Kwokõnan bwe Kwon Kain Armij Rot?

LEO ej jeban bolijmãn ro ilo juõn bukwon ilo Bilibin ear kajitõk iben juõn pioneer, “Ta eo kwar kõmõne bwe leo en ukot mõnit ko an renana?” Ilo an jitõñlok ñõn peba ko rej ber ion tebel eo an, ear ba: “Kwo jela ke bwe aolep men kein rej peba in ekajet ko mokta nae e? Ear kõmõn elõñ abañ ko ilo bukwon in, ak kiõ kwar jibõñ e ñõn jolok aolep mõnit ko an renana.” Lein me rar konono kake ekar juõn dri karek elej. Ta eo ear kamakit e ñõn kõmõn oktõk ko relap ilo mour eo an? Kar ennan eo ekakõrmol an Anij ilo Baibel eo.

Elõñ kajuju armij ro rar bõk ñõn burueir nan in kakabilek eo an dri jilik Paul ñõn ‘wutik armij emor ekar ñõn air etetal mokta im bwe ren kõnõk armij ekãl, eo ekar ñõn Anij.’ (Ep. 4:​22-​24) Meñe jej aikwij kõmõn oktõk ko relap ak redrik ñõn erom juõn Kristian, oktõk kein rej mõtõn ar kõnõk armij eo ekãl.

Ak, ar wõnmanlok im kõmõn oktõk ko ñõn ar tellokin baptais ej jinoin wõt mour in Kristian eo ar. Ñe jej baptais iomin dren, jej einwõt juõn alal me emwij jino lame ñõn jekjekin juõn men. Kwomaroñ kile ta eo ej lame, ak ej lõñ wõt men ko ej aikwij in kõmõni. Dri lamlam eo ej aikwij bar ejaaki men ko jet ñõn kakõmõnmõnloke bwe en aibujuij. Ilo ien eo jej baptais, eor iber jet karkar ko rej menin aikwij ñõn erom juõn dri korijeran Anij. Bõtab, jej aikwij kakõmõnmõnlok karkar ko karkarir ikijen ar wõnmanlok wõt im kõmõn oktõk ko ilo mour eo ar.

Paul ear bareinwõt lo aikwij eo ñõn an kõmõn oktõk ko ilo mour eo an. Ear ba:“Inem ij lo kien, bwe nana ej ber iba, ña I kõnan kõmõn emõn.” (Rom. 7:​21) Paul ear kile kar kain armij rot e im ear jela kain armij rot eo ekõnan erom. Ak ta kin kij? Kij bareinwõt jej aikwij kajitõkin kij mõke: ‘Ta eo ej ber iba? Kain armij rot ña? Im kain armij rot ikõnan erom?’

Ta eo “Ej Ber Iba”?

Ñe jej kõkãle juõn em emor, ejabwe ñõn baj unoik wõt ilikin mweo elañe e kõt alal ko iloan. Elañe jejjab kõkãle jorran ko iloan mweo, enaj laplok wõt an or jorran ko jen kar mokta. Eindrein, ejjab bwe ñõn ar kwalok bwe wãweir ewãnik elañe tuloa enana. Jej aikwij etale lukkun tumũlõlin karkar ko karkarir im kile likjõp ko me jej aikwij in kamarmiri. Elañe jejjab, karkar ko ar renana renaj bar walok. Inem ej juõn menin aikwij ñõn ar etale kij mõke. (2 Kor. 13:5) Jej aikwij kile karkar ko ar renana im kajimeiki. Ñõn kõtõbrak men in, Jeova ear letok ñõn kij elõñ kein jibõñ ko.

