Kammineneik Er bwe Ren Wõnm̦aanl̦o̦k Wõt ilo Aer Karejar ñan Jeova

Em̦õj etale im lo bwe rukwal̦o̦k naan ro rekããl me kar katakin er jãn jinoin bwe ren niknik im kijejeto ilo kwal̦o̦k naan, ekkã an rein lo tõprak ilo jerbalin kwal̦o̦k naan. (JK 22:6; Pil 3:16) Erkein jet iaan wãween ko kwõmaroñ l̦oori ñan jipañ rũkkatak eo am̦ ilo jinoin an kwal̦o̦k naan:

• Ilo iien eo wõt ãlikin an rũkkatak eo am̦ erom juon rukwal̦o̦k naan, jino jerbal ippãn im kammineneiki. (km 8/15 1) Kwal̦o̦k ñane joñan an aorõk bwe en kwal̦o̦k naan kajjojo wiik. (Pil 1:10, UBS) Em̦m̦an ñe kwõj bwebwenato kõn men ko rem̦m̦an kõn teretore eo ami. (Pil 4:8) Rõjañe bwe en kwal̦o̦k naan ippãn em̦m̦aan eo ej loloorjake kumi in kwal̦o̦k naan eo ami im ippãn rukwal̦o̦k ro jet, kõnke men in enaaj jipañe ñan katak jãn er.​—JK 1:5; km 10/12 6 pãr. 3

• Ãlikin an rũkkatak eo am̦ peptaij, jab bõjrak jãn am̦ rõjañe im kammineneiki ilo jerbalin kwal̦o̦k naan, el̦aptata ñe ejjañin dedel̦o̦k an katak kõn bok eo, “Yokwe eo an Anij.”​—km 12/13 7

• Kõjerbal juon naanin ijjino epidodo ñe kwõj kwal̦o̦k naan ippãn rukwal̦o̦k naan eo ekããl. Ãlikin am̦ roñjake an kwal̦o̦k naanin ijjino eo an, nõbar im kam̦m̦oolol e. Kwõmaroñ bar lel̦o̦k naanin rõjañ ko jet me renaaj jipañ kal̦apl̦o̦k an jel̦ã kwal̦o̦k naan.​—km 5/10 7