Juõn Kein Jibõñ Jodrikdrik ro ñõn Kememej Dri Kõmõnmõn eo Air
ENAÑIN 3,000 yiõ ko remotlok dri meletlet eo Solomon ear je nan kein, “kwon bareinwõt kememej Eo Dri Kõmõnmõn yuk ilo ran ko ñe emõn ridtõm.” (Ekk. 12:1) Kiõ ebar or juõn kein jibõñ Kristian jodrikdrik ro ñõn air kõmõne men in. Buk eo etan, Kajitõk ko Jodrikdrik Ro Rej Kajitõk—Uak ko Rej Jerbal,a Volume 2, eo rar kwaloke ilo kar kwelok eo elap me ear walok ilo belakin lõlin ilo 2008 ñõn 2009 im etan, “Jitõbõn Anij En Tel Kij.”
Ilo jinoin buk in eor juõn letter jen Kumi eo Ej Tel Dri Kennan ro an Jeova ñõn jodrikdrik ro. Ilo juõn ian mõtõn ko ilo letter in ej ba: “Kimij lukkun jar im kejatrikrik bwe ennan ko ilo buk in renaj jibõñ yuk ñõn am jutõk bin iomin ijjibed im kabo ko me jodrikdrik ro ranin rej jelmae, im buk in enaj kwalok ñõn yuk kin ewi wãwen kwomaroñ kõmõn bebe ko im rej errã iben ankilan Anij.”
Emol bwe ro jemen im jinen rej kõnan lale im katakin ajiri ro nejir “ilo kaje im kowe an Iroij.” (Ep. 6:4) Bõtab, ilo ien eo rej ridtolok im erom jodrikdrik ro, elõñ iair rejjab lukkun jela kin ta eo rej aikwij kõmõne, im rej kõnan bwe juõn en tel ir. Elañe eor juõn nejõm jodrikdrik, ewi wãwen kwomaroñ jibõñ e ñõn an bõk tokjen ko jen aolep katak ko ilo buk in? Jen etale jet wãwen ko remaroñ jibõñ yuk kõmõne men in.
▪ Kwon bõk juõn am mõke buk im kwon lukkun liñõri im jela kobõn. Melelen men in bwe kwojjab aikwij riiti wõt, ak kwon kajeoñ bwe kwon jela kin ta eo buk in ej konono kake. Ijellokin an kwalok ñõn jodrikdrik ro kin ta eo ejime im ta eo ebwir, buk in ej kajeoñ in “katak im kamineneik ir.” (Hib. 5:14, UBS) Ej bareinwõt lelok ñõn ir nan in kakabilek ko kin ewi wãwen remaroñ jutõk kin ta eo ejime. Ñõn wanjoñok, ilo Japter 15 (“Ewi Wãwen Aõ Maroñ Jumae Ijjibed ko jen Ro Dred Wõt Iõ?”) ej katakin jodrikdrik ro ñõn air jela kin ta eo rej aikwij in kõmõne ñe rej iion ijjibed ko elaplok jen air ba jaab. Ej kemelele kin wãwen remaroñ kajerbal nan in kakabilek ko jen Baibel ñõn air kamarmire abañ ko, im ewi wãwen remaroñ “jelã uak armij otemjej ilo jimwe.”—Kol. 4:6, UBS.
▪ Kortokjen mõtõn ko ilo buk in im rej kajerbal kajitõk im uak ko. Meñe mõtõn kein kar kõmõni ñõn jodrikdrik ro, ak emõn elañe kom ridto ro komij bareinwõt je uak ko ami ñõn kajitõk ko rekkar ñõn kom.b Ñõn wanjoñok, ñe komij etale kajitõk ko ruo ilo peij 16, kajeoñ in lemnok kin ewi wãwen am kar iñjake kin kajitõk kein ke kwar juõn jodrikdrik. Ijo emwij kajenolok ñõn jeje ie, bwelen kwomaroñ je uak ko am ekkar ñõn am naj kar uaki ilo tõre eo kwar juõn jodrikdrik. Inem kwomaroñ kajitõkin yuk mõke: ‘Ewi wãwen an kar oktõk iñjake eo aõ ikijen men in iomin yiõ ko mantak? Ta eo emwij aõ katak kin men in jen ke iar jodrikdrik, im ewi wãwen imaroñ lelok jelalokjen in ñõn ajiri eo nejiõ ilo jime im jejit?’
▪ Koutiej ien im men ko mweien jodrikdrik eo nejõm. Mõtõn ko ikijen kajitõk im uak ko ilo buk in kar eiki ñõn jibõñ ajiri eo nejõm bwe en kwalok lemnok ko an kin ta eo ej katak. Mejenkajik eo am ej ñõn am jela ta eo ilo buruen, im jab ta eo ajiri eo ej je iloan buk eo an. Ilo peij 3 ilo mõtõn eo etan “Nan in Rejañ ñõn Jemen im Jinen,” ej ba: “Ñõn am rejañ ajiri ro nejõm ñõn air kwalok ta eo ilo burueir, kwoj aikwij kejbãrok bwe kwon jab lale ta eo rar je ilo buk eo air. Inem tokelik remaroñ kwalok kin ta ko rar je ilo buk eo air.”
