an lemnok kin ta?

• Wõn ro elaptata an Setan kijirãte ir ranin?

• Ewi wãwen Jeova enaj uake jar eo ej ber ilo Sam 83:18?

[Mab eo ilo peij 15]

(Ñan lale pija eo, jouj im lale ilo bok eo)

Ewi wãwen tõrinae ko iturin Megido eo etto rej jelet ilju eo ar?

River Kaishon

Haroshet

Tol Karmel

Komlõl Jezriel

Megido

Teanak

Tol Gilboa

Unin Dren in Herod

Tol More

Endor

Tol Tebor

Lomalo in Galili

River Jordan

[Pija eo ilo peij 12]

Ta eo ear kamakit juõn dri jeje sam ñõn an kine juõn jar ear itok jen buruen?