“Ejelok Armij Ear Konono Einwõt Armij In”
“Im ir otemjej rej nebar E, im bwilõñ kin nan in joij rej walok jen loñin.”—LUK 4:22.
1, 2. (a) Etke opija ro kar jilkinlok ir bwe ren jibwe Jesus rar jeblaktok ilo ejelok tõbrak? (b) Ta eo ej kwalok bwe opija ro ear jab ir wõt eo rar bwilõñ kin katakin eo an Jesus?
OPIJA RO rar likjap in kõtõbrak jerbal eo kar kabbeik ir make. Rar jilkinlok ir bwe ren jibwe Jesus Christ, ak rar jeblaktok im ejelok jabdewõt ilo peiir. Priest ro relap im Pharisee ro rar kajitõk ñan juõn kamelele: “Etke kom ar jab añintok E?” Emol, etke opija ro rar jab jibwe leo ejamin kar kwalok an jumae? Opija ro rar kamelele: “Ejelok armij e ar konono einwõt armij in.” Joñan air kar bwilõñ kin an Jesus katakin rar jab maroñ in jibwe armij in eainemõn im bõke ibbeir.a—Jon 7:32, 45, 46.
2 Opija rein ejjab ir wõt eo rar bwilõñ kin an Jesus katakin. Bible ej jiroñ kij bwe ekanuij in lõñ ro rar jãdelok ñan baj roñjake wõt an konono. Armij ro ilo bukwon eo an rar bwilõñ “kin nan in joij rej walok jen loñin.” (Luk 4:22) Elõñlok jen juõn alen ear konono jen juõn booj ñan jarlepju in armij ro rar kweloklok ion barijet in Lomalo in Galilee. (Mark 3:9; 4:1; Luk 5:1-3) Ilo juõn ien, “juõn jar ekanuij lap” ear bed ibben ilo elõñ ran ko, meñe ear ejelok kijeir mõñã.—Mark 8:1, 2.
3. Ta kar un eo moktata unin an Jesus kar juõn ri kaki eo emõn?
3 Ta eo ear kõmman bwe Jesus en juõn ri kaki elap an emõn? Yokwe kar un eo moktata. Jesus ear yokwe mol ko ear kwaloki, im ear yokwe armij ro ear katakin ir. Ak Jesus ear bareinwõt wõr an maroñ eo ekõppalpal ñan an kajerbale ilo bolemen ilo kilen katakin. Ilo katak ko rej walok ilo magazine in ilo alliñ in, jenaj konono jet ian kilen ko rekeie ear kajerbali im wãwen ad maroñ kajeoñe e.
Ebidodo an Melele im Melak an Alikar
4, 5. (a) Etke Jesus ear kajerbal kajin eo elamwan ilo an katakin, im ta eo ejejuan kin mol eo bwe ear kõmman eindein? (b) Ewi wãwen Katak eo ion Tol eo ej juõn wanjoñok kin kilen eo ebidodo Jesus ear katakin?
4 Ejjab juõn men ejeja ñan an armij ro emõn air kar school kajerbal kajin eo ri roñjake ro air rejjab maroñ melele kake. Ak elañe men eo jej ba ro jet rejjab melele kake, ewi wãwen air maroñ bõk tokjen jen jelãlokjen eo ad? Einwõt juõn ri kaki, Jesus ejañin kar konono ellã jen jelã eo an ro jet. Kalmenlokjen kin joñan nan ko emaroñ kar kajerbali. Ak, meñe ear lap jelãlokjen eo an, ear lemnak kin ri roñjake ro an, im jab e make. E ar jelã bwe elõñ wõt iair rar “dri jab katak im dri jab meletlet.” (Jerbal 4:13) Ñan tõbar burueir, ear kajerbal kajin eo me kain armij rot in emaroñ kar melele. Nan ko remaroñ kar bidodo, ak mol ko ear kwalok kaki ear lap air kalikar jelãlokjen im melele eo emũlal.
