Kwõmaroñ Ke Ãinwõt Pinehas Ñe Kwõj Kõm̦adm̦õde Apañ Ko?

EJ JUON jeraam̦m̦an el̦ap ñe juon ej bõk jerbal in elder ilo congregation eo. Bõtab, Baibõl̦ ej kwal̦o̦k bwe elder ro rej iion apañ ko. Jet iien, rej aikuj ‘ekajet ñan Jeova’ ilo aer etale im kõm̦adm̦õde apañ ko an ro im rar kõm̦m̦an bõd. (2 Kronikel 19:⁠6) Ak bõlen remaroñ jitõñ juon elder ñan kõm̦m̦ane juon jerbal me ej l̦õmn̦ak bwe ejepojak in kõm̦m̦ane. Ej ãinl̦o̦k wõt Moses ke ear kajjitõk ippãn Jeova ilo ettã bõro: “Wõn ña, bwe in ilo̦k ñan ippãn Pero?”​​​—Exodus 3:​11.

Anij ear kõjerbal kajoor eo an ñan kam̦akũt armej ro bwe ren je Baibõl̦ eo. Ear bareinwõt jitõñ elder ro kõn ejja kajoor in wõt. Innem, Baibõl̦ ej letok mel̦el̦e ko rem̦m̦antata kõn wãween elder ro remaroñ kõm̦adm̦õd apañ ko rej iioni. Pinehas ear nejin Iliezar im jibwin Aron. Kõn men in, tokãlik enaaj kar erom juon pris el̦ap. Ewõr jilu men ko rar wal̦o̦k ilo mour eo an Pinehas im rej kalikkar bwe ñe elder ro rej kõm̦adm̦õd apañ ko rej aikuj peran, lol̦o̦kjen̦, im atartar ioon Jeova.

Ear Jab Aepedped

Pinehas ear juon likao ilo tõre eo ri Israel ro rar kajutak im̦õn kabbed ko aer im jokwe ilo aelõñ in Moab. Baibõl̦ eo ej ba: “Armej raar jino in l̦õñ ippãn kõrã ro nejin Moab. . . . Im armej raar m̦õñã im badikdik jãn anij ko aer.” (Bõnbõn 25:​1, 2) Jeova ear m̦an ro rar kõm̦m̦ani men ko renana kõn juon nañinmej. Baj l̦õmn̦ak m̦õk kõn eñjake eo an Pinehas ke ear lo an men kein wal̦o̦k?

Bwebwenato in ej wõnm̦aanl̦o̦k im ba: “Lo, juon iaan ro nejin Israel ear itok im ãñintok ñan ippãn ro jein im jatin, juon kõrã in Midian im̦aan mejen Moses, im im̦aan mejen aolepen jar eo an ro nejin Israel, ke rar jañ iturin kõjãm in m̦õn kweilo̦k eo.” (Bõnbõn 25:⁠6) Ta eo Pinehas ear kõm̦m̦ane? Eokwe ilo iien in ear juon likao im pris. L̦eo ear kõm̦m̦an nana ej juon ri tõl im ear tõl armej ro ñan kabuñ ñan Jeova.​​​—Bõnbõn 25:⁠14.

Ak Pinehas ear mijak Jeova im jab armej. Ke ear lo em̦m̦aan in Israel eo im kõrã in Moab eo, ear m̦õkaj im bõk juon m̦ade im l̦oor l̦o̦k erro ñan loan em̦ nuknuk eo im wãkare erro jim̦or. Kar ewi wãween an Jeova l̦õmn̦ak kõn an kar Pinehas peran im jab aepedped kõn jorrããn eo? Ilo iien eo wõt, Jeova ear jol̦o̦k nañinmej eo. Im ear kajeraam̦m̦an Pinehas ilo an kõm̦m̦ane juon bujen ippãn bwe ro ineen renaaj bõk jerbal in pris “ñan indeeo.”​​​—Bõnbõn 25:​7-​13.

