Kilen bwe En Em̦m̦anl̦o̦k Wõt Ad Kwal̦o̦k Naan—Jipañ Rukwal̦o̦k Naan eo M̦õttam̦

Unin An Aorõk Kõl In: Jijej ear kile joñan an aorõk bwe en wõr m̦õttad ñe jej kwal̦o̦k naan. Eñin unin, ke ear jilkinl̦o̦k 70 iaan rũkal̦oor ro an bwe ren kwal̦o̦k naan, ear jilkinl̦o̦k er ruo iaan ruo. (Luk 10:1) Ñe ruo rukwal̦o̦k naan rej jerbal ippãn doon, enaaj pidodo aerro jipañ doon, el̦aptata ilo iien ko me juon iaaerro ej aikuj jipañ im ejjab lukkuun jel̦ã kilen uwaake kajjitõk ko an armej eo rej kwal̦o̦k naan ñane. (Ekl. 4:9, 10, UBS) Juon rukwal̦o̦k naan emaroñ bar jipañ eo m̦õttan ilo an kwal̦o̦k kõn tõprak ko ej loi ilo kwal̦o̦k naan. Im ñe ekkar, emaroñ kwal̦o̦k wãween ko jet me rukwal̦o̦k naan eo juon emaroñ kõm̦m̦ani bwe en em̦m̦anl̦o̦k wõt wãween an kwal̦o̦k naan. (JK. 27:17, UBS) Rukwal̦o̦k naan in emaroñ bar jipañ eo m̦õttan ilo an bwebwenato kõn men ko rem̦m̦an ñe erro ej kwal̦o̦k naan.—Pil. 4:8, UBS.

Kilen Kõm̦m̦ane:

Ñe rukwal̦o̦k naan eo m̦õttam̦ ej bwebwenato ippãn armej ro, kwõn lukkuun roñjake an kõnnaan. (Jem. 1:19) Ñe ej riiti juon eoon, kwõn bar kõpel̦l̦o̦ke Baibõl̦ eo am̦ im lale eoon eo. Ñe kwõj lukkuun roñjake, enaaj pidodo am̦ jipañe eo m̦õttam̦ ñe ej aikuji jipañ eo am̦.
Ñe rukwal̦o̦k naan eo m̦õttam̦ ej kõnnaan ippãn armej ro, kwõj aikuj lukkuun lale iien ta ko renaaj ekkar bwe kwõn bõk kun̦aam̦ ak jipañe. (JK. 25:11) Ñe rukwal̦o̦k naan eo m̦õttam̦ ej katak ippãn juon iaan rũkkatak ro an, enaaj em̦m̦an ñe jet iien kwõj bõk kun̦aam̦ im kakkobaba. Bõtab, ñe komiro ej em̦ ñan em̦, keememej bwe enaaj em̦m̦an ñe kwõj kõtl̦o̦k bwe eo m̦õttam̦ en e eo ej kõnnaan ñan armej ro el̦aññe an m̦weo. El̦aññe rukwal̦o̦k naan eo m̦õttam̦ ej juon rukwal̦o̦k naan kããl ak juon eo me ejaje en ba ta ñe armej ro rej jum̦ae ak kwal̦o̦k kajjitõk ko, eokwe kwõmaroñ jipañe. Bõtab, aolep iien, kwõn kõjparok bwe kwõn jab bõkjab im ko̦kkure an rukwal̦o̦k naan eo m̦õttam̦ kõnnaan im kõmmel̦el̦e jekdo̦o̦n ñe komiro ej em̦ ñan em̦, bar jepl̦aak ippãn armej ro, ak katak ippãn rũkkatak ro. Kwõj aikuj bar kõjparok bwe kwõn jab ukote men eo rukwal̦o̦k naan eo ej bwebwenato kake ippãn armej eo.
Bwebwenato ippãn rukwal̦o̦k naan eo m̦õttam̦ kõn tõprak ko kwõj loi ilo kwal̦o̦k naan. Jet iien, ñe kwõj kile bwe ewõr jet men ko me eo m̦õttam̦ ej aikuj kakõm̦anm̦anl̦o̦k ilo an kwal̦o̦k naan, kwõn jab ãliklik in jipañe. (JK. 3:27) El̦aññe ekkar, kwõmaroñ ba, “Kwõl̦ak lale armej eo emel̦el̦e ke?” ak “Imaroñ ke kwal̦o̦k juon aõ l̦õmn̦ak?” Ñe eaab, kwõmaroñ kwal̦o̦k ta ko kwõn kar kõm̦m̦ani ak ba ñan armej eo el̦aññe en kar kwe eo kwõj kõnnaan. Eaorõk bwe kwõn jipañ rukwal̦o̦k eo m̦õttam̦ ilo am̦ kwal̦o̦k ta ko emaroñ kõm̦m̦ani bwe en em̦m̦anl̦o̦k wãween an kwal̦o̦k naan. Bõtab, kwõj aikuj keememej bwe el̦aññe aolep iien kwõj lel̦o̦k naan in kakapilõk ko, rukwal̦o̦k eo emaroñ ebbeer im l̦õmn̦ak bwe el̦ap wõt am̦ l̦õmn̦ak kõn likjab ko ej kõm̦m̦ani ilo an kwal̦o̦k naan. Kõn men in, kwõj aikuj keememej ñan lel̦o̦k naan in kakapilõk ko ñan rukwal̦o̦k naan eo m̦õttam̦ ilo iien ko wõt me rekkar.

Kõm̦m̦ane Men in Ilo Allõñ In:

Ãlikin amiro rukwal̦o̦k naan eo m̦õttam̦ kwal̦o̦k naan ippãn doon, kwõn kwal̦o̦k ñane kõn men ko rem̦m̦an me ear kõm̦m̦ani ak ba im el̦ap aer kar jipañ eok ilo amiro kwal̦o̦k naan.