Kõm̦m̦ani Pepe ko Rem̦m̦antata ilo Iien eo Em̦m̦an Dettam̦

1. Ta ko elõñ likao im jiroñ ro rej kõm̦m̦ani?

RAAN kein jej mour ie rej raan ko el̦ap aer aorõk im kãitoktoklimo. Ilo raan kein ad, ej kab tõn wõr elõñ milien armej ro jãn aolep aelõñ ko rej kiiõ kabuñ ñan Jeova. (Revelesõn 7:9, 10) Elõñ likao im jiroñ ro rej bõk kun̦aaer ñan kũr ro jet ñan “bõk dãnnin mour ejej on̦ean,” im rej iioon elõñ men ko rem̦m̦an jãn aer kõm̦m̦ane jerbal in. (Revelesõn 22:17) Jodrikdrik rein rej jipañ armej ro kakõm̦anm̦anl̦o̦k mour ko aer ilo aer katak Baibõl̦ ippãer. Jet iaaer rej kate er ñan katak bar juon kajin im rej kwal̦o̦k naan kõn nuuj eo em̦m̦an ilo jikin ko armej ro ie rej kõnono ilo kajin in. (Sam 110:3; Aiseia 52:7, UBS) Ta ko kwõj aikuj kõm̦m̦ani bwe kwõn maroñ bõk kun̦aam̦ ilo jerbal in ekam̦õn̦õn̦õ?

2. Elemen an bwebwenatoun Timote kaalikkar bwe Jeova em̦õn̦õn̦õ in lel̦o̦k eddo ak jerbal ko ñan likao im jiroñ ro? (Lale pija eo itulõñ.)

² Kiiõ ke kwõj juon jodrikdrik, kwõmaroñ kõm̦m̦ani pepe ko me renãj tokãlik tõl eok ñan am̦ bõk jeraam̦m̦an ko ilo jerbal eo an Jeova. Ñan waanjoñak, Timote ear kõm̦m̦an pepe ko rem̦m̦an ke ear juon jodrikdrik wõt. Im ke ear bõlen 20 jim̦a an iiõ, ear maroñ bõk jerbal in mijinede. (Jerbal 16:1-3) Bõlen jejjo wõt allõñ jãn iien in, Paul ear kajjitõk ippãn Timote bwe en etal ñan eklejia eo ekããl ilo Tessalonika kõnke Kũrjin ro ijo rar iioon jum̦ae im eñtaan. Armej in bukwõn in rar kadiwõjl̦o̦k Paul jãn jikin in. Kõn men in, ear kwal̦o̦k an lõke Timote ke ear jilkinl̦o̦ke bwe en kakajoor Kũrjin ro ilo Tessalonika. (Jerbal 17:5-15; 1 Tessalonika 3:1, 2, 6) Joñan in Timote ear lukkuun m̦õn̦õn̦õ ke kar lel̦o̦k jerbal in ñane!

PEPE EO AM̦ EAORÕKTATA

3. (1) Ta pepe eo eaorõktata kwõmaroñ kõm̦m̦ane ilo mour eo am̦? (2) Im ñããt ej iien eo em̦m̦antata ñan kõm̦m̦ane pepe in?

³ Iien eo em̦m̦an ñan am̦ kõm̦m̦ani pepe ko raorõk ej kiiõ ke kwõj jodrikdrik wõt. Innem, ta pepe eo eaorõktata kwõmaroñ kõm̦m̦ane ilo mour eo am̦? Ej pepe eo ñan jerbal ñan Jeova. Ñããt ej iien eo em̦m̦antata ñan kõm̦m̦ane pepe in? Eokwe, Jeova ej jiroñ eok bwe kwõn keememej e ilo iien eo em̦m̦an dettam̦. (Ekklisiastis 12:1, UBS) Wãween eo wõt kwõj kaalikkar bwe kwõj keememej Jeova ej ilo am̦ jerbal ñane kõn aolepen bũruom̦. (Duteronomi 10:12) Eñin ej pepe eo am̦ eaorõktata. Etke? Ej kõnke pepe in enãj jelõt eok ilo aolepen mour eo am̦.​—Sam 71:5.