Paul ear je: “Bwe nan in Anij ej mour im jerbal wõt, im ekõñ jen jabrewõt jãji ruo mejen, im ej wie im bukwe an armij im jitõb, im mokwõj ko im nononmej, im e mõkõj an kili lemnok ko im bebe ko an buru.” (Hib. 4:​12) Ennan eo an Anij kar je ilo Baibel eo emaroñ lap an jelet mour ko ar. Ilo nan in kõkkar, ej tõbar nononmej ko ijo emũlõltata ilo dri ko. Ej kwalok kin lemnok ko ar im unin jej kõmõni men ko. Ej kwalok kin kain armij rot kij iloa ñe keiri ñõn wãwen eo armij rej lo kij ak wãwen lemnok eo ar kin kij mõke. Nan eo an Anij ej lukkun jibõñ kij ñõn kile likjõp ko ar!

Ñe jej kõkãl juõn em emor, ejabwe ñõn baj kõkãl wõt men ko rejorrãn. Ilo ar jela kin ta eo ej kõmõn bwe en walok jorran ko, men in enaj jibõñ kij ñõn bõk buñten ne ko ñõn bõprae an bar walok jorran ko. Ilo ejja wãwen in wõt, ñe jej kile karkar ko ar renana im bareinwõt unin air walok emaroñ jibõñ kij kamarmire mõjino ko ar. Elõñ men ko remaroñ jelet karkar ko karkarir. Jet iair ej joñõn utiejir im joñõn ar mweie, men ko rej walok ibelakir, mõnit ko ar, ro jemer im jiner, ro mõtar, im kabuñ eo ar. Bareinwõt pija ko jej aluiji ekoba menin kamõnõnõ ko rej jelet karkar ko karkarir. Ñe jej kile men ko rej jelet karkarir ilo juõn wãwen enana, enaj jibõñ kij ñõn kadriklok air jelet kij.

Elikin ar etale kij mõke, ekkã ar ba, ‘Eindrein ña.’ Wãwen lemnok in ejjab jime. Ilo an Paul konono kin ro ilo congregation eo ilo Korint me rar dri lũñ, dri karek, man ro rej mijkaieik dron, im ro eierlok wõt, ear ba: “Im jet iami kar eirwõt: a emwij kwoli kom, . . . ilo Jitõbõn ar Anij.” (1 Kor. 6:​9-​11) Kin jibõñ eo jen jitõb kwojarjar eo an Jeova, kij bareinwõt jemaroñ lo tõbrõk ilo ar kõmõn oktõk ko rej menin aikwij.

Lemnok kin wanjoñok eo an juõn eman etan Marcos,a eo ej jokwe ilo ailiñ in Bilibin. Ilo an konono kin wãwen an kar ridtolok, Marcos ear ba: “Ien otemjej jema im jinõ rar akwail. Eñin unin ke ear 19 aõ yiõ iar jumaik ir.” Rar jela kajen Marcos einwõt juõn eo ej ikkure kin jããn, kwot, im kajerbal bu ñõn bõk jããn ak mweiuk ko jen armij. E im ro jet mõtõn rar karõk ñõn bõk juõn balun ilo air kamijak armij ro rej uwe, ak ear jab tõbrõk. Marcos ear wõnmanlok wõt kin mõnit ko an renana elikin an kar mare. Ilo jemlokõn ear luji aolepen men ko an kin an ikkure kin jããn. Ejjabto tokelik, Marcos ear kobalok iben lio belen ñõn katak Baibel iben dri Kennan ro an Jeova. Ilo jinoin, ear eñjake bwe ejjab tellokin ñõn erom juõn ian dri Kennan ro an Jeova. Bõtab, ke ear jerbale men ko ear katak kaki im ber ilo kwelok ko, men in ear jibõñ Marcos ñõn jolok mõnit ko an mokta. Kiõ ej juõn Kristian eo emwij an baptais me ej ekkeini an katakin ro jet kin wãwen air maroñ bareinwõt kõmõn oktõk ko ilo mour ko air.

Kwokõnan bwe Kwon Armij Rot?

Ta oktõk ko jej aikwij in kõmõni ñõn kakõmõnmõnlok karkar ko karkarir einwõt juõn Kristian? Paul ear kakabileklek dri Kristian ro: “Komin bareinwõt julok men kein otemjej; illu, buru karu, illu aitok, konono nae, im nan ko retton jen loemi: Komin jab riõp ñõn dron, bwe kom ar wutik armij eo mokta kab jerbal ko an.” Ej wõnmanlok wõt im ba: “Kõnõk armij ekãl, kõkãl e ñõn jelalokjen im ilo wãwen Eo e ar kõmõnmõne.”​—Kol. 3:​8-​10.