5 Lemnak kake, ñan wanjoñok, Katak eo ion Tol eo, emwij je ilo Matu 5:3–7:27. Jesus emaroñ kar bõk 20 wõt minute ñan an kwalok katak eo. Ak, katak ko ie remũlal, rar tõbar okran wãwen ko einwõt lũñ, jebel, im mweiuk. (Matu 5:27-32; 6:19-34) Bõtab, ejelok nan ko rekabwokbwok ak lomaan. Ilo mol, ejelok juõn nan ebin juõn ajiri ear jab maroñ melele! Ejelok bwilõñ bwe ke ear kajemlok, jar in armij ro—bõlen ekoba elõñ ri kõmman jikin kallip ko, shepherd ro, im ri eñwõd ro—“rej bwilõñ kin An katak”!—Matu 7:28.
6. Kwalok juõn wanjoñok kin wãwen ennan ko an Jesus me rar lamwan ak ear lap meleleir.
6 Ekkã an Jesus kajerbal ainikien nan ko ralikar, im kadu im bidodo ak elap meleleir. Ilo an kwalok nan ko an relamwan ak lap meleleir ear kõmman bwe ennan ko rekabwilõñlõñ an ren tõbar lemnak ko im buruen ri roñjake ro an. Lale jet wanjoñok ko: “Ejelok armij e maroñ bokake ruo iroij; . . . kom ban dri korijeran Anij im mweiuk.” “Komin jab ekajet bwe en jab ekajet kom.” “Inem kom naj jela kajeir kin leir.” “Dri ejmour re jab aikwij dru uno, a ro re nañinmij wõt.” “Bwe ro otemjej rej bõk jãji, re naj mij kin jãji.” “Komin lelok ñõn Sizar men ko an Sizar, im ñõn Anij men ko an Anij.” “Mõnõnõ in lelok elap jen bõk.”b (Matu 6:24; 7:1, 20; 9:12; 26:52; Mark 12:17; Jerbal 20:35) Tok ñan tõre kein ilo ran kein, iturinlok 2,000 yiõ ko elikin an kar Jesus konono kaki, ennan rot in im elap an kajur ebidodo kememeji.
Kajerbal Kajitõk ko
7. Etke Jesus ear kajerbal kajitõk ko?
7 Jesus ear emõn an kajerbal kajitõk ko. Ekkã an kin kõmman eindein meñe ear dik ien ñan an baj jiroñ wõt ri roñjake ro an kin melele eo. Eokwe, inem etke ear kajitõk kin kajitõk ko? Ilo jet ien, ear kajerbal kajitõk ko rej toloñe ñan kajedmatmate kõmman ko an ri jumae ro an, im melelen menin kaikõñ ir. (Matu 12:24-30; 21:23-27; 22:41-46) Bõtab, ilo elõñ wãwen ko, Jesus ear bõk ien ñan kajitõk kin kajitõk ko ñan an kwalok mol ko, bwe ri roñjake ro an ren kwalok ta eo ilo burueir, im ñan lujur im kamineneik an ri kalor ro an lemnak. Jen etale ruo wanjoñok ko, rej jimor jelet ri jilek Peter.
8, 9. Ewi wãwen an kar Jesus kajerbal kajitõk ko ñan jibañ Peter tõbar jemlok eo ejimwe ilo wãwen eo kin kõllã owõj?
8 Moktata, kememej ien eo ke ri tel owõj ro rar kajitõk ibben Peter elañe Jesus ear kõllã owõj.c Peter, ilo an mõkaj jet ien ear uak, “Aet.” Bõtab, elikin jidik ien, Jesus ear kõmmanwa ibben: “‘Ta am lemnok, Saimon? Kiñ ro an lõl rej bõk owõj ak wõnan jen wõn? Jen ro nejir ke, ak jen ro drua maijet?’ Piter ej ba ñõn E, ‘jen ro drua maijet.’ Jisõs e ba ñõn e: ‘Inem, ro nejir rej anemkwojair.’” (Matu 17:24-27) Melele eo ilo kajitõk ko an Jesus rar aikwij alikar ñan Peter. Etke eindein?
