KATAK KO KÕN TAITÕL̦IN BOK IN | KWÕMAROÑ EPAAKE ANIJ
Kwõj Ke Kõm̦m̦ani Men ko Anij Ekõn̦aan bwe Kwõn Kõm̦m̦ani?
“Jabdewõt men eo kokõn̦aan bwe in kõm̦m̦ane, ba ñan ña im inãj m̦õn̦õn̦õ in kõm̦m̦ane.” Ealikkar bwe kwõn kar ãliklik in ba men in ñan juon eo me kwõjaje kajjien ak juon eo kwõjjab epaake. Bõtab, kwõban kar ãliklik in ba ñan juon eo me kwõlukkuun epaake. Ñe ruo armej relukkuun epaake doon, ekkã aer m̦õn̦õn̦õ in kõm̦m̦ani men ko erro ej kajjitõk ippãn doon kaki.
Baibõl̦ ej kwal̦o̦k bwe aolep iien Jeova ej kõm̦m̦ani men ko me ejel̦ã bwe rem̦m̦an ñan ro rej kabuñ ñane. Ñan waanjoñak, Kiiñ Devid, eo me ear bar epaake Anij, ear ba: “O Jeova aõ Anij, Kwaar kõm̦m̦an elõñ menin bwilõñ, im l̦õmn̦ak ko Am̦ kõn kõm rellõñ wõt; . . . rellõñ jãn maroñ in bwini.” (Sam 40:5) Ejjab men in wõt, ak Jeova ej bar kõm̦m̦ani men ko rem̦m̦an ñan ro me rejjañin jel̦ã kõn E, ilo an ‘lel̦o̦k kijeer im kobrak bũrueer kõn m̦õn̦õn̦õ.’—Jerbal 14:17, UBS.
Jem̦õn̦õn̦õ in kõm̦m̦ani men ko rem̦m̦an ñan ro jej yokwe im kautiej er
Kõnke Jeova em̦õn̦õn̦õ in kõm̦m̦ani men ko rem̦m̦an ñan ro jet, ealikkar bwe ro rekõn̦aan epaake rej aikuj kõm̦m̦ani men ko me rej ‘kam̦õn̦õn̦õik bũruon.’ (Jabõn Kõnnaan 27:11) Innem, ta ko kwõmaroñ kõm̦m̦ani ñan kam̦õn̦õn̦õik bũruon Anij? Baibõl̦ ej ba: “Kom̦win jab mel̦o̦kl̦o̦k in kõm̦m̦an em̦m̦an kab jipañ doon, kõnke men kein rej menin katok ko rej kabuñbũruon Anij.” (Hibru 13:16, UBS) Mel̦el̦ein ke men in bwe ad kõm̦m̦an em̦m̦an im jipañ doon ej men ko wõt jej aikuj kõm̦m̦ani ñan kam̦õn̦õn̦õik bũruon Jeova?
Baibõl̦ ej ba: “Ejjel̦o̦k en̦ emaroñ kabuñbũruon Anij ñe ejjel̦o̦k tõmak.” (Hibru 11:6, UBS) Eaorõk men in kõnke ãlikin an kar Ebream kwal̦o̦k an “tõmak Anij,” kar “n̦aetan jeran Anij.” (Jemes 2:23) Jijej Kũraij ear bareinwõt kwal̦o̦k bwe jej aikuj kwal̦o̦k ad tõmak ak “lõke Anij” ñe jekõn̦aan bwe jen epaake im bwe en kajeraam̦m̦an kõj. (Jon 14:1) Kõn men in, ewi wãween bwe en wõr ippam̦ kain tõmak rot in me Anij ekõn̦aan jãn ro me ej epaake er? Kwõmaroñ jino ilo am̦ katak Baibõl̦, Naan in Anij. Ilo am̦ kõm̦m̦ane men in, kwõnaaj “jel̦ã ankilaan” im kwõnaaj jel̦ã kilen “kabuñbũruon ilo men otemjej.” Innem, ilo am̦ naaj kal̦apl̦o̦k am jel̦ã katak ko rem̦ool kõn Jeova im l̦oori men ko kwaar katak im jel̦ã bwe Jeova ekõn̦aan, tõmak eo am̦ ilo E enaaj l̦apl̦o̦k wõt im kwõnaaj epaakel̦o̦k wõt E.—Kolosse 1:9, 10.