Mour in Drio ion Lõl—Ej ke Juõn Kejatrikrik Jisõs Ear Katakin Kake?
“[Anij] E naj kõmõraik jen mejeir dren in kemjãlãl otemjej, im e naj ejelok bar mij.”—REV. 21:4.
1, 2. Ewi wãwen ar jela bwe ear or iben elõñ dri Ju ro ilo ran ko an Jisõs kejatrikrik eo ñõn mour in drio ion lõl?
JUÕN likao emweie im buñbuñ ear etõrlok ñõn iben Jisõs im bukwelõlõ iman, im ear kajitõk: “Dri Kaki emõn, ta eo in kõmõn bwe en aõ jolit mour in drio?” (Mark 10:17) Likao eo ear kajitõk kin ewi wãwen emaroñ jolit mour in drio, ak ear konono kin mour in drio ilõñ ke ak ilõl? Einwõt emwij ar kar etale ilo katak eo lok iman, ilo elõñ buki yiõ ko mokta, Anij ear lelok ñõn dri Ju ro kejatrikrik eo ñõn jerkakbiji im ñõn mour in drio ion lõl. Im ear or wõt iben elõñ dri Ju ro kejatrikrik in ilo ien ko an Jisõs.
2 Kõra eo mõtõn Jisõs, Marta, ear lemnok kin jerkakbiji eo ñõn mour ion lõl ke ear konono kin leo jein im jãtin emij: “I jela e naj bar jerkak ilo jerkakbiji eo ilo ran eliktata.” (Jon 11:24) Emol, dri Saddusi ro ilo ien eo rar jab tõmak ilo jerkakbiji. (Mark 12:18) Bõtab, ilo buk eo an George Foot Moore kin kabuñ eo an dri Ju ro ilo ran ko an dri jilik ro, ej ba: “Jeje ko . . . iomin jibuki ak rubuki yiõ ko mokta jen an kar Jisõs itok ñõn lõl rej kwalok bwe elõñ rar tõmak bwe ilo juõn ien ejejit, ro rar mij ilo ien ko mokta renaj jerkakbiji im bar mour ijin ion lõl.” Likao eo emweie me ear kebake Jisõs ear kõnan bõk mour in drio ion lõl.
3. Ta kajitõk ko jenaj etali ilo katak in?
3 Ranin, elõñ kabuñ ko im dri meletlet ro rej etale Baibel eo rej ba bwe Jisõs ear jab katakin kin kejatrikrik eo ñõn mour in drio ion lõl. Enañin aolep armij ro rej kejatrikrik bwe elikin air mij renaj mour manlok wõt ilo juõn jikin jitõb ro. Inem ñe ro rej riiti Jeje ko ilo kajin Grik rej lo nan kein “mour in drio,” elõñ rej lemnok bwe ej jitõñlok ñõn mour ilõñ. Emol ke men in? Ta melelen nan ko an Jisõs ke ear konono kin mour in drio? Ta eo dri kalor ro an rar tõmak kake? Jeje ko ilo kajin Grik rej ke katakin bwe jemaroñ mour in drio ion lõl?
Mour in Drio “ilo Ebeben eo Ekãl”
4. Ta men ko renaj walok “ilo ebeben eo ekãl”?
4 Baibel eo ej katakin bwe Kristian dri kabit ro renaj jerkakbiji im iroij ion armij ro ion lõl jen ilõñ. (Luk 12:32; Rev. 5:9, 10; 14:1-3) Bõtab ke Jisõs ear konono kin mour in drio, ejjab aolep ien ear lemnok kin kumi in. Lemnok kin men eo ear ba ñõn dri kalor ro an elikin an kar likao eo emweie ilok ilo buromõj kin nan in kir eo ñõn an lelok aolepen men ko mweien ñõn ro rejeramel im lor Kraist. (Mat. 19:28, 29, UBS) Jisõs ear jiroñ dri jilik ro an bwe renaj ian ro rej iroij einwõt kiñ im ekajete “bwij ko joñoul ruo bwijjin Israel,” melelen, aolep armij ro ion lõl ijellokin wõt ro im renaj iroij ilõñ. (1 Kor. 6:2) Ear bareinwõt konono kin jinekjij eo ñõn “jabdrewõt” eo ej lor e. Armij rein renaj bareinwõt jolit “mour indrio.” Aolep men kein renaj walok “ilo ebeben eo ekãl.”
