Drebij Wõt Am Lõñliñ Iomin Ien ko Renana
“Ro otemjej rej liki [Jeova] ren lõñliñ; ren kelok kin lõñliñ in drio.”—SAM 5:11.
1, 2. (a) Ta jet ian men ko rej bõktok elap buromõj im inebata ranin? (b) Ijellokin abañ ko me rej jelet aolep, ta eo dri Kristian ro remol rej aikwij kijenmij kake?
DRI KENNAN RO AN JEOVA rej bareinwõt iion jorran ak abañ ko me rej jelet armij ro otemjej. Elõñ iair rar iion abañ ko ikijen koaroñ, tõrinae, im jab ekajet jime ko jet. Jorran ko relap einwõt lañ ko, makõtkit lõl, im men ko eierlok wõt, jeramel, nañinmij, im mij rej men ko me rej bõktok elap buromõj im inebata. Ear jejit nan ko an dri jilik Paul ke ear je: “Bwe je jela bwe aolepen men in kõmõn e mat im ñõr, im mat im iñtan ñõn ien in.” (Rom. 8:22) Jej bareinwõt iion tokjen ko renana kin jab wãppen eo ar. Einwõt Kiñ Devid, jemaroñ ba: “Bwir ko aõ r’ar kijone bõra. Einwõt inek erro rerrolok jen ña.”—Sam 38:4.
2 Ijellokin abañ ko me rej jelet aolep armij ro, dri Kristian ro remol, ilo kõkkar, rej inek alal in iñtan eo. (Luk 14:27) Aet, einwõt Jisõs, dri kalor ro an rar iion kijirãt im matõrtõr. (Mat. 10:22, 23; Jon 15:20; 16:2) Kin men in, ñõn ar lore Kraist ej aikwij ar lukkun kate kij im kijenmij wõt ilo ar kõtar jerammõn ko me renaj walok ilo jukjuk im ber eo ekãl.—Mat. 7:13, 14; Luk 13:24.
3. Ewi wãwen jejela bwe dri Kristian ro rejjab aikwij bõk juõn mour ekaiñtanan ñõn kabuñburuen Anij?
3 Men in ej ke melelen bwe dri Kristian ro remol rej jibarek juõn wãwen mour me ejelok lõñliñ im mõnõnõ ie? Mour eo ar ej aikwij ke ber wõt ilo buromõj ñõn ien eo enaj itok jemlokõn jukjuk im ber in? Alikar, Jeova ekõnan bwe jen mõnõnõ wõt ke jej kõtar an jejit kitien kalimur ko an. Elõñ alen, Baibel eo ej kwalok kin dri korijer ro remol einwõt armij ro remõnõnõ. (Riit Aiseia 65:13, 14.) Sam 5:11 ej ba: “Ro otemjej rej liki [Jeova] ren lõñliñ; ren kelok kin lõñliñ in drio.” Aet, meñe jej iion abañ ko, jemaroñ lo wõt lõñliñ, ainemõn, im mõnõnõ. Jen etale ewi wãwen Baibel eo emaroñ jibõñ kij ñõn jelmae abañ ko im lo wõt lõñliñ.
Jeova Ej Juõn “Anij E Mõnõnõ”
4. Ewi iñjake eo an Anij ñe juõn ej jumae iroij potata eo an?
4 Ñõn wanjoñok, jen etale mõk kin Jeova. Einwõt Anij eo Ekajur Potata, men otemjej ilõñ im ion lõl rej ber iomin maroñ eo an, im ejelok jabrewõt men ej aikwiji ak jabrewõt ñõn ber iben im jibõñ e. Bõtab, meñe ekajur otem kajur, Jeova emaroñ kar buromõj ke juõn ian jitõb ro nejin ear jumae e im erom Setan. Im tokelik emaroñ kar laplok an Anij buromõj ke enjel ro jet rar bar jumae e. Bareinwõt, lemnok kin joñõn an kar Anij metõk ke Adam im Iv, menin kõmõnmõn ko an remõntata ion lõl, rar karmijete. Jen ien eo, elõñ billion ro inen Adam im Iv rar jumae iroij potata eo an Jeova.—Rom. 3:23.