Jejel̦ã bwe elder ro rejjab lãj. Ak elder ro remaroñ ãinwõt Pinehas ilo aer peran im jab aepedped kõn pepe ko aer. Ñan waanjoñak, ewõr juon elder etan Guilherme. Ekar jejjo wõt allõñ in an elder ak rar kajjitõk ippãn ñan jerbal ippãn kumi in elder ro rej ekajet. Apañ eo e im elder ro jet rar kajjioñ kõm̦adm̦õde ej kõn bar juon elder me ekõn jipañ Guilherme ke ear dik. Guilherme ej ba: “Iar ãliklik in kõnono ippãn. Im iar jaje kiki in boñ. Aolep iien iar l̦õmn̦ak kõn ewi wãween aõ maroñ kõm̦adm̦õde apañ eo. Im jab kõtl̦o̦k bwe aõ epaake elder eo en kapañ aõ kajim̦we e ekkar ñan kien ko an Jeova. Ium̦win elõñ raan iar jar im kappok mel̦el̦e ko kõn apañ eo ilo bok ko jãn doulul eo.” Men in ear kaperan e ñan kõm̦adm̦õde apañ eo im lel̦o̦k naan in kakapilõk ko jãn Baibõl̦ eo ñan brother eo ear kõm̦m̦an bõd.​​​—1 Timote 4:​11, 12.

El̦aññe elder ro rej peran im jab aepedped kõn pepe ko aer kõn juon apañ ilo congregation eo ñe ej menin aikuj, rej kwal̦o̦k juon joñak em̦m̦an ñan tiljek wõt im eddãp ñan Jeova. Kũrjin ro jet rej aikuj bar peran im kõjjel̦ãik elder ro ñe rejel̦ã bwe juon ej kõm̦m̦ani men ko renana. Bareinwõt, ej menin aikuj bwe jen dãpij wõt ad tiljek im bõjrak ad kobal̦o̦k ippãn juon m̦õttad ak nukid me ebukwel̦o̦k.​​​—1 Korint 5:​11-​13.

Lol̦o̦kjen̦ Ej Bõbraik Juon Jorrããn L̦apl̦ap

Pinehas ear juon likao eperan. Bõtab, ear jab ãinwõt jodrikdrik ro me rejjab l̦õmn̦ak m̦okta jãn aer kõm̦m̦ane juon men. Jen lale ewi wãween ear kwal̦o̦k lol̦o̦kjen̦ ke ear roñ kõn bar juon men ear wal̦o̦k. Bwijin Ruben im Gad kab jeblokwan bwijjin Menassa rar kalõk juon lokatok iturin Reba Jordan. Ri Israel ro jet rar m̦õkaj im ekajete er im ba bwe rar kabuñ ñan ekjab. Innem rar kapojak im ilen tarin̦aeki er.​​​—Joshua 22:​11, 12.

Ta eo Pinehas ear kõm̦m̦ane? Eokwe, e im ri tõl ro jet an Israel rar kwal̦o̦k lol̦o̦kjen̦ ilo aer kar etal im kõnnaan m̦okta ippãn bwij ko rar kalõk lokatok eo. Innem, bwij kein rar kõmel̦el̦eik er bwe unin aer kar kalõk lokatok eo ej ñan kõm̦m̦ane “jerbal an Jeova.” Men in ear bõbraik an wal̦o̦k juon jorrããn.​​​—Joshua 22:​13-​34.

El̦aññe juon Kũrjin ej roñ aer ruruwe im kananaiki juon ri karejeran Jeova, ej aikuj anõke joñak eo an Pinehas! Lol̦o̦kjen̦ ej bõbraik ad m̦õkaj im illu ak kwal̦o̦k naan ko rejjab em̦m̦an im ekajete ro jeid im jatid.​​​—Jabõn Kõnnaan 19:⁠11.

