Kajeoñwe Tõmak eo Air

Ear “Ridtolok Iman Jeova”

SAMUEL, leo etiljek im ear jerbal einwõt juõn dri kanan im dri ekajet iomin elõñ yiõ ko, ear reilok ñan armij ro ear kirtok ir ñan air kweloklok ilo bukwon in Gilgal. Ien in ear walok ilo aliñ in Mei ak Juun ekkar ñan calendar eo ad rainin, im dredrelok an kar ijjino ien det. Ej ien marmiri wit ko ilo jikin kallip ko ilo bukwon in. Ilo tõrein, jar eo ear ikõñ wõt. Ewi wãwen Samuel emaroñ tõbar burueir?

Armij ro rar jab melele kin joñan an kar kauwatata kajitõk eo rar bõkmantak. Rar akwelap bwe juõn kiiñ en iroij ioir. Rein rar jab kile bwe rar kwalok air jab kautiej Anij eo air, Jeova, im dri kanan eo an. Ear einwõt ñe rar karmijete Jeova einwõt Kiiñ eo air! Ewi wãwen Samuel emaroñ kamakõt ir bwe ren ukwelok?

Samuel ear ba ñan armij ro: “Ña I ridto im bwiljere.” Im kin an kar ritto, armij ro rar kaurõk nan kein an. Inem ear ba: “I ar etetal imami jen ke I ar ajiri ñõn ranin.” (1 Samuel 11:14, 15; 12:2) Meñe Samuel ear juõn lõlap, ak men ko rar walok ke ear juõn ajiri rar alikar wõt ilo lemnak eo an. Bebe ko ear kõmmani ilo ien eo ke ear juõn ladrik wõt rar tellok e ñan an tiljek wõt ñan Anij eo an, Jeova, ilo aolepen mour eo an.

Elõñ alen Samuel ear aikwij kakajur im drebij wõt an tõmak. Ear kõmmane men in meñe ear bed ibwiljin armij ro ejelok air tõmak im rejjab tiljek. Bareinwõt, ebin ñan ad kalek tõmak eo ad rainin kinke jej mour ilo juõn lal enana im armij ro ie ejelok air tõmak ilo Anij. Jen lale ta eo jemaroñ katak jen joñok eo an Samuel jen ke ear juõn ajiri.

Jen Ien “Ej Laddrik Wõt, Ear Wõnmanlok Wõt ilo an Jerbal ñõn” Jeova

Ear lukkun eoktak wãwen mour eo an Samuel ke ear juõn ajiri. Ejjabto elikin kar kalikitit e, bwelen ke ear emen an yiõ, ear jino jerbal ilo imõn kaber ak tempel eo ekwojarjar an Jeova ilo Shailo, eo ej bed elõñlok jen 20 mail etolok jen ijo jikin etan Rema. Jemen im jinen, etair Elkena im Hanna, rar ajelok e ñan an jerbal ñan Jeova einwõt juõn dri Nazirait.a Men in ear ke melelen bwe Elkena im Hanna rar kejole Samuel?

Jab ñan jidrik! Pris eo Elap Ilai ear lolorjake aolep men ko kinke Samuel ear jerbal ibben. Ear bareinwõt wor kõrã ro rar bõk kwonair ilo jet jerbal ko ilo imõn kaber eo im kar karõke men in ilo juõn wãwen ekwon. Rar jelã bwe rein renaj kar kejbãrok ladrik eo nejiiro ilo Shailo—Exodus 38:8.

Bareinwõt, Hanna im Elkena rar jab meloklok manje eo nejiiro ejitenburu, eo kar uak eo ñan jar eo an Hanna. Hanna ear kajitõk ibben Anij kin juõn nejin ladrik im ear kalimur bwe enaj ajelok ladrik eo ñan an jerbal ñan E ilo aolepen an mour. Kajjojo yiõ ke Hanna ear lolok Samuel, ear kõmman juõn liboror ekaru pein im lelok ñan e, kein an jerbal ilo tempel eo. Alikar bwe ladrik in ear kaurõk ien lotok ko an jemen im jinen. Ejelok berre bwe ear bõk kakajur jen nan in rejañ im tel ko airro ke rar katakin e bwe ear juõn jerammõn elap ilo an jerbal ñan Jeova ilo imõn kaber eo.

Rainin, elõñ men ko ro jemen im jinen remaroñ katak jen Hanna im Elkena. Ekkã air kate ir ñan kabwe aikwij ko an ajiri ro nejiir ilo kanniek, ak rej jerwane air katakin ir kin Anij. Bõtab, jemen im jinen Samuel rar likit men ko an Anij moktata, im men in ear lap an jelet e ilo juõn wãwen emmõn ke ear rittolok.—Jabõn Kennan Ko 22:6.

