“Rar kõn̦aan bwe in make pukot im lo katak ko rem̦ool jãn Baibõl̦”

MOUR EO AÕ M̦OKTA:

Iar l̦otak ilo Santo Domingo, juon bukwõn ilo aelõñ in Dominican Republic. Ewõr 3 jeiõ im ña diktata. Ear l̦ap an jinõ im jema mãlõtlõt im rar kõn̦aan bwe komeañ ro jeiõ en rũttol̦o̦k ippãn armej ro me rem̦m̦an im rem̦ool. Ke ear emãn aõ iiõ, jinõ im jema rar iioon jet mijenede in Mormon. Erro ar bwilõñ kõn an likao rein erreo im jel̦ã m̦anit. Kõn men in, erro ar peek bwe baam̦le eo am en juon iaan baam̦le ko jinointata ilo Dominican Republic ñan erom kabuñ in Mormon.

Ke iar dik im rũttol̦o̦k ekar em̦m̦an ippa iien iukkure im kam̦õn̦õn̦õ ko ilo im̦õn jar eo am. Bareinwõt, ear em̦m̦an ippa kabuñ in kõnke el̦ap aer kaorõk mour in baam̦le im m̦wil ko rem̦m̦an. Iar m̦õn̦õn̦õ bwe iar juon Mormon im iar kõn̦aan erom juon iaan mijenede ro aer.

Baam̦le eo aõ ar em̦m̦akũt ñan Amedka ke ear 18 aõ iiõ bwe in wõnm̦aanl̦o̦k im jikuul̦ ilo juon university em̦m̦an. L̦o̦kun juon iiõ, lio jatin m̦am̦a im l̦eo ippãn rar lotok kõm ilo Florida. Erro ej Ri Kõnnaan ro an Jeova im rar kajjitõk ippem bwe kõmin etal ñan juon kweilo̦k el̦ap ippãer. Ke iar etal, iar bwilõñ kõn an aolep armej ro ãlõkl̦o̦k Baibõl̦ ko aer im jei naan ko me rar kõn̦aan keememeji. Kõn men in, iar bar jino kõm̦m̦an ãindein.

Ke ear jem̦l̦o̦k kweilo̦k el̦ap eo, lio jatin m̦am̦a im l̦eo ippãn rar ba bwe rem̦õn̦õn̦õ in jipañ eõ ñan jel̦ã kobban Baibõl̦ kõnke rar jel̦ã bwe iar kõn̦aan erom juon mijenede. Iar lukkuun m̦õn̦õn̦õ kõnke ilo kar tõre eo, el̦apl̦o̦k aõ kar jel̦ã kobban Bok eo an Mormon jãn Baibõl̦.

WÃWEEN AN KAR BAIBÕL̦ EO UKOT MOUR EO AÕ:

Ekkã an lio jatin m̦am̦a im l̦eo ippãn bwebwenato ippa kõn Baibõl̦ ilo talboon. Aolep iien rar rõjañ eõ bwe in keidi men ko iar tõmaki ippãn Baibõl̦. Rar kõn̦aan bwe in make pukot im lo katak ko rem̦ool ilo Baibõl̦.

Iar tõmak elõñ katak ko an Mormon bõtab iar jab jel̦ã ewi wãween katak kein rej errã ippãn Baibõl̦. Lio jatin m̦am̦a ear jilkintok juon bok etan Awake! an allõñ in Nobõm̦ba 8, 1995. Ri Kõnnaan ro an Jeova rar kõm̦m̦ane bok in im ekar wõr jet katak ko ie me rej kwal̦o̦k kõn tõmak ko an Mormon. Iar bwilõñ bwe iar jaje kõn elõñ iaan tõmak kein. Kõn men in, iar pukot kõmel̦el̦e ko ilo Web site eo an Mormon im lale el̦aññe em̦ool mel̦el̦e ko ilo bok eo lio jatin m̦am̦a ear jilkintok. Rar m̦ool, im iar bar kam̦oole ke iar etal im lale kõmel̦el̦e ko ilo museum ko an Mormon ilo Utah.