Ewi wãween elder ro remaroñ ãinwõt Pinehas ilo aer kwal̦o̦k lol̦o̦kjen̦? Jaime, eo im 10 jim̦a iiõ in an elder ej ba: “Ñe juon ej kwal̦o̦k an inepata ippãn bar juon armej ilo congregation eo, ij m̦õkaj im jar ñan Jeova bwe en jipañ eõ bwe in jab bõk kun̦aaõ ilo apañ eo ikõtaaer. Ak in lel̦o̦k wõt naan in kakapilõk ko jãn Baibõl̦ eo. Juon sister ear itok ippa im kwal̦o̦k an inepata kõn wãween an kar juon brother ilo bar juon congregation kõm̦m̦an ñan e. Kõnke iepaake brother eo, enaaj kar pidodo aõ kõnono ippãn kõn apañ eo. Bõtab, ijello̦kun aõ kõm̦m̦ane men in, kom̦ro sister eo ar etale jet eoon ko jãn Baibõl̦ eo. Innem sister eo ear errã bwe enaaj m̦okta kepaake im kõnono ippãn brother eo ej inepata ippãn. (Matu 5:​23, 24) Bõtab, ear jab m̦õkaj im em̦m̦an kõtaaerro. Innem iar rõjañ e bwe en bar etale im kõl̦mãnl̦o̦kjen̦ kõn bar eoon ko jet ilo Baibõl̦. Sister eo ear pepe bwe enaaj bar jar kõn apañ in ej iione im kate e ñan jol̦o̦k an brother eo bõd.”

Innem ta eo ear wal̦o̦k? Jaime ej ba, “Jet allõñ ko tokãlik, sister eo ear kepaake eõ. Ear ba bwe tokãlik brother eo me ear inepata ippãn ear ajl̦o̦k kõn naan ko ear jiroñl̦o̦k e. Brother in ear karõk ñan kwal̦o̦k naan ippãn im ear kam̦m̦oolole. Kiiõ ear em̦m̦an kõtaaerro. El̦aññe iar bõk kun̦aaõ ilo apañ eo ikõtaaerro im bõlen kwal̦o̦k kalijekl̦o̦k, innem eban kar wõr aenõm̦m̦an.” Baibõl̦ eo ej kakapilõk kõj: “En jab mõkaj am jedrelok ñõn jikin ekajet kin juõn men eo kwõj loe.” (Jabõn Kõnnaan 25:​8, UBS) Elder ro im rej kwal̦o̦k aer lol̦o̦kjen̦ rej rõjañ Kũrjin ro im rej inepata ippãn ro jet ñan jerbale naan in kakapilõk ko ilo Baibõl̦ ñan kõm̦m̦an aenõm̦m̦an.

Ear Kajjitõk Jipañ Ippãn Jeova

Pinehas ear watõke juon jeraam̦m̦an el̦ap ñan jerbal ãinwõt juon pris ñan armej ro doon Anij. Ãinwõt ad kar etale m̦oktal̦o̦k, Pinehas ear kwal̦o̦k el̦ap peran im lol̦o̦kjen̦ meñe ear juon likao wõt. Bõtab, ear maroñ lo tõprak im kõm̦adm̦õde apañ ko kõnke ear atartar wõt ioon Jeova.

Juon iien, em̦m̦aan ro ilo Gibia im rej jãn bwijjin Benjamin, rar babu ippãn kõrã eo pãleen juon ri Livai im ko̦kkure e ñan mej. Kõn men in, bwij ko jet rar pojak in iten tarin̦aeki bwij eo an Benjamin. (Ri Ekajet 20:​1-​11) Ri Israel ro jet rar jar im kajjitõk ippãn Jeova bwe en jipañ er m̦okta jãn aer kar ilo̦k im tarin̦ae. Bõtab, ruo alen rar luuj jãn bwijjin Benjamin im elõñ rar mej. (Ri Ekajet 20:​14-​25) Innem mel̦el̦ein ke bwe ejjel̦o̦k tokjãn aer kar jar? Jeova ear ke lukkuun kea kõn men eo rar kõm̦m̦ane ñan kõm̦adm̦õde jorrããn eo ear wal̦o̦k?

