KAJJITÕK KO BAIBÕL̦ EJ UWAAKI

Anij ej ke eo̦roñ aolep jar ko?

Anij ej roñjake aolep jar ko an aolep armej ro jãn aelõñ otemjej. (Sam 145:18, 19) Naan ko an ilo Baibõl̦ rej rõjañ kõj ñan jar ñane kõn aolep apañ ko ad. (Pilippai 4:6, 7) Bõtab, ewõr jet jar me Anij ejjab m̦õn̦õn̦õ kaki. Ñan waanjoñak, Anij ejjab m̦õn̦õn̦õ ñe jej ãliji jar ko me jej kakkilõklõki.​—Riit Matu 6:7, UBS.

Bareinwõt, Jeova edike jar ko an ro me rejjab pokake kien ko an meñe rejel̦ã kaki. (Jabõn Kõnnaan 28:9, UBS) Ñan waanjoñak, ilo iien ko etto, Anij ear m̦akoko in eo̦roñ jar ko an Ri Israel ro me ewõr rueer kõn aer uror. Men in ej kaalikkar bwe ewõr men ko jej aikuj kõm̦m̦ani bwe Anij en eo̦roñ jar ko ad.​—Riit Aiseia 1:15.

Ta ko jej aikuj kõm̦m̦ani bwe Anij en eo̦roñ jar ko ad?

Ej aikuj wõr tõmak ippãd ñe jej jar ñan Anij. (Jemes 1:5, 6, UBS) Jej aikuj lukkuun tõmak ilo Anij im tõmak bwe ej yokwe im kaorõk kõj. Jej aikuj katak Baibõl̦ bwe en maroñ kajoorl̦o̦k tõmak eo ad. Menin kam̦ool ko im kallim̦ur ko ilo Baibõl̦ rej kõm̦m̦an bwe en pen im kajoor tõmak eo an juon armej.​—Riit Hibru 11:1, 6.

Jej aikuj jar ñan Anij ilo ettã bõro im ej aikuj itok jãn tum̦wilal̦ in bũruod. Meñe Jijej, eo im ej Nejin Anij, ak ear kwal̦o̦k an ettã bũruon ke ear jar ñan Anij. (Luk 22:41, 42) Kõn men in, ijello̦kun ad kwal̦o̦k ta ko Anij en kõm̦m̦ani ñe jej jar ñane, jej aikuj riit Baibõl̦ im kate kõj ñan mel̦el̦e kõn men ko ekõn̦aan bwe jen kõm̦m̦ani. Innem ñe jej jar ñan Anij, jar ko ad rej aikuj ekkar ñan ankilaan.​—Riit 1 Jon 5:14.