Jemaroñ pijaik an ladrik eo rittolok im ej itoitak ibwiljin tol ko redrik ibelakin Shailo. Ke ear reilallok ñan bukwon eo im komlal eo, ear obrõk buruen kin lõñliñ im ear loudriñdriñ ke ear lo imõn kaber eo an Jeova. Alikar bwe imõn kaber in ear juõn jikin ekwojarjar.b Kar kaleke enañin 400 yiõ ko remotlok iomin tel eo an Moses, im ear jikin kabuñ eo erreo an Jeova ibelakin lal.

Samuel ear mõnõnõ ilo an jerbal ilo imõn kaber eo an Anij. Ilo bwebwenato eo ear je, ej ba: “Ilo ien eo ke Samuel ej laddrik wõt, ear wõnmanlok wõt ilo an jerbal ñõn [Jeova], im ekin kõnak juõn nuknuk ekadru bein, kõmmõn jen linen.” (1 Samuel 2:18, UBS) Kobe eo an ekaru pein ear kalikar bwe Samuel ear juõn dri jibañ ñan pris ro ilo imõn kaber eo. Meñe ear jab uan pris ro, ak Samuel ear kõmmani eddo ko einwõt kebellok kejem ko ilo jibboñ im dri jibañ ñan Ilai. Ear lukkun lõñliñ kin jerammõn kein, bõtab ejjabto ear walok juõn bwid elap ilo imõn kaber eo an Jeova im ear lap an abnõnõ bõklikõt eo an kake.

Ear Drebij Wõt an Erreo Meñe Ear Walok Men ko Renana

Samuel ear drik wõt ke ear lo an men ko renana walok. Ear wor ruo nejin Ilai, etair Hophni im Pinehas. Bwebwenato eo an Samuel ej ba: “Lõma ro nejin Eli rar armij nana. Rar kejekdron [Jeova].” (1 Samuel 2:12, UBS) Lemnak ko ruo ilo eon in rej ekkejel ibben dron. Hophni im Pinehas rar “armij nana,” ak ekkar ñan ukok ko jet rar armij ro “ejelok tokjeir,” kinke rar jab kautiej Jeova. Ear ejelok air kea kin kien ko rewãnik im men ko rar aikwij kõmmani. Men in ear tellok ir ñan air kõmman elõñ jerawiwi ko.

Kien eo an Anij ear kwalok ilo tibrikin kin eddo ko an pris ro im wãwen eo rar aikwij lelok menin katok ko ilo imõn kaber eo. Men in ear eindrein kinke menin katok ko rar jutak kin menin letok ko an Anij ñan jeorlok jerawiwi ko bwe armij ro ren maroñ erreo iman mejen im bwe en tellokin air bõk jerammõn im tel jen Anij. Bõtab, Hophni im Pinehas rar kõmman bwe pris ro mõttair ren jab kwalok kautiej kin menin katok kein.c

Pijaik mõk an Samuel lo an pris ro kõmmani manit kein relukkun nana im ejelok en ej kajimweik ir. Jete alen ear lo an armij ro, ekoba ro rejeramel, ro retã, im ro reburomõj, jibareke tempel eo ilo air kejatrikrik bwe renaj bõk kainemõn im kakajur jen Jeova, bõtab rar illu, metõk, im jook ke rar jeblak? Im ewi wãwen kar iñjake eo an ke ear jelã bwe Hophni im Pinehas rar jab kautiej kien ko an Jeova kin mour erreo ilo air kar lũñ ibben jet ian kõrã ro im rar jerbal ilo imõn kaber eo? (1 Samuel 2:22) Bwelen ear kejatrikrik bwe Ilai enaj kajimwe wãwen in enana ear walok.

Ilai kar armij eo ejejjet ñan kajimwe abañ in ear walok kinke einwõt pris eo elap, kar eddo eo an ñan kajimwe jabrewõt men ko rar walok ilo imõn kaber eo. Inem einwõt juõn jemen, kar eddo eo an ñan kajimwe lõmaro nejin kinke men ko ro nejin rar kõmmani rar jab jelet wõt ir ak bareinwõt elõñ armij ro ilo eneo. Bõtab, Ilai ear likjab ilo wãwen kein ruo, einwõt juõn jemen im pris elap. Ear jab kanuij lap an kajeik lõmaro nejin. (1 Samuel 2:23-25) Bõtab, lõmaro nejin rar aikwij bõk juõn kaje elaplok kinke jerawiwi ko rar kõmmani rar tellokin mij!

