Kwõn Pojak Wõt!

“Kom̦win barãinwõt pojak, bwe ilo awa kom̦ij jab l̦õmn̦ak, Nejin Armej ej itok.”—MATU 24:44.

1, 2. (a) Ta eo enaaj wal̦o̦k im kar kanaan kake ilo Baibõl̦ me jemaroñ keidi ñan jorrããn eo ear wal̦o̦k ikijen juon taikõ? (b) Ta eo jej aikuj kõm̦m̦ane bwe jen el̦l̦ã im mour ilo iien eo Jijej enaaj ko̦kkure lal̦ in an Setan?

IUM̦WIN elõñ iiõ ko, juon em̦m̦aan ear buñbuñ kõn an kalwõje armej ro ikijen an iukkure ippãn taikõ ko rej n̦aetaer Bengal. Ear ba: “Ñe juon menin mour ej jino an yokwe eok, men in ej lukkuun kam̦õn̦õn̦õik eok.” Bõtab ilo Oktoba 3, 2003 ear jako an lein bar maroñ iukkure ippãn menin mour kein rekõn yokwe e. Kõn ejjel̦o̦k unin, juon iaan taikõ ko nejin im emouj kilin me joñan eddo in ej 380 bo̦un, ear kiji. Men in ear wal̦o̦k ilo jidimkij, im lein ear jab pojak.

² Baibõl̦ eo ej bareinwõt kõnono kõn iien ko̦kkure eo an juon “kidu” awiia me enaaj wal̦o̦k ilo jidimkij. (Riit Revelesõn 17:15-18.) Wõn “kidu” awiia in? Wõn eo enaaj ko̦kkure? Kidu awiia in ej jutak kõn United Nations, im “doon ko joñoul” rej jutak kõn aolep kien ko ilo lal̦ in. Kidu in enaaj ko̦kkure Babilon Elap ak aolep doulul in kabuñ ko reriab. Enaaj juon men ekailbõkbõk kõnke kidu awiia eo im Babilon eo Elap rar jem̦jerã. Aolepeir rej m̦õttan lal̦ in an Setan. Bõtab, ñããt enaaj wal̦o̦k iien ko̦kkure in? Jejjab jel̦ã raan eo im awa eo men in enaaj wal̦o̦k. (Matu 24:36) Jejel̦ã bwe enaaj wal̦o̦k ilo awa eo jejjab kõtmãne kake im ejjab to jãn kiiõ men in enaaj wal̦o̦k. (Matu 24:44; 1 Kor. 7:29) Innem, jej aikuj pojak wõt ñan ta eo Jeova im Jijej renaaj kõm̦m̦ane. (Luk 21:28) Juon men im emaroñ jipañ kõj ej ilo ad katak jãn joñak ko rem̦m̦an an ro jet ilo Baibõl̦ eo. Rar pojak ke Anij ear ko̦kkure armej ro renana im lo̦mo̦o̦ren ro doon ilo iien ko etto. Rar lo kõn mejeir bwe men ko Anij ear ba rar jejjet kitieir. Jen lale ta eo jet iaaer rar kõm̦m̦ane im ewi wãween jemaroñ anõke rein.

Kwõn Pojak Wõt Ãinwõt Kar Noa

3. Ta mãlejjoñ ko Noa ear jelm̦aiki im rar kõm̦m̦an bwe en pen an karejar im tiljek ñan Anij?

³ Meñe ear kanooj lap nana ioon lal̦ ilo raan ko an Noa, bõtab Noa ear pojak wõt ñan an lo jejjet in kitien kallim̦ur eo an Anij. Baj l̦õmn̦ak m̦õk kõn mãlejjoñ ko Noa ear jelm̦aiki ke enjel̦ ro renana rar ukot mõraer ñan armej im koba ippãn kõrã ro redeo̦ ijin ioon lal̦! Ear juon men me Anij ear jab karõke. Kõn men in, ke rein rar neji, ro nejier rar armej ro “rekajoor” im rar kajerbal kajoor ko aer ñan kaamijak im kajorrããn ro jet. (Jen. 6:4) L̦õmn̦ak kõn joñan an kar lap kowadoñ ke ri inea rein rar kõm̦m̦an kiojal̦jal̦ ilo jabdewõt jikin rar ilo̦k ñani. Kõn men in, nana ear jeededl̦o̦k im ear marok l̦õmn̦ak ko an armej ro im nana mantier. Innem, Jeova ear karõk juon iien enaaj ko̦kkure armej rein renana.—Riit Jenesis 6:3, 5, 11, 12.a

4, 5. Ilo wãween et raan kein ad rej ãinl̦o̦k wõt raan ko an Noa?

