Kwõn Kijejeto Wõt ilo Jerbalin Kwal̦o̦k Naan

JERBALIN kwal̦o̦k naan kõn ennaan eo em̦m̦an ej jerbal eo eaorõktata jej kõm̦m̦ane ilo lal̦ in. Ej juon jeraam̦m̦an ñan jerbal ñan Jeova ilo ad kwal̦o̦k naan im katakin armej ro. Bõtab, jet iien emaroñ jab pidodo ñan an bainier ro ak rukwal̦o̦k naan ro kijejeto wõt ilo jerbal in. Etke?

Jet rukwal̦o̦k naan rej lo bwe elukkuun iiet armej ro rej bwebwenato ippãer ñe rej jerbal jãn em̦ ñan em̦. Unin an ãindein ej kõnke elõñ iaan armej ro rejako ilo m̦õko im̦weer. Im ñe armej ro rej pãd ilo m̦õko im̦weer, ekkã aer jab kõn̦aan roñjake, joñan rej illu ippãd. Jet rukwal̦o̦k naan ro rej jerbal ilo jikin ko me relukkuun l̦ap im lõñ armej ie, bõtab rej inepata kõnke rejaje ñe renaaj maroñ tõpar aolep armej ro ie. Bar jet rukwal̦o̦k naan eto aer kwal̦o̦k naan ium̦win elõñ iiõ ko ak rar jino ebbeer kõnke ejjañin itok jem̦l̦o̦kin jukjukun pãd in.

Enaaj baj wõr wõt apañ ko jej jelm̦aiki ilo jerbalin kwal̦o̦k naan. Im apañ kein remaroñ kõm̦m̦an bwe en dikl̦o̦k ad kijejeto. Jej mour ilo jukjukun pãd in me ej pãd ium̦win maroñ eo an “Rinana eo,” ak Setan Tepil̦ eo. Kõn men in, jej kõtmãne bwe eban pidodo ñan ad kwal̦o̦k naan kõn ennaan eo em̦m̦an.​—1 Jon 5:19, UBS.

Jekdo̦o̦n ta apañ ko kwõj jelm̦aiki ilo jerbalin kwal̦o̦k naan, ak kwõmaroñ lõke bwe Jeova enaaj jipañ eok bwe kwõn kijenmej ioer. Bõtab, ta ko kwõmaroñ kõm̦m̦ani ñan kal̦apl̦o̦k am̦ kijejeto ilo jerbalin kwal̦o̦k naan? Eokwe, jen bwebwenato kake jet iaan men ko remaroñ jipañ eok.

JIPAÑ RUKWAL̦O̦K NAAN KÃÃL RO

Kajjojo iiõ, elõñ to̦ujin armej ro rej peptaij im erom Ri Kõnnaan ro an Jeova. Ñe ej kab m̦õj am̦ peptaij, elõñ men ko kwõmaroñ katak jãn ro eto aer kwal̦o̦k naan ium̦win elõñ iiõ. Im ñe kwõj juon rukwal̦o̦k naan eo me eto an kwal̦o̦k naan ium̦win elõñ iiõ, kwõmaroñ ke jipañ ro rekããl? Ilo am̦ naaj jipañ er enaaj kõm̦m̦an bwe kwõn lukkuun m̦õn̦õn̦õ.

Jijej ear jel̦ã bwe rũkal̦oor ro an rar aikuji an tõl er bwe ren maroñ lo tõprak ilo jerbalin kwal̦o̦k naan. Eñin unin an kar katakin er kilen kwal̦o̦k naan. (Luk 8:1) Ro rekããl kiiõ rej bareinwõt aikuji an ro jet katakin er bwe ren jel̦ã kwal̦o̦k naan im ren lo tõprak.