9 Ilo ran ko an Jesus, ro uan family ko an king ro rar jelã bwe rejjab owõj. Kin menin, einwõt ke e wõt eo kar keotak Nejin King eo ilañ eo rar kabuñ ñan e ilo temple eo, Jesus ear jab aikwij kõllã owõj. Lale bwe jen an baj jiroñ wõt Peter kin uak eo ejimwe, Jesus ilo jab keie wõt ak inemõn bareinwõt ear kajerbal kajitõk ko ñan jibañ Peter tõbar jemlok eo ejimwe—im bõlen ñan jibañ Peter ñan an lo aikwij eo ñan kalaplok an kejbãrok an lemnak mokta jen an konono.
10, 11. Ewi wãwen an kar Jesus emmakit ke Peter ear jek lojilñin juõn emaan ilo boñin Kijone eo ilo 33 C.E., im ewi wãwen an menin kwalok bwe Jesus ear kaorõk aorõkin kajitõk ko?
10 Wanjoñok eo kein karuo ejelet juõn men eo ear walok jotenin Kijone eo ilo 33 C.E. ke juõn jarlepju rar itok im jibwe Jesus. Ri kalor ro rar kajitõk ibben Jesus elañe rar aikwij ire ñan air jojomar ñan e. (Luk 22:49) Ilo an jab kõttar ñan juõn uak, Peter ear jek lojilñin juõn emaan kin juõn jãje (im bõlen Peter ear karõk in kõmman elaplok jorrãn). Peter ear emmakit im kõmman ilo juõn wãwen eo ear jab ekkar ñan ankilan master eo an, bwe Jesus ear lukkun bojak in lelok e make bwe ren jibwe im kalbuji. Ewi wãwen an kar Jesus emmakit? Einwõt ien otemjej ej meanwõd, ear kajitõk ibben Peter jilu kajitõk ko: “Kõp eo Jema e ar letok ñõn iõ, In jamin irak ke?” “Kwoj lemnak bwe I jab maroñ in kajitõk iben Jema, im E naj jilkintok ñõn iba kiõ elõñ jen joñoul im ruo lijion enjel ke? Elañe einwõt, ekijkan an kamol Jeje ko, bwe ren kõmõnmõn ein drein?”—Jon 18:11; Matu 26:52-54.
11 Kalmenlokjen iumin jidik ien kin bwebwenato in. Juõn jarlepju in armij ro rar kabol Jesus ilo air illu, a ear jelã bwe ien mij eo an ear mottok im bwe karreoik etan Jemen im lomor eo an family eo an armij ear bed ion aeran. Ak, ear bõk ien eo ke ejejjet ñan an kajerbal kajitõk ko ñan kõmman bwe mol ko elap tokjeir ren jelet lemnak eo an Peter. Ejjab alikar ke bwe Jesus ear jelã aorõkin kajitõk ko?
Añlap eo Ealikar Kar Kajerbale ñan Lo Tokjen
12, 13. (a) Ta in añlap? (b) Ewi wãwen an kar Jesus kajerbal añlap ñan kalikar bwe ej menin bwebwe ñan notaiki likjap ko redik an ro jeid im jatid?
12 Ilo jerbal in kwalok nan eo an, Jesus ekkã an kin kajerbal bar juõn kilen katakin eo ebolemen—añlap. Ewõr juõn añlap eo ilo jelã kake ñan kalikar juõn men. Ikijen nan in añlap, Jesus ear ejaake ilo kalmenlokjen nememe ko ebin melokloki. Jen etale jejjo wanjoñok ko.
13 Ilo Katak eo an ion Tol eo, ke ear kalikar aikwij eo ñan “jab ekajet” ro jet, Jesus ear ba: “Im etke kwoj kalimjek belok erik iloan mejen jeõm im jãtõm a jab lemnok kin wijki ej ber iloan mejõm?” (Matu 7:1-3) Kwomaroñ kilelok ke melele eo? Juõn eo ekin notaiki ro jet ej lelok jibañ ñan nõrtok belok eo ilo “mejen” jein im jatin.” Ri notata eo ej ba bwe jein im jatin ejjab maroñ lo wãwen ko ebwe air alikar ñan an kõmman ekajet ko remõn. Ak maroñ eo an ri notata eo make ñan an ekajet ilo jimwe ejjab emõn kin juõn “wijki”—juõn alal ak jekpãd eo remaroñ kajerbale ñan jurake juõn bõrwoj. Juõn wãwen eo ebin meloklok ñan kalikar bwe emenin bwebwe ñan notaiki likjap ko redik an ro jeid im jatid ñe likjap ko ad make elaplok air lap!