4. Ta pepe ko raorõk renãj jelõt wãween am̦ jerbal ñan Anij?

⁴ Elõñ bar pepe ko jet me renãj jelõt ilju im jekl̦aj eo am̦. Ñan waanjoñak, kwõnãj aikuj pepe el̦aññe kwõnãj m̦are, kain armej rot kokõn̦aan m̦areiki, im jerbal rot kwõnãj kõm̦m̦ane ñan kabwe aikuj ko am̦. Pepe kein relukkuun bar aorõk. Bõtab, kwõj aikuj m̦okta pepe el̦aññe kwõnãj jerbal ñan Jeova kõn aolepen bũruom̦. (Duteronomi 30:19, 20, UBS) Etke? Kõnke jabdewõt pepe kwõj kõm̦m̦ane enãj jelõt pepe ko jet am̦. Ñan waanjoñak, pepe eo am̦ kõn m̦are im jerbal renãj jelõt wãween am̦ jerbal ñan Anij. Bareinwõt, pepe eo am̦ ñan jerbal ñan Anij enãj jelõt pepe ko am̦ kõn m̦are im jerbal. (Lale Luk 14:16-20, UBS.) Kõn men in, kwõn pepe ippam̦ make kõn ta eo enãj em̦m̦antata ak aorõktata ilo mour eo am̦.​—Pilippai 1:10, UBS.

TA KO KWÕNÃJ KÕM̦M̦ANI KIIÕ KE KWÕJ JODRIKDRIK WÕT?

5, 6. Elemen an bwebwenatoun Yuichiro kaalikkar bwe pepe ko rem̦m̦an jej kõm̦m̦ani renãj tõl kõj ñan bõk jeraam̦m̦an ko tokãlik ilo jerbal eo an Jeova?

⁵ Ñe em̦õj am̦ pepe ñan jerbal ñan Jeova, eokwe kiiõ lale ta eo ekõn̦aan bwe kwõn kõm̦m̦ane. Innem, pepe kõn elemen am̦ nãj kõjerbal mour eo am̦ ñan jerbal ñane. Juon jeid im jatid em̦m̦aan ilo Jepaan ear je im ba: “Ke ear 14 aõ iiõ, iar kwal̦o̦k naan juon iien ippãn juon em̦m̦aan ej lale eklejia. Em̦m̦aan in ear kile bwe ijjab m̦õn̦õn̦õ ilo aõ kar kwal̦o̦k naan. Innem, ilo jouj ear ba ñan ña: ‘Kwõjel̦ã ta Yuichiro? Em̦m̦an kwõn ro̦o̦l ñan m̦weo im jijet im kõl̦mãnl̦o̦kjen̦ kõn men ko rem̦m̦an Jeova ear kõm̦m̦ani ñan kwe.’ Iar roñjake men eo ear ba. Ilo m̦ool, iar jar im l̦õmn̦ak kake men in ium̦win jet raan. Jidik kõn jidik, ear oktakl̦o̦k wãween aõ watõk jerbal in kwal̦o̦k naan. Ejjabto tokãlik, iar lo m̦õn̦õn̦õ ilo aõ jerbal ñan Jeova. Em̦m̦an kar ippa riiti bwebwenatoun mijinede ro, im kõn men in iar jino lukkuun l̦õmn̦ak kõn elemen aõ maroñ kal̦apl̦o̦k aõ jerbal ñan Anij.”

⁶ Yuichiro ear jino kõm̦m̦ani pepe ko rem̦m̦an. Kõn men in, tokãlik ear maroñ jerbal ñan Jeova ilo bar juon aelõñ. Ear ba: “Iar pepe in katak kajin Pãlle ilo jikuul̦. Innem, ke iar kadiwõjl̦o̦k jãn high school, iar jerbal part-time bwe in maroñ in pioneer. Jerbal eo aõ kar jerbal in katakin ro jet kajin Pãlle. Ke ear 20 aõ iiõ, iar jino katak kajin Mongolia. Im tokãlik iar baj lol̦o̦k juon kumi in ri kwal̦o̦k ro me rej kõnono kajin Mongolia. Ruo iiõ tokãlik ilo 2007, iar jam̦bo l̦o̦k ñan aelõñ in Mongolia ilo Esia. Ke iar kwal̦o̦k naan ippãn jet pioneer ro ijo im lo an elõñ armej kõn̦aan katak bwe ren jel̦ã m̦ool eo, iar kõn̦aan jokwe ijin im jipañ ilo jerbal in kwal̦o̦k naan. Kõn men in, iar jepl̦aak ñan Jepaan im kõpooji men ko ij aikuji ñan aõ em̦m̦akũtl̦o̦k im jokwe ilo Mongolia. Iar jino pioneer ilo jikin in jãn Eprõl 2008. Ejjab pidodo mour ijin. Bõtab, armej rej m̦õn̦õn̦õ in roñjake nuuj eo em̦m̦an, im imaroñ jipañ er ñan ejaak juon kõtaan epaak ippãn Jeova. Ij kile bwe iar kããlõt wãween mour eo me ej make wõt im em̦m̦antata.”

7. (1) Ta pepe ko kwe make kwõj aikuj kõm̦m̦ani? (2) Im ta eo jemaroñ katak jãn joñak eo an Moses?

⁷ Kwe eo kwõj aikuj make pepe kõn elemen am̦ nãj kõjerbal mour eo am̦ ñan jerbal ñan Jeova. (Joshua 24:15) Kõmij jab maroñ jiroñ eok bwe kwõn m̦are ak jab m̦are, im kõn wõn armej eo kwõj aikuj m̦areiki ak jab m̦areiki. Bareinwõt, kõmij jab maroñ jiroñ eok kõn kain jerbal rot eo kwõj aikuj bõke ñan kabwe aikuj ko am̦. Kwõnãj ke pukot juon jerbal me eban bõk aolep iien ko am̦ ñan katak kilen kõm̦m̦ane? Bõlen jet iaami kom̦ij jokwe ilo jikin ko epen mour ie, ak ro jet rej jokwe ilo jikin ko me rem̦weiie. Kom̦ jodrikdrik ro ipel̦aakin lal̦ in, kom̦ij aolep oktak jãn doon. Ebar oktak maroñ im kapeel ko ami im men ko kom̦ij itoklimo kaki. Bareinwõt, eoktak mejãnkajjik ko ami me renãj kakajoor kõtaan eo ami ippãn Jeova. Ami oktak jãn doon ej ãinwõt an kar Moses oktak jãn jodrikdrik in Hibru ro jet ilo kar Ijipt. Kõnke lio nejin Pero ear bõk Moses bwe en nejin, Moses ear m̦weiie. Bõtab, jodrikdrik ro jet me er Ri Hibru rar ri kam̦akoko ilo Ijipt. (Exodus 1:13, 14; Jerbal 7:21, 22) Ãinwõt kwe, rein rar aikuj kõm̦m̦ani pepe ko raorõk ilo mour ko aer ke rar jodrikdrik. (Exodus 19:4-6) Bõtab, kajjojo rar aikuj make pepe el̦aññe renãj jerbal ñan Jeova kõn aolepen bũrueer. Moses ear kõm̦m̦ane pepe eo ejim̦we ke ear pepe ñan kõm̦anm̦an ankilaan Jeova.​—Riit Hibru 11:24-27.

8. Bwe kwõn maroñ kõm̦m̦ani pepe ko rem̦m̦an, ia eo kwõmaroñ bõk jipañ jãne?

⁸ Jeova ej jipañ jodrikdrik ro ñan kõm̦m̦ani pepe ko rem̦m̦an. Elemen an kõm̦m̦ane men in? Ej ikijjeen an letok naan in kakapilõk ko jãn Baibõl̦. Ej katakin er naan in kakapilõk kein bwe ren maroñ l̦oori jekdo̦o̦n ta wãween eo rej iioone. (Sam 32:8, UBS) El̦aññe kwõjjab lukkuun jel̦ã elemen am̦ nãj l̦oore juon iaan naan in kakapilõk ko an, eokwe kwõmaroñ kajjitõk jipañ ippãn rũtto ro jem̦am̦ im jinem̦. Ak kwõmaroñ bar kajjitõk jipañ ippãn em̦m̦aan ro rej lale eklejia. (Jabõn Kõnnaan 1:8, 9) Jen etale jilu naan in kakapilõk ko ilo Baibõl̦ me remaroñ jipañ eok ñan kõm̦m̦ani pepe ko rem̦m̦an kiiõ.

