Jeova Ej Kõnnaan ñan Samuel

Ear wõr ruo em̦m̦aan nejin Bũrij L̦apl̦ap eo Ilai me rar bar bõk jerbalin bũrij ilo im̦õn kõppãd eo. Etaer in Hopnai im Pinehas. L̦õm̦arein rar jab pokake kien ko an Jeova, im ear lukkuun nana aerro kõm̦m̦an ñan armej ro. Ñe RiIsrael ro rej bõkl̦o̦k menin katok ko aer ñan Jeova, Hopnai im Pinehas rekõn bõk kanniõk ko renno̦tata jãn menin katok kein aer bwe en kijeer. Ilai ear roñ kõn men in erro kar kõm̦m̦ane, ak ear jab kõm̦m̦an jabdewõt. Jeova enaaj ke kar kõtl̦o̦k wõt an men in wal̦o̦k?

Meñe Samuel ear lukkuun dik jãn Hopnai im Pinehas, ak ear jab l̦oore kõm̦m̦an ko aerro. Jeova ear m̦õn̦õn̦õ ippãn Samuel. Juon boñ ke Samuel ej kiki, ear ruj ke ej roñ juon ainikien ej kũr etan. Ear jerkak im ettõrl̦o̦k ñan ippãn Ilai im ba: ‘Ña e!’ Ak Ilai ear ba: ‘Iar jab kũr eok. Kwõn ro̦o̦l im kiki.’ Innem Samuel ear ro̦o̦l ñan jikin kiki eo an. Ak ebar roñ an ainikien eo kũr etan. Ilo iien eo kein kajilu ke Samuel ej roñ ainikien eo, Ilai ej kab kile bwe Jeova eo ej kũr Samuel. Kõn men in, ear ba ñan Samuel bwe ñe enaaj bar roñ ainikien eo, en uwaak im ba: ‘Jeova, jouj im kõnnaan bwe ña karejeram̦, ipojakin roñjake eok.’

Samuel ear bar ro̦o̦l ñan ijo ej kiki ie. Innem ear bar roñ an ainikien eo kũri im ba: ‘Samuel! Samuel!’ Im ear uwaak im ba: ‘Jouj im kõnnaan bwe ña karejeram̦, ipojakin roñjake eok.’ Jeova ear ba ñane: ‘Ba ñan Ilai bwe inaaj kajeik e im baam̦le en̦ an. Ejel̦ã bwe l̦õm̦aran̦ nejin rej kõm̦m̦ani men ko renana ilo im̦õn kõppãd n̦e aõ, ak ejjab kõm̦m̦an jabdewõt.’ Ilo jibboñõn raan eo tok juon, Samuel ear kõpel̦l̦o̦k kõjãm ko ilo im̦õn kõppãd eo ãinwõt an kõn kõm̦m̦ane aolep raan. Ear mijak in ba ñan Ilai ta ko Jeova ear ba ñane. Ak Ilai ear kũr Samuel ñan ippãn im kajjitõk: ‘Nejũ, ta eo Jeova ear ba ñan eok? Jouj im kwal̦o̦ktok aolepen men ko ear ba.’ Innem Samuel ear ba ñan Ilai aolepen men ko Anij ear ba ñane.

Ilo an kar Samuel rũttol̦o̦k, Jeova ear wõnm̦aanl̦o̦k wõt im jipañe. Aolep armej ro ilo ãneen Israel rar jel̦ã bwe Jeova ear kããlõt Samuel bwe en An rũkanaan im riekajet.