Kar m̦okta iar l̦õmn̦ak bwe katak ko ilo Bok eo an Mormon im Baibõl̦ rej errã ippãn doon. Bõtab, ke iar liñõri Baibõl̦ iar kile bwe ewõr tõmak ko an Mormon me rejjab errã ippãn Baibõl̦.

Iar inepata kõn an tõmak kein jab errã ippãn Baibõl̦ im kõn an Mormon ro katakin armej ro bwe ren lukkuun kautieje aelõñ ko aer. Ñan waanjoñak, rej ba bwe jikin kallib in Iden ear pãd ilo juon bukwõn ilo Missouri, Amedka. Bareinwõt, ri tõl in kabuñ in Mormon rej katakin armej ro bwe juon raan Anij enaaj kõjerbal kien an Amedka ñan irooj im tõl aolepen lal̦ in.

Iar kõn̦aan jel̦ã kõn ta eo ri tõl rein rej katakin armej kõn aelõñ eo me iar l̦otak ie im aelõñ ko jet ipel̦aakin lal̦ in. Juon boñ, juon likao me ej itõn erom juon mijenede in Mormon ear calle ña. Innem, iar kwal̦o̦k ñan e men kein me iar jino l̦õmn̦ak kaki. Iar kajju kajjitõk ippãn el̦aññe aelõñ eo an ej tarin̦aek bar juon aelõñ, enaaj ke kar etal im tarin̦aek Mormon ro jãn aelõñ eo juon. Iar bwilõñ ke ear uwaak im ba aet! Iar lukkuun etale tõmak ko an Mormon im iar bar kwal̦o̦k kajjitõk ko jet ippãn ri tõl in kabuñ in. Rar ba bwe rejjab maroñ uwaak im bwe enaaj alikkar uwaak ko ñe meram eo ej meraml̦o̦k wõt.

Iar bũrom̦õj im inepata kõn uwaak ko aer. Innem, iar lukkuun etale eõ make im kõl̦mãnl̦o̦kjen̦ kõn etke iar kõn̦aan erom juon mijenede in Mormon. Iar kile bwe juon iaan un ko unin iar kõn̦aan erom juon mijenede ej kõnke iar kõn̦aan jipañ armej ro jet. Un eo kein karuo ej kõnke iar jel̦ã bwe el̦aññe ij mijenede, armej ro jet renaaj kautiej im nõbar eõ. Iar jab l̦õmn̦ak kõn Anij, ilo m̦ool iar jab lukkuun jel̦ã kõn e. Meñe elõñ alen aõ baj lale Baibõl̦ eo, iar jab lukkuun kaorõke. Iar jaje kõn kõn̦aan eo an Anij kõn lal̦ in im armej ro.

WÃWEEN AÕ KAR BÕK TOKJÃN:

Iar katak elõñ men ko ke iar katak Baibõl̦ ippãn Ri Kõnnaan ro an Jeova. Jet iaaer ej kõn etan Anij, ta eo ej wal̦o̦k ñe juon armej ej mej, im kõn wãween eo me Anij ej kõjerbal Jijej ñan kajejjet ankilaan. Iar jino mel̦el̦e kõn katak ko ilo Baibõl̦ im iar lukkuun m̦õn̦õn̦õ in kwal̦o̦k kõn men ko iar katak kaki ñan ro jet. Meñe kar m̦okta iar jel̦ã bwe ewõr Anij, ak kiiõ ij jar ñan e im kõnnaan ippãn ãinwõt juon Jera. Iar peptaij im erom juon iaan Ri Kõnnaan ro an Jeova ilo Jul̦ae 12, 2004, im 6 allõñ tokãlik iar jino kwal̦o̦k naan 70 awa kajjojo allõñ.

Ium̦win 5 iiõ, iar jerbal ilo ra eo el̦ap an Ri Kõnnaan ro an Jeova ilo Brooklyn, New York. Iar lukkuun m̦õn̦õn̦õ ke iar maroñ kõm̦m̦an Baibõl̦ ko im bok ko jet me rej pedped ioon Baibõl̦ im rej jipañ elõñ milien armej ro ipel̦aakin lal̦ in. Im ij m̦õn̦õn̦õ wõt ñan jipañ armej ro jet ñan katak im jel̦ã kõn Anij.