Unin An Aelõñ Eo An Anij​—Aorõk Ippãn Jijej

Katak eo m̦okta jãn katak in ear kwal̦o̦k bwe men eo ear aorõktata ippãn Jijej ej bwe en “kwal̦o̦k Naan eo Em̦m̦an kõn Aelõñ in Anij.” (Luk 8:1, UBS) Jijej ear kate wõt e bwe en katakin armej ro kõn Aelõñ eo an Anij. Joñan, ear etetal elõñ bukwi m̦ail̦ ilo aelõñ in Israel bwe en tõpar armej ro. Ilo bokin Matu, Mark, Luk im Jon rej kwal̦o̦k kõn iien ko Jijej ear kwal̦o̦k naan. Elõñl̦o̦k jãn 100 alen an bok kein kwal̦o̦k kõn Aelõñ eo an Anij. Enañin aolep iien ñe bok kein rej kwal̦o̦k kõn Aelõñ in, ej an Jijej naan kein. Ejjel̦o̦k pere bwe elõñl̦o̦k wõt men ko ear ba kõn Aelõñ eo an Anij meñe rejjab wal̦o̦k ilo Baibõl̦!​—Jon 21:25, UBS.

Etke Aelõñ eo an Anij ear lukkuun aorõk ippãn Jijej ke ear pãd ioon lal̦ in? Eokwe, juon iaan un ko ej kõnke Jijej ear jel̦ã bwe em̦õj an Anij kããlõte bwe en Rũtõl in Aelõñ in. (Aiseia 9:6, UBS; Luk 22:28-30, UBS) Bõtab, Jijej ear jab l̦õmn̦ak in kwal̦o̦k kõn Aelõñ in bwe armej ro ren nõbare im kautieje. (Matu 11:29; Mark 10:17, 18) Jijej ear kwal̦o̦k kõn Aelõñ eo kõnke ear l̦õmn̦ak kõn ro jet. Unleplepin an Aelõñ eo an Anij aorõk ippãn Jijej ej kõnke ejel̦ã ta ko rem̦m̦an Aelõñ in enaaj kõm̦m̦ani ñan ro ej yokwe er.a (Lale kõmel̦el̦e eo itulal̦.) Wõn rein? Ej Jemãn ilañ, kab ro rej tiljek ñane.

TA EO AELÕÑ EO ENAAJ KÕM̦M̦ANE ÑAN JEMÃN JIJEJ?

El̦ap an Jijej yokwe Jemãn ilañ. (Jabõn Kõnnaan 8:30; Jon 14:31) El̦ap an Jemãn tũriam̦o im yokwe armej ro, im em̦m̦an an kõm̦m̦an ñan er. Elukkuun em̦m̦an ippãn Jijej men kein. (Duteronomi 32:4; Aiseia 49:15; 1 Jon 4:8) Bõtab, jet rej riab n̦ae Jemãn im ba bwe ejjab kea ñe armej rej eñtaan, im bwe ekõn̦aan bwe jen eñtaan. Jijej elukkuun inepata ñe ro jet rej riab im kananaik Jemãn. Eñin ej un eo juon unin an kar Jijej kate wõt e ñan “kwal̦o̦k Naan eo Em̦m̦an kõn Aelõñ in Anij.” Ear jel̦ã bwe Aelõñ in enaaj jojomare Jemãn im kaalikkar m̦ool eo kõn E. (Matu 4:23, UBS; 6:9, 10) Ak, elemen an Aelõñ in naaj kõm̦m̦ane men in?

Jeova enaaj kõjerbal Aelõñ eo ñan kõm̦m̦an elõñ oktak ko ijin ioon lal̦ me renaaj jipañ aolep armej ro retiljek ñane. Ñan waanjoñak, Jeova enaaj “kõm̦õrãik jãn mejãer dãnnin kõmjaal̦al̦ otemjej.” Enaaj bar jol̦o̦k men ko me rej kõm̦m̦an an armej ro jañ. Enaaj kõm̦m̦an bwe en “ejjel̦o̦k bar mej, im [armej] rejãmin bar liaajlo̦l̦, ak jañ, ak eñtaan.” (Revelesõn 21:3, 4) Ikijjeen Aelõñ in, Anij enaaj jol̦o̦k aolep men ko me rej kaeñtaan armej.b (Lale kõmel̦el̦e eo itulal̦.)