JILU NAAN IN KAKAPILÕK JÃN BAIBÕL̦ ME REMAROÑ JIPAÑ EOK

9. (1) Elemen an Jeova kwal̦o̦k bwe ej kautiej kõj? (2) Ta eo enãj wal̦o̦k ñan kwe ñe kwõnaaj pukot m̦okta Aelõñ eo an Anij?

⁹ Pukot m̦okta Aelõñ eo an Anij im kwõjarjar eo an. (Riit Matu 6:19-21, 24-26, 31-34.) Jeova ej kwal̦o̦k an kautiej eok ilo an kõtl̦o̦k bwe kwõn make pepe kõn elemen am̦ nãj kõjerbale iien ko am̦. Ejjab ba bwe kwõj aikuj kõjerbal aolepen iien ko am̦ ñan kwal̦o̦k naan. Bõtab, Jijej ear katakin kõj aorõkin ad likũt Aelõñ eo an Anij m̦oktata. Ñe kwõj pukot m̦okta Aelõñ eo an Anij, elõñ jeraam̦m̦an ko renãj pel̦l̦o̦k ñan kwe ilo jerbal eo an Jeova. Kõn men in, enãj lõñ wãween ko kwõmaroñ kõm̦m̦ani ñan kwal̦o̦k am̦ yokwe Jeova im armej, im am̦ kam̦m̦oolol kõn kõjatdikdik eo kõn mour indeeo. Innem, el̦aññe kwõj l̦õmn̦ak in m̦are ak kappok am̦ jerbal, em̦m̦an bwe kwõn lukkuun lale. Im etale ñe pepe ko am̦ renãj kõm̦m̦an bwe kwõn lukkuun poub in kabwe aikuj ko am̦ jãn am̦ “pukot m̦okta Aelõñ in Anij, im kwõjarjar eo An.”

10. (1) Ta eo ear kõm̦m̦an an Jijej m̦õn̦õn̦õ? (2) Im ta eo kwõj aikuj kõm̦m̦ane bwe kwõn bar m̦õn̦õn̦õ?

¹⁰ Kwõnãj lo m̦õn̦õn̦õ ilo am̦ jipañ ro jet. (Riit Jerbal 20:20, 21, 24, 35.) Naan kein rem̦ool aolep iien. Jijej ear katakin armej ro kõn men in. Eñin unin ear jerbal ñan Jemãn ilo an kar kõm̦anm̦an Ankilaan im jipañ ro jet ilo an kar katakin er kõn nuuj eo em̦m̦an. Jijej ear lukkuun m̦õn̦õn̦õ ilo an kar kõm̦m̦ani men kein. (Luk 10:21; Jon 4:34) Bõlen kwõj bar lo m̦õn̦õn̦õ ilo am̦ jipañ ro jet. Kõn men in, kwõn kõm̦m̦an pepe ko ekkar ñan naan in kakapilõk ko an Jijej. Ilo am̦ nãj kõm̦m̦ane men in, kwõnãj lukkuun m̦õn̦õn̦õ im bareinwõt Jeova enãj m̦õn̦õn̦õ.​—Jabõn Kõnnaan 27:11.

11. (1) Etke ear jako an Baruk m̦õn̦õn̦õ? (2) Im ta eo Jeova ear jiroñe bwe en kõm̦m̦ane?

¹¹ Enãj l̦aptata ad m̦õn̦õn̦õ ñe jej kõjerbal mour eo ad ñan jerbal ñan Jeova. (Jabõn Kõnnaan 16:20, UBS) Bõtab Baruk, ri jeje eo an Jeremaia, ear mel̦o̦kl̦o̦k men in. Ear wõr juon iien me ear jako an kar m̦õn̦õn̦õ in jerbal ñan Jeova. Ear jino l̦apl̦o̦k an l̦õmn̦ak kõn ta ko ekõn̦aan jãn ta eo Jeova ekõn̦aan. Jeova ear kile men in ippãn Baruk. Kõn men in ear jiroñe bwe en bõjrak jãn an ‘pukot men ko rel̦l̦ap ñan e.’ Im Jeova ear ba bwe ñe Baruk ej pokake, eokwe enãj el̦l̦ã im mour jãn jorrããn eo me enãj ko̦kkure Jerusalem. (Jeremaia 45:3, 5) Ta eo enãj l̦apl̦o̦k an kõm̦m̦an bwe Baruk en m̦õn̦õn̦õ? Jibadek m̦weiuk ko an lal̦ in ke im jorrããn tokãlik? Ak an pokake Jeova im mour jãn jorrããn eo ear wal̦o̦k ñan Jerusalem?​—Jemes 1:12.

12. Ta pepe ko Ramiro ear kõm̦m̦ani me ear jipañe lo m̦õn̦õn̦õ ilo mour eo an?

¹² Juon eo me ej lo m̦õn̦õn̦õ ilo an jipañ ro jet ej juon jeid im jatid em̦m̦aan etan Ramiro. Ear ba: “Iar dik im rũttol̦o̦k ilo juon bukwõn ilo tol̦ ko me rej n̦aetan Andes Mountain ilo aelõñ in Bolivia. Baam̦le eo aõ rar jerata. Innem, ke l̦eo jeiũ ear ba bwe enãj kõl̦l̦ã on̦ean aõ etal ñan college, ear juon jeraam̦m̦an kileplep ñan aõ maroñ jipañ baam̦le eo aõ. Bõtab, ej kab m̦õj aõ peptaij ãinwõt juon Ri Kõnnaan an Jeova im juon pioneer ekar kajjitõk ippa el̦aññe ikõn̦aan etal ippãn im kwal̦o̦k naan ilo juon bukwõn edik. Innem iar etal ippãn. Iar katak kilen m̦wijbar, im iar kepel̦l̦o̦k juon aõ peejnej in m̦wijbar ilo jikin in ñan kabwe aikuj ko aõ. Ke kom̦ro ear kwal̦o̦k naan im kajjitõk ippãn armej ro ñe rekõn̦aan katak Baibõl̦, elõñ armej ilo bukwõn in rar itoklimo in roñjake im katak. Tokãlik, iar em̦m̦akũt ñan juon eklejia me ej kab m̦õj an jutak im rej kõnono ilo kajin eo aõ. Joñoul iiõ kiiõ in aõ jerbal ãinwõt juon pioneer. El̦ap aõ m̦õn̦õn̦õ ilo aõ jipañ armej ro ñan katak kõn nuuj eo em̦m̦an ilo kajin eo aer. Ejjel̦o̦k bar juon men emaroñ kõm̦m̦an aõ m̦õn̦õn̦õ ñan joñan in.”

13. Ta iien eo em̦m̦antata ñan am̦ jerbal ñan Jeova kõn aolepen bũruom̦, im etke?

¹³ Kwõn m̦õn̦õn̦õ in jerbal ñan Jeova. (Riit Ekklisiastis 12:1, UBS.) Jab l̦õmn̦ak bwe kwõj aikuj pukot juon jerbal em̦m̦an m̦okta jãn am̦ jino pioneer. Iien eo em̦m̦antata ñan jino jerbal ñan Jeova kõn aolep bũruom̦ ej kiiõ ke kwõj juon jodrikdrik. Etke? Kõnke ejjañin wõr am̦ baam̦le im em̦m̦an ãjmour eo am̦, im kwõkajoor ñan kõm̦m̦ani jerbal ko remaroñ pen. Ta eo kokõn̦aan kõm̦m̦ane ñan Jeova ilo mour eo am̦? Bõlen mejãnkajjik eo am̦ ej ñan pioneer. Im bõlen kokõn̦aan kwal̦o̦k naan ippãn armej ro rej kõnono bar juon kajin. Ak bõlen kokõn̦aan kal̦apl̦o̦k ijo kun̦aam ñan jipañ im rejetake eklejia eo am̦. Jekdo̦o̦n ta mejãnkajjik eo kwõj kõn̦aan jibadeke, ak kwõj aikuj jerbal bwe kwõn maroñ kabwe aikuj ko am̦. Kõn men in, em̦m̦an kwõn kajjitõk ippam̦ make: ‘Kain jerbal rot inãj kããlõte? Ewi toon aõ nãj ekkatak kilen kõm̦m̦ane jerbal in?’

L̦OORE NAAN IN KAKAPILÕK KO JÃN BAIBÕL̦ ÑAN KÕM̦M̦ANI PEPE KO REM̦M̦AN

14. Etke kwõj aikuj kõjparok ñe kwõj kappok am̦ jerbal?

¹⁴ Naan in kakapilõk ko jilu jãn Baibõl̦ me jaar etali renãj lukkuun jipañ eok. Elemen aer nãj jipañ eok? Eokwe, renãj jipañ eok ñan am̦ pukot juon jerbal me eban kapañ eok. Bõlen juon armej me kwõjel̦ã kajjien emaroñ ba ñan kwe kõn juon jerbal epel̦l̦o̦k. Ak bõlen kwõmaroñ lo ilo nuujpeba ko kõn jerbal ko repel̦l̦o̦k ilo jikin eo kwõj pãd ie ak ilo aelõñ eo kwõnãj em̦m̦akũtl̦o̦k im jipañ ie. Wãween kein remaroñ lukkuun jipañ eok, ak em̦m̦an kwõn bar kõjparok. Etke? Kõnke armej ro me rejjab yokwe Jeova remaroñ kareel eok ñan kõn̦aan men ko an lal̦ in. (1 Jon 2:15-17) Ñe kwõj l̦õmn̦ak kõn menin karreelel ko an lal̦ in ikijjeen jikin jerbal, kwõn keememej bwe bũruom̦ emaroñ m̦on̦e eok im kõm̦m̦an bwe en pidodo am̦ po.​—Riit Jabõn Kõnnaan 14:15; Jeremaia 17:9.

15, 16. Wõn ro remaroñ lewaj naan in kakapilõk ko rem̦m̦an im jejjet ikijjeen jerbal?

¹⁵ Ãlikin am̦ jel̦ã ta jerbal ko repel̦l̦o̦k ñan eok, kwõn kiiõ kappok naan in kakapilõk ko me remaroñ jipañ eok. (Jabõn Kõnnaan 1:5) Wõn ro remaroñ jipañ eok ñan jel̦ã ewi wõt jerbal eo em̦m̦an im ejejjet ñan naan in kakapilõk ko jãn Baibõl̦? Ej ro rej yokwe Jeova im rej yokwe eok. Im rejel̦ã aolep men kõn kwe ekoba wãween ko kwõj iiooni. Rein renãj jipañ eok ñan lukkuun etale kwe make im kile joñan maroñ ko am̦ el̦aññe kwõmaroñ kõm̦m̦ane jerbal eo ak el̦aññe jerbal eo in me kwõnãj kõn̦aan kõm̦m̦ane. Bõlen renãj ba bwe kwõn bar lukkuun etale mejãnkajjik ko am̦. El̦aññe jem̦am̦ im jinem̦ rej yokwe Jeova, renãj kakapilõk eok ñan kõm̦m̦ane pepe eo ejim̦we. Bareinwõt, em̦m̦aan ro rej lale eklejia renãj lewaj naan in kakapilõk ko rejejjet im em̦m̦an. Kajjitõk ippãn pioneer ro im ro rej lol̦o̦k eklejia ko etke rar pepe ñan kõjerbal iien im maroñ ko aer ñan jerbal ñan Jeova. Ta ko rar kõm̦m̦ani bwe ren kar maroñ jino pioneer? Ta kar jerbal ko rar kõm̦m̦ani ñan kabwe aikuj ko aer? Ta jeraam̦m̦an ko rej loi kõn aer kõjerbal mour eo aer ñan jerbal ñan Jeova?​—Jabõn Kõnnaan 15:22, UBS.

