Wãwen Kamineneik Ro Rekãl ñõn Kwalok Nan
1. Ewi wãwen am kar iñjake ilo ien eo kwar jino kwalok nan?
1 Kwoj kememej ke ien eo jinointata in am kar kwalok nan jen im ñõn im? Alikar kwar lukkun ikũmkũm. Elañe kwar jerbal iben eo ear katak Baibel ibõm ak bar juõn dri kwalok, ejelok berre bwe kwar mõnõnõ ke ear jibõñ yuk. Kiõ ke emwij am erom juõn dri kwalok ekabel, eor am maroñ kiõ ñõn kamineneik ro jet rekãl ñõn kwalok nan.
2. Ta eo dri kwalok ro rekãl rej aikwij katak?
2 Dri kwalok ro rekãl rej aikwij katak kilen ijjino bwebwenato ko iben dri mweo, kajerbal Baibel eo, kõmõn bar jeblak ko, im jino katak Baibel iben armij ro. Rej aikwij bareinwõt katak kilen kwalok nan ko jet, einwõt kwalok itõrerein ial ko im kwalok iben armij ro ilo jikin business ko. Kwomaroñ jibõñ ir ñõn air kakõmõnmõnlok wãwen air kwalok nan ikijen joñok im nan in rejañ ko am.
3. Ewi wãwen jemaroñ jibõñ ro jet ikijen joñok ko ar?
3 Katakin Ikijen Joñok: Jisõs ear kwalok ñõn dri kalor ro an kilen kwalok nan. (Luk 8:1; 1 Pit. 2:21) Ñe kwoj karõk ñõn am jerbal iben juõn dri kwalok ekãl, kwon kepoj juõn nan in ijjino ebiruru bwe en maroñ anõke, bwelen juõn ian nan in ijjino ko jen buk ko ar. Inem, ba bwe kwonaj konono ilo mweo kein kajuõn ak kein karuo bwe en roñjake im lale wãwen am kwalok. Elikin amiro ber ilo moko kajjojo, kwomaroñ kajitõk iben kin ta ko ear loi im katak jen wãwen am kar konono iben dri mweo. Men in enaj jibõñ e ñõn kile aurõkin an jerbal iben ro jet ilo kwalok nan im enaj kõmõn bwe en biruru an bõk nan in kakabilek ko kwoj lilok elikin an konono iben dri mweo.
4. Ewi wãwen jemaroñ jibõñ juõn dri kwalok kãl elikin ar roñjake an kennan iben dri mweo?
4 Lelok Nan in Kakabilek ko: Jisõs ear bareinwõt lelok ñõn dri jilik ro an nan in tel ko kin kilen air kwalok nan. (Matu 10:5-14) Kwomaroñ jibõñ juõn dri kwalok ekãl ilo ejja wãwen in wõt. Ñe ej ien ñõn an kennan iben dri mweo, kwon lukkun roñjake. Inem ñe komro ej ilok jen kejem eo, ilo joij lelok nan in nebar, meñe kwoj lo jet wãwen ko me ej aikwij kakõmõnmõnlok. Mokta jen am lelok nan in kakabilek, kwomaroñ kãlet ñõn lale elañe ear kakõmõnmõnlok jerbal eo an ilo mweo tok juõn. Bwelen ear ikũmkũm. Kememej bwe kajjojo dri kwalok ro ejjab joñõn maroñ im kabel ko air wõt juõn, im ekkã an lõñ wãwen ko rejime ñõn kõmõne juõn men.—1 Kor. 12:4-7.
5. Ta eo jemaroñ ba ñe jej emakõt im lelok nan in kakabilek ko?
5 Jet ien dri kwalok eo ekãl enaj kajitõk ibõm kin jet nan in kakabilek ko. Ak elañe ejjab, kwon emakõt im lelok jibõñ ñõn e. Ewi wãwen kwomaroñ kõmõne men in ilo kabel? Jet dri kwalok ro eor air iminene rej kajitõk, “Imaroñ ke kwalok juõn nan in kakabilek?” ak, “Ewi wãwen am lemnok kin aõ kar kwalok?” Bar juõn wãwen ej ñõn am ba, “Ke iar juõn dri kwalok ekãl, iar lo bwe ear juõn men ebin ñõn . . . , ak iar lo bwe wãwen in elap an jibõñ. . . . ” Jej bõk elap tokjen ñe jej etale iben dron point ko jen katak ko rej walok ilo Ar Jerbal Ñõn Ailiñ Eo. Jab lelok elõñlok jen juõn nan in kakabilek, kinke elañe elõñ enaj kõmõn bwe en ebwer.
6. Ilo jerbal in kwalok nan, ewi wãwen “mãl ej jeme mãl”?
6 Mãl Ej Jeme Mãl: Timote, ear juõn eo elap an iminene ilo jerbal in kwalok nan, ak Paul ear rejañ e bwe en kakõmõnmõn wãwen an katakin im kõmõn wõnmanlok ko. (1 Tim. 4:13, 15) Meñe emotlok elõñ yiõ ko jen ien eo kwar jino kwalok nan, bõtab kwon wõnmanlok wõt im kajeoñ kakõmõnmõnlok kabel eo am ilo jerbal in kwalok nan. Katak jen dri kwalok ro kwoj jerbal ibeir, meñe ro im ejjab lap air iminene ilo kwalok nan, im pojõk in jibõñ ro jet ilo joij, elaptata ro rekãl, bwe ren erom dri kwalok ro rekabel kin nuuj eo remõn.—Ken. 27:17.