Jejjab aikuj in bõk l̦õmn̦ak in bwe ilo an juon rukwal̦o̦k naan kããl etal im kwal̦o̦k naan, men in ej jipañe im katakin e kilen katakin ro jet. Rukwal̦o̦k naan kããl in ej aikuji juon eo ejouj im el̦ap yokwe ippãn bwe en katakini im kammineneiki kõn kilen kwal̦o̦k naan. Juon rukwal̦o̦k el̦ap imminene ippãn ilo jerbalin kwal̦o̦k naan ej aikuj katakin rukwal̦o̦k naan kããl ro kilen (1) kõppojakl̦o̦k im̦aan im kõmmãlmeli men ko renaaj ba ñan armej ro renaaj iioon er, (2) bwebwenato ippãn armej ro, (3) lel̦o̦k bok ko ñan armej ro, (4) bar jepl̦aak ippãn ro rar m̦õn̦õn̦õ in roñjake, im (5) jino katak Baibõl̦ ippãn armej ro. Juon rukwal̦o̦k naan kããl enaaj jel̦ã kilen kwal̦o̦k naan el̦aññe ej lale im l̦oore wãween an juon rukwal̦o̦k eo el̦ap imminene ippãn kwal̦o̦k naan. (Luk 6:40, UBS) Im rukwal̦o̦k naan in ekããl enaaj l̦apl̦o̦k an tõmak bwe ñe ej aikuj jipañ, ewõr juon eo epojak in jipañ. Bareinwõt, ñe jej nõbar im kam̦m̦oolol kab kwal̦o̦k ta ko rukwal̦o̦k naan kããl ro remaroñ kõm̦m̦ani ñan kakõm̦anm̦anl̦o̦k kilen aer kwal̦o̦k naan, men in emaroñ bar l̦ap an jipañ er.​—Ekklisiastis 4:9, 10, UBS.

BWEBWENATO IPPÃN RUKWAL̦O̦K NAAN EO M̦ÕTTAM̦

Jekdo̦o̦n ewi joñan am̦ kate eok bwe kwõn lo tõprak ilo am̦ bwebwenato ippãn armej ro kwõj iioon er ilo kwal̦o̦k naan, ak jet iien, eo me em̦m̦antata ñan bwebwenato ippãn ej rukwal̦o̦k eo m̦õttam̦. Keememej bwe ke Jijej ear jilkinl̦o̦k rũkal̦oor ro an bwe ren kwal̦o̦k naan, ear “karruwol̦o̦k,” ak karõk bwe kajjojo en wõr juon m̦õttan. (Luk 10:1) Ilo an kar rũkal̦oor rein jerbal ippãn doon, rar maroñ rõjañ im kakajoor doon. Ejja ãindein wõt ilo raan kein. Ñe jej kwal̦o̦k naan ippãn rũttõmak ro m̦õttad, ej juon iien em̦m̦an ñan ad rõjañ im “jipañ doon.”​—Rom 1:12, UBS.

Ta jet iaan men ko kwõmaroñ bwebwenato kaki ippãn rukwal̦o̦k eo m̦õttam̦? Ewõr ke bwebwenato ak juon men em̦m̦an juon iaamiro ej kab m̦õj an iioone im komiro maroñ bwebwenato kake? Ewõr ke juon mel̦el̦e ekãitoktoklimo me kwaar katak kake ilo iien kabuñ eo an baam̦le eo am̦ ak iien eo kwaar katak ippam̦ make? Ewõr ke juon katak ak mel̦el̦e kwaar roñ ilo iien kweilo̦k ko, me ear lukkuun jipañ eok? Jet iien kwõmaroñ jerbal ippãn juon rukwal̦o̦k naan me kwõjjab lukkuun jel̦ã kajjien. Bõlen kwõmaroñ kajjitõk ippãn rukwal̦o̦k in kõn wãween an kar lo m̦ool eo. Kwõmaroñ kajjitõk ippãn kõn ta ko rar jipañe ñan lukkuun tõmak bwe doulul in ej an Jeova. Im kwõmaroñ bar kajjitõk kõn ta jeraam̦m̦an ko em̦õj an bũki ak kõn bwebwenato ko kõn e make. Bõlen kwõmaroñ bar kwal̦o̦k ñane kõn bwebwenato ko am̦. Jekdo̦o̦n ñe armej ro ilo jikin ko kwõj kwal̦o̦k naan ie rejjab m̦õn̦õn̦õ in roñjake, ak ñe kwõj jerbal ippãn juon rukwal̦o̦k naan, ej juon iien em̦m̦an ñan amiro rõjañ im “kalõk doon.”​—1 Tessalonika 5:11.