Juõn Kein Jibõñ ilo Ien Katak Baibel Iben Baamle eo
Buk eo etan Jodrikdrik Ro Rej Kajitõk, Volume 2, ej juõn kein jibõñ ekanuij emõn ñõn ar kajerbale ilo Ien Kabuñ an Baamle. Kinke ejelok kajitõk ko ilo kajjojo pãrokõrããp ilo buk in, ewi wãwen kwomaroñ kajerbale? Etke kwojjab ukot wãwen am katak ñõn juõn wãwen ekeie im emõn ñõn ajiri ro nejõm?
Ñõn wanjoñok, jet baamle remaroñ kajerbal ien katak eo ñõn air kamelmel ñe rej etale mõtõn eo “Kilen Jutõk Nae Ijjibed ko Jen Ro Dred Wõt Yuk ” ilo peij 132 im 133. Kajitõk eo ilo jinoin peij kein emaroñ jibõñ ajiri ro nejõm ñõn air kile ta abañ eo elaptata rej jelmae. Kajitõk eo kein karuo ej kalikar kin ta eo emaroñ kõmõn bwe abañ eo en walok. Elikin an kalomõnlokjen kin ta ko renaj walok elañe ej bo ilo ijjibed ko ak ñe ej jutõk nae, buk in ej rejañ ajiri eo ñõn kapojõk lok iman ñõn an jela ta eo enaj kõmõne ñõn kamarmir abañ eo. Jibõñ ajiri ro nejõm bwe ren jela uak ilo beran im kijejeto ñõn men in ijjibed ko rej iioni.—Sam 119:46.
Juõn Kein Jibõñ Ridto ro im Ro Nejiir ñõn Konono Iben Dron
Buk eo Kajitõk ko Jodrikdrik Ro Rej Kajitõk, Volume 2 ej rejañ jodrikdrik ro ñõn air bõk ien im kennan iben ro jemeir in jineir. Ñõn wanjoñok, ilo box ko etair “Ewi Wãwen Imaroñ Kennan Iben Jinõ im Jema kin an jiroñ im likao ro babu iben dron?” (peij 63-64) im “Kennan Iben Ro Jinõm im Jemõm!” (peij 189) rej letok nan in rejañ ko kin ewi wãwen jemaroñ kennan kin men ko ebin konono kaki. Juõn ledrik im 13 an yiõ ear ba, “Buk in ear kaberan iõ bwe in maroñ kennan iben jinõ im jema kin ta ko rej ber ilo lemnok eo aõ, im bareinwõt men ko iar kõmõni.”
Buk in ej bareinwõt jibõñ ridto ro im ro nejiir ñõn air jela konono iben dron ilo wãwen ko jet. Ilo jemlokõn kajjojo japter eor juõn box im etan “Ewi Wãwen Am Lemnok?” Box in ejjab ñõn baj elij wõt, ak baamle ko remaroñ kajerbale ñõn air etale point ko ilo katak eo. Bareinwõt, ebar or juõn box etan “Wãwen Am Naj Emakõt ak Uak!” ilo jemlokõn kajjojo japter ko. Jodrikdrik ro remaroñ kajerbal box in ñõn air je ta ko rar katak ilo japter eo im ewi wãwen remaroñ kajerbali. Mõtõn eo eliktata ilo box kein ej ba: “Men eo ikõnan kajitõk iben jema im jinõ ikijen men in ej . . .” Wãwen in emaroñ jibõñ jodrikdrik ro bwe ren mõnõnõ in kebake ro jemeir im jineir ñõn bõk nan in kakabilek ko.
Tõbar Buruen!
Einwõt juõn jemen im jinen, ej mejenkajik eo am ñõn tõbar buruen ajiri eo nejim. Buk eo Kajitõk ko Jodrikdrik Ro Rej Kajitõk, Volume 2 emaroñ jibõñ yuk ñõn kõmõne men in. Jen lale ewi wãwen juõn jemen ear maroñ kajerbale buk in ilo airro ledrik eo nejin konono iben dron.
Ear ba, “Eor jet jikin ko remõn im ekkã amro Rebeka etal ñõni. Ien rõt kein rar kõmõn bwe en biruru an Rebeka kwalok lemnok ko an.
“Men eo moktata komro ear etale iben dron kar letter eo jen Governing Body im bareinwõt mõtõn eo ej ba ‘Nan in Rejañ ñõn ro Jemen im Jinen.’ Iar kõnan bwe ledrik eo nejiõ en jela bwe emaroñ jei jabrewõt men eo ekõnan ilo buk eo an, einwõt an peij 3 kwalok. Ijamin lale ta ko ear jei ilo buk eo an.
