“Jeova Aõ Kajur”

Bwebwenato Eo An Joan Coville

Iar lotak ilo Julae 1925 ilo Huddersfield, England. Iar mõke wõt nejin jinõ im jema im ear wõr aõ nañinmij. Jema ekin ba, “Jabrewõt ien ij ber ilo kõto, ij nañinmij.” Im einwõt men in ear mol!

KE IAR ajiri, dri tel ro an kabuñ rar jar kin ainemõn, ak ke bata eo ken karuo ear walok, rar jar bwe ren bõk anjo. Men in ear kabiuk iõ, ak ilo ejja ien eo wõt, Annie Ratcliffe, eo ear make wõt Dri Kennan ro an Jeova ilo jikin eo kim ar jokwe ie, ear itok ñõn mweo imwem.

Iar Katak Kin Mol Eo

Annie ear letok buk eo Lomor (Salvation) ñõn kim im ear kir jinõ ñõn ber ilo juõn kwelok ñõn katak Baibel ilo mweo imõn Annie.a Jinõ ear kajitõk iba bwe in etal ibenlok. Ij kememej wõt ta eo kar konono kake ilo kwelok eo. Kim ar katak kin binmour eo im iar bwilõñ kinke ear juõn katak ekaitoktoklimo. Ear uak elõñ kajitõk ko aõ. Juõn wik tokelik, kimar bar kwelok ibeir. Ilo ien eo rar kemelele kin kakõlõn ran ko eliktata. Ke kimro jinõ ej kalmenlokjen kin wãwen ko rekaburomõjmõj rej walok ilo lõl in, ilo mõkaj kimro kar kile bwe eñin mol eo. Ilo ejja ran eo wõt, kar kir kimro ñõn etal ñõn mõn kwelok eo air.

Ilo mõn kwelok eo, iar iione jet pioneer ro, im juõn iair kar Joyce Barber (kiõ etan ej Ellis), eo me kiõ e im leo iben Piter, rej jerbal ilo ra eo ilo London. Iar lemnok bwe aolep rej pioneer im kin men in iar jino kwalok nan 60 awa kajuju alliñ, meñe iar bedwõt ilo jikuul.

Lalem alliñ ko tokelik, ilo Pãpode 11, 1940, kimro jinõ ar baptais ilo juõn kwelok elap ilo Bradford. Jema ear jab jumae kabuñ eo amro ak ear jab erom juõn Dri Kennan an Jeova. Ilo ien eo iar baptais, jerbal in kwalok nan turin ial ej kab jino. Iar bõk kunaõ ebbõk ieb in magazine im likit kõjelã ko ilo kiin mõn wia ko kin kwelok ko relap. Juõn Jãdede, rar karõk bwe in kwalok nan iturin juõn mõn wia elõñ armij ie. Ilo ien in ij mijak wõt armij im ilo mol enañin aolep ri jikuul ro mõtta rar lo aõ jutak ijo.

Ilo yiõ eo 1940, rar ajeje congregation eo aõ im enañin aolep dri kwalok ro mõtta me dettair wõt ña rar bed ilo congregation eo juõn. Iar kwalok aõ abõnõnõ kake men in ñõn juõn elder im ear ba, “Elañe kwokõnan mõttam jodikdik, kwon etal im kwalok nan ñõn jodikdik ro.” Im eñin men eo iar kõmõne! Ejjabto tokelik, iar iione Elsie Noble. Liin ear bõk mol eo im tokelik ear erom juõn mõtta ilukkun ebake.

Jerbal in Pioneer im Jerammõn Ko

Elikin aõ kadrioijlok jen jikuul, iar jerbal in lale jããn ilo juõn business. Bõtab, ke iar lo lañliñ eo iben dri kwalok ro me rar pioneer, kõnan eo aõ ear laplok ñõn karejar ñõn Jeova einwõt juõn pioneer. Ilo kar Mei 1945, iar lañliñ ke iar jino bõk jerbal in special pioneer. Ear wũt mejiljil aolepen ran eo kein kajuõn in aõ jerbal in pioneer. Bõtab, joñan aõ mõnõnõ in kwalok nan iar kejekron an wũt. Ak meñe iar lemnok bwe men in emaroñ kar kalaplok aõ nañinmij ak ilo mol ear kakõmõnmõnlok ejmour eo aõ. Meñe eddoũ ear 90 wõt, men in ear jab bõprae iõ jen aõ jerbal in pioneer. Elõñ yiõ ko remotlok, iar lukkun lo bwe ‘Jeova ej aõ kajur.’​​—Sam 28:7.

