KAJJITÕK KO BAIBÕL̦ EJ UWAAKI
Aolep kabuñ ko rej ke kautiej Anij?
Bõlen em̦õj am̦ roñ ilo nuuj ko rainin kõn an kabuñ ko bõk kun̦aaer ilo men ko renana. Eokwe, ejjab aolep kabuñ ko rej kabuñ ñan Anij eo em̦ool. (Matu 7:15) Ilo m̦ool, em̦õj an elõñ kabuñ ko m̦on̦e elõñ armej ro.—Riit 1 Jon 5:19, UBS.
Anij ejel̦ã wõn ro me em̦ool bũrueer im rej kõm̦m̦ani men ko rem̦m̦an im rejim̦we. (Jon 4:23) Ekõn̦aan bwe armej rein ren katak Baibõl̦ bwe ren jel̦ã kõn katak ko rem̦ool.—Riit 1 Timote 2:3-5.
Elemen am̦ maroñ jel̦ã ewi wõt kabuñ eo em̦ool?
Jeova Anij ej jipañ armej ro ijoko otemjej ñan katak kõn katak ko rem̦ool kab kilen aer yokwe doon. (Maika 4:2, 3) Kõn men in, kwõmaroñ kile kabuñ eo em̦ool kõn wãween an armej ro ie yokwe im kaorõk doon.—Riit Jon 13:35.
Jeova Anij ej ko̦kweilo̦ktok armej ro jãn aelõñ otemjej ikijjeen kabuñ eo em̦ool.—Sam 133:1
Tõmak ko an armej ro ilo kabuñ eo em̦ool rej pedped wõt ioon Baibõl̦. Im armej rein rej kate er bwe ren mour ekkar ñan naan ko ilo Baibõl̦. (2 Timote 3:16) Bareinwõt, rej kautiej etan Anij. (Sam 83:18) Rej bar tõmak bwe kien ak Aelõñ eo wõt an Anij emaroñ jipañ armej ro. (Daniel 2:44) Im rej l̦oore joñak eo an Jijej ilo aer kõm̦m̦ane men ko rem̦m̦an ñan ro jet. Ilo wãween in ej ‘romaak aer meram.’ (Matu 5:16) Kõn men in, Kũrjin ro rem̦ool rej jibadekl̦o̦k armej ro ilo m̦õko im̦weer ñan kwal̦o̦k kõn Aelõñ eo an Anij.—Riit Matu 24:14; Jerbal 5:42, UBS; 20:20.