Enana Ke im Lãj Wãween an Kar Anij Kajeik Armej Ro?

ÑAN uwaake kajjitõk in, jen etale ruo bwebwenato ko ilo Baibõl̦ me rej kwal̦o̦k an kar Anij kajeik armej ro. Iien kein ruo ej Ibwijleplep eo ilo raan ko an Noa im iien eo me Anij ear kajeik Ri Kenean ro.

IBWIJLEPLEP EO ILO RAAN KO AN NOA

MEL̦EL̦E KO AN JET ARMEJ: “Anij enana im lãj kõnke ear kõtl̦o̦k bwe aolep armej ro ren mej ilo Ibwijleplep eo, ijello̦kun wõt Noa im baam̦le eo an.”

EKKAR ÑAN BAIBÕL̦: Anij ear ba: “Ijjab m̦õn̦õn̦õ kõn mej an ri nana; ak em̦m̦anl̦o̦k ñe ri nana eo ej oktak jãn ial̦ eo an im mour.” (Ezekiel 33:11) Anij ear jab m̦õn̦õn̦õ ke armej ro ilo raan ko an Noa rar mej ilo ibwijleplep eo. Ak etke ear wõnm̦aanl̦o̦k im kõm̦m̦ane men in?

Baibõl̦ eo ej uwaak im kwal̦o̦k bwe ke Anij ear ko̦kkure armej ro renana ilo iien ko m̦okta, men in ear ãinwõt juon “joñak [ak kakkõl] ñan ro renaaj kõm̦m̦an nana tokãlik.” (2 Piter 2:5, 6) Bareinwõt, Baibõl̦ eo ej kõmel̦el̦e kõn wãween an Anij jerbal ak kõm̦m̦an ñan armej ro.

M̦oktata, meñe Anij elukkuun bũrom̦õj in ko̦kkure armej ro, ak ej loe ri nana ro me rej kaeñtaan ro jet im enaaj kaje er ekkar ñan kõm̦m̦an ko aer. M̦õttan jidik Anij enaaj jol̦o̦k kalijekl̦o̦k im eñtaan jãn lal̦ in.

Kein karuo, men ko me Anij ear kõm̦m̦ani m̦okta rej menin kakkõl ñan kõj. Men in ej kaalikkar an Anij yokwe armej ro kõnke ej kakkõl er ñan kõm̦m̦an oktak ko m̦okta jãn an kajeik er. Noa ear kakkõl armej ro, ak enañin aoleper rar jab roñjake. Baibõl̦ eo ej ba bwe rar jab roñjake im pokake m̦ae “tõre eo ibwijleplep ej itok, im bõkl̦o̦k er otemjej.”​—Matu 24:39.

Tokãlik, Anij ear bar kakkõl Ri Israel ro bwe ñe renaaj kõm̦m̦ani men ko renana ãinwõt armej in aelõñ ko jet, enaaj kõtl̦o̦k bwe aelõñ ko jet ren itok im tarin̦aek er, ko̦kkure Jerusalem, im kõm̦m̦an bwe ren ri kam̦akoko. Armej in Israel rar kõm̦m̦ani men ko renana. Joñan aer nana rar katok kõn ajri ro nejier ñan anij waan ko. Jeova ear ke ko̦kkure armej ro? Aet. Bõtab, m̦okta jãn an kar ko̦kkure er ear jilkinl̦o̦k ri kanaan ro an bwe ren kakkõl armej ro elõñ alen bwe ren oktak jãn men ko renana rej kõm̦m̦ani m̦okta jãn an ejjel̦o̦k iien. Joñan, ear ba: “Irooj Anij ejjab kõm̦m̦ane juon men el̦aññe ejjab kwal̦o̦k karõk eo an ñan ri kanaan ro karejeran.”​—Amos 3:7, UBS.

WÃWEEN AN MEN IN EJ JELÕT EOK: Men ko Jeova ear kõm̦m̦ani ilo iien ko m̦okta rej jipañ kõj bwe en wõr ad kõjatdikdik. El̦ap ad tõmak bwe m̦õttan jidik Anij enaaj ko̦kkure ro renana me rej kõm̦m̦an bwe en wõr eñtaan. Baibõl̦ ej ba: “Ro rej kõm̦m̦an nana renaaj jako . . . A ro ettã bũrueer renaaj jolõt ãne eo, im renaaj m̦õn̦õn̦õ kõn aenõm̦m̦an el̦ap.” (Sam 37:9-11) Anij enaaj ko̦kkure armej ro renana kõnke ekõn̦aan bwe armej ro rem̦m̦an ren jab bar eñtaan. Men in ej ke kaalikkar bwe Anij enana im lãj? Ak ej ke kwal̦o̦k bwe el̦ap tũriam̦o ippãn?