Einwõt juõn pioneer rar jilkinlok iõ ñõn bukwon ko me ejelok dri kennan ro ie bwe in jibõñ kajutak congregation ko ie. Mokta iar jerbal ilo England iomin jilu yiõ inem tokelik jilu yiõ ilo Ireland. Ke iar pioneer ilo Lisburn, Ireland, iar katak iben juõn emaan ej dri tel ñõn kabuñ in Protestant. Ke ear katak mol eo ilo Baibel eo ear kwalok katak kein ilo kabuñ eo an. Jet rar abõnõnõlok iben ri utiej ro an kabuñ eo kin men in, im ear aikwij kemelele kin unin an kwalok katak kein. Ear ba bwe einwõt juõn Kristian ej erro eo an ñõn kwalok ñõn ir bwe mokta ear katakin ir kin katak ko rejjab mol. Jekdon ñe baamle eo an ear jumae e, ak ear wujleplok mour eo an ñõn Jeova im jerbal ñõn e mae ien ear mij.

Jikin eo ken karuo iar pioneer ie ilo Ireland, etan Larne. Iar mõke jerbal ie iomin jiljino wik kinke pioneer eo mõtta ear ber ilo juõn kwelok elap etan “Iroij eo an Anij Ej Laplok Wõt,” eo ear walok ilo New York ilo 1950. Iar kõnan etal ñõn kwelok elap in ak jerbal eo aõ ear ber ilo Ireland. Ilo wik kein, iar lo tõbrõk ko ilo jerbal in kwalok nan. Iar iion juõn lõllab me ear bõk juõn ian buk ko ad elõñlok jen 20 yiõ ko remotlok. Joñan toõn an riiti buk in iomin elõñ yiõ ko, ear maroñ kili enañin aolep katak ko iloan. E im leo kab lio nejin, rar jimor bõk mol eo.

Bõk Katak ko Jen Jikuul in Missionary etan Gilead

Ilo 1951, ña im pioneer ro joñoul jen England kim ar ber ilo jikuul in Gilead eo ken ka 17 ilo South Lansing, New York. Iar lukkun mõnõnõ in roñjake aolep katak ko iomin jejjo alliñ ko. Ilo ien eo ejelok kõra ear maroñ bõk kunan ilo jikuul eo ej walok ilo congregation ko. Ak ilo jikuul in Gilead kim limaro kimar bõk kunam ilo jikuul eo ñõn kwalok katak ko. Kimar lukkun ikũmkũm! Ke iar kwalok katak eo aõ ken kajuõn, peiõ ear wuririr. Dri tel jikuul eo, Brother Maxwell Friend, ear kõmõn kejak ilo an ba: “Kwar jab ikũmkũm ilo jinoin wõt, ak kwar ikũmkũm ñõn jemlokin.” Ilo ien katak eo, ear laplok am maroñ ñõn kwalok lemnok ko am iman ri jikuul ro mõttam. Jikuul eo am ear mõkaj an jemlok, im rar jilkinlok kim ri jikuul ro ñõn ailiñ ko jet. Ijo rar jilkinlok iõ ñõne ej Thailand.

“Ailiñ in Ettõñdikdik”

Ij watõke einwõt juõn menin letok jen Jeova bwe Astrid Anderson kar dri jerbal eo mõtta ilo jerbal in missionary ilo Thailand. Kar jiljilimjuõn wik in am etal ilo tima eo lok ñõn am tõbar ijo. Ke kimar tõbarlok Bangkok, kimar lo bwe kar juõn jikin me elõñ mõn wia rej ber ie im rar kajerbal river ko ñõn itoitak. Ilo 1952, eietlok jen 150 dri kwalok ro ilo kar Thailand.

Jinoin am kar lo Imõniaroñroñ in kajin Thailand, kimar berre bwe kim ban kar konono kajin eo air. Elaptata ear bin ñõn ba nan ko ilo juõn ainiken ejimwe im jejjet. Ñõn wanjoñok, nan in kaou (khaù) ñe emera am ba ej melelen “rice” ak ñe eddo am ba ej melelen “nuuj.” Inem ke kimar kwalok nan, ilo jinoin ijellokin am jiroñ armij ro bwe kimij “bõktok nuuj eo emõn” kimar ba “kimij bõktok rice emõn.” Enañin lõñ ien kimij ettoñ kin bwid ko am mõke ak jirik kin jirik ear emõnlok am konono kajin in.