KAKÕM̦ANM̦ANL̦O̦K AM̦ KATAK IPPAM̦ MAKE

Bwe jen maroñ kijejeto wõt ilo jerbalin kwal̦o̦k naan, jej aikuj kakõm̦anm̦anl̦o̦k wãween ad katak ippãd make. Elõñ mel̦el̦e ko im katak ko ‘rũkarejar eo etiljek im mãlõtlõt’ ej litok ñan kõj bwe jen maroñ katak kaki. (Matu 24:45) Jen lale juon waanjoñak kõn juon men jemaroñ katak kake ilo iien ko jej katak ippãd make. Eñin kajjitõk eo jemaroñ katak kake: Etke jerbalin kwal̦o̦k naan elukkuun aorõk? Bo̦o̦k eo etan “Etke Kwõj Aikuj Kijejeto Wõt ilo Jerbalin Kwal̦o̦k Naan?” ej kwal̦o̦k jet iaan un ko unin an aorõk jerbalin kwal̦o̦k naan.

Am̦ etali mel̦el̦e ko ilo bo̦o̦k in enaaj kõm̦akũt eok bwe kwõn wõnm̦aanl̦o̦k im kijejeto ilo kwal̦o̦k naan. Ñe kwõbar katak ippam̦ make, kwõmaroñ kõjerbal iien eo ñan kajjioñ kõllaajraki un ko jet me rej pedped ilo Baibõl̦ kõn unin ad aikuj kijejeto ilo kwal̦o̦k naan. Ñe em̦õj, kwõn kõl̦mãnl̦o̦kjen̦ kaki. Ñe kwõnãj kõm̦m̦ane men in, enaaj l̦apl̦o̦k am̦ kijejeto ilo jerbalin kwal̦o̦k naan.

M̦ÕN̦ÕN̦Õ IN KAJJIOÑE KILEN KWAL̦O̦K NAAN KO JET

Aolep iien doulul in an Jeova ej kwal̦o̦k wãween ko ñan jipañ kõj kakõm̦anm̦anl̦o̦k kilen ad kwal̦o̦k naan. Ñan waanjoñak, ijello̦kun ad kwal̦o̦k naan jãn em̦ ñan em̦, jemaroñ jeje lõta, kõjerbal talboon, kwal̦o̦k naan ilo ial̦ ko ak ijoko elõñ armej ie, im kwal̦o̦k naan ilo iien em̦m̦antok ak ilo jikin jerbal ko an armej ro. Jemaroñ bareinwõt kõm̦m̦an karõk ñan kwal̦o̦k naan ilo jikin ko me eiiet ak ejjel̦o̦k Ri Kõnnaan ro an Jeova ie.

Kwõm̦õn̦õn̦õ in ke kajjioñe kilen kwal̦o̦k naan ko jet me kwõjjañin kar kõm̦m̦ani? Elõñ rar lo tõprak ilo jerbalin kwal̦o̦k naan ke rar kajjioñe kõl kein. Jen lale jilu waanjoñak ko kõn rein.

Juon jeid im jatid kõrã etan April ear kajjioñ l̦oore juon iaan kilen kwal̦o̦k naan ko jãn Ad Jerbal ñan Anij kõn wãween ad jino juon rũkkatak. Ear kõm̦m̦ane wãween in ke ear kajjitõk ippãn 3 iaan rijerbal ro m̦õttan ñe rekõn̦aan katak Baibõl̦. April ear lukkuun bwilõñ im m̦õn̦õn̦õ ke rein jilu rar kõn̦aan katak Baibõl̦ im jino pãd ilo kweilo̦k ko.

Kar bar rõjañ kõj ñan l̦õmn̦ak kõn ta ko armej ro rej itoklimo kaki bwe jen lil̦o̦k ñan er bok ko ad me rej kõnnaan kõn men kein rej itoklimo kaki. Ilo juon jikin ilo Amedka, juon iaan em̦m̦aan ro me ej lol̦o̦k eklejia ear lel̦o̦k ñan aolep mãnija ro an m̦õn wia neen wa ko juon iaan Awake! ko me ej kõnnaan kõn neen wa. Erro lio ippãn kar bar illik kaape in juon iaan Awake! ko me rej kõnnaan kõn taktõ ro, ilo elõñl̦o̦k jãn 100 opij in taktõ ko. Em̦m̦aan in ej ba bwe ilo an lol̦o̦k jikin kein, ekõm̦m̦an bwe armej ro ren jel̦ã kõn jerbalin kwal̦o̦k naan im bok ko ad. Bareinwõt, ilo aerro kar kõm̦m̦ane wãween in, ekõm̦m̦an bwe ren jel̦ã kajjien armej ro ilo jikin ko rej kwal̦o̦k ie im elõñl̦o̦k ro rar bar jepl̦aak ippãer.

