Ium̦win tõl eo an Anij, aolep menin kõm̦anm̦an ko rar bõrokuk im pãd ilo aenõm̦m̦an

Etke Jej Aikuji Aelõñ eo an Anij?

Ke kar kõm̦anm̦an armej ro m̦oktata, ri-Kõm̦anm̦an eo ad, me etan in Jeova, kar e wõt ri-Tõl. Ear kwal̦o̦k yokwe ilo wãween an tõl. Ear kõm̦m̦ane juon jikin jokwe eaiboojoj ilo juon jikin kallib ilo Iden, ñan an armej ro jokwe ie. Im ear kõppooj elõñ m̦õñã ko ñan er. Ear bareinwõt lel̦o̦k ñan armej ro jerbal ko el̦ap tokjãer. (Jenesis 1:28, 29; 2:8, 15) Armej ro renaaj kar lañlõñ kõn aenõm̦m̦an ñe ren kar pãd wõt ilo ium̦win tõl im yokwe eo an Anij.

Adam ej jibwe leen wõjke eo me kar kamoik aerro kañe me Iv ej lel̦o̦k ñane. — Armej ro m̦oktata rar kõjekdo̦o̦n Anij ãinwõt juon aer ri-Tõl

Baibõl̦ ej kwal̦o̦k bwe juon enjel̦ ri-jum̦ae, me kar n̦aetan tokãlik Setan Tepil̦ eo, ear jum̦ae jim̦we im maroñ eo an Anij ñan tõl. Ear ba bwe armej ro renaaj m̦õn̦õn̦õl̦o̦k ilo an ejjel̦o̦k naanin tõl ko jãn Anij im an Anij jab tõl er. Ekabũrom̦õjm̦õj bwe ro jemãd im jined m̦oktata, Adam im Iv rar l̦oor Setan im jum̦ae Anij.—Jenesis 3:1-6; Revelesõn 12:9.

Kõnke Adam im Iv rar kõjekdo̦o̦n tõl eo an Anij, rar luuji Pedetaij eo ijo jikier im kõjatdikdik eo ñan mour indeeo me eweeppãn. (Jenesis 3:17-19) Pepe eo aer ear bar jelõt ajri ro nejier. Baibõl̦ ej ba bwe kõn an kar Adam jerawiwi, “jerawiwi ear del̦o̦ñ ilo lal̦ in im mej ear wal̦o̦k kõn wõt jerawiwi.” (Rom 5:12) Jerawiwi eo ear bar tõll̦o̦k ñan bar juon men ekabũrom̦õjm̦õj: “Juon armej ewõr an maroñ ioon bar juon bwe en kõjorrããne.” (Ekklisiastis 8:9) Ilo bar juon wãween ba, ñe armej ro rej tõl er make, apañ ko renaaj baj wal̦o̦k wõt.

ARMEJ RAR JINO TÕL

Nimrod ej jutak ilo an utiej bũruon. Itulikin, armej ro rej kalõk juon em̦ kileplep. — Nimrod ear jum̦ae Jeova

Armej eo m̦oktata ear jino tõl me Baibõl̦ ej kwal̦o̦k kake ej Nimrod. Im ear jum̦ae tõl eo an Jeova. Jãn raan ko an Nimrod, ro me el̦ap maroñ ko ippãer rar kõjerbal maroñ ko aer ilo wãween ko rejjab jim̦we. Enañin 3,000 iiõ ko remootl̦o̦k, Kiiñ Solomon ear je: “Iar . . . lo, dãnnin kõmjaal̦al̦ an ro em̦õj kõjorrããn er, im ejjel̦o̦k ri-kaenõm̦m̦an; im ippãn ro ri-kõjorrããn er ewõr kajoor; a ejjel̦o̦k ri-kaenõm̦m̦an er.”—Ekklisiastis 4:1.

Ejjel̦o̦k oktak wãween ko rej wal̦o̦k ilo raan kein. Ilo 2009 eo, juon bok an United Nations ej lukkuun watõk im ba bwe an nana an ri-tõl ro tõl bwe “ej juon iaan un ko unin an wal̦o̦k men ko renana ilo juon jukjukun pãd.”

IIEN ÑAN EM̦M̦AKŨT

Lal̦ in ej aikuji ri-tõl ro rem̦m̦anl̦o̦k im juon kien eo em̦m̦anl̦o̦k. Im eñin ej men eo ri-Kõm̦anm̦an eo ad ear kallim̦ur kake!

Pija ko: Men ko rej wal̦o̦k jãn kien ko an armej. 1. Juon kõrã in Eijia ej jijet iturin ial̦ eo ettoon im ej jibwe ajri eo nejin me ej jañ. 2. Juon l̦al̦l̦ap enañinmej ej babu ilo juon peet ilo Aujpitõl̦. 3. Ri-tarin̦ae ro rej bu ilo jikin tarin̦ae. 4. Armej ro rej jum̦ae kien ilo aer lam̦õj im kotak banner ko aer. 5. Juon kõrã im leddik eo nejin rej jutak ilo nabõjin m̦weo m̦weerro im lo bwe erup kilaj eo ilo kõjãmin m̦weo m̦weerro. — Meñe kien ko rem̦m̦antata an armej ak rar bar likjab ñan kõm̦adm̦õd apañ ko rel̦l̦ap an armej ro

Em̦õj an Anij kajutak juon Aelõñ, ak juon kien, me enaaj bõk jikin aolep kien ko an armej, im “enaaj jutak ñan indeeo.” (Daniel 2:44) Eñin Aelõñ eo me elõñ milien ro rar jar kake. (Matu 6:9, 10) Bõtab eban Anij wõt enaaj tõl kien in. Ijoke, ear jitõñe juon eo me ear mour ãinwõt armej bwe en juon ri-Tõl. Wõn eo Anij ear kããlõte?