⁴ Jijej ear kanaan bwe wãween ko ilo raan kein ad renaaj ãinwõt wãween ko ilo raan ko an Noa. (Matu 24:37) Ñan waanjoñak, jej bareinwõt lo jerbal ko renana an enjel̦ ro renana. (Rev. 12:7-9, 12) Enjel̦ rein rar ukot mõraer ñan armej ilo raan ko an Noa. Meñe rejjab maroñ kõm̦m̦ane men in kiiõ, rej lukkuun kate er ñan kapo ro redik im rerũtto jim̦or. Ej kam̦õn̦õn̦õik enjel̦ rein renana ñe rej alwõje an armej ro kõm̦m̦ani men ko renana.—Ep. 6:11, 12.

⁵ Naan in Anij ej kwal̦o̦k kõn Tepil̦ eo ãinwõt juon “ri uror” im ej bareinwõt ba bwe “kajoor in mej ippãn.” (Jon 8:44; Hib. 2:14) Meñe Setan ekajoor ak Anij ejjab kõtl̦o̦k bwe en m̦an jabdewõt eo ekõnan. Mekarta, Setan emaroñ kõm̦m̦akũt armej ro bwe ren kõm̦m̦ani men ko me renaaj kaiñtan er im kõm̦m̦an bwe ren mej. Ej bareinwõt ukot l̦õmn̦ak ko an armej bwe ren dike ro jet im kõn̦aan m̦an er. Ñan waanjoñak, ke rar kõm̦m̦ane etale ko ilo Amedka, rar lo bwe 142 ajri ro ilo juon kumi im rar l̦otak, juon iaaer enaaj mej kõnke rar m̦an e. Kõn an kanooj lapl̦o̦k kowadoñ, Jeova ejamin kõjekdo̦o̦n men kein renana rej wal̦o̦k ãinwõt kar ilo raan ko an Noa. Enaaj jol̦o̦k men kein renana.

6, 7. Ewi wãween Noa im baam̦le eo an rar kwal̦o̦k aer tõmak im mijak Anij?

⁶ Tokãlik, Anij ear jiroñ Noa bwe enaaj bõktok juon ibwijleplep ioon lal̦ in ñan ko̦kkure aolep armej ro. (Jen. 6:13, 17) Jeova ear jiroñ Noa bwe en jek juon wa elap ãinwõt jekjekin juon tõptõp. Innem, Noa im baam̦le eo an rar jino kõm̦m̦ane wa eo. Ta eo ear jipañ er bwe ren pokake im pojak wõt ñan iien eo ear itok raan in ekajet eo an Anij?

⁷ Tõmak im mijak Anij rar kõm̦m̦akũt Noa im baam̦le eo an ñan kõm̦m̦ane jerbal eo Anij ear kakien kake. (Jen. 6:22; Hib. 11:7) Ãinwõt juon bõran baam̦le, Noa ear pãd epaake wõt Jeova im ear jab kobal̦o̦k ilo kõm̦m̦an ko renana an armej ro ilo raan ko an. (Jen. 6:9) Ear jel̦ã bwe baam̦le eo an ear aikuj kõjparok jãn m̦wil im l̦õmn̦ak ko renana an armej ro rej jokwe ibwiljier. Ekanooj kar aorõk bwe ren jab mad kõn men ko rej kõm̦m̦ani jãn raan ñan raan. Anij ear lel̦o̦k juon jerbal ñan er, im ear aorõk bwe aolep ro uwaan baam̦le eo ren poub wõt kõn jerbal in.—Riit Jenesis 6:14, 18.

Noa im Baam̦le eo an Rar Pojak Wõt

8. Ta eo ej kwal̦o̦k bwe ro uwaan baam̦le eo an Noa rar kabuñ ñan Anij?

⁸ Ekkã wõt an bwebwenato in ilo Baibõl̦ kwal̦o̦k kõn Noa, bõtab lio pãlen Noa, l̦õm̦aro nejin im lim̦aro pãleir rar bareinwõt kabuñ ñan Jeova. Ri kanaan Ezekiel ear kam̦ool men in. Ezekiel ear ba bwe el̦aññe Noa ear mour ilo tõre ko an, ro nejin reban kar bõk lo̦mo̦o̦r kõnke jemãer ear wãnik. Etke? Kõnke rar rũtto ñan aer kããlõt el̦aññe rej kõn̦aan pokake ak jab. Kõn men in, er kajjojo rar kwal̦o̦k bwe rej yokwe Anij im naan in tõl ko an. (Ezek. 14:19, 20) Baam̦le eo an Noa rar pokake naan in tõl ko an jemãer im kobal̦o̦k ippãn ilo tõmak eo an. Bareinwõt rar jab kõtl̦o̦k bwe menin karreelel ko jãn ro jet ren kabañ aer kõm̦m̦ane jerbal eo Anij ear lel̦o̦k ñan er.