Juon jeid im jatid kõrã etan Judy ear jejel̦o̦k ñan ra eo el̦ap ilo New York im kwal̦o̦k an kam̦m̦oolol kõn katak ko me rej rõjañ kõj ñan kõjerbal talboon im kwal̦o̦k naan. Ej ba bwe jinen, me 86 an iiõ im elõñ kain nañinmej ko ippãn, ekkã an kõjerbal talboon im kwal̦o̦k naan ippãn armej ro. Ilo an kar kõm̦m̦ane men in, ekar jino katak ippãn juon lel̦l̦ap me 92 an iiõ.

Katak ko ilo bok ko ad kõn kilen kwal̦o̦k naan el̦ap aer jipañ. Kajjioñ l̦oori men kein! Remaroñ jipañ eok bwe kwõn lo m̦õn̦õn̦õ im kijejeto ilo jerbalin kwal̦o̦k naan.

KÕM̦M̦ANI MEJÃNKAJJIK KO KWÕMAROÑI

Ad lo tõprak ilo jerbalin kwal̦o̦k naan ejjab itok jãn an lõñ bok ko jej lil̦o̦k ñan armej ro, lõñ ad rũkkatak, ak lõñ armej ro jaar katak ippãer im kiiõ rej Ri Kõnnaan ro an Jeova. L̦õmn̦ak m̦õk kõn Noa. Jete armej ro ear jipañ er bwe ren erom rũkarejar ro an Jeova ijello̦kun baam̦le eo an? Meñe ekar ejjel̦o̦k, ak ear lo tõprak ilo jerbalin kwal̦o̦k naan. Men eo eaorõktata ej bwe jen tiljek wõt ilo ad karejar ñan Jeova.​—1 Korint 4:2, UBS.

Elõñ rukwal̦o̦k naan rej lo bwe ñe rej kõm̦m̦ani mejãnkajjik ko me remaroñi, men in ej kõm̦m̦an bwe ren m̦õn̦õn̦õ in kwal̦o̦k naan. Ta jet iaan mejãnkajjik kein? Jet iaaer repãd ilo bo̦o̦k eo etan “Kõm̦m̦ani Mejãnkajjik ko Kwõmaroñi.”

Jar ñan Jeova bwe en jipañ eok bwe kwõn lo tõprak ilo jerbalin kwal̦o̦k naan. Ñe kwõnaaj tõpar mejãnkajjik ko am̦, enaaj em̦m̦an am̦ mour kõnke kwõjel̦ã bwe kwõj kate eok joñan wõt am̦ maroñ ñan kwal̦o̦k kõn ennaan eo em̦m̦an.

M̦ool bwe ejjab aolep iien epidodo jerbalin kwal̦o̦k naan. Bõtab, elõñ men ko kwõmaroñ kõm̦m̦ani bwe kwõn kijejeto wõt. Kwõmaroñ bwebwenato ippãn rukwal̦o̦k naan eo m̦õttam̦ kõn men ko rem̦m̦an, keini am̦ katak ippam̦ make kõn men ko me renaaj jipañ eok, kajjioñ l̦oori naanin rõjañ ko jãn rũkarejar eo etiljek im mãlõtlõt, im kõm̦m̦ani mejãnkajjik ko me kwõmaroñi. Men eo eaorõktata in ej bwe kwõn keememej bwe Jeova Anij ear lewaj ñan kwe jeraam̦m̦an in ñan kwal̦o̦k naan kõn ennaan eo em̦m̦an kõnke kwõj juon iaan Ri Kõnnaan ro an. (Aiseia 43:10) Kwõnaaj lo lañlõñ el̦aññe kwõj kate eok bwe kwõn kijejeto wõt ilo jerbalin kwal̦o̦k naan!