5. Ta men eo elaptata an kar kaburomõj Jeova?
5 Jumae eo me Setan ear jinoe ej wõnmanlok wõt ñõn ranin. Iomin 6,000 jima yiõ ko, Jeova ear lo an armij ro kõmõni jerbal ko rekoaroñ, lej, kabuñ ñõn ekjõp, im mour in ejej. (Jen. 6:5, 6, 11, 12) Bareinwõt, ear roñ nan in riõp im blaspim ko renana. Im jet ien dri korijer ro remol an Anij rar bareinwõt kõmõni men ko me rar kaburomõj e. Baibel eo ej kwalok kin juõn ien ke men in ear walok ilo an ba: “Elõñ alen air kabata nae E ilo ene jemaren, im kaburomõj E ilo ene rãrõk eo. Im r’ar bar oktõk im melejoñ Anij; im kakitõtõik Eo ekwojarjar an Israel.” (Sam 78:40, 41) Joñõn metõk eo me Jeova ej iñjake ñe armij ro an rej karmijeteik e, emol ekanuij lap. (Jerm. 3:1-10, UBS) Alikar, men ko renana rej walok, im men in ej lukkun kaburomõj Jeova.—Riit Aiseia 63:9, 10.
6. Ewi wãwen Anij ej jelmae wãwen ko rekaburomõjmõj?
6 Meñe eindrein, Jeova ear jab kõtlok bwe an metõk im buromõj ren kabwijrõk e jen an kamarmiri men ko renana rej walok. Ke ear jino walok abañ ko, Jeova ear mõkõj im bõk buñten ne ko ñõn kadriklok tokjen ko renana me rej itok jen men eo ear walok. Ear bareinwõt bõk buñten ne ko eto air jerbal bwe en jejit kitien karõk eo an ilo jemlokõn. Kin aolep buñten ne kein remõn ear kõmõni, Jeova ej reimanlok ñõn ien eo naj kamol an jime iroij potata eo an im ñõn jerammõn ko renaj walok ñõn dri korijer ro an retiljek. (Sam 104:31) Aet, jekron jete alen kar kwalok nan ko renana nae e, Jeova ej juõn “Anij e mõnõnõ” wõt.—1 Tim. 1:11; Sam 16:11.
7, 8. Ñe men ko rej oktõk im nana, ewi wãwen jemaroñ anõk Jeova?
7 Emol, jejjab maroñ keiri kij mõke ñõn Jeova ñe ej itok ñõn ar kamarmiri abañ ko. Meñe eindrein, jemaroñ anõk Jeova ñe jej jelmae wãwen ko rebin. Ej biktokid ñõn buromõj ñe wãwen ko jej iioni rej oktõk im nana, bõtab jejjab aikwij kõtlok bwe jen buromõj wõt. Kinke kar kõmõnmõn kij ilo nememen wõt Jeova, eor iber lolokjen im maroñ eo ñõn lemnok, im men in ej jibõñ kij ñõn etali abañ ko ar im bõk buñten ne ko remõn ilo jabrewõt ien jemaroñe.
8 Juõn men eaurõk me emaroñ jibõñ kij ñõn kijenmij kin abañ ko ilo mour ej ñõn ar kile bwe eor jet men ko me relap jen joñõn maroñ eo ar. Ilo ar inebata kin men kein, men in emaroñ kalaplok ar buromõj im kõmõn bwe jen luji lõñliñ ko me rej itok jen ar kobalok iben kabuñ eo emol. Elikin ar bõk buñten ne ko ñõn kamarmire abañ eo, emõn bwe jen jab lemnok kin abañ ko ar ak jen lemnok wõt kin jibarbar ko me eor tokjeir. Bwebwenato ko ilõl me rej berber ion Baibel eo rej kalikar kin men in.