Ilo iien in, Pinehas ear kiiõ juon pris el̦ap. Ear jab dikl̦o̦k an lõke Jeova. Pinehas ear jar im ba: “In bar diwõjl̦o̦k n̦ae ro nejin Benjamin jatũ ke jab ke?” Jeova ear uwaake jar eo an ilo an kar kõm̦m̦an bwe ren maroñ anjo̦ ioon bwijjin Benjamin im tile jikin kweilo̦k eo an Gibia.​​​—Ri Ekajet 20:​27-​48.

Ta eo jemaroñ katak jãn men in? Jet iien congregation eo ej jelm̦aiki jet apañ ko rejjab bõjrak aer wal̦o̦k meñe el̦ap an elder ro kate er im jar bwe Anij en jipañ er. El̦aññe ej ãindein, em̦m̦an bwe elder ro ren keememej naan kein an Jijej: “Kajjitõk [ak jar], im naaj lewõj ñan kom̦; kappukot, im kom̦ naaj loe; kal̦l̦al̦l̦al̦, im enaaj pel̦l̦o̦k ñan kom̦.” (Luk 11:⁠9) Meñe emaroñ jab m̦õkaj an Jeova uwaake jar ko, elder ro remaroñ lõke bwe Jeova enaaj uwaak ilo iien eo ejejjet im em̦m̦an.

Ñan waanjoñak, juon congregation ilo aelõñ in Ireland ear lukkuun aikuji juon aer Im̦õn Kweilo̦k. Bõtab, l̦eo ej pepe kõn jikin ekkal ko ilo bukwõn eo aer, ear jab kõn̦aan kamãlim er. Ear ba jaab ñan aolep plan ko aer kõn jikin eo rar kõn̦aan kalõke Im̦õn Kweilo̦k eo. Innem wãween eo wõt bwe en maroñ tõprak plan ko aer ej ñe rej etal im kõnono ippãn armej eo eutiejl̦o̦k jãn l̦eo juon. Ãinwõt kar ilo tõre ko an Pinehas, jar emaroñ ke bar jipañ er?

Juon elder jãn ijo ej keememej im ba: “Ãlikin am kar jar im akwel̦ap ñan Jeova bwe en jipañ kõm, kõmar jibadekl̦o̦k opij eo an armej eo eutiejl̦o̦k jãn l̦eo juon. Rekar jiroñ eõ bwe kõm naaj bõlen aikuj kõttar ium̦win elõñ wiik ñan am maroñ kõnono ippãn armej in. Bõtab, kõmar iione im maroñ kõnnaan ippãn ium̦win l̦alem wõt minit. Ãlikin an kar lo plan ko am, ear m̦õkaj im letok mãlim ñan kalõk Im̦õn Kweilo̦k eo. Innem l̦eo me ear jum̦ae kõm m̦okta ear oktak im jipañ kõm. Wãween in kõmar iione ej kwal̦o̦k bwe jar emaroñ lukkuun jipañ.” Aet, Jeova enaaj uwaake jar ko an elder ro im rej atartar wõt ioon.

Pinehas ear bõk juon jerbal me elõñ eddo ko ear aikuj kõm̦m̦ani, bõtab ear maroñ lo tõprak im kõm̦adm̦õdi apañ ko. Etke? Kõnke ear kwal̦o̦k peran, lol̦o̦kjen̦, im ear atartar wõt ioon Anij. Im wãween an kar Pinehas kõjparok armej ro an Anij rar ekkar ñan wãween eo Jeova ej buñbũruon kake. Enañin 1,000 iiõ ko tokãlik, kajoor eo an Anij ear kõm̦m̦akũt Ezra ñan je naan kein: “Im Pinehas nejin Iliezar ear irooj iooer ilo iien e mootl̦o̦k, im Jeova ear pãd ippãn.” (1 Kronikel 9:​20) Jeova en bareinwõt pãd ippãn ro rej tõl armej ro an rainin im aolep Kũrjin ro rej tiljek ilo aer karejar ñan e.