9. Wõn ro rainin rej l̦oor joñak eo an Noa?

⁹ Ej kakajoor kõj ñe jej lo bwe ilo doulul in jimjãn jimjãten eo ipel̦aakin lal̦, ewõr bõran baam̦le ko rej kate er joñan wõt aer maroñ ñan anõke joñak eo an Noa! Rein rejjab baj kabwe aikuj ko an baam̦le ko aer ãinwõt kijeir, ballier, jikin aer jokwe, im jikuul. Rej bareinwõt jipañ baam̦le ko aer ñan ejaak juon kõtaan em̦m̦an ippãn Anij. Ilo aer kõm̦m̦an ãindein, rej kalikkar aer pojak ñan men eo m̦õttan jiddik Jeova enaaj kõm̦m̦ane.

10, 11. (a) Kar ta eñjake eo an Noa im baam̦le eo an ke rar pãd iloan wa eo? (b) Ta kajjitõk eo jen kajjitõkin kõj make kake?

¹⁰ Noa, lio pãlen, l̦õm̦aro nejin im lim̦aro pãleir, remaroñ kar kõm̦m̦ane wa eo ium̦win 50 iiõ ko. Elõñ buki alen aer kar diwõj del̦o̦ñ iloan wa eo ke rar kõm̦m̦ane. Rar karpene bwe en jab ettal, kakon̦kon̦ m̦õñã, im kadel̦o̦ñ menin mour ko iloan wa eo. Baj pijaik m̦õk iien in. Raan eo elap ej itok. Ej raan eo kein ka 17 ilo allõñ eo kein ka ruo ilo iiõ eo 2370, (iiõ eo kein ka 600 an Noa mour). Im rej del̦o̦ñl̦o̦k iloan wa eo. Jeova ej kiil kõjãm in wa eo, im ej jino an wõt. Ejjab juon wõt mijeljel bajjek. Juon dãn elap ear bũttũk im lutõk jãn lañ im buñut wa eo. (Jen. 7:11, 16) Armej ro inabõjin wa eo rej mejl̦o̦k ak ro iloan ejjel̦o̦k aer uwõta. Ta kar eñjake eo an Noa im baam̦le eo an? Alikkar bwe elap aer lukkuun kam̦m̦oolol Anij. Bõtab ejjel̦o̦k pere remaroñ kar l̦õmn̦ak, ‘Jekanooj m̦õn̦õn̦õ bwe jaar etetal ippãn Anij eo em̦ool im pojak wõt!’ (Jen. 6:9) Baj pijaik m̦õk am̦ el̦l̦ã jãn Armagedõn, bũruom ej obrak ke kõn kam̦m̦oolol?

¹¹ Ejjel̦o̦k emaroñ kabõjrak Anij eo ekajoor otem kajoor jãn an kajejjet kallim̦ur eo an bwe enaaj kajeepepl̦o̦k jukjuk im pãd in an Setan. Kajjitõk ippam̦ make, ‘Ij ke lukkuun lõke bwe aolep kallim̦ur ko an Anij reban likjab im bwe aolepeir renaaj jejjet kitieir ilo iien eo em̦õj an karõke?’ El̦aññe aet, kwõn pojak wõt ilo am̦ lipjerjere an raan eo an Jeova itok.—2 Pit. 3:12.

Moses Ear Ekkõl Wõt

12. Ta ko remaroñ in kar kamad Moses?

¹² Jen etale bar juon waanjoñak. Ekkar ñan l̦õmn̦ak ko an armej, Moses emaroñ kar erom juon eo eutiej ilo aelõñ in Ijipt. Lio nejin Pero ear kaajiririk Moses. Eñin unin armej ro rar kautiej e im ear m̦õñã ekkan ko rennotata, kõn̦ak nuknuk ko rem̦m̦antata, im jokwe ilo jikin eo ej make wõt m̦weiie im aiboojoj. Ear jikuul ilo jikuul ko reutiej. (Riit Jerbal 7:20-22.) Innem, emaroñ kar bõk juon menin jolet elap.