Eaurõk ñõn Kwalok Kamanwa
9. Ewi wãwen Hanna ear kwalok kamanwa?
9 Lemnok kin joñok eo an Hanna, eo me ear erom jinen dri kanan Samuel. Ear lukkun buromõj kinke kar kajirere kake e kin an ewar. Jet ien, joñõn an kar Hanna lukkun buromõj, ear jõñ im jab mõña. (1 Sam. 1:2-7) Juõn ien ke Hanna ear etal ñõn tempel eo an Jeova, ear “kanuij buromõj ilo an, im e ar jõñ ñõn Jeova, im elap an jõñ.” (1 Sam. 1:10) Elikin an Hanna kwalok buruen ñõn Jeova, pris eo elap Ilai ear kebake e im ba: “Kwon ilok ilo ainemõn; im Anij in Israel en lewoj men in kajitõk eo kwar kajitõk iben.” (1 Sam. 1:17) Ilo ien in, Hanna ear kile bwe ear kõmõn joñõn wõt an maroñ bwe en or nejin. Men in ej kalikar bwe ear kwalok kamanwa. Inem ear “etal im e ar mõña; im turin mejen e ar jab bar buromõj.”—1 Sam. 1:18.
10. Ta lemnok eo ejime Paul ear kwaloke ke ear jab maroñ jolok abañ eo me ear iione?
10 Dri jilik Paul ear kwalok ejja lemnok eo wõt ke ear iion juõn abañ. Ear or an utame ilo enbwinin me ear lap an kaburomõj e im ear naetan, ‘juõn kãliklik ilo kõniekin.’ (2 Kor. 12:7) Jekron kain rõt utame eo ear or iben, Paul ear kõmõn joñõn wõt an maroñ bwe en ejmour jen nañinmij eo an ilo an jar ñõn Jeova bwe en kemour e. Ewi emakijkij in an kar Paul kajitõk iben Jeova kin men in? Jilu alen. Elikin alen eo kein kajilu, Anij ear kalikar ñõn Paul bwe ejamin kejmour ‘kãliklik eo ilo kõniekin’ ilo juõn wãwen ekabwilõñlõñ. Paul ear melele kin men in im ear kõmõn bwe en jerbal ñõn Jeova joñõn wõt an maroñ.—Riit 2 Dri Korint 12:8-10.
11. Ewi wãwen jar im akwelap rej jibõñ kij ñõn kijenmij iomin abañ ko?
11 Wanjoñok kein rejjab kwalok bwe jej aikwij bwijrõk jen ar jar ñõn Jeova kin abañ ko jej iioni. (Sam 86:7) Jen an eindrein, Nan eo an Anij ej rejañ kij: “Komin jab inebata kin jabrewõt; a ilo men otemjej kin jar im akwelap kab kamolol, kajitõk ko ami ren walok ñõn Anij.” Ewi wãwen Jeova enaj uaki kajitõk im akwelap rõt kein? Baibel eo ej wõnmanlok im ba: “Im ainemõn jen Anij, eo ej elã jen jela otemjej, e naj kejbãrok buruemi im lemnok ko ami ilo Kraist Jisõs.” (Pil. 4:6, 7) Emol, Jeova emaroñ jab mõkõj im jolok abañ eo ar, bõtab emaroñ uaki jar ko ar ilo an kejbãrok lemnok ko ar. Elikin ar jar kin abañ eo, jemaroñ kile bwe ekauwatata ñõn ar kõtlok bwe en lap ar inebata kin abañ ko.
Lo Lõñliñ ilo Am Kõmõnmõn Ankilan Anij
12. Ñe eto ar buromõj, etke emaroñ juõn men ekauwatata?
12 Jabõn Kennan Ko 24:10 ej ba: “Elañe kwoj kijelok ilo ran in jorran, inem erik wõt am kajur.” Bar juõn jabõn kennan ej ba: “Kin buromõj in buruen, emwij rupe an.” (Ken. 15:13) Jet dri Kristian ro rar buromõj ñõn joñõn eo me ear kabwijrõk ir jen air katak Baibel ibeir mõke im kalomõnlokjen kin Nan eo an Anij. Jar ko air rar oktõk im juõn mõntin bajjek wõt, im remaroñ kar kamõkelok iair jen dri tõmak ro jeir im jãtir. Alikar, emaroñ juõn men ekauwatata ñõn kij ñe eto ar buromõj.—Ken. 18:1, 14.
