Ta ko Rej Kwal̦o̦k bwe Jeova Ej Yokwe Kõj?

1. Ta eo rijjilõk Jon ear rõjañ kõj bwe jen kõl̦mãnl̦o̦kjen̦ kake, im etke?

RIJJILÕK Jon ej rõjañ kõj bwe jen lukkuun kõl̦mãnl̦o̦kjen̦ kõn joñan yokwe eo an Jeova ñan kõj. Ilo bokin 1 Jon 3:1 (UBS) ej ba: “Lale m̦õk joñan an Jemãd yokwe kõj!” Ñe jenaaj kõl̦mãnl̦o̦kjen̦ kõn joñan an Jeova yokwe kõj im wãween an kwal̦o̦k an yokwe kõj, jenaaj epaakel̦o̦k e im enaaj l̦apl̦o̦k ad yokwe e.

2. Etke epen an jet mel̦el̦e bwe el̦ap an Anij yokwe er?

² Ekabũrom̦õjm̦õj bwe jet rejjab mel̦el̦e ewi wãween an Anij yokwe er. Rej l̦õmn̦ak bwe Anij ejjab kea kake armej ro. Ak bõlen rej l̦õmn̦ak bwe Anij ej kõm̦m̦an wõt kien im kajeik ro me rejjab pokake kien ko an. Katak ko rejjab m̦ool rej kõm̦m̦an an jet l̦õmn̦ak bwe Anij elukkuun nana im lãj im jejjab maroñ yokwe e. Ak ro jet rej l̦õmn̦ak bwe Anij ej yokwe aolep armej ro jekdo̦o̦n ta ko rej kõm̦m̦ani. Bõtab, kõn am̦ katak Baibõl̦, men in ej jipañ eok ñan jel̦ã m̦ool eo kõn Jeova. Kwõjel̦ã bwe yokwe ej men eo el̦aptata ippãn im bwe ear letok Nejin bwe en mej kõn kõj. (Jon 3:16; 1 Jon 4:8) Bõtab, kõnke elõñ men ko reppen kwaar iiooni ilo mour n̦e am̦, men in emaroñ kõm̦m̦an bwe en pen am̦ mel̦el̦e joñan an Jeova yokwe eok.

3. Ta eo enaaj jipañ kõj ñan mel̦el̦e kõn yokwe eo an Jeova ñan kõj?

³ Bwe jen maroñ mel̦el̦e kõn yokwe eo an Jeova ñan kõj, m̦oktata jej aikuj mel̦el̦e bwe Jeova eo ear kõm̦anm̦an kõj. Ear letok mour ñan kõj. (Riit Sam 100:3-5.) Eñin unin Baibõl̦ ej ba bwe em̦m̦aan eo m̦oktata ej “nejin Anij.” (Luk 3:38) Bareinwõt, Jijej ear katakin kõj bwe jen kũr Jeova im ba, “Jememwõj ilañ.” (Matu 6:9) Jeova ej Jemãd im ej yokwe kõj ãinwõt an juon em̦m̦aan eo el̦ap yokwe ippãn yokwe ajri ro nejin.

4. (1) Ewi wãween an Jeova oktak jãn ro jemãd? (2) Ta eo jenaaj etale ilo katak in im katak eo tok juon?

⁴ Epen an jet l̦õmn̦ak kõn juon jemãn eo me el̦ap yokwe ippãn. Emaroñ pen ñan er kõnke ke rar dik ear lukkuun nana an jemãer kõm̦m̦an ñan er. Jeova eban kõm̦m̦ane men in ñan ro nejin. Jeova ej Jemãd eo em̦m̦antata. (Sam 27:10, UBS) El̦ap an yokwe kõj im ej lale kõj ilo elõñ wãween ko. Ñe el̦apl̦o̦k ad kile an Jeova yokwe kõj, enaaj l̦apl̦o̦k ad yokwe e. (Jemes 4:8) Ilo katak in, jenaaj etale 4 wãween ko me Jeova ej kwal̦o̦k an yokwe kõj. Im ilo naaj katak eo tok juon, jenaaj etale 4 wãween ko jemaroñ kwal̦o̦k ad yokwe e.

EL̦AP AN JEOVA YOKWE IM JOUJ

5. Ta eo Anij ej letok ñan kõj aolep?

⁵ Ke rijjilõk Paul ear pãd ilo Atens ilo aelõñin Grik, ear kile bwe ear lõñ ekjab ko im bwe elõñ armej rar tõmak bwe anij ko aer rar lel̦o̦k mour ñan er. Kõn men in, ear kwal̦o̦k ñan er kõn “Anij, eo ear kõm̦anm̦an lal̦ im men ko otemjej ie.” Ear ba bwe Anij ear “lel̦o̦k mour im menono im men otemjej ñan armej otemjej” im bwe “ilo e, jej mour im m̦akũtkũt im pãd.” (Jerbal 17:24, 25, 28, UBS) Jeova ej letok ñan kõj aolep men ko jej aikuji bwe jen maroñ mour im m̦õn̦õn̦õ. Kõl̦mãnl̦o̦kjen̦ m̦õk kõn jet iaan men ko me em̦õj an litok ñan kõj kõn wõt yokwe eo an ñan kõj.

6. Ke Jeova ear kõm̦anm̦an lal̦ in, ewi wãween an men in kwal̦o̦k ñan kõj joñan an yokwe kõj? (Lale pija eo ilo jinoin katak in.)

⁶ Ñan waanjoñak, Jeova ear kõpooj juon jikin aiboojoj ñan ad jokwe ie. (Sam 115:15, 16) Iaan aolep bũl̦ãnet ko ear kõm̦anm̦ani, lal̦ in ej bũl̦ãnet eo me ej make wõt jejuwaan. Elõñ rũmmãlõtlõt ro rar ekkatak kõn bũl̦ãnet ko jet im kõm̦m̦an etale kaki, ak rejjañin loe juon bũl̦ãnet me ewõr aolep men ko me armej ro rej aikuji ñan aer mour. Jeova ear jab baj letok wõt men ko jej aikuji bwe jen mour. Ear bar kõm̦m̦an bwe lal̦ in en aiboojoj im bwe en juon jikin me jemaroñ jokwe ie, im jen m̦õn̦õn̦õ ilo ad mour ie. (Aiseia 45:18) Ñe jenaaj kõl̦mãnl̦o̦kjen̦ kõn lal̦ in me Jemãdwõj Jeova ear letok ñan kõj, jenaaj kile joñan an yokwe kõj.​—Riit Job 38:4, 7; Sam 8:3-5.

7. Ewi wãween an Jeova kaalikkar an yokwe kõj ilo an kar kõm̦anm̦an kõj?

⁷ Bar juon wãween Jeova ej kwal̦o̦k an yokwe kõj ej ilo an kar kõm̦anm̦an kõj im letok ñan kõj maroñ eo bwe jen anõke. (Jenesis 1:27) Mel̦el̦ein men in bwe jemaroñ kile yokwe eo an ñan kõj im jemaroñ kwal̦o̦k ad yokwe e. Ejel̦ã bwe eñin ej wãween eo bwe jen lo m̦õn̦õn̦õ eo em̦ool. Jejel̦ã bwe ajri ro rej m̦õn̦õn̦õ ñe rej kile bwe jemãer im jineer rej yokwe er. Ejja ãindeinl̦o̦k wõt, Jijej ear katakin kõj bwe jenaaj m̦õn̦õn̦õ el̦aññe jej epaake Jemãd Jeