M̦õttan Jidik Armej ro Reban Bar Bũrom̦õj im Eñtaan!

JUON KIEN EM̦M̦AN ENAAJ TÕL KÕJ

“Anij in lañ enaaj kajutak juon aelõñ [ak kien] eo eban jako indeeo, im aelõñ in reban lel̦o̦k ñan armej ro jet. Enaaj kapedakilkil im ko̦kkure aolep aelõñ kein, im enaaj jutak ñan indeeo.”​—Daniel 2:44.

Aelõñ eo an Anij ej juon kien ilañ. Anij ear kããlõt Jijej Kũraij bwe en tõle kien in im enaaj bõk jikin aolep ri tõl ro an kien ko ilo lal̦ in. Jijej Kũraij enaaj kajejjet ankilaan Anij ilañ im bareinwõt ioon lal̦. (Matu 6:9, 10) Kien in eban jako im ejjel̦o̦k kien ijin ioon lal̦ enaaj bõk jikin kõnke kien in an Anij “ej pãd ñan indeeo, eo an ad Irooj im Ri Lo̦mo̦o̦r Jijej Kũraij.” Ealikkar bwe jenaaj aenõm̦m̦an ñan indeeo.​—2 Piter 1:11, UBS.

ENAAJ JAKO AOLEP KABUÑ KO RERIAB

“Setan emaroñ ukõt e make bwe en ãinwõt juon enjel̦ in meram! Innem ejjab juon men el̦ap el̦aññe ro ri karejeran Setan rej ukot er make bwe ren ãinwõt ri karejeran wãnõk. Ilo jem̦l̦o̦kin renaaj bõk leen jerbal ko aer.”​—2 Korint 11:14, 15, UBS.

Naaj kwal̦o̦k kõm̦m̦an ko renana an kabuñ ko reriab im enaaj alikkar bwe kabuñ kein rej an Tepil̦. Innem, Anij enaaj jol̦o̦k aolep kabuñ kein jãn lal̦ in. Enaaj jako an kabuñ ko kalijekl̦o̦k im tõl armej ñan m̦an ro jet. Kõn men in, aolep ro me rej yokwe “Anij eo emour im em̦ool” renaaj kabuñ ñan e ilo “m̦ool.” Im enaaj ‘juon wõt aer tõmak.’ Men in enaaj kõm̦m̦an bwe aolep armej ro ren aenõm̦m̦an im bõrokuk ippãn doon!​—1 Tessalonika 1:9; Jon 4:23; Epesõs 4:5.

AOLEP ARMEJ RO RENAAJ WÃNÕK IM WEEPPÃN

“Anij enaaj pãd ippãer, im Enaaj aer Anij. Im Enaaj kõm̦õrãik jãn mejãer dãnnin kõmjaal̦al̦ otemjej, im enaaj ejjel̦o̦k bar mej, im rejamin bar liaajlo̦l̦, ak jañ, ak eñtaan; bwe men ko m̦okta rejako.”​—Revelesõn 21:3, 4.

Jeova Anij enaaj kajejjete men in ikijjeen Nejin, Jijej, eo me ear mej kõn armej otemjej. (Jon 3:16) Ñe Jijej enaaj tõl armej ro, aolepeer renaaj weeppãn ãinwõt kar m̦okta ke Anij ear kõm̦anm̦an armej ro ruo m̦oktata. Ejjel̦o̦k armej renaaj bũrom̦õj im eñtaan kõnke “Anij enaaj pãd ippãer” im enaaj “kõm̦õrãik jãn mejãer dãnnin kõmjaal̦al̦ otemjej.” Armej ro renaaj wãnõk im weeppãn, im reban bar bũrom̦õj im eñtaan. Baibõl̦ ej ba: “Ro rem̦m̦an renaaj jolõt ãne eo, im jokwe ilowaan ñan indeeo.”​—Sam 37:29.

ENAAJ JAKO AOLEP ENJEL̦ RO RENANA

Jijej Kũraij “ear jibwe tũrãikõn eo, jedpãnit erũtto, eo ej Tepil̦ im Setan, im liãpe ium̦win juon to̦ujin iiõ, im ear jol̦o̦k e n̦a ilo abys eo, im kiili, im sil ioon, bwe en jab bar m̦on̦ ri aelõñ ko.”​—Revelesõn 20:2, 3.

Kũraij enaaj lukwõje Setan im enjel̦ ro an renana im enaaj jol̦o̦k er ilo “abys eo” ak jikin kalbuuj eo ilo kõkkar. Innem, enaaj jako aer kareel im kapo armej ro. Reban bar tõl armej ilo men ko rej kõm̦m̦ani. Jenaaj lukkuun m̦õn̦õn̦õ ñe kõj aolep ilo lal̦ in jej rõl̦o̦k jãn pein Setan im enjel̦ ro renana!

