Katakin Ajri ro Nejõm̦

Kwõnañin Ke L̦õmn̦ak bwe Ro Jet Redike Eok?

ELÕÑ armej ro rej make iaaer im ejjel̦o̦k m̦õttaer. Unin ej kõnke ro jet rejjab kõn̦aan aetõl e kõnke eoktak kil eo kilin, aelõñ eo an, ak kajin eo an. Im bõlen bareinwõt kõnke eoktak men ko ej kõm̦m̦ani jãn er. Ej ke wal̦o̦k men in ñan kwe?​​​—a

Jen lale juon bwebwenato kõn juon em̦m̦aan me ear l̦õmn̦ak bwe ro jet redike. Etan em̦m̦aan in ej Mipiboshet. Jen kiiõ etale wõn em̦m̦aan in im etke ear l̦õmn̦ak rot in? El̦aññe kwõj l̦õmn̦ak bwe ro jet redike eok, eokwe enaaj l̦ap am̦ katak jãn bwebwenato in kõn Mipiboshet.

Mipiboshet ej nejin Jonatan, l̦eo m̦õttan Devid. M̦okta jãn an kar Jonatan mej ilo juon tarin̦ae, ear ba ñan Devid: ‘Jouj im lale ajri eo nejũ.’ Devid ear erom kiiñ. Elõñ iiõ ko tokãlik ear jab mel̦o̦kl̦o̦k naan kein an Jonatan im Mipiboshet ear mour wõt. Ke ear dik, ear wal̦o̦k jorrããn ñan e im kõm̦m̦an an jaje etetal. Kwõj ke kile unin an Mipiboshet maroñ kar l̦õmn̦ak bwe ro jet redike?​​​—

Devid ear kõn̦aan kwal̦o̦k jouj ñan l̦eo nejin Jonatan. Kõn men in, ear kõm̦m̦an bwe en wõr juon m̦õn Mipiboshet make im en pãd iturin m̦weo im̦õn ilo Jerusalem. Mipiboshet ear m̦õñã ilo tebõl̦ in m̦õñã eo an Devid. Bareinwõt, Devid ear jitõñ juon em̦m̦aan etan Zaiba im ro nejin, im ri jerbal ro an bwe ren jerbal ñan Mipiboshet. Devid ear lukkuun kaorõke l̦eo nejin Jonatan! Kwõjel̦ã ke ta eo ear wal̦o̦k tokãlik?​​​—

Juon men enana ear wal̦o̦k iloan baam̦le eo an Devid. Juon iaan l̦õm̦aro nejin, etan Absalom, ear kajjioñ kairooj e make im ear jum̦ae jemen. Kõn men in, Devid ear aikuj ko. Ke elõñ rar etal ippãn Devid l̦o̦k, Mipiboshet ear bareinwõt kõn̦aan etal. Rein rar jel̦ã bwe Devid ej kiiñ eo me Jeova ear kããlõte. Bõtab, Mipiboshet ear jab maroñ etal ippãerl̦o̦k kõnke ejjab maroñ etetal.

Zaiba ear ba ñan Devid bwe Mipiboshet ear kõn̦aan pãd wõt kõnke ekõn̦aan erom kiiñ. Kõn an Devid tõmake naan kein reriab an Zaiba, ear lel̦o̦k aolep m̦weiuk ko im jikin ko an Mipiboshet ñan Zaiba. Tokãlik, ke Devid ear anjo̦ ilo tarin̦ae eo n̦ae Absalom, ear jepl̦aak ñan Jerusalem. Kiiõ Mipiboshet ear kwal̦o̦k ñan Devid unin ear pãd wõt. Devid ear pepe bwe Mipiboshet im Zaiba ren ajeji jolet ko an Mipiboshet. Ta eo Mipiboshet ear kõm̦m̦ane?​​​—

Mipiboshet ear jab illu im ba ñan Devid bwe ejjab jim̦we an jerbal. Ejel̦ã bwe kiiñ eo ear kõn̦aan bwe en wõr aenõm̦m̦an bwe en em̦m̦an an irooj ioon armej ro. Kõn men in, Mipiboshet ear ba bwe Zaiba en bõk aolep jolet ko. Men kein rar jab aorõk ñan Mipiboshet. Ear m̦õn̦õn̦õ bwe Devid, eo Jeova ear kããlõte, ear mour im jepl̦aak ñan Jerusalem bwe en kiiñ.

Mipiboshet ear lukkuun eñtaan. Aolep iien ear l̦õmn̦ak bwe ej make wõt oktak jãn ro jet. Ak Jeova ear yokwe e im kõjparok e. Ta eo jemaroñ katak jãn men in?​​​— Meñe ejim̦we men ko jej kõm̦m̦ani ak enaaj wõr wõt ro im remaroñ riab n̦ae kõj. Jijej ear ba: “El̦aññe lal̦ ej kõjdate kom̦, kom̦ij jel̦ã bwe ear kõjdate Eõ m̦okta jãn kom̦.” Armej ro rar m̦an Jijej ñan mej! Jen lõke im tõmak bwe el̦aññe jej kõm̦m̦ane wõt men ko rejim̦we, innem Jeova im Jijej renaaj yokwe kõj.

Riit ilo Baibõl̦ eo am̦

1 Samuel 20:​15-​17, 41, 42

2 Samuel 4:4; 9:​1-​10; 19:​24-​30;

Jon 15:18

[Kamelele eo itulal]