Eoktak Ke Baibõl̦ eo jãn Bok ko Jet?
“Jeje ko otemjej em̦õj letok kõn kakũrm̦ool an Anij, ej bareinwõt wõr tokjãer . . . , bwe armej karejeran Anij en weeppãn im em̦õj kakõm̦anm̦an e ñan jerbal em̦m̦an otemjej.”—2 Timote 3:16, 17.
JET armej rejjab errã kõn naan ko ilo 2 Timote 3:16, 17. Ak kwe? Ewi iaan men kein ilal̦ kwõj errã kake kõn wãween l̦õmn̦ak eo am̦ kõn Baibõl̦ eo?
• Ej juon bok me em̦m̦an aer kar je bwebwenato ko im naan ko ie
• Ej joñan wõt juon ippãn bok ko jet me rekwõjarjar
• Ej juon bok in ino̦ñ me ej katakin kõj ta eo ejim̦we im ta eo ebõd
• Ej Naan in Anij
Eaorõk ke men eo kwõj tõmake? Lale ta eo Baibõl̦ ej make ba: “Jabdewõt men ko ar jeje m̦okta, ar jeje kein katakin kõj, bwe kõj kõn kijenmej, im kõn aenõm̦m̦an jãn Jeje ko, en wõr ad kõjatdikdik.” (Rom 15:4) Baibõl̦ eo ej make ba bwe unin kar je naan ko ie ej ñan katakin kõj, kaenõm̦m̦an kõj, im letok ñan kõj kõjatdikdik.
Ñe Baibõl̦ eo en kar juon bok bajjek me em̦m̦an aer kar je ak baj juon iaan bok ko rekwõjarjar, kwõn kar ke tõmake? Bareinwõt, kwõn kar ke lõke Baibõl̦ eo ñan tõl im katakin eok kab baam̦le eo am̦ el̦aññe naan ko ie reoktak jãn men ko kwõj l̦õmn̦ak bwe rejim̦we? Im ñe Baibõl̦ eo en kar juon bok in ino̦ñ bajjek, kwõn kar ke bõk kaenõm̦m̦an im likũt am̦ kõjatdikdik ioon kallim̦ur ko ie?
Elõñ milien armej rar katak kõn Baibõl̦ im tõmak bwe ej juon bok ejejuan im ej Naan in Anij. Etke? Ta ko rej kõm̦m̦an bwe Baibõl̦ eo en oktak jãn jabdewõt bok? Eokwe ilo katak kein tok jet, jenaaj etale l̦alem men ko me rej kalikkar bwe Baibõl̦ eo eoktak jãn bok ko jet.