14. Etke kajerbal nan ko an Jesus kin liklik lijiljilimõk im wõrañlok kamel rej juõn wãwen ekajur ñan kajerbal añlap?
14 Ilo bar juõn ien, Jesus ear konono nae Pharisee ro einwõt “dri tel bilo, ro rej liklik lijiljilimõk, im wõrõñlok kamel.” (Matu 23:24) Menin kar juõn wãwen ekajur ñan kajerbal añlap ilo bolemen. Etke? Oktak eo ikõtan juõn lijiljilimõk im juõn kamel, eo kar juõn ian menin mour ko relaptata ri roñjake ro an Jesus rar jelã kake, ear lukkun alikar. Rej antonelok bwe ej aikwij 70 million lijiljilimõk ko bwe en joñan eddon wõt juõn kamel! Bareinwõt, Jesus ear jelã bwe Pharisee ro rar liklik wine ko nimeir kin juõn mõttan nuknuk. Ro rar akwelap bwe ren ri tel rar kõmmane menin ñan bõprae air wõrañlok juõn lijiljilimõk im ilo wãwen in oktak im jab erreo. Ak, ilo nan in kõkkar rar wõrañlok juõn kamel, eo ear bareinwõt jab erreo. (Livitikõs 11:4, 21-24) Melele eo an Jesus ear alikar. Pharisee ro rar kejbãrok air jerbale menin aikwij ko rediktata an Kien eo, ak rar kajekdon men ko elaplok eddoiir—“ekajet im tiriamokake im tõmak.” (Matu 23:23) Ealikar an kar Jesus kajedmatmate ir kin kadkad eo lukkun kadkadiir!
15. Ta jet katak ko Jesus ear katakin kaki ikijen kajerbal añlap?
15 Ilo ien jerbal in kwalok nan eo an, Jesus ekkã an kin kajerbal nan in añlap ko ñan kõkkar kaki. Lemnak kin jet wanjoñok ko. “Tõmak eo dettan wõt juõn ine [edik] inen mustard” emaroñ kamakit juõn tol—enaj kar bin an Jesus lo juõn wãwen eo elaplok an keie ñan kalikar bwe meñe juõn tõmak edik emaroñ lap ijo ej kõtõbrake. (Matthew 17:20, NW) Juõn kamel eo ekilep ej kajeoñ in deloñ iloan juõn roñin needle—emõn an menin kalikar an bin an juõn ri mweie eo ej kajeoñ in karejar ñan Anij ke ejja ilo ien in wõt ej debij wõt juõn style in mour kin mweiuk! (Matu 19:24) Kwoj jab bwilõñ ke kin nan in kõkkar kein an Jesus im an maroñ kõtõbrak elap ilo nan ko reiet wõt?
Kõmmanwa eo Rar Jab Maroñ Kariape
16. Ien otemjej Jesus ear kajerbal kajur in kalmenlokjen eo an ilo wãwen et eo?
16 Kin kalmenlokjen eo an ewãppen, Jesus kar juõn eo ekanuij kabel ilo kõmmanwa ibben armij ro. Ak, ear jab kajerbal maroñ eo an ilo jõkkar. Ilo an katakin, ien otemjej ear kajerbal kabel in jelãlokjen eo an ñan kalaplok mol. Ilo jet ien, ear kajerbal kajur in kõmmanwa ñan kariap naruõn ko rar jab mol an ri kabuñ ro rar jumae. Ilo elõñ wãwen ko rar walok, ear kajerbal kõmmanwa ñan an katakin ri kalor ro an katak ko elap tokjeir. Jen lale kabel in maroñ eo an Jesus ñan kajerbale ilo melele.
17, 18. Ta melele eo ekajur Jesus ear kajerbale ñan kariap naruõn eo ewan an Pharisee ro?
