Tokjãn Am̦ Tõmak ilo​—Mej Im Jerkakpeje Eo An Jijej

Armej rejjab aikuj kar mej

“Jeova Anij ear bõk armej eo im likũt e ilo jikin kallib in Iden, bwe en jerbale im kõjparoke. Im Jeova Anij ear jiroñ armej eo im ba, ‘Jãn wõjke otemjej ijikin kallib eo kwõmaroñ m̦õñã wõt, a kõn wõjke in jel̦ã em̦m̦an im nana, kwõn jab m̦õñã jãne, bwe ilo raan eo kwõj m̦õñã jãne, kwõnaaj mej otem mej.’”​—Jenesis 2:15-17.

Anij ear likũt em̦m̦aan eo m̦oktata, Adam, ilo pedetaij eo ijin ioon lal̦ ilo jikin kallib in Iden, ijo me eobrak kõn menninmour im menin eddek ko raiboojoj. Ear lõñ wõjke ko me ewõr leer im Adam emaroñ m̦õñã jãni. Bõtab, Jeova Anij ear ba en jab m̦õñã jãn juon wõt wõjke. Ear kakkõl Adam bwe el̦aññe enaaj m̦õñã jãne, enaaj mej otem mej.

Adam ear ke mel̦el̦e kõn kakien eo an Anij? Aet, ear jel̦ã ta in mej kõnke em̦õj an kar lo an menninmour ko mej. El̦aññe Anij ear kõm̦anm̦an Adam bwe en jidik wõt iien an mour, enaaj kar ejjel̦o̦k tokjãn naanin kakkõl eo an. Kõn men in, Adam ear jel̦ã bwe el̦aññe enaaj pokake Anij im jab m̦õñã jãn leen wõjke eo, eban kar mej ak enaaj kar mour ñan indeeo.

Jet rej tõmak bwe wõjke eo ej kõkkar kõn an kar Adam im Iv babu ak pãd ippãn doon. Bõtab, ejjab m̦ool men in kõnke Jeova ear kõn̦aan bwe Adam im Iv ren “tim̦on̦ im orl̦o̦k, im kobrak lal̦, im kajoor jãne.” (Jenesis 1:28) Kakien eo Jeova ear ba ñan erro ej lukkuun kõnnaan kõn m̦oolin wõjke. Jeova ear n̦aetan wõjke in “wõjke in jel̦ã em̦m̦an im nana,” kõnke ej kaalikkar kõn maroñ eo an ñan jel̦ã ta eo em̦m̦an im ta eo enana ñan armej ro. Ñe Adam ear jab m̦õñã jãn leen wõjke eo, eban kar kwal̦o̦k wõt an pokake ak enaaj kar bar kwal̦o̦k an kam̦m̦oolole eo ear kõm̦anm̦ane im kajeraam̦m̦ane.

Adam ear mej kõnke ear jab pokake Anij

“[Anij] ear ba ñan Adam, ‘Kõn am̦ . . . m̦õñã jãn wõjke eo Iar jiroñ eok . . . kõn menokadu in mejam̦ kwõnaaj m̦õñã ekkan, ñan iien eo kwõj jepl̦aak ñan bwidej, bwe ar bõk eok jãne; bwe bwidej kwe, im ñan bwidej kwõnaaj jepl̦aak.’”​—Jenesis 3:17, 19.

Adam ear m̦õñã jãn wõjke eo me ear mo̦ an m̦õñã jãne. Men in ear kõm̦m̦ane ear juon jerawiwi el̦ap. Ilo an kar jab pokake, ear kwal̦o̦k an jum̦ae im kajettokjãn men ko rem̦m̦an Jeova ear kõm̦m̦ani ñane. Im ke ear m̦õñã jãn leen wõjke eo, ear kããlõt ñan tõl e make im kõjekdo̦o̦n Jeova. An kar kõm̦m̦ane men in ear kõm̦m̦an bwe en wal̦o̦k elõñ men ko rekabũrom̦õjm̦õj.