¹⁶ Ro me relukkuun jel̦ã kajjiem remaroñ lewaj naan in kakapilõk ko rejim̦we im jejjet ñan kwe. Ñan waanjoñak, jen ba bwe kokõn̦aan jol̦o̦k am̦ high school im jino pioneer. Ak unin am kõn̦aan kõm̦m̦ane men in ej kõnke kwõñate an bwijin katak im homework ilo jikin jikuul̦. Eokwe, ñe armej eo ej yokwe eok ej kile bwe eñin unin am̦ jol̦o̦k am̦ jikuul̦, enãj lewaj naan in kakapilõk ko ñan jipañ eok. Enãj jipañ eok ñan kile bwe eaorõk jikuul̦ kõnke enãj katakin eok ñan jel̦ã kijenmej im jab m̦õkaj in ebbeer. Eaorõk men in kõnke el̦aññe kokõn̦aan jerbal ñan Jeova ñan indeeo, kwõj aikuj in jel̦ã kijenmej.​—Sam 141:5, UBS; Jabõn Kõnnaan 6:6-10.

17. Kain jerbal rot eo kwõj aikuj kõjparok eok jãne?

¹⁷ Aolep ro rej jerbal ñan Jeova renãj baj iiooni wõt mãlejjoñ ko me remaroñ kam̦õjn̦o̦ik tõmak eo aer im kattol̦o̦k kõtaan eo aer ippãn Jeova. (1 Korint 15:33, UBS; Kolosse 2:8, UBS) Ewõr jet jerbal me emaroñ pidodo aer kajorrããn tõmak eo am̦ jãn jerbal ko jet. Bõlen ewõr jet me kwõjel̦ã kake er im ear jorrããn tõmak eo aer ãlikin wõt aer kar bõk juon jerbal me ejjab lukkuun em̦m̦an ñan er. (1 Timote 1:19) Kõn men in, el̦aññe kwõj kõjparok eok jãn jerbal ko me renãj ko̦kkure jem̦jerã eo am̦ ippãn Jeova, men in enãj kaalikkar am̦ mãlõtlõt.​—Jabõn Kõnnaan 22:3.

KORTOKJÃN IIEN AM̦ JODRIKDRIK

18, 19. El̦aññe kwõjjañin kõn̦aan pioneer, ta eo kwõmaroñ kõm̦m̦ane?

¹⁸ El̦aññe kwõj m̦ool ilo am̦ kõn̦aan jerbal ñan Jeova, kwõn kortokjãn iien am̦ jodrikdrik ñan jerbal ñan e. Kwõn kõm̦m̦ani pepe ko me remaroñ jipañ eok ñan lo m̦õn̦õn̦õ ilo am̦ jerbal ñan Anij ilo iien ko ejja em̦m̦an dettam̦.​—Sam 148:12, 13.

¹⁹ Ta el̦aññe kwõjjañin kõn̦aan pioneer ak kal̦apl̦o̦k ijo kun̦aam ilo jerbal eo an Jeova? Eokwe, jab m̦õkaj in ebbeer ak kwõn kate wõt eok ñan kakajoorl̦o̦k am̦ lõke Jeova. Paul ear kwal̦o̦k kõn men eo ear kõm̦m̦ane bwe Jeova en kajeraam̦m̦ane. Ear ba: “El̦aññe ewõr iaami ej mour ilo bar juon wãween, Anij enãj kaalikkare men in ñan kom̦. Innem, jen wõnm̦aanl̦o̦k wõt ekkar ñan katak ko jaar l̦oori m̦aantak ñan kiiõ.” (Pilippai 3:15, 16, UBS) Keememej bwe Jeova ej yokwe eok. Naan in kakapilõk ko an rej make wõt em̦m̦antata. Kõn men in, kõtl̦o̦k bwe en jipañ eok kõm̦m̦ani pepe ko rem̦m̦antata kiiõ ke ejja em̦m̦an dettam̦.