17 Lemnak kin ien eo ke Jesus ear kemour juõn emaan eo dimon ear miok na enbwinin im ebilo im ejjab maroñ konono. Ke rar roñ kake, Pharisee ro rar ba: “Armij in e jab kajutõklok dimon ro, a kin Beelzebub [Satan], iroij in dimon ro.” Lale bwe Pharisee ro rar kamol bwe kajur eo elap jen eo an armij ear menin aikwij ñan kajutaklok dimon ro an Satan. Bõtab, ñan debij armij ro jen air tõmak Jesus, rar ba bwe kajur eo an ear itok jen Satan. Ilo an kalikar bwe rar jab lukkun etale nan in iakwelel eo air ñan juõn jemlok eo ejimwe, Jesus ear uak: “Jabrewõt ailiñ in kiñ im emwij kijbil e jimõtõn jumae jimõtõn e naj joko; im jikin kwelok ak em elañe e jibil jimõtõn jumae jimõtõn e naj joko. Im elañe Setan ej kajutõklok Satan, e karuoik an bebe; inem e naj kijkan an ailiñ ber?” (Matu 12:22-26) Tokjen eo in kar einwõt an Jesus ba: ‘Elañe I ar, einwõt ami ba, juõn ri jerbal an Satan, im kokkure men eo Satan ear kõmmane, inem Satan enaj kar jerbal nae tokjen ko an make im ejjabto enaj jako.’ Juõn wãwen kõmmanwa ekajur, ejjab ke?
18 Inem ilo kõmmanwa Jesus ear etal wõt im kalikar menin. Ear wõr an jelã bwe jet jen ro uan Pharisee ro rar kajutaklok dimõn ro. Kin menin, ear kajitõk juõn kajitõk eo elamwan ak ej menin kajorrãn: “Im elañe Ña kin Beelzebub, Ij kajutõklok dimon ro, kin wõn eo ro nejimi rej kajutõklok ir?” (Matu 12:27) Nan in iakwelel eo an Jesus, ilo jelã kar eñin: ‘Elañe, ilo mol, I ar kajutaklok dimon ro kin kajur eo an Satan, inem ri kalor ro ami make rej aikwij in kar jerbal iumin ejja kajur in wõt.’ Ta eo Pharisee ro rar maroñ ba? Rar jañin kamol bwe ri kalor ro air rar jerbal iumin kajur eo an Satan. Kin melele eo rejjab kariape, Jesus ear kõmman bwe naruõn eo air nae e en menin bwebwe.
19, 20. (a) Ilo wãwen et eo emol Jesus ear kajerbal kõmmanwa? (b) Ewi wãwen an kar Jesus kajerbal ‘kijkan an lap’ im nan ko eirlok wõt ilo kõmmanwa ke ear uak ñan kajitõk eo an ri kalor ro an ñan katakin ir wãwen jar?
19 Ilo an kobaiktok kõmmanwa ñan kaikõñ ri jumae ro an, Jesus ear bareinwõt kajerbal melele ko, nan in kareelel ko ilo kõmmanwa ñan katakin mol ko rekakajur im kõmãnãn buru kin Jehovah. Elõñ ien ko ear kajerbal nan in ‘kijkan an lap’, ‘ejamin lap an’ ak ‘e jab laplok an’ einwõt juõn wãwen kamelele ilo kõmmanwa, jibañ ri roñjake ro an ñan wõnmanlok jen juõn mol eo ewõr air jelã kake ñan tõmak eo elaplok an bin. Jen etale ruo wõt wanjoñok ko.
20 Ke ear uak kajitõk eo an ri kalor ro an ñan katakin ir wãwen jar, Jesus ear karõklok wanjoñok eo an ñan juõn emaan eo ear “beran in kate” im eliktata kareel juõn jeran eo ear jab kõnan bwe en kamelim kajitõk eo an. Jesus ear bareinwõt kwalok kin jemen im jinen ro rej mõnõnõ in lelok “men ko remõn” ñan ro nejiir. Inem ear kajemlok: “Im elañe komeo dri nana, kom jela kijkan lelok men ko remõn ñõn ro nejemi; ta, e jamin lap an Jememiuij i lõñ lelok Jitõb Kwojarjar ñõn ro otemjej rej kajitõk iben ke!” (Luk 11:1-13) Melele eo Jesus ear kõmmane ej bedbed, jab ion men eo einlok wõt, ak ion men eo einjuõn. Elañe juõn jeran eo ejjab mõnõnõ emaroñ eliktata reel ñan an tõbar aikwij eo an eo iturin, im elañe armij jab wãppen ro jemen im jinen ajiri ro rej kea kin aikwij ko an ajiri ro nejiir, ewi joñan an laplok an Jemed eo ej yokwe ilañ letok jitõb kwojarjar ñan ro ri karejaran retiljek ro ilo ettã buru rej itok ñan e ilo jar!