Wãwen ko rar nanalok ñan joñan eo Jeova ear aikwij jilkinlok “juõn armij õn Anij,” ak juõn dri kanan ñan Ilai bwe en kwalok ñan e juõn nan in ekajet elap. Jeova ear jiroñ Ilai: “Kwoj kõñiãjoik lõmaro nejõm jen Ña.” Kin men in, Anij ear kanan bwe lõmaro renana nejin Ilai renaj mij ilo juõn wõt ran im bwe baamle eo an Ilai enaj lap air iñtan, im renaj luji jerammõn eo air ñan jerbal einwõt pris ro. Nan in kakkil in ekajur ear ke kamakõt baamle eo ñan air kõmman oktak ko? Bwebwenato eo ejjab kwalok bwe rar kõmmane men in.—1 Samuel 2:27–3:1.

Ewi wãwen an kar aolep men kein renana jelet Samuel? Jen ien ñan ien ilo bwebwenato in, jej lo ennan ko remmõn kin an Samuel rittolok im kõmman wõnmanlok ko. Kememej bwe ilo 1 Samuel 2:18, UBS, ej ba, “Ilo ien eo ke Samuel ej laddrik wõt, ear wõnmanlok wõt ilo an jerbal ñõn [Jeova]” ilo tiljek. Meñe ear drik wõt, ak Samuel ear likit jerbal eo an Anij moktata ilo mour eo an. Ilo eon 21 ilo ejja japter in wõt, ej ba juõn men im elaplok an kamõnõnõik buruer: “Samuel, e ar ridtolok iman Jeova.” Ke ear rittolok, kõtan eo an ibben Jemen ilañ ear kajurlok. Juõn kõtan ebak ibben Jeova ej kein kejbãrok eo emmõntata nae jabrewõt men ko renana.

Emaroñ kar biruru ñan an Samuel bõk lemnak eo bwe elañe pris eo elap im lõmaro nejin remaroñ kõmmani men ko renana, inem emaroñ bareinwõt kõmmane jabrewõt men ekõnan. Bõtab, nana ko armij ro rej kõmmani, ekoba ro rej bõk jerbal ko relap, ejjab juõn un ekkar ñan ad jerawiwi. Rainin, elõñ Kristian jodrikdrik ro rej lor joñok eo an Samuel im rej wõnmanlok wõt im “ridtolok iman Jeova,” meñe armij ro jet ibelakiir rej likjab in likit juõn joñok emmõn.

Kin an kar Samuel kõmmane men in, ewi wãwen ear jelet mour eo an? Baibel eo ej ba: “Im ladrik eo, Samuel, e ar ridtolok, im laplok an jitenburu iben Jeova, im bareinwõt iben armij ro.” (1 Samuel 2:26) Inem ro eaurõk lemnak ko air rar buñburueir kin Samuel. Samuel ear aurõk ibben Jeova kinke ear tiljek. Im Samuel ear jelã bwe Anij enaj kabwijrõk aolep men ko renana rej walok ilo Shailo, bõtab bwelen ear lemnak kin ñãt eo men in enaj walok.

“Kwon Konono; bwe Korijerõm Ej Roñ”

Juõn boñ, ear alikar ñãt eo Jeova enaj kabwijrõk men kein renana. Ear jimmarok im lamp eo elap ilo im nuknuk eo ear urur wõt. Samuel ear roñ juõn ainiken ej kir etan. Ear lemnak bwe kar Ilai eo ear kir e, eo ej juõn lõlap im ebilo. Samuel ear jerkak im “etõr ñõn” ibben Ilai. Kwomaroñ ke pijaik an ladrik eo jintõb im kakaiuriurlok ñan an lale ta eo Ilai ear aikwiji? Elap an jelet buruer ñan jelã bwe Samuel ear kwalok kautiej im joij wõt ñan Ilai. Meñe elõñ men ko ear kõmmani rar jab jimwe, ak Ilai ej pris eo wõt elap an Jeova.—1 Samuel 3:2-5.

Samuel ear karuj Ilai im ba: “Ña e; bwe kwar kir iõ.” Ak Ilai ear ba bwe ear jab kir e im ear jiroñ e bwe en jeblak im kiki. Jilu alen an kar men in walok! Eliktata, Ilai ear kile ta eo ej walok. Ear jeja an Jeova lelok juõn vis̃õn ak kanan ñan armij ro an, im ejjab bin ñan ad melele etke. Bõtab Ilai ear jelã bwe Jeova ear bar jino an konono ñan armij ro an ikijen ladrik in! Ilai ear jiroñ Samuel bwe en jeblak im kiki im ear katakin e kilen uak ilo jimwe im Samuel ear bokake. Ejjabto Samuel ear roñ juõn ainiken ej kir: “Samuel, Samuel!” Inem ladrik eo ear uak im ba: “Kwon konono; bwe korijerõm ej roñ.”—1 Samuel 3:1, 5-10.