13. Ta jet ian makõtkit ko me remaroñ jibõñ kij ñõn jolok ar buromõj im kõmõn bwe jen lõñliñ?
13 Ijo turãjet, ilo ar bõk juõn lemnok ejime im emõn, men in enaj jibõñ kij ñõn lemnok wõt kin wãwen ko ilo mour eo ar me jemaroñ lo lõñliñ im mõnõnõ ie. Devid ear je: “I lõñliñ in kõmõnmõn ankil Am, O aõ Anij.” (Sam 40:8) Ñe men ko rej oktõk im nana ilo mour eo ar, jen jab kõtlok bwe men kein ren kabwijrõk kij jen ar niknik in kõmõni aolep makõtkit ko me rej ekkejellok iben kabuñ eo emol. Ilo mol, wãwen eo emõn ñõn ar anjo ion buromõj ej ñõn ar bõk kwonad ilo makõtkit ko rekamõnõnõ. Jeova ej jiroñ kij bwe jemaroñ lo lõñliñ im mõnõnõ ilo ar riit im etale Nan eo an ran otemjej. (Sam 1:1, 2; Jem. 1:25) Ilo ien kwelok ko an Kristian im jen Jeje ko Rekwojarjar, jej bõk “nan ko nan in joij” me remaroñ kõkãtõk kij im kalõñliñ buruer.—Ken. 12:25; 16:24.
14. Ta men eo Jeova ej kalimur kake im ej bõktok lõñliñ ñõn kij kiõ?
14 Anij ej letok elõñ un ko ñõn ar lõñliñ. Kalimur eo an bwe enaj lomoren kij ej unjen eo elap ñõn ar mõnõnõ. (Sam 13:5) Jejela bwe jekron ta eo ej walok ñõn kij kiõ, ilo jemlokõn, Anij enaj kejerammõn ro rej kate ir ñõn kabukot e. (Riit Ekklisiastis 8:12.) Ear emõn an dri kanan Habakkuk kwalok an tõmak kin men in ke ear je: “Jekdron ñe ejjelok leen wijki fig ko im ejjelok leen grape ko; Jekdron ñe ejjelok leen wijki olive ko im ejjelok wheat ilo jikin kallib ko; Im jekdron ñe sheep ko remij im ejjelok kobban worworin cow ko, ak inaj lõñliñ wõt im mõnõnõ, kinke Iroij Anij ej aõ ri lomor.”—Hab. 3:17, 18, UBS.
“Emõnõnõ ro dri Ailiñ Ñe Air Anij Jeova!”
15, 16. Ke jej kõtar jerammõn ko renaj walok ilju im jeklaj, kwalok jet ian menin letok ko an Anij me jemaroñ mõnõnõ kaki kiõ.
15 Ke jej kõtar ilju im jeklaj eo eaibujuij me ej ber iman, ej ankil an Jeova bwe jen mõnõnõ kin men ko remõn me ej litok ñõn kij. Baibel eo ej ba: “Ña I jela bwe ejelok men emõnlok ñõn [armij], jen bwe ren mõnõnõ, im bwe ren kõmõn emõn toõn air mour. Im bareinwõt, bwe jabrewõt armij en mõña im irak, im lõñliñ ilo tokjen aolepen jerbal eo an, eñin men in lelok jen Anij.” (Ekk. 3:12, 13) Ar “kõmõn emõn” ej kitibuj ar kõmõni jerbal ko remõn ñõn ro jet. Jisõs ear ba bwe elaplok mõnõnõ ilo lelok jen bõk. Jerbal ko rejoij me jej kwalok ñõn eo beled, ro nejir, ro jiner im jemer, im ro jet nukid rej bõktok elap lõñliñ. (Ken. 3:27) Ilo ar kwalok yokwe, karuwainene, im jeorlok bwir ko an dri tõmak ro jeer im jãter, men kein renaj bareinwõt bõktok elap lõñliñ, im ej kabuñburuen Jeova. (Gal. 6:10; Kol. 3:12-14; 1 Pit. 4:8, 9) Im ilo ar karmijeteik kij mõke ñõn kõtõbrõk ar jerbal in kwalok nan, men in enaj bõktok elap jerammõn ko.