13. Ta eo ear jipañ Moses bwe en kaorõk kallim̦ur ko an Anij?

¹³ Ri Ijipt ro rar kabuñ ñan ekjab ko. Bõtab Moses ear jel̦ã bwe ej juon menin bwebwe. Ke ear lukkuun dik, jemen im jinen rar katakin e bwe Jeova ej Anij eo em̦ool. (Ex. 32:8) Jel̦ãl̦o̦kjen eo eutiej ilo Ijipt im m̦weiuk ko rem̦m̦an ilo m̦weo im̦õn Pero rar jab kareel Moses bwe en ilo̦k jãn kabuñ eo em̦ool. Emaroñ kar lukkuun kõl̦mãnl̦o̦kjen̦ kõn kallim̦ur ko an Anij ñan ro jim̦m̦an im ear kõn̦aan kwal̦o̦k bwe epojak in kõm̦anm̦an ankilaan Anij. Eñin unin Moses ear jiroñ ro nejin Israel: “Jeova . . . Anij an Ebream, Anij an Aisak, im Anij an Jekob, E ar jilkinwõj eõ ñan kom̦.”—Riit Exodus 3:15-17.

14. Ewi wãween Moses ear kalikkar an tõmak im peran?

¹⁴ Moses ear tõmak bwe Jeova, Anij eo em̦ool, ej lukkuun m̦ool an pãd. Ear jab ãindein an l̦õmn̦ak kõn ekjab ko me rej jutak kõn anij ko rewaan an ri Ijipt ro. Kõnke ear ãinwõt ñe ej lo “Eo re ban lo E,” Moses ar mour ilo wãween eo Anij ear buñbũruon kake. Moses ear tõmak bwe Anij enaaj kanemkwoj armej ro an, bõtab ear jab jel̦ã ñããt. (Hib. 11:24, 25, 27) An kar kõn̦aan bwe ri Hibru ro ren anemkwoj ear alikkar ke ear jojomare juon ri kamakoko in Israel me rar m̦an e. (Ex. 2:11, 12) Bõtab, ippãn Jeova ejañin jejjet iien eo ñan an kanemkwoj er, innem Moses ear aikuj ko ñan juon ãne etolok im jokwe ie. Ejjel̦o̦k pere bwe ear kanooj pen ñan e kõnke ekõn em̦m̦an kõjeãn ilo m̦weo im̦õn kiiñ ilo Ijipt im kiiõ ear jokwe ilo ãne jem̦aden. Meñe ãindein, Moses ear ekkõl im pojak wõt ñan an bõk naan in tõl ko jãn Jeova. Kõn men in, Anij ear kajerbale e ñan kanemkwoj ri Israel ro jein im jatin ãlikin 40 iiõ ko in an kar mour ilo Midian. Ear jejjet iien eo ñan an Moses kõm̦m̦ane jerbal in an Anij im ilo wãween eo Anij ear kõn̦aan bwe en kõm̦m̦ane. (Ex. 3:2, 7, 8, 10) Kõnke Moses, eo ear “kanooj ineem̦m̦an jãn armej otemjej,” ear bar jepl̦aak ñan Ijipt, ear aikuj peran im tõmak bwe en maroñ wal̦o̦kl̦o̦k im̦aan mejen Pero. (Bõn. 12:3) Ear jab juon wõt alen an kõm̦m̦ane men in. Elõñ alen ear jelm̦aik Pero ke ear aikuj kwal̦o̦k ñan e kõn kajjojo iaan menin kaiñtan ko. Im ear jab jel̦ã jete alen an naaj aikuj kõm̦m̦ane men in.

15. Ta eo ear kõm̦m̦akũt Moses bwe en pukot wãween ko ñan kaiboojoj Jemen ilañ meñe ear bũrom̦õj im inepata?

¹⁵ Ium̦win 40 iiõ ko tokãlik, ke ri Israel ro rar jebwãbwe ilo ãne jem̦aden, Moses ear iion elõñ men ko rar kabũrom̦õj im kainepataik e. Bõtab, ear pukot wãween ko ñan kaiboojoj Jeova im rõjañ ri Israel ro ñan aer bar kõm̦m̦ane men in. (Dut. 31:1-8) Etke? Kõnke elapl̦o̦k an kar yokwe ãt eo etan Jeova im irooj bõtata eo an jãn ãt eo etan make. (Ex. 32:10-13; Bõn. 14:11-16) Meñe jej jelm̦ae men ko rej kabũrom̦õj im kainepataik kõj, kõj bareinwõt jej aikuj rejetake irooj bõtata eo an Anij, im lõke bwe karõk im pepe ko an rejim̦wel̦o̦k, remãlõtlõtl̦o̦k im rem̦m̦anl̦o̦k jãn jabdewõt ko an armej. (Ais. 55:8-11; Jerm. 10:23) Ãindein ke am̦ l̦õmn̦ak?