Ealikkar kiiõ unin an kar Jijej kate wõt e bwe en katakin ro jet kõn Aelõñ eo an Anij! Ear jel̦ã bwe men ko me Aelõñ in enaaj kõm̦m̦ani renaaj kaalikkar m̦ool eo kõn joñan an Jemãn kajoor im yokwe. (Jemes 5:11) Ejjab men in wõt, ak Jijej ear bar jel̦ã bwe Aelõñ in enaaj jipañ ro me el̦ap an yokwe er. Wõn rein? Ej armej ro retiljek ñan Anij.

AELÕÑ EO AN ANIJ ENAAJ JIPAÑ ARMEJ RO RETILJEK ÑAN ANIJ

Elõñ bukwi iiõ ko in an kar Jijej pãd ilañ ippãn Jemãn m̦okta jãn an kar itok ñan lal̦ in. Jemãn ear kõjerbal Nejin ñan kõm̦anm̦an men otemjej. Jet iaan men ko rekabwilõñlõñ kar kõm̦anm̦ani ej lañ, iju ko rellõñ, kab kumi in iju ko. Bareinwõt, kar kõm̦anm̦an lal̦ in eaiboojoj kab menninmour ko im mennin eddek ko ie. (Kolosse 1:15, 16) Bõtab, iaan aolep men ko kar kõm̦anm̦ani, elukkuun l̦ap an kar Jijej “m̦õn̦õn̦õ” kõn armej ro.​—Jabõn Kõnnaan 8:31, UBS.

Aolep iien Jijej ear kwal̦o̦k yokwe ke ear kwal̦o̦k naan ñan armej ro. Jãn kar jinoin an kwal̦o̦k naan, ear kaalikkar bwe unin an kar itok ñan lal̦ in ej bwe en “kwal̦o̦k kõn Naan em̦m̦an” ñan ro rar aikuji. (Luk 4:18, UBS) Bõtab, Jijej ear jab baj ba bwe enaaj jipañ armej ro. Aolep iien ear kõm̦m̦ani men ko ñan kaalikkar bwe ej yokwe armej. Ñan waanjoñak, ke juon jarlepju in armej rar kõn̦aan bwe Jijej en katakin er, ear ‘tũriam̦okake er, im kõmour ro renañinmej ippãer.’ (Matu 14:14) Bareinwõt, juon iien juon em̦m̦aan me ear eñtaan kõn an nañinmej, ear ba bwe ewõr an Jijej maroñ ñan kõmouri el̦aññe ekõn̦aan. Men in ear jelõt bũruon Jijej im ear kõmouri em̦m̦aan in. Ear ba ilo jouj im ba: “Ikõn̦aan, kwõn erreo.” (Luk 5:12, 13) Bar juon iien, juon em̦m̦aan etan Lazerõs ear mej. Ke Jijej ear lo an lio jatin Lazerõs etan Meri lukkuun bũrom̦õj kõnke emej l̦eo jein, Jijej ear “lim̦õ ilo an,” “bũrom̦õj,” im “jañ.” (Jon 11:32-36) Innem, Jijej ear kõm̦m̦ane juon men ekabwilõñlõñ. Ear kõmouri Lazerõs meñe 4 raanin an kar mej!—Jon 11:38-44.

Jijej ear jel̦ã bwe wãween an jipañ armej rein ilo kabwilõñlõñ enaaj ñan jidik wõt iien. Etke? Kõnke ear jel̦ã bwe aolep ro me ear kõmour er jãn nañinmej kab mej, renaaj bar nañinmej im mej tokãlik. Bõtab, Jijej ear bar jel̦ã bwe Aelõñ eo an Anij enaaj jol̦o̦k nañinmej im mej ñan indeeo. Eñin unin an kar Jijej jab kõm̦m̦ani menin kabwilõñlõñ ko wõt, ak ear bar kijejeto in katakin armej ro kõn “Naan Em̦m̦an kõn Aelõñ eo.” (Matu 9:35, UBS) Menin kabwilõñlõñ ko Jijej ear kõm̦m̦ani rar kwal̦o̦k kõn ta ko renaaj wal̦o̦k ñan aolep armej ipel̦aakin lal̦ in ñe Aelõñ eo an Anij enaaj tõl er. Jen kiiõ lale ta ko Baibõl̦ ej kallim̦ur kaki ilo naaj tõrein.