16 Nan ko itulõñ me kar eliji jen buk in Ekklisiastis rej kwalok kin men ko ekkã ar mõnõnõ kaki ilo mour, einwõt mõña im irak. Aet, meñe ilo ien eo jej ber iomin melejoñ ko, jemaroñ lo lõñliñ ilo jabrewõt menin letok ko ilo kõniek me Jeova ear litoki. Men ko ejelok wõnair remaroñ bareinwõt bõktok elap mõnõnõ im lõñliñ ñõn kij, einwõt ñe jej lo tol ko reutiej, an aibujuij lañ ñe ej tulok al, an menin mour ko redrik ikkure iben dron, im men ko jet raibujuij ilo lõl in. Ilo ar kalomõnlokjen kin men kein, yokwe eo ar ñõn Jeova enaj laplok, bwe E eo ej dri Letok eo kin aolep men ko remõn.
17. Ta eo enaj kanemkwoj kij jen abañ ko, im ilo ar kõtar ien in, ta eo ej kainemõn kij?
17 Eliktata, yokwe eo ar ñõn Anij, ar bokake kien ko an, im ar tõmak ilo katok in binmour eo, men kein renaj kanemkwoj kij jen abañ ko rej waloktok jen ar jab wãppen im renaj tel kij ñõn lo lõñliñ eo ej indrio. (1 Jon 5:3) Mae ien eo, jej bõk kainemõn ilo ar jela bwe Jeova ejela kin aolep men ko me rej kaburomõj im kaiñtan kij. Devid ear je: “I naj lõñliñ im mõnõnõ ilo Am tiriamokake; bwe kw’ar lo aõ jorran: kw’ar jela iñtan ko aõ.” (Sam 31:7) Kin an Jeova yokwe kij, enaj lomoren kij jen abañ im iñtan ko.—Sam 34:19.
18. Etke elap an armij ro an Anij lõñliñ?
18 Ilo ar kõtar an jejit kitien kalimur ko an, jen kajeoñwe Jeova, Anij eo emõnõnõ. Jen jab kõtlok bwe iñjake ko rekabwerer ren bõprae kij jen ar wõnmanlok im kõmõne jerbal eo ar ñõn Anij. Ñe abañ ko rej walok, jen kõtlok bwe lolokjen im maroñ in lemnok eo ar ren tel kij. Jeova enaj jibõñ kij ñõn drebij iñjake ko ar im ñõn bõk jabrewõt buñten ne ko jej aikwiji ñõn kadriklok tokjen ko renana me rej waloktok jen jorran ko. Inem jen lõñliñ kin men ko remõn me rej itok jen e, men ko ilo jitõb im kõniek jimor. Ilo ar ber ebake Anij, jenaj lo lõñliñ kinke “emõnõnõ ro dri ailiñ ñe air Anij Jeova!”—Sam 144:15.
Ta Eo Kwar Katak Kake?
• Ñe jej kijenmij iomin wãwen ko rebin, ewi wãwen jemaroñ kajeoñwe Jeova?
• Ewi wãwen ar kwalok kamanwa enaj jibõñ kij ñõn kijenmij iomin wãwen ko rebin?
• Ilo ien ko rekaburomõjmõj, ewi wãwen jemaroñ lo lõñliñ ilo ar kõmõnmõn ankilan Anij?
[Pija ko ilo peij 16]
Jeova ej buromõj kin men ko renana rej walok
[Credit Line]
© G.M.B. Akash/Panos Pija ko
[Pija ko ilo peij 18]
Jeova ear letok ñõn kij men ko jej aikwiji ñõn drebij wõt ar lõñliñ