Ejjabto Adam ear mej, ãinwõt an kar Jeova ba. Anij ear kõm̦anm̦an Adam “jãn bũñal in ãne” im ear ba ñane bwe enaaj bar “jepl̦aak ñan bwidej.” Alikkar bwe Adam ear jab bar mour m̦aanl̦o̦k wõt ilo bar juon ãnbwin ak ilo bar juon jikin. Kõnke kar kõm̦anm̦ane jãn bũñal, ke ear mej ear bar ro̦o̦l im erom bũñal.​—Jenesis 2:7; Ekklisiastis 9:5, 10.

Jej mej kõnke jej ro nejin Adam

“Ãinwõt kõn juon armej, jerawiwi ear del̦o̦ñ ilo lal̦, im mej kõn jerawiwi; im ãindein mej ear itok ioon armej otemjej, bwe er otemjej rar jerawiwi.”​—Rom 5:12.

An Adam kar jab pokake ak jerawiwi, ear kõm̦m̦an bwe en wal̦o̦k men ko rekabũrom̦õjm̦õj. Kõn an kar jerawiwi, ekar luuji mour eo an me en kar ñan indeeo im eban kar ñan 70 ak 80 wõt iiõ. Bareinwõt, ke Adam ear jerawiwi, ear jako an weeppãn im aolep ro nejin rejjab bar weeppãn.

Kõj aolep nejin Adam. Kõn men in, kõj aolep jej jerawiwi im mej kõnke jej bõdañe Adam. Paul ear kwal̦o̦k kõn apañ in ilo an ba: “Ña Ij kanniõk wõt, em̦õj wiakake eõ ium̦win jerawiwi. O ña armej eñtaan! Wõn enaaj kõtl̦o̦k eõ jãn ãnbwinnin mej in?” Paul ear make uwaake kajjitõk in an im ba: “Ij kam̦m̦oolol Anij kõn Jijej Kũraij ad Irooj.”​—Rom 7:14, 24, 25.

Jijej ear mej bwe jen maroñ mour ñan indeeo

“Jemãd ear jilkintok Nejin bwe En Rũlo̦mo̦o̦ren lal̦.”—1 Jon 4:14.

Jeova Anij ear kõm̦m̦ane juon karõk ñan n̦amejal̦an apañ ko jej iiooni kõn ad rijjerawiwi im kanemkwõj kõj bwe jen jab mej ñan indeeo. Ewi wãween? Eokwe, ikijjeen an kar jilkintok Nejin eo ej make wõt jãn lañ bwe en l̦otak ãinwõt juon armej eweeppãn ãinwõt kar Adam. Bõtab, Jijej ear oktak jãn Adam kõnke “ear jab kõm̦m̦an jerawiwi.” (1 Piter 2:22, UBS) Kõnke Jijej ear weeppãn, ear jab juon rijjerawiwi im eban kar mej. Emaroñ kar mour ñan indeeo ãinwõt juon armej eweeppãn.

Bõtab, Jeova ear kõtl̦o̦k bwe ro rar kõjdate Jijej ren m̦ane ñan mej. Im jilu raan tokãlik, Jeova ear kõmouri Jijej ãinwõt juon jetõb bwe ejjabto tokãlik en maroñ wanlõñl̦o̦k ñan lañ. Jijej ear katok kõn mour eo an eweeppãn ñan Anij bwe en kõl̦l̦ãik men eo Adam im ro nejin rar luuji. Jeova ear m̦õn̦õn̦õ kõn menin katok in. Kõn men in, ear kõm̦m̦an bwe ro rej kwal̦o̦k aer tõmak ilo Jijej ren maroñ bõk mour indeeo.​—Rom 3:23, 24, UBS; 1 Jon 2:2, UBS.

Jijej ear kõjepl̦aaktok men eo Adam ear luuji. Ear eñtaan im mej kõn kõj bwe jen maroñ mour ñan indeeo. Baibõl̦ ej ba bwe Jijej ear eñtaan im mej “bwe ilo jouj an Anij En edjoñ mej ñan armej otemjej.”​—Hibru 2:9.