Armij in Thailand relukkun joij. Unin rej naetan Thailand ailiñ in ettõñdikdik. Jikin eo jinoin kimar jerbal ie enañin ruo yiõ ej Khorat (rainin rej naetan Nakhon Ratchasima). Tokelik kimar jerbal ilo jikin eo etan Chiang Mai. Enañin armij in Thailand rej kabuñ ñõn Buddha im rejjab jela Baibel. Iar katak iben eo ej bõk eddon post office eo ilo Khorat. Kimar katak kin Abream eo ilo Baibel inem kinke lein ear roñ kin ãt in moktalok ear lemnak ejela wõn eo ij kennan kake. Ak tokelik iar kile bwe leo ear jab melele wõn eo ij kennan kake ak ilo lemnok eo an ear lemnok kin president eo an Amerika, Abraham Lincoln.

Kimar lukkun mõnõnõ in katakin ro ettã burueir ilo Thailand kin Baibel eo, ak ilo ejja ien eo wõt rar katakin kim kin wãwen am maroñ lo mõnõnõ ñõn mour ilo lamwan. Men in ear lap tokjen ñõn kim kinke ilo mõn missionary eo ken kajuõn ilo Khorat ear ejelok jarom im dren. Ilo jerbal kein kimar katak bwe jen bõptoa im kab kijenmij ilo aikwij. Einwõt dri jilek Paul, kim ar lo ta melelen nan kein “I maroñ in kõmõn men otemjej ilo Eo ej kakajur iõ.”​​—Pil. 4:​12, 13.

Juõn Mõtta Kãl im Jerbal Ekãl

Ilo kar 1945, iar etal ñõn London. Ilo lolok in aõ, iar etal ñõn jikin kaluijuj eo ijo (Museum), iben jet pioneer im jet dri jerbal in Bethel. Juõn iair kar Allan Coville, eo me tokelik ear ber ilo jikuul in missionary eo ken ka 11. Kar jilkinlok e bwe en jerbal ilo France im tokelik ilo Belgium.b Tokelik, ilo ien eo ij missionary wõt ilo Thailand, ear kajitõk bwe in mareik e im ear emõn iba.

Kimro ar mare ilo Brussels, Belgium, ilo Julae 9, 1955. Iar baj kõnan wõt bwe elikin ij mare, inaj etal ñõn Paris, inem Allan ear karõk bwe kimro en etal ilo kwelok elap eo ej walok ijo wik eo tok juõn. Bõtab, ke kimro ar tõbarlok ijo, kar kajitõk ibben Allan bwe en jibañ ukok ilo aolepen ranin kwelok ko. Aolep ran, ej aikwij mõkajlok in jiboñ im ñe kimij rol ñõn mweo ejok marok. Inem ilo mol iar ber ilo Paris elikin aõ mare, ak enañin aolep ien Allan ej ettolok jen iõ, ej ber ilo jikin konono eo maan. Meñe eindrein ak iar mõnõnõ in lo bwe kar kajerbal leo iba bwe en jerbal ñõn ro jein im jatin, im ejelok berre ilo lemnok eo aõ bwe ñe Jeova ej men eo eaorõktata ilo mour in mare eo amro, kimro naj lo mõnõnõ eo emol.

Mour in mare eo aõ ear kõmõn bwe in jerbal ilo bar juõn jikin, ej Belgium. Melele eo aõ kin kar jikin in bwe kar jikin tõrinae, ak tokelik iar kile bwe armij in Belgium eor ainemõn im yokwe ibeir. Kinke armij ro ilo tuiõñ in ailiñ in rar konono kajin French, inem iar aikwij katak kajin in.