• 

  Armej ro reban bar nañinmej.

  “Mejãn ro repilo renaaj pel̦l̦o̦k, im naaj kõpel̦l̦o̦k lo̦jilñin ro reroñjam̦õn̦. Innem armej ekũrro enaaj kãke ãinwõt juon deer, im lo an rũban kõnono enaaj al.” Bareinwõt, “rũjokwe ie ejãmin ba, ‘inañinmej.’”​—Aiseia 33:24; 35:5, 6.

• 

  Armej ro reban bar mej.

  “Ro rem̦m̦an renaaj jolõt ãne eo [lal̦, NW], im jokwe ilowaan ñan indeeo.”​—Sam 37:29.

  “Anij enaaj jol̦o̦k mej ñan indeeo! Enaaj kõm̦õrãik dãnnin kõmjaal̦al̦ ko jãn mejãn armej otemjej.”​—Aiseia 25:8, UBS.

• Ro remej renaaj bar mour.

  “Ro otemjej rej pãd ilo lõb ko, renaaj roñ ainikien, im naaj diwõjtok.”​—Jon 5:28, 29.

  “Armej otemjej . . . renaaj jerkak jãn mej.”​—Jerbal 24:15, UBS.

• 

  Aolep armej enaaj wõr aer jerbal im jikin jokwe.

  ‘Renaaj kalõk m̦õko, im jokwe ilo er; im renaaj kallib jikin kallib in grep, im m̦õñã jãn leen. Rejãmin kalõk, im bar juon ej jokwe ie; im rejãmin kallib, im bar juon ej m̦õñã. . . . Enaaj to aer m̦õn̦õn̦õ kake jerbal an peier.’​—Aiseia 65:21, 22.

• 

  Armej ro reban bar tarin̦ae.

  “Ej kabõjrak tarin̦ae ko ioon aolepen lal̦.”​—Sam 46:9, UBS.

  “Ro riaelõñ rejãmin kotake jãje n̦ae ro riaelõñ, im enaaj jako aer katak tarin̦ae.”​—Aiseia 2:4.

• 

  Armej ro reban bar kwõle.

  “Ãneo ar jebar leen; Irooj ad Anij ear kajeraam̦m̦an kõj.”​—Sam 67:6, UBS.

  “Ãneo en obrak kõn wiit; Keinikkan ko ren kabwe ioon tol̦ ko.”​—Sam 72:16, UBS.

• Armej ro reban bar jeram̦õl im jerata.

  “Rijjeram̦õl rejãmin jerata ñan indeeo.”​—Sam 9:18, UBS.

  “Ej lo̦mo̦o̦ren ro rijjeram̦õl ñe rej kũr ñane, kab ro riaikuj im rejool. Ej tũriam̦okake ro rem̦õjn̦o̦ im ro rejeram̦õl; Ej lo̦mo̦o̦ren ro riaikuj.”​—Sam 72:12, 13, UBS.

Aolep kallim̦ur kein rej kõn Aelõñ eo an Anij. Kwõj ke kiiõ kile unin an Aelõñ eo an Anij aorõk ippãn Jijej? Ke Jijej ear pãd ioon lal̦, ear m̦õn̦õn̦õ in kõnnaan ippãn jabdewõt armej kõn Aelõñ eo an Anij. Ear jel̦ã bwe Aelõñ in an Anij enaaj jol̦o̦k aolep apañ ko me rej kaeñtaan kõj ilo raan kein.

Kwõj ke itoklimo kõn kallim̦ur ko ilo Baibõl̦ kõn Aelõñ eo an Anij? El̦aññe aet, ta eo kwõmaroñ kõm̦m̦ane ñan kal̦apl̦o̦k am̦ jel̦ã kõn Aelõñ in? Bareinwõt, ta eo kwõj aikuj kõm̦m̦ane bwe kwõn maroñ bõk jeraam̦m̦an kein ñe Aelõñ in enaaj tõl aolep armej? Eokwe, katak eo tok juon enaaj uwaake kajjitõk kein.