Ewi Joñõn Am Jela Kajen Anij?

Ej juõn jerammõn elañe jemaroñ kir juõn dri utiej ilo ar kajerbale etan. Ekkã an armij ro kir dri utiej ro ilo air kajerbal title ko einwõt “President,” “Iroij,” ak “Leroij.” Kin men in, elañe juõn dri utiej ej jiroñ yuk men in, “Joij im kir iõ kin ãt eo eta,” ejelok berre enaj lap am mõnõnõ.

ANIJ eo emol ej jiroñ kij ilo Nan eo an, Baibel eo: “Ña Jeova, eñin eta.” (Aiseia 42:8) Meñe elõñ title ko iben einwõt “Dri Kõmõnmõn,” “Anij Ekajur Potata,” im “Iroij Laplap,” ak ear kõñiãjoik dri korijer ro an retiljek ilo an kõtlok bwe ren kajerbale ãt eo etan.

Ñõn wanjoñok, ilo ien eo kar ajelok tempel eo ilo Jerusalem, Kiñ Solomon ear kebellok jar eo an ilo an ba: “O Jeova.” (1 Kiñ 8:​22, 23) Dri kanan Ilaija ear eowore Anij ilo an ba: “Kwon eoroñ iõ, O Jeova.” (1 Kiñ 18:​37) Ke dri kanan Aiseia ear kebake Anij kin dri Israel ro, ear ba: “O Jeova, Jemem.” (Aiseia 63:16) Alikar bwe Jemer ilõñ ekõnan bwe jen kajerbale ãt eo etan.

Meñe eaurõk ñõn ãñiñin Jeova kin ãt eo etan, elõñlok men ko jej aikwij jela kin e ijellokin ar baj jela wõt etan. Jeova ear kalimuri ro rej yokwe im liki e: “Inaj . . . kejbarok ro rejelã kajjiõ.” (Sam 91:14, UBS) Elukkun alikar bwe ñõn ar lukkun jela kajen Anij, elõñlok men ko jej aikwij jela kaki ijellokin ar baj jela wõt kin ãt eo etan, kinke eñin ej wãwen eo wõt im jemaroñ bõk kejbãrok eo an Anij. Ta ko jej aikwij kõmõni bwe jen lukkun jela kajen Anij?