Ilo 1955 ear wõr 4,500 dri kwalok ro ilo Belgium. Enañin 49 yiõ ko in amro Allan jerbal ilo Bethel im jerbal in lolok congregation ko. Ruo im jimettan yiõ ko jinoin, kimro ar kajerbal bicycle ñõn itoitak. Kimro ej wanliñ wanlal ilo jikin ko reutiej im bareinwõt meñe ej wũt ak jab. Iomin elõñ yiõ ko kimar jokwe ilo elõñlok jen 2,000 moko imõn ro jeim im jatim. Ekkã aõ iion ro jeiõ im jatiõ remõjno ilo kõniek ak rej kijejeto wõt ilo air jerbal ñõn Jeova joñõn wõt air maroñ. Joñok eo air ear lukkun kakajur iõ bwe in jab ebwer jen jerbal eo aõ. Ilo aolep jemlokin wik in lolok ko amro iben congregation ko, enañin aolep ien kimij bõk elap kõkãtok. (Rom. 1:​11, 12, UBS) Allan ear juõn mõtta eo emol. Elap an mol nan kein ilo Ekklisiastis 4:​9, 10: “Ruo remõnlok jen juõn . . . bwe elañe re buñ, juõn e naj kejerkak eo juõn.”

Jerammõn ko Ilo Aõ Jerbal kin ‘Kajur Eo An Jeova’

Iomin elõñ yiõ ko, elõñ bwebwenato ko amro Allan rekamõnõnõ kin amro jibõñ ro jet ñõn korijer ñõn Jeova. Ñõn wanjoñok, ilo 1983 eo, kimro ear lolok congregation eo an Ri French ilo Antwerp im kim ar jokwe iben juõn baamle me Benjamin Bandiwila ear bar jokwe ibeir ilo ien in, brother in ej juõn jodrikdrik jen ailiñ in Zaire (kiõ rej naetan Democratic Republic in Congo). Benjamin ear emmakit ñõn Belgium ñõn bõk jikuul ko reutiejlok. Ear ba ñõn kimro: “Ilukkun ebanbane wãwen amiro mour, komro ej lukkun lelok aolepen mour eo amiro ñõn jerbal eo an Jeova.” Im Allan ear uak e: “Kwoj ba bwe kwoj ebanbane wãwen amro mour ak kwoj wõnmanlok wõt im bukõt men ko an lõl in. Kwoj lemnok ke bwe wãwen kein jimor rej idaptõk iben don?” Nan kein an rekajju rar kõmõn bwe Benjamin en lemnok kin mour eo an. Tokelik ke ear rol ñõn Zaire, ear jino jerbal in pioneer, im kiõ ej jerbal einwõt juõn uan ro rej lolorjake ra eo ilo ailiñ in.

Ilo 1999, iar mwijmwij in buru ñõn jolok kinej eo ear eddek ie. Jen ien in, kar 65 wõt eddoũ. Ij lukkun juõn “jãbi brij” emõjno. Bõtab elap aõ kamolol Jeova kin an letok ñõn iõ “maroñ eo e kanuij lap.” Elikin aõ kar mwijmwij, Jeova ear kamaroñ iõ bwe in bar etal ibben Allan lok ilo jerbal in lolok congregation ko. (2 Kor. 4:7) Inem, ilo kar Maaj 2004, enañin 49 yiõ in mare eo amro, Allan ear mij. Elap aõ oñ kake e ak ijela bwe Jeova ej kememej wõt e, im men in ej kainemõn iõ.

Rainin ej 83 aõ yiõ kiõ im elõñlok jen 63 yiõ in aõ jerbal in full time. Ij keini wõt aõ jerbal in kwalok nan, katak iben dri katak ro aõ, im ij kortokjen ien ko rebellok ñõn konono iben ro jet kin karõk eo an Jeova. Ewõr ien, ij lemnok iba mõke, ‘Enaj kar ewi wãwen mour eo aõ elañe iar jab jino pioneer ilo yiõ eo 1945?’ Ilo kar ien eo, nañinmij eo aõ ear un eo unin bwe in kar jab. Bõtab, ilukkun mõnõnõ bwe iar jino aõ pioneer ke iar ajiri wõt. Iar lo iba mõke bwe elañe jej likit Jeova moktata, enaj kakajur kij.

[Kamelele Ko Itulal]

[Pija eo ilo peij 18]

Eo mõtta ilo jerbal in missionary, Astrid Anderson (ituanbwijmaroñ)

[Pija eo ilo peij 18]

Jerbal in lolok congregation ko iben leo beleiõ ilo 1956

[Pija eo ilo peij 20]

Iben Allan ilo yiõ eo 2000