Jisõs Kraist Ewi Joñõn An Kar Ennan eo An Jelet Armij Ro?
“Kein kamol eo elaptata bwe dri meletlet eo jen Kaperneum ear mour, ej bwe ej wõnmanlok im jelet buruen im lemnok ko an armij ro.”a—DRI JEJE EO ETAN GREGG EASTERBROOK.
EOR kajur ilo nan ko. Nan ko remõn me jej kãleti ilo jime remaroñ kamakõt buruen armij ro, kõmõn bwe en or air kejatrikrik, im ukot mour ko air. Ejelok bar juõn ear laplok an jelet armij ro ikijen nan ko ear ba ijellokin wõt Jisõs Kraist. Juõn eo me ear roñ Katak eo ebuñbuñ an Jisõs ion Tol eo ear je nan kein: “Ke emwij an Jesus kwalok men kein, elab an jar ko bwilõñ kin wãwen an katakin ir.”—Matu 7:28, UBS.
Ñõn ranin, elõñ armij ro ibelakin lõl rejela kin nan ko an Jisõs. Jen lale jet wanjoñok ko kin nan ko an me elap meleleir.
“Kom ban dri korijeran Anij im mweiuk.”—Matu 6:24.
“Inem men otemjej jabrewõt komij kõnan bwe armij ren kõmõnmõn ñõn kom, en ein drein ami kõmõnmõn ñõn ir.”—Matu 7:12.
“Komin lelok ñõn Sizar men ko an Sizar, im ñõn Anij men ko an Anij.”—Matu 22:21.
“Mõnõnõ in lelok elap jen bõk.”—Jerbal 20:35.
Bõtab, Jisõs ear jab baj ba wõt nan ko ñõn an armij ro kememeji. Ennan eo ear kwalok kake ekajur kinke ej kwalok mol eo kin Anij, katakin armij ro kin wãwen eo remaroñ bõk juõn mour elap melelen, im ej kalikar bwe Ailiñ eo an Anij ej mejelan abañ ko an armij ro. Ke jej etale ennan in ilo katak ko tok jet, jenaj lo etke Jisõs ej wõnmanlok wõt im jelet “buruen im lemnok ko” an elõñ million armij ro.
[Kamelele itulõl]