5. Ewi wãwen kwonaj kemelele kin “ebeben eo ekãl”?
5 Ta melelen nan ko an Jisõs ke ear konono kin “ebeben eo ekãl”? Ilo ukok in Baibel eo etan The Bible—An American Translation, ear ukot nan kein einwõt “lõl eo ekãl.” Im ilo ukok in Baibel eo The Jerusalem Bible, kar ukote “ñe naj kõmõn men otemjej bwe ren kãl,” im ilo ukok in Baibel eo juõn etan The Holy Bible—New International Version ej ukot nan kein einwõt “ñe naj kõkãl men otemjej.” Kinke Jisõs ear jab kemelele kin nan kein, ealikar ear konono kin juõn men me dri Ju ro rar kejatrikrik kake iomin elõñ buki yiõ ko. Rar tõmak bwe naj bar kõkãle wãwen ko ilo lõl in bwe en oktõk im einwõt kar jikin kallip in Iden mokta jen an kar Adam im Iv jerawiwi. Ebeben eo ekãl enaj kajejit kalimur eo an Anij ñõn kõmõn “lõñ ko rekãl im lõl ekãl.”—Ais. 65:17.
6. Ta eo wanjoñok eo kin s̃ip ko im got ko rej katakin kij kin kejatrikrik eo kin mour in drio?
6 Jisõs ear bareinwõt konono kin mour in drio ke ear kwalok katak eo an kin jemlokõn jukjuk im ber in. (Mat. 24:1-3) Ear ba: “A ñe Nejin armij e naj itok ilo wuj eo An, im enjel ro otemjej iben, ien eo E naj jijõt ion tron in wuj eo An. Im naj kokweloktok dri ailiñ otemjej iman mejen; im E naj kijbil ir jen dron, einwõt s̃eperd ej kijbil s̃ip ko jen goat ko.” Ro rej bõk ekajet “re naj ilok ñõn iñtan in drio: a ro remõn ñõn mour in drio.” “Ro remõn” me rej bõk mour in drio rej ro im rar tiljek in rejetake dri kabit ro ‘jãtin’ Kraist. (Mat. 25:31-34, 40, 41, 45, 46) Kinke kar kãlet dri kabit ro bwe ren iroij ro ilo Ailiñ eo ilõñ, inem “ro remõn” rej ro ion lõl me renaj mour iomin iroij eo an Ailiñ eo. Baibel eo ej kanan: “[Kiñ eo an Jeova] E naj bareinwõt iroij jen lomalo ñõn lomalo, im jen river eo ñõn jemlokõn ko jemlokõn lõl.” (Sam 72:8) Armij ro enaj iroij ioir renaj lõñliñ ilo air mour in drio ion lõl.
Ta eo Gospel eo an Jon Ej Kwalok Kake?
7, 8. Ta kejatrikrik ko ruo Jisõs ear konono kaki ñõn Nikodimõs?
7 Einwõt kar je ilo Gospel ko an Matu, Mark, im Luk, Jisõs ear kajerbal nan kein “mour in drio” ilo eon ko me pãrokõrããp ko mokta rar konono kaki. Ilo Gospel eo an Jon ej eliji nan ko an Jisõs kin mour in drio enañin 17 alen. Jen etale jet ian ien kein ñõn lale ta eo Jisõs ear konono kake kin kejatrikrik eo ñõn mour in drio ion lõl.