“Iar kõtlok bwe Rebeka en kãlet im kõlajrõki japter ko ekõnan bwe kimro en katak kaki. Juõn ian japter ko ear kãleti moktata kar etan “Ij Aikwij in ke Ikkure Video Game?” Ejelok aõ kar kõtõmene bwe enaj kar kãlet katak in! Bõtab, ear or unin an kar kãlete katak in, ej kinke jet ian ro mõtõn rar ikkure kin juõn game ear lukkun nana. Iar jaje bwe ikkure in ear lukkun obrõk kin men ko relej im nan ko retton! Bõtab ilo ien eo kimro ar etale box eo “Wãwen Am Naj Emakõt ak Uak!” ilo peij 251 ear bõk mantak men kein im kimro ear konono kaki. Katak in ilo box in ear bareinwõt jibõñ Rebeka bwe en pojõk in jelmae jabrewõt ijjibed ko jen ro mõtõn ñõn an bõk kwonan ilo ikkure kein renana.
“Kiõ, Rebeka ejjab ãliklik in kwalok ñõn ña kin ta ko ear je ilo buk eo an. Im ñe kimro ej katak ejelok jemlokõn amro bwebwenato. Kimro ej riiti pãrokõrããp ko kajjojo, im elikin ej kõnan bwe kimin konono kin aolep men ko ie ekoba pija im box ko. Menin ej letok ñõn iõ juõn ial ñõn aõ kwalok ñõn e kin tõre ko ke iar dred wõt e, im elikin ej kwalok kin wãwen ko jodrikdrik ro rej iioni ranin. Ekõnan kwalok aolep men ñõn ña!”
Elañe kwe juõn jemen ak jinen, ejelok berre bwe kwar lukkun mõnõnõ ilo ien eo buk in ear drioijtok. Kiõ ej juõn ien emõn ñõn am kortokjen buk in. Kumi eo Ej Tel Dri Kennan ro an Jeova ej kejatrikrik bwe buk in Kajitõk ko Jodrikdrik Ro Rej Kajitõk—Uak ko Rej Jerbal, Volume 2, enaj juõn jerammõn ñõn baamle eo am. Kejatrikrik bwe buk in enaj jibõñ aolep, elaptata jodrikdrik ro rejitenburu iber, bwe ren wõnmanlok im “etetal kin Jitõb.”—Gal. 5:16.
[Kamelele eo itulals]
a Ejelok ilo kajin Majõl.
b Jet ian mõtõn ko ilo buk in ej jerbal ñõn jodrikdrik im ridto ro jimor. Ñõn wanjoñok, box eo me title in “Drebij Am Illu” (peij 221) emaroñ jibõñ yuk im ro nejõm. Bareinwõt box ko etair “Wãwen Kamarmir Abañ ko jen ro Dred wõt Iõ” (peij 132-133), “Joñõn Jããn eo Ij Kajerbale Kajjojo Ailiñ” (peij 163), im “Mejenkajik ko Aõ” (peij 314), box kein remaroñ jibõñ yuk bareinwõt.
[Kamelele in juõn pija ilo peij 30]
Ta Ko Jet Jodrikdrik Rej Ba kin Buk In
[Kamelele in juõn pija ilo peij 30]
“Buk in ej juõn buk kwoj aikwij jijõt im jeje ta eo kwoj riiti im kalomõnlokjen kake. Im kar eik buk in ñõn am kajerbale ñõn je lemnok ko am im remaroñ jibõñ yuk ñõn kãlet ial in mour eo emõntata.” —Nicola.
“Ña ij iion elap ijjibed ko ñõn aõ jerã, meñe jen ro rebake iõ. Mõtõn eo iman ilo buk in ear jibõñ iõ bwe jekron ta ko armij rej ba, ijela bwe ijjab pojõk ñõn jerã.”—Katrina.
“Box eo etan ‘Kwoj Lemnok Ke in Baptaise?’ ear jibõñ iõ ñõn aõ lukkun kaurõke baptais eo aõ. Ear bareinwõt jibõñ iõ ñõn aõ kakõmõnmõnlok wãwen aõ katak im jar.”—Ashley.
“Meñe jinõ im jema rar katakin iõ jen ke iar drik kin Baibel eo, ak buk in ear jibõñ iõ ñõn aõ kõmõn jokãlet ko kin ta ko ij aikwij kõmõni ilo mour eo aõ. Ear bareinwõt jibõñ iõ bwe in maroñ kwalok buruõ ñõn jinõ im jema.”—Zamira.
[Kamelele in juõn pija ilo peij 31]
Ñe kwoj juõn jemen ak jinen, kwoj aikwij jela im melele kin kobõn buk in
[Kamelele in juõn pija ilo peij 32]
Kõmõn bwe en mejenkajik eo am ñõn tõbar buruen ajiri eo nejõm