Inem mejenkajik eo ar moktata, ej ñõn wutik armij eo mokta im kõnõk armij eo ekãl. Ta karkar ko jej aikwij ejaaki ñõn kõtõbrak men in? Paul ear ba:“Komin kõnõk buruen tiriamo, joij, etã buru, inimõn, jejanunoij; Im komin meamiwõr ñõn dron, im jeorilok nana jen dron, elañe iben jabrewõt iami eor ruõn iben bar juõn; im einwõt [Jeova, NW] e ar jeorilok ami nana, en ein drein bareinwõt ami kõmõn ñõn dron: Ak ion men kein otemjej komin kõnõk yokwe, eo ken lukwõj ej kowãppemi.”(Kol. 3:​12-​14) Ilo ar kate kij ñõn ejaake karkar kein enaj jibõñ kij bwe en laplok ar “jitenburu iben Jeova, im bareinwõt iben armij ro.” (1 Sam. 2:​26) Ke Jisõs ear ber ion lõl, ear kwalok aolep karkar ko karkarin Anij. Ilo ar katak im kajeoñwe joñok eo an, jemaroñ einwõt Kraist im ilo wãwen in enaj emõnlok ar “dri kajeoñwe Anij.”​—Ep. 5:​1, 2.

Bar juõn wãwen ñõn kile oktõk ko jej aikwij in kõmõni ej ikijen ar katak kin karkar ko karkarin armij ro ilo Baibel, im lale kar ta eo ear kõmõn bwe en aibujuij iman mejen armij ro im ta eo ear jab. Ñõn wanjoñok, lemnok kin Josep, eo nejin Jekõb me ej jeban bwij eo an. Meñe ear iion elõñ wãwen ko renana, Josep ear drebij wõt juõn lemnok emõn im an aibujuij iloa. (Jen. 45:​1-​15) Ilo okõtõn, Absalom, nejin Kiñ Devid, ear einwõt ñe ear itoklimo kin armij ro im kar nebar e kin an wõleo. Ak ilo mol, ear juõn dri ketak im dri uror. (2 Sam. 13:28, 29; 14:25; 15:​1-​12) Joij etao im an juõn dreo ak wõleo ejjab kõmõn bwe en lukkun aibujuij iman mejen armij ro.

Jemaroñ Lo Tõbrõk

Ñõn kakõmõnmõnlok karkar ko karkarir im bwe jen aibujuij iman mejen Anij, jej aikwij etale kain armij rot kij iloa. (1 Pit. 3:​3, 4) Ñõn ar kõmõn oktõk ko ilo karkarir, jej aikwij kile karkar ko ar renana im unin air walok, im bareinwõt ilo ar ejaaki karkar ko karkarin Anij iber. Jemaroñ ke liki bwe jenaj lo tõbrõk ilo ar kate kij ñõn kõmõn oktõk ko?

Aet, kin jibõñ eo jen Jeova jemaroñ kõmõn oktõk ko rej menin aikwij. Einwõt dri jeje sam, jemaroñ jar: “Kwon kõmõnmõn buruõ erreo ilo ña, O Anij; im kõkãl aõ ejime iloan.” (Sam 51:10) Jemaroñ kajitõk bwe jitõb eo an Anij en kamakit kij ñõn kalaplok kõnan eo ar ñõn ukot mour ko ar ekkar ñõn ankil an. Emol, jemaroñ lo tõbrõk ilo ar erom armij ro me raibujuij iman mejen Jeova!

[Kamelele Eo Itulal]

[Pija eo ilo peij 4]

Ebwe ke ñõn unoik ilikin mwin ejorran?

[Pija eo ilo peij 5]

Karkar ko karkarõm rej einwõt ke karkar ko an Kraist?