8 Ekkar ñõn Jon, jinoin an kar Jisõs konono kin mour in drio kar iben dri Parisi eo etan Nikodimõs. Ear jiroñ Nikodimõs: “Elañe armij e jab lotak jen dren im Jitõb, e jab maroñ dreloñ ilo ailiñ in Anij.” Ak armij ro rej dreloñ ilo Ailiñ in lõñ rej aikwij “bar lotak.” (Jon 3:3-5) Ak ejjab men eo drein Jisõs ear konono kake. Tokelik ear konono kin kejatrikrik eo me ebellok ñõn aolep armij ro. (Riit Jon 3:16.) Jisõs ear konono kin kejatrikrik eo kin mour in drio ilõñ ñõn dri kalor ro emwij kãlet ir im mour ion lõl ñõn armij ro jet.
9. Ta kejatrikrik eo Jisõs ear konono kake iben kõra in Sameria eo?
9 Elikin an Jisõs konono iben Nikodimõs ilo Jerusalem, ear etal ñõn Galili. Ilo ial eo an, ear iion juõn kõra ilo aibij lõl eo an Jekõb me ebak ñõn jikin kwelok in Saikar ilo Sameria. Ear jiroñ kõra eo: “A jabrewõt eo ej irak dren eo I naj lelok ñõn e, e jamin bar maro in drio: a dren eo I naj lelok ñõn e, e naj aibij ilo e im naj tortok ñõn mour in drio.” (Jon 4:5, 6, 14) Dren in ej jutõk kin menin letok ko an Anij ñõn kõmõn bwe aolep armij ren bar bõk mour in drio, ekoba ro renaj jokwe ion lõl. Ilo buk in Reveles̃õn, ej kwalok bwe Anij mõke ej ba: “I naj lelok ñõn eo ej maro jen unin dren in mour ejij wõnan.” (Rev. 21:5, 6; 22:17) Inem, Jisõs ear konono ñõn kõra in Sameria eo kin mour in drio, jab ñõn dri kabit ro wõt me renaj iroij ilõñ ak bareinwõt ñõn armij ro eor air kejatrikrik ñõn mour in drio ion lõl.
10. Elikin an kar Jisõs kemour juõn eman iturin lwe eo ilo Betesda, ta eo ear ba ñõn ro rar jumae e kin mour in drio?
10 Ilo yiõ eo tok juõn, Jisõs ear bar ber ilo Jerusalem. Ijo ear kejmour juõn armij enañinmij ilo lwe eo ilo Betesda. Ñõn dri Ju ro rar kananaik men eo ear kõmõne, Jisõs ear kemelele bwe “Nejin e jab mõke maroñ kõmõnmõn jabrewõt, a men eo Ej lo Jemen kõmõne.” Elikin an ba ñõn ir bwe Jemen “Ej likit ekajet otemjej ñõn Nejin,” Jisõs ear ba: “Eo ej roñjake Aõ in nan, im liki Eo e ar jilkintok Iõ, an mour in drio.” Jisõs ear bareinwõt ba: “Bwe auõ ej itok, ilo eo ro otemjej rej ber ilo lũp ko, re naj roñ ainiken [Nejin armij], im naj drioijtok; ro r’ar kõmõn emõn, ñõn jerkakbiji in mour: im ro r’ar kõmõnmõn nana, ñõn jerkakbiji in ekajet.” (Jon 5:1-9, 19, 22, 24-29) Jisõs ear ba ñõn dri Ju ro rar matõrtõr e bwe Anij ear kãlet e bwe en kajejit kitien kejatrikrik eo an dri Ju ro ñõn mour in drio ion lõl im enaj kõmõne men in ikijen an kejerkakbiji ro remij.
11. Ewi wãwen ar jela bwe kejatrikrik eo kin mour in drio ion lõl ej ber ilo nan ko an Jisõs ilo Jon 6:48-51?
11 Ilo Galili, elõñ tausan armij ro rar jino air lor Jisõs, rein rej ro im rar kõnan bõk bred eo Jisõs ear lelok ñõn ir ilo kabwilõñlõñ. Jisõs ear konono ibeir kin bar juõn kain bred, “bred in mour.” (Riit Jon 6:40, 48-51.) Ear ba, “bred eo I naj lewoj e kõniekiõ.” Jisõs ear lelok mour eo an kin ro renaj iroij iben ilo Ailiñ in lõñ im bareinwõt kin armij ro rej tellokir ñõn bõk mour in drio ion “lõl.” “Elañe jabrewõt armij ej mõña jen bred in,” melelen, ilo an jerbale tõmak ilo katok in binmour eo an Jisõs, enaj jolit mour in drio. Ejelok berre bwe nan ko an Jisõs kin mour in drio ear koba kejatrikrik eo eto an dri Ju ro kejatrikrik kake kin “mour in drio” ion lõl iomin iroij eo an Messaia eo.