Kwõn Ekkõl!

16, 17. Etke naan ko ilo Mark 13:35-37 raorõk ñan kwe?

¹⁶ “Kom̦win kõjparok kom̦, kom̦win ekkõl im jar; bwe kom̦ jaje ñããt iien eo.” (Mark 13:33) Jijej ear kwal̦o̦k naan in kakkõl in ke ear kõnono kõn kakõl̦l̦en jem̦l̦o̦kin jukjuk im pãd in enana. Jen lale naan ko ilo tujem̦l̦o̦kin kanaan eo an Jijej me Mark ear je: “Innem komin ekkõl bwe komij jab jelã ñãt eo leo imõn mweo enaj itok, emaroñ ilo jota, ilo lukõn boñ, ilo jimmarok, ak mokta jãn an al tak. Elañe ejidrimkij an itok, en jab lo ami kiki! Men eo ij ba ñõn kom, ij bareinwõt ba ñõn aoleb: Komin ekkõl!”—Mark 13:35-37, UBS.

¹⁷ Naan kein an Jijej rej lukkuun kaitoktoklimo. Jijej ear kõnono kõn emãn iien ko ñan emmej im ekkõl wõt. Iien emmej eo ãliktata enaaj lapl̦o̦k an pen ñan ekkõl im ruj kõnke ej jino jãn jilu awa jimmarok ñan takin al̦. Ro rejel̦ã kõttõbalbal ilo tarin̦ae rej ba bwe eñin ej iien eo em̦m̦antata ñan nitbwili ri kõjdat ro aer kõnke ej iien eo remaroñ lo aer “kiki.” Ãindein, ñe armej ro rejjab kõn̦aan roñjake nuuj eo em̦m̦an kõn Aelõñ eo, emaroñ pen ad ekkõl wõt. Jej ke kile ad aikuj “kõjparok” im “ekkõl” wõt kõn iien jem̦l̦o̦kin jukjuk im pãd in im iien eo jenaaj bõk lo̦mo̦o̦r?

18. Ta jeraam̦m̦an eo ewõr ippãd ãinwõt Ri Kõnnaan ro an Jeova?

¹⁸ Leo ebuñbuñ kar kwal̦o̦k kake ilo jinoin katak in ear mour wõt meñe taikõ eo ear kiji. Bõtab, Baibõl̦ eo ej kanaan bwe aolep kabuñ ko reriab im ro ilo jukjuk im pãd in enana rejamin el̦l̦ã im mour ñe enaaj itok jem̦l̦o̦kin. (Rev. 18:4-8) Kõj aolep ro ri karejaran Anij, ro redik im rerũtto jim̦or, jen kile aorõkin ad kate kõj bwe jen pojak wõt ñan raan eo elap an Jeova ãinwõt kar Noa im baam̦le eo an. Jej mour ilo juon lal̦ ejjab kautiej Anij. Ri kaki ro ilo kabuñ ko reriab im bareinwõt armej ro rejjab tõmak ilo Anij, rej kananaik Ri Kõm̦anm̦an eo. Bõtab, jej aikuj kõjparok bwe jen jab bo ippãer. Jen jab mel̦o̦kl̦o̦k joñak ko an ro jet im em̦õj ad etali. Jen pukot iien ko ñan ad jojomare im kaiboojoj Jeova, eo ej “Anij in anij ran̦” im “Anij l̦apl̦ap, ri kajoor.”—Dut. 10:17.

[Kamelele eo itulal]

Kwõj Keememej Ke?

• Etke ear aorõk bwe Noa en jipañ baam̦le eo an ñan kakajoorl̦o̦k kõtaan eo aer ippãn Anij?

• Ewi wãween raan kein ad rej ãinl̦o̦k wõt raan ko an Noa?

• Etke Moses ear kaorõk wõt kallim̦ur ko an Anij meñe ear iion men ko rar kabũrom̦õj im kainepataik e?

• Ta kanaan ko ilo Baibõl̦ im rej lujur eok bwe kwõn pojak im ekkõl wõt?

[Pija ilo peij 25]

Noa im baam̦le eo an rar poub wõt kõn jerbal eo an Jeova

[Pija ilo peij 26]

Kallim̦ur ko an Anij rar jipañ Moses bwe en ekkõl wõt