21, 22. (a) Ta un eo Jesus ear kajerbale ke ear lelok nan in kakabilek ilo jerbale inebata kin mweiuk ko? (b) Elikin liñõri jejjo ian kilen katakin ko an Jesus, ta jemlok eo jej tõbare?
21 Jesus ear kajerbal kõmmanwa eo einlok wõt in ke ear lelok nan in kakabilek ilo jerbale abañ eo kin mweiuk ko. Ear ba: “Komin kalomõnlokjen kin bao reven ko: bwe re jab jeor, im jab marmir; ejelok imõn mweieir ak imõn kijeir; im Anij ej najirik ir: kijkan elap ami emõn jen bao ko ke? Komin kalomõnlokjen kin kiõp ko ekijkan air edrek; re jab jerbal, re jab irap . . . A elañe ein drein an Anij kalitlit mãr eo ej ber ilo jikin kallip rainin, im ilju julok ilo um; e jab laplok An naballimi ke, O komeo erik ami tõmak!” (Luk 12:24, 27, 28) Aet, elañe Jehovah ej lale bao ko im wit ko, ewi joñan an naj laplok an kejbãrok ro ri karejaran! Bidodo ak kajur in kamelele rot in ejelok bere ear lujur buruen ri roñjake ro an Jesus.
22 Elikin ad liñõri jejjo ian kilen katakin ko an Jesus, emaroñ bidodolok ad bõk jemlok in bwe opija ro rar likjap in jibwe e rar jab burolap ke rar ba: “Ejelok armij e ar konono einwõt armij in.” Ak kilen katakin eo me bõlen unin an lap jelã kake Jesus ej kin kajerbal wanjoñok ko, ak parable ko. Etke ear kajerbal kilen in? Im ta eo ear kõmman bwe wanjoñok ko an en lap air wejepedik? Kajitõk kein naj konono kaki ilo katak in tok juõn.
[Kamelele ko itulal]
a Bõlen opija ro rar ri jerbal ro an Sanhedrin eo im iumin maroñ eo an priest ro relap.
b Ennan in eliktata, jej lo ilo Jerbal 20:35, ri jilek Paul wõt ear eliji, meñe melelen nan kein jej loi ilo Gospel ko. Paul emaroñ kar bõk ennan in (ñe jab jen juõn ri kalor eo ear roñ an Jesus ba eokwe jen Jesus eo ear jerkakbiji) ak ikijen kalikar eo ekwojarjar.—Jerbal 22:6-15; 1 Dri Korint 15:6, 8.
c Ri Jew ro rar aikwij kõllã owõj ñan temple eo yiõ otemjej ruo drachma [money in Greece] (tarrin wõnãn ruo ran in jerbal). Money in owõj eo kar kajerbale ñan kõllã wõnãn kejbãrok temple eo, jerbal eo rej kõmmane ijo, im katok ko rej lilok ran otemjej ilo etan ailiñ eo.
Kwoj Kememej Ke?
• Ta wanjoñok ko rej kwalok bwe Jesus ear katakin ilo wãwen ebidodo an melele im alikar?
• Etke Jesus ear kajerbal kajitõk ko ilo an katakin?
• Ta in añlap, im ewi wãwen an kar Jesus kajerbal kilen katakin in?
• Ewi wãwen an kar Jesus kajerbal kamelele ilo kõmmanwa ñan katakin ri kalor ro an kin mol ko rej kõmãnãn buruen armij kin Jehovah?
[Pija eo ilo peij 17]
Jesus ear kajerbal kajin eo elamwan bwe armij ro ren maroñ melele
[Pija eo ilo peij 18]
Pharisee ro ‘rar liklik lijiljilimõk ak rar wõrañlok kamel’