Kajjitõk Ko Baibõl̦ Ej Uwaaki

Lal̦ in epãd ium̦win maroñ eo an wõn?

Elõñ armej rej tõmak bwe Anij eo em̦ool ej tõl men ko otemjej ilo lal̦ in. Ak ñe ear m̦ool men in, en kar ke l̦ap eñtaan ilo lal̦ in? (Duteronomi 32:4, 5, UBS) Baibõl̦ ej ba bwe lal̦ in epãd ium̦win maroñ eo an juon eo me enana.​—Riit 1 Jon 5:19, UBS.

Ta bwe lal̦ in en pãd ium̦win maroñ eo an rinana in? Ilo kar jinoin ke Anij ear jino kõm̦anm̦an armej, ear wõr juon enjel̦ me ear jum̦aik Anij. Enjel̦ in ear kapo armej ro ruo m̦oktata bwe ren jum̦ae. (Jenesis 3:1-6) Armej rein rar kããlõt ñan pokake enjel̦ in me n̦aetan Setan. Kõnke rar pokake Setan, rar kããlõt bwe en aer irooj im rũtõl. Anij eo eutiejtata ej Rũtõl eo ejim̦we im ekkar bwe jen pokake. Meñe ãindein, ak Anij ejjab iuuni armej ro bwe ren kããlõt E bwe en tõl mour ko aer. Ekõn̦aan bwe armej ro ren make kããlõt E bwe en tõl er kõnke rej yokwe E. (Duteronomi 6:6; 30:16, 19, UBS) Ekabũrom̦õjm̦õj bwe em̦õj an Setan m̦on̦e im tõlpiloik enañin aolep armej ro bwe ren jab pokake Anij, ãinwõt an kar armej ro ruo m̦oktata po ippãn im jab pokake Anij.​—Riit Revelesõn 12:9.

Wõn eo enaaj julo̦k aolep men ko renana me rej wal̦o̦k ñan armej?

Anij enaaj ke kõtl̦o̦k wõt bwe lal̦ in en pãd ium̦win maroñ eo an Setan? Eban! Anij enaaj kõjerbal Jijej bwe en julo̦k aolep men ko renana me Setan ear kõm̦m̦ani.​—Riit 1 Jon 3:8, UBS.

Anij enaaj lel̦o̦k maroñ ñan Jijej bwe en jol̦o̦k Setan. (Rom 16:20) Innem Anij enaaj tõl aolep armej ro ilo lal̦ in, im renaaj aenõm̦m̦an im m̦õn̦õn̦õ ãinwõt ke kar karõk eo an Anij in jãn kar jinoin.​—Riit Revelesõn 21:3-5.