An kar Jijej mej kõn kõj ej kaalikkar kain Anij rot Jeova. Elukkuun jim̦we wãween an ekajet. Innem, kõnke kõj armej jejjab weeppãn, jejjab maroñ kõl̦l̦ãik on̦ãn jerawiwi ko ad. Bõtab, kõn an l̦ap an Jeova yokwe im tũriam̦o, men kein rar kõm̦akũti ñan an jilkintok nejin eo ej make wõt ñan kõl̦l̦ãik on̦ãn jerawiwi ko ad.​—Rom 5:6-8, UBS.

Jijej ear jerkakpeje im mour, im ro jet renaaj bar mour

“Em̦õj an Kũraij jerkakpeje jãn ro remej, leen m̦oktata iaan ro rej kiki. Bwe ãinwõt mej ear itok kõn armej, bareinwõt kõn armej ej itok jerkakpeje an ro remej. Bwe ãinwõt ilo Adam ro otemjej rej mej, ãindein bareinwõt ilo Kũraij ro otemjej renaaj mour.”​—1 Korint 15:20-22.

Ejjel̦o̦k pere bwe Jijej ear mour im tokãlik mej. Ak ta kein kam̦ool ko bwe Jijej ear jerkakpeje jãn mej? Juon iaan kein kam̦ool ko ej bwe ke Jijej ear jerkakpeje, elõñ armej ro ear wal̦o̦kl̦o̦k ñan er ilo jikin im iien ko reoktak jãn doon. Ñan waanjoñak, juon iien ear wal̦o̦k ñan elõñl̦o̦k jãn 500 armej ro. Rijjilõk Paul ear je men in ilo lõta eo an ñan RiKorint ro. Ear ba bwe jet iaan armej rein me rar lo Jijej rar mour wõt, im armej rein remaroñ kwal̦o̦k kõn ta ko rar loi im roñ.​—1 Korint 15:3-8.

Ilo m̦ool, ke Paul ear ba bwe Kũraij ear ‘leen eo m̦oktata’ iaan ro rar jerkak jãn mej, ear kaalikkar bwe ro jet renaaj bareinwõt jerkak im mour tokãlik. Jijej make ear ba bwe ej itok wõt iien eo ñe “ro otemjej rej pãd ilo lõb ko” renaaj “diwõjtok.”​—Jon 5:28, 29.

Bwe jen maroñ mour ñan indeeo, jej aikuj kwal̦o̦k ad tõmak ilo Jijej

“Bwe joñan an Anij yokwe lal̦, ear letok Nejin eo ej make wõt, bwe jabdewõt eo ej tõmak ilo e en jab jako, ak en mour indeeo.”​—Jon 3:16, UBS.

Bok eo jinointata ilo Baibõl̦ ej kwal̦o̦k kõn an kar jino wal̦o̦k mej, im Pedetaij eo ear jako. Ak bok eo ãliktata ej kwal̦o̦k kõn an naaj bar ejjel̦o̦k mej im bwe Anij enaaj kõm̦m̦an bwe lal̦ in en bar erom juon Pedetaij. Armej ro renaaj mour im m̦õn̦õn̦õ ñan indeeo. Revelesõn 21:4 ej ba: “Enaaj ejjel̦o̦k bar mej.” Bwe jen maroñ jel̦ã joñan an m̦ool kallim̦ur in, eoon 5 ej ba: “Naan kein retiljek im rem̦ool.” Ealikkar bwe Jeova enaaj kajejjet men ko em̦õj an kallim̦ur kaki.

Kwõj ke tõmak bwe “naan kein retiljek im m̦ool”? Eokwe, kal̦apl̦o̦k am̦ katak kõn Jijej Kũraij, im kwal̦o̦k am̦ tõmak ilo e. El̦aññe kwõnaaj kõm̦m̦ane men in, Jeova enaaj m̦õn̦õn̦õ ippam̦. Enaaj kajeraam̦m̦an eok kiiõ, im enaaj wõr am̦ kõjatdikdik ñan mour indeeo ilo Pedetaij eo ijin ioon lal̦ me “enaaj ejjel̦o̦k bar mej, im rejãmin bar liaajlo̦l̦, ak jañ, ak eñtaan.”