Elikin elõñ yiõ ko, ej kab wor juõn dri karejaran Jeova ilo Shailo im ej bokake E. Eñin kar wãwen mour eo an Samuel. Ej eindrein ke ibõm? Jejjab aikwij kõttar an juõn ainiken konono ilo kabwilõñlõñ ñan kij ilo boñ. Rainin, ien otemjej jemaroñ roñ ainiken Anij ilo Nan eo an, Baibel eo. Elañe elaplok ad roñjake Anij im bokake e, inem tõmak eo ad enaj kajurlok. Ear eindrein ibben Samuel.

Boñin eo ilo Shailo ear juõn ien eaurõk ilo mour eo an Samuel kinke ear jino ejaak juõn kõtan ejejuan ibben Jeova ilo an kar erom juõn dri kanan im dri konono an Anij. Ilo jinoin, ladrik eo ear mijak in kwalok ennan eo an Jeova ñan Ilai kinke ear kajelã eo eliktata bwe kanan eo nae baamle eo an Ilai ej bojak in jejjet kitien. Bõtab, ilo beran Samuel ear kwaloke, im Ilai ear kõtãik e ñan nan in ekajet eo an Jeova. Ejjabto, aolep men ko Jeova ear ba rar jejjet kitieir. Dri Israel ro rar tõrinae ibben dri Pilistia ro, im kar mõn Hophni im Pinehas ilo juõn wõt ran. Im Ilai ear mij ke ear roñ bwe dri kijdrat ro rar bõk tebteb eo ekwojarjar an Jeova.—1 Samuel 3:10-18; 4:1-18.

Bõtab, ear laplok an armij ro jelã kajen Samuel einwõt juõn dri kanan etiljek. Bwebwenato eo ej ba bwe “Jeova ej ber iben,” im ej wõnmanlok im ba bwe Jeova ear jab kõtlok bwe jabrewõt kanan ko Samuel ear kwaloki ren jab jejjet kitieir.—1 Samuel 3:19.

“Samuel E ar Kir ñõn Jeova”

Bõtab, men in ear ke melelen bwe dri Israel ro rar lor joñok eo an Samuel im erom armij ro retiljek im ewor ibbeir juõn kõtan emmõn ibben Jeova? Jaab. Elikin jet ien, dri Israel ro rar bebe bwe rekõnan juõn men elaplok jen juõn dri kanan ñan ekajete ir. Rar kõnan bwe ren einwõt ailiñ ko jet ilo an wor air kiñ ñan iroij ioir. Jeova ear jiroñ Samuel bwe en kõtõbrõk kõnan eo air. Bõtab Samuel ear aikwij kalikar ñan dri Israel ro kin joñan an nana jerawiwi eo air. Ilo mol, rein rar karmijete Jeova, im jab Samuel wõt! Inem Samuel ear kirtok ir ñan air kweloklok ilo Gilgal.

Jen bar jeblak ñan ien eo ke Samuel ear konono ñan dri Israel ro ilo Gilgal. Ilo jikin in, Samuel ear kakememej dri Israel ro kin an kar tiljek wõt ilo aolepen an mour. Inem, Baibel eo ej ba: “Samuel e ar kir ñõn Jeova” im kajitõk ibben bwe en kõmman an jorur im wũt.—1 Samuel 12:17, 18.

Ewi wãwen an walok jorur im wũt ilo ien det? Ejañin kar walok men in! Armij ro remaroñ kar kwalok air berre ak kajirere, bõtab ear jab to air kõmmane men in. Ilo idriñ, ear jino an kilmej lañ. Ear jino an lap kõto im ear kokkure wit ko ilo jikin kallip ko. Ear lap an jorur im jino an wũt. Ewi wãwen an kar armij ro emakõt? ‘Armij ro rar kanuij mijõk Jeova im Samuel.’ Kiõ rar kile joñan an kar nana jerawiwi eo air.—1 Samuel 12:18, 19.

Kar Jeova im jab Samuel, eo im ear tõbar buruen armij rein renana. Jen ke ear drik ñan ien eo ebwijwõlã, Samuel ear tõmak im liki Anij eo an, im Jeova ear kejerammõn e. Ñan rainin, Jeova ejañin oktak. Ej wõnmanlok wõt im rejetake ro im rej kajeoñwe tõmak eo an Samuel.

[Kamelele eo Itulal]

[Pija ilo peij 17]

Meñe ear mijak, ak ilo tiljek Samuel ear kwalok nan in ekajet eo an Jeova ñan Ilai

[Pija ilo peij 18]

Samuel ear jar ilo tõmak im Jeova ear uake ilo an kõmman bwe en jorur im wũt