ENAAJ JEM̦L̦O̦K “RAAN KO ÃLIKTATA”

Enaaj jem̦l̦o̦k “raan ko ãliktata” ñe ej itok ‘eñtaan eo el̦ap’ me Jijej ear kõnono kake. Jijej ear ba: “Ilo iien eo enaaj el̦ap eñtaan, eo ejjañin ãinwõt jãn jinoin lal̦ ñan iien in, aet, ejãmin ãinwõt tokãlik.”​—Matu 24:21.

Unin an ba eñtaan eo el̦ap ej kõnke jorrããn ko me renaaj wal̦o̦k ilo tõre in renaaj kanooj l̦ap. Enaaj jem̦l̦o̦k aolep jorrããn kein rel̦l̦ap ilo “tarin̦ae in raan el̦ap, raan in Anij Ekajoor Otem Kajoor.” Etan tarin̦ae in ej “Armagedon.”​—Revelesõn 16:14, 16.

Armej ro ijoko otemjej me rej yokwe men ko rejim̦we, rej reim̦aanl̦o̦k wõt ñan iien eo me enaaj jem̦l̦o̦k aolep men ko renana ilo jukjukun pãd in. Jen kiiõ lale jet iaan jeraam̦m̦an ko me renaaj wal̦o̦k ñe jenaaj pãd ium̦win Aelõñ ak Kien eo an Anij.

ANIJ ENAAJ KAJERAAM̦M̦AN ARMEJ RO!

Juon “jar el̦ap” enaaj el̦l̦ã jãn eñtaan eo el̦ap im renaaj aenõm̦m̦an ilo lal̦ in: Naan in Anij ej ba bwe juon “jar el̦ap” me ejjel̦o̦k armej ej maroñ in bwine er, enaaj el̦l̦ã “jãn eñtaan eo el̦ap.” Innem renaaj mour ilo lal̦ in ekããl me ro rewãnõk renaaj pãd ie. (Revelesõn 7:9, 10, 14; 2 Piter 3:13, UBS) Aolepeer renaaj kile bwe Jijej Kũraij ej eo me ear lo̦mo̦o̦ren er. Baibõl̦ ej ba bwe ej “L̦aam̦ [ak Jiip] an Anij, Eo ej bõkl̦o̦k an lal̦ jerawiwi.”​—Jon 1:29.

Elõñ men ko rem̦m̦an jenaaj loi jãn an Anij katakin kõj: Ñe ekããl lal̦ in, enaaj “obrak kõn jel̦ã Jeova.” (Aiseia 11:9) Jeova Anij enaaj katakin kõj elõñ men ko. Jet iaaer ej kõn kilen ad aenõm̦m̦an ippãn aolep armej ro kab kilen kõjparok lal̦ in. Anij ej kallim̦ur im ba: “Ña Jeova am̦ Anij, Eo ewõr tokjãn An katakin eok, Eo ej tõl eok ilo ial̦ eo em̦m̦an kwõn etal ie.”​—Aiseia 48:17.

Ro remej renaaj bar mour: Ke Jijej ear pãd ijin ioon lal̦, ear kõmour l̦eo m̦õttan etan Lazerõs ke ear mej. (Jon 11:1, 5, 38-44) Men in me Jijej ear kõm̦m̦ane ej kwal̦o̦k bwe enaaj bar kõmour ak kõjerkak ro remej ñe jenaaj pãd ium̦win kien eo an Anij.​—Jon 5:28, 29, UBS.

Jenaaj aenõm̦m̦an im wãnõk ñan indeeo: Ium̦win tõl eo an Kũraij, ejjel̦o̦k armej enaaj kõm̦m̦ani men ko renana. Jejaam̦ ba men in? Kõnke Jijej ej lo bũruon armej. Kõn men in, enaaj ekajet armej ro im jel̦ã wõn ro rem̦m̦an jãn ro renana. Ro me renaaj m̦akoko in ukõt mour ko aer renaaj jako jãn lal̦ eo ekããl an Anij.​—Sam 37:9, 10; Aiseia 11:3, 4, UBS; 65:20, UBS; Matu 9:4.

Ekanooj em̦m̦an kanaan kein jej kab kõnono kaki. Ak rej baj jet wõt iaan kanaan ko ilo Baibõl̦ me rej kwal̦o̦k kõn ilju im jekl̦aj. Ñe aolep armej ro ilo lal̦ in renaaj pãd ium̦win tõl eo an kien eo an Anij, er otemjej “renaaj m̦õn̦õn̦õ kõn aenõm̦m̦an el̦ap” ñan indeeo. (Sam 37:11, 29) Aolep men ko me rej kõm̦m̦an an armej ro bũrom̦õj im eñtaan renaaj jako. Jemaroñ tõmak im lõke men in kõnke Anij ej make kallim̦ur im ba: “Kiiõ ij kõkããl men otemjej! . . . Naan kein rem̦ool im kwõmaroñ lõki.”​—Revelesõn 21:5, UBS.