KAJJITÕK KO BAIBÕL̦ EJ UWAAKI

Jemaroñ ke mour ñan indeeo?

Em̦m̦aan eo m̦oktata, Adam, ear mour ium̦win elõñ bukwi iiõ ko. Bõtab, ear rũttol̦o̦k im mej. Jãn tõre eo tok ñan rainin, armej rej kajjioñ pukot kilen bwe ren jab rũttol̦o̦k. Meñe ãindein, ak aolep armej rej rũttol̦o̦k im mej. Etke? Kõnke Adam ear jerawiwi ilo an kar jab pokake Anij. Eñin unin ear rũttol̦o̦k im mej. Kõnke jaar aolep wal̦o̦ktok jãn Adam, jej bõdañe ilo ad jerawiwi. Eñin unin jej bar rũttol̦o̦k im mej.​—Riit Jenesis 5:5; Rom 5:12.

Bwe jen maroñ mour ñan indeeo, jej aikuji juon ñan an itok im kõl̦l̦ãik on̦ead ñan kanemkwõj kõj bwe en jako ad jerawiwi. (Job 33:24, 25, UBS) Ilo iien ko etto, ñe ewõr ruõn juon armej im ejjab kõn̦aan mej, emaroñ kõl̦l̦ã on̦ean bwe en mour wõt. (Exodus 21:29, 30, UBS) Jijej ear aje mour eo an kõn kõj ãinwõt juon kõl̦l̦ã ñan kanemkwõj kõj jãn jerawiwi.—Riit Jon 3:16.

Jej aikuj ta bwe jen maroñ mour indeeo?

Ejjab aolep renaaj bõk jeraam̦m̦an eo ñan mour indeeo. Armej ro me rejjab pokake Anij, ãinwõt kar Adam, reban mour ñan indeeo. Ro wõt me Anij enaaj jol̦o̦k jerawiwi ko aer renaaj mour indeeo.​—Riit Aiseia 33:24, UBS; 35:3-6, UBS.

Bwe Anij en jol̦o̦k jerawiwi ko ad, ewõr men ko jej aikuj kõm̦m̦ani. Jej aikuj katak Baibõl̦ bwe jen jel̦ã kajjien Anij. Baibõl̦ eo ej katakin kõj wãween jemaroñ m̦õn̦õn̦õ ilo mour ko ad im bareinwõt ej kwal̦o̦k ta ko jemaroñ kõm̦m̦ani ñan kabuñbũruon Anij im mour ñan indeeo.​—Riit Jon 17:3; Jerbal 3:19.