12. Ta kejatrikrik eo Jisõs ear konono kake ke ear ba ñõn dri jumae ro bwe enaj ‘lelok mour in drio ñõn s̃ip ro an’?
12 Tokelik, ilo Kwojkwoj in Lelok eo ilo Jerusalem, Jisõs ear ba ñõn dri jumae ro an: “Kom jab tõmak bwe kom jab ian Aõ s̃ip, einwõt I ar ba ñõn kom. Aõ s̃ip rej roñjake ainikiõ, im I jela ir, im rej lor Iõ: Im ij lelok ñõn ir mour in drio.” (Jon 10:26-28) Jisõs ear ke konono wõt kin mour in drio ilõñ, ak ear ke bar lemnok kin mour in drio ilo paredais eo ion lõl? Jisõs ear kainemõn dri kalor ro an kin nan kein: “Komin jab mijõk; bwe ebuñburuen Jememiuij kin An lewoj ailiñ eo ñõn kom.” (Luk 12:32) Bõtab ilo ejja ien eo wõt ear walok Kwojkwoj in Lelok eo, Jisõs ear ba: “Im bar jet Aõ s̃ip, re jab jen worwor in: emõn bareinwõt In añintok ir.” (Jon 10:16) Kin men in, ke Jisõs ear konono iben dri jumae ro, nan ko an rar kitibuj kejatrikrik eo kin mour ilõñ ñõn “bwij erik” im kejatrikrik eo kin mour in drio ion lõl ñõn elõñ million ‘s̃ip ro jet.’
Juõn Kejatrikrik Kar Jab Aikwij Kemelele Kake
13. Ta melelen nan kein an Jisõs ke ear ba: “Kwonaj ber iba ilo Paredais”?
13 Ilo ien eo ear iñtan ion alal eo, Jisõs ear kwalok ilo alikar kin kejatrikrik eo an armij ro. Juõn ian dri nana ro me ear toto iturin Jisõs ear kajitõk iben bwe en kememej e ñe Jisõs enaj ber ilo Ailiñ eo an. Inem Jisõs ear kalimuri e im ba: “Emol Ij ba ñõn yuk ranin, kwonaj ber iba ilo paredais.” (Luk 23:43, NW) Kin an alikar bwe eman in ear juõn dri Ju, Jisõs ear jab aikwij kemeleleik e kin Paredais eo. Lein ear jela kin kejatrikrik eo ñõn mour in drio ion lõl ilo jukjuk im ber eo ej itok.
14. (a) Ta eo ej kwalok bwe kejatrikrik eo kin mour ilõñ ear bin ñõn an dri jilik ro melele kake? (b) Ñãt eo dri kalor ro an Jisõs rar jino melele kin kejatrikrik eo ñõn mour ilõñ?
14 Bõtab, men eo Jisõs ear aikwij kemelele kake kar kin mour in drio ilõñ. Ke ear konono iben dri kalor ro an bwe enaj ilok ñõn lõñ ñõn kapoj ijo jikiir, rar jab melele. (Riit Jon 14:2-5.) Ear ba ñõn ir, “Elõñ men ko iba bwe In ba ñõn kom, a kom jab maroñ in bõki kiõ. A ñe Eo, Jitõb õn mol, Ej itok, E naj tel kom ñõn loan mol otemjej.” (Jon 16:12, 13) Bõtab elikin Pentekost ilo yiõ eo 33, ke kar kabit dri kalor ro kin jitõb kwojarjar eo an Anij ñõn air kiñ, rej kab kile bwe tron ko air renaj ber ilõñ. (1 Kor. 15:49; Kol. 1:5; 1 Pit. 1:3, 4) Kejatrikrik eo ñõn jolit ailiñ in lõñ ear juõn kemelele ekãl ñõn ir, im ear jino lap air kwalok kake ilo letter ko ilo Jeje ko ilo kajin Grik. Ak letter kein rej ke kwalok ilo alikar kin kejatrikrik eo an armij ro kin mour in drio ion lõl?