IIEN EO ANIJ EAR KAJEIK RI KENEAN RO

MEL̦EL̦E KO AN JET ARMEJ: “An kar Anij ko̦kkure Ri Kenean ro elukkuun kar nana im lãj im ejjel̦o̦k oktak jãn tarin̦ae ko raan kein me el̦ap an armej ro kalijekl̦o̦k im m̦an doon.”

EKKAR ÑAN BAIBÕL̦: “Jeova ej yokwe ekajet jim̦we.” (Sam 37:28) Jejjab maroñ keidi tarin̦ae ko an armej ñan wãween an kar Anij kaje armej ro ilo iien ko etto. Etke? Kõnke Anij emaroñ riiti bũruon im l̦õmn̦ak ko an armej ro. Ak armej ro rejjab maroñ kõm̦m̦ane men in.

Ñan waanjoñak, ke Anij ear ekajete Sodom im Gomorra im ba bwe enaaj ko̦kkure armej ro ijo, em̦m̦aan eo etiljek etan Ebream ear kwal̦o̦k an inepata ñan Anij. Ear kõn̦aan jel̦ã el̦aññe ejim̦we pepe in Anij ej pojak in kõm̦m̦ane. Ebream ear jab tõmak bwe Anij eo an enaaj kar “m̦an ro ri wãnõk ippãn ro ri jerawiwi.” Ak Anij ear kwal̦o̦k ñan e bwe ñe en kar wõr armej ro rem̦m̦an ilo Sodom, meñe jejjo wõt, ak eban kar ko̦kkure jikin in. (Jenesis 18:20-33) Ealikkar bwe Anij ear lale bũruon armej ro im loe bwe relukkuun nana.​—1 Kronikel 28:9.

Anij ear bar ekajete Ri Kenean ro im ear ba bwe enaaj ko̦kkure er kõn aer nana. Aolep rar jel̦ã bwe armej rein rar lukkuun nana im lãj. Joñan aer nana rar tile im katok kõn ajri ro nejier ñan anij waan ko aer meñe ajri ro rej mour wõt.a (Lale kõmel̦el̦e ko itulal̦.) (2 Kiiñ 16:3) Ri Kenean ro rar jel̦ã bwe Jeova ear kakien Ri Israel ro bwe ren bõk aolepen ãneo. Ri Kenean ro me rar jab kõn̦aan em̦m̦akũt jãn ãneo im rar tarin̦aek Ri Israel rar kaalikkar aer jum̦ae meñe rar jel̦ã kõn aolep kein kam̦ool ko bwe Jeova ej pãd ippãn Ri Israel ro.

Bõtab, Anij ear tũriam̦okake Ri Kenean ro me rar oktak jãn men ko renana rar kõm̦m̦ani im jino aer l̦oor kien ko an. Ñan waanjoñak, kar lo̦mo̦o̦ren Rehab, juon kõrã ekijoñ in Kenean. Kar bar lo̦mo̦o̦ren baam̦le eo an. Im ke armej ro ilo juon jikin ilo Kenean etan Gibeon rar kajjitõk an Ri Israel ro tũriam̦okake er, Anij ear jab ko̦kkure armej rein im ajri ro nejier.​—Joshua 6:25; 9:3, 24-26.

WÃWEEN AN MEN IN JELÕT EOK: Ewõr juon men eaorõk jemaroñ katak jãn an kar Anij kaje Ri Kenean ro. M̦õttan wõt jidik enaaj itok ‘raan eo naaj ekajete im ko̦kkure ro ri nana.’ (2 Piter 3:7, UBS) El̦aññe jej yokwe Jeova im kõm̦m̦ani men ko rejim̦we, jenaaj el̦l̦ã im mour ilo iien eo me enaaj kajem̦l̦o̦k eñtaan ilo an ko̦kkure ro me rej jum̦aeik e, meñe em̦m̦an im ejim̦we wãween an irooj.

Jeova ej kakeememej kõj bwe pepe ko rũtto ro rej kõm̦m̦ani rej jelõt ajri ro nejier. Naan in Anij ej ba: “Kom̦win kããlõt mour. Kom̦win yokwe Irooj ami Anij, im pokake e im tiljek ñane, innem kom̦ im ro ineemi kom̦ naaj mour.” (Duteronomi 30:19, 20, UBS) Ñe Anij enana im lãj, en kar ke ba naan kein? Eban kar. Naan kein rej kaalikkar an Anij kõn̦aan bwe jen kõm̦m̦ani pepe ko rem̦m̦an im bwe jen mour.