“Komin Kõnõk Armij Ekal”
1 Christian ro rej kamolol kin air jelã mol eo! Jar katak kin wãwen eo jej aikwij mour bwe jen bõprae ial eo an ro rej bed ilo lal in. Kin air “drua maijet jen mour an Anij,” rej bed ilo “marok ilo air lolãtãt.” (Ep. 4:18) Kar katakin kij bwe jen kõkãl ad lolãtãt jen wãwen lemnak eo an lal in ilo ad wutik armij eo emor im kõnak eo ekãl.—Ep. 4:22-24.
2 Kadkad ko remor rej tellok ñan juõn ial ej ñan mour ekajookok, im walok ilo tokjen mour etton im mij. Kin men in, jej kir jabdewõt armij eo ej mõnõnõ in roñjake ennan in Ailiñ eo ñan jolok illu, buru kadu, nana, konono nae, im nan ko retton. Ro rekõnan bwe Anij en buñburuen ibbeir rej aikwij wutik ilo eyu armij eo emor—ilo wãwen eo rej wutik juõn nuknuk etton.—Kol. 3:8, 9.
3 Juõn Kajur Ekãl Ej Kamakit Lemnak eo: Kõnak armij eo ekãl ej kitibuj ad kõkãl kajur eo ej kamakit lemnak ko ad. (Ep. 4:23) Ewi wãwen juõn armij ej kõkãl kajur eo, ak wãwen an lemnak, bwe en etal ilo ial eo ejimwe? Men in ej kõmmane ilo an keini im nikniki an katak Nan in Anij im kalmenlokjen kin ta melelen. Inem, juõn wãwen lemnak ekãl ej eddeklok, im armij eo ej lemnak ilo wãwen Anij im Christ rej lemnak kin men ko. Wãwen mour an juõn armij ej oktak ñe ej kõnak kadkad ko relõñ kadkadin Christ, ekoba tiriamokake, joij, ettã buru, inemõn, meanwõd, im yokwe.—Kol. 3:10, 12-14.
4 Ilo ad kõnak armij eo ekãl, jej kajenolok kij jen lal in. Wãwen mour eo ad ej kõmman bwe jen einjuõn. Jej konono mol im kajerbal nan ko remõn ñan kalek ro jet. Jej debdebiji ad illu, airwaro, konono nae, im nana otemjej im kõkãl men kein kin kadkad ko rewãnik im kwojarjar. Jej le jen men eo rej aikwiji jen kij ñe jej jolok bwid. Aolep men kein buruõd ej mõnõnõ in kõmmani.—Ep. 4:25-32.
5 Jab wutiki armij eo ekãl. Jejjab maroñ karejar ñan Jehovah elañe e jako. Kõtlok bwe en kareel armij ñan mol eo, im kõtlok bwe en kaibujuij Jehovah, Ri Kõmanmõn eo kin kadkad ko ad rekãl im aibujuij.—Ep. 4:24.