‘Ien eo Ej Karõke’ Ej Ebak

DRI jilik ro an Jisõs rar einwõt Habakkuk ilo air kar kijorur in lo an jemlok iñtan. Elikin air kar katak kin ta eo Ailiñ eo an Anij enaj kõmõne ñõn kamarmiri aolep jorran ko rej walok ilo lõl in, rar kajitõk iben Jisõs: “Ñãt men kein re naj walok? Im ta eo kakõlõn Am naj itok [ilo kajur in Ailiñ] im lokõn lõl?” (Matu 24:3) Jisõs ear uake ir im ba bwe Jeova wõt ejela kin ien eo Ailiñ eo enaj bõk an kajur ñõn an iroij ion aolepen lõl in. (Matu 24:36; Mark 13:32) Bõtab, Jisõs im ro jet rar kanan kin jet ian men ko renaj walok ñõn kalikar bwe ien eo ej ebak.​—Lale box eo itu anbijmaroñ.

Ejjab mol ke bwe men kein aolep rej walok ran otemjej? Jisõs ear bareinwõt kanan bwe jerbal in katakin eo enaj jededlok iaolepen lõl. Ear ba: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.”​—Matu 24:14.

Inem eñin men eo ej walok ranin. Dri Kennan ro an Jeova rej kõmõne jerbal in ranin. Ilo 236 ailiñ ko, elõñlok jen jiljilimjuõn million Dri Kennan ro an Jeova rej kwalok ñõn armij kin ta eo Ailiñ eo enaj kõmõne, im rej jibõñ ir ñõn air mour ekkar ñõn kien ko rewãnik an Anij, eo me kõnan eo an ej bwe iñtan en joko ñõn indrio. Kwon wõnmanlok wõt im katak kin Ailiñ eo an Anij, im kwonaj bõk jerammõn eo ñõn mour ilo juõn lõl ejelok iñtan ie ñõn indrio.

[Box ilo peij 16]

Eon ko Me Rej Jitõñlok ñõn Ran ko Eliktata

MATU 24:6, 7; REVELES̃ÕN 6:4

• Tõrinae ko rejañin kar einwõt mokta

MATU 24:7; MARK 13:8

• Makõtkit lõl ko relap

• Ñitta

LUK 21:11; REVELES̃ÕN 6:8

• Nañinmij ko relap

MATU 24:12

• Laplok nana ak kõtare kien

• Yokwe an armij enaj mololok

REVELES̃ÕN 11:18

• Armij renaj kokkure lõl

2 TIMOTE 3:2

• Arõk mõnni

• Kiblia ñõn jemeir im jineir

• An armij yokwe ir mõke ellã jen joñõn

2 TIMOTE 3:3

• Jab yokwe ro nukiir

• Ro relej ilo air rupe kõtan armij

• Ro ejelok air kamanwa ak koutiej armij otemjej

• Laplok an armij drike emõn

2 TIMOTE 3:4

• Yokwe menin kabuñburueir elaplok jen Anij

2 TIMOTE 3:5

• Ro rej mone im etaouk armij im ba ir Kristian

MATU 24:​5, 11; MARK 13:6

• An lõñ dri kanan wan ro

MATU 24:9; LUK 21:12

• Naj matõrtõr ak kaiñtan Kristian ro remol

MATU 24:39

• Armij ro rejjab emakõt kin nan in kakkil ko ilo Baibel

[Kamelele in juõn pija ilo peij 16]

Ibelakin lõl in, Dri Kennan ro an Jeova rej katakin armij ro kin Ailiñ eo an Anij