Ta eo Letter ko Kar Kakõrmoli Rej Ba?
15, 16. Ewi wãwen letter eo ñõn dri Hibru ro im nan ko an Piter rej kwalok kin kejatrikrik eo kin mour in drio ion lõl?
15 Ilo letter eo an ñõn dri Hibru ro, dri jilik Paul ear ãñiñin dri tõmak ro mõtõn einwõt “jãtiõ rokwojarjar, dri bõk mõtõn kir jen lõñ.” Bõtab, ear bareinwõt ba bwe Anij ear kairoij Jisõs ion “lõl [eo] e naj itok.” (Hib. 2:3, 5; 3:1) Ilo Jeje ko ilo kajin Grik, nan eo rar ukot “lõl” jene ien otemjej ej jitõñlok ñõn lõl eo me armij ro rej jokwe ie. Kin men in, “lõl [eo] e naj itok” ej jitõñlok ñõn jukjuk im ber eo ion lõl iomin iroij eo an Jisõs Kraist. Ilo ien eo Jisõs enaj kajejit kitien kalimur eo an Anij: “Ro remõn re naj jolit ene eo, im jokwe iloan ñõn in drio.”—Sam 37:29.
16 Kar bareinwõt kakõrmol dri jilik Piter ñõn jeje kin ilju im jeklaj eo an armij ro. Ear je: “A lõñ ko kiõ im lõl, kin nan eo, kejbãroki ñõn kijeek ilo ran in ekajet im kokkure armij renana.” (2 Pit. 3:7) Ta eo enaj bõk jikin kien ko reutiej ion lõl im jukjuk im ber in armij ro renana kiõ? (Riit 2 Piter 3:13.) “Lõñ ko rekal” eo ej melelen Ailiñ eo an Anij im juõn “lõl ekal” me ej jitõñlok ñõn juõn jukjuk im ber ewãnik in dri kabuñ ro remol, renaj bõk jikiir.
17. Ewi wãwen Reveles̃õn 21:1-4 ej kemelele kin kejatrikrik eo an armij ro?
17 Vis̃õn eo ilo buk eo eliktata ilo Baibel kin armij ro emwij kajeblak ir ñõn mour wãppen eo ej kalõñliñ kij. (Riit Reveles̃õn 21:1-4.) Eñin kar kejatrikrik eo an dri tõmak ro jen ke armij eo moktata ear jerawiwi im luji mour wãppen ilo jikin kallip in Iden. Armij ro rewãnik renaj mour ñõn in drio ilo Paredais ion lõl im rejamin ridtolok. Eor juõn berber ebin kin kejatrikrik in ilo Jeje ko ilo kajin Hibru im Grik, im ej wõnmanlok wõt im kakajur dri korijer ro retiljek an Jeova tok ñõn ranin.—Rev. 22:1, 2.
Kwomaroñ ke Kemelele?
• Ta melelen nan ko an Jisõs ke ear konono kin “ebeben eo ekãl”?
• Ta eo Jisõs ear konono kake iben Nikodimõs?
• Ta eo Jisõs ear kalimuri dri nana eo ear toto iturin?
• Ewi wãwen letter eo ñõn dri Hibru ro im nan ko an Piter rej kamol kejatrikrik eo kin mour in drio ion lõl?
[Pija eo ilo peij 8]
Ro rej einwõt s̃ip renaj bõk mour in drio ion lõl
[Pija eo ilo peij 10]
Jisõs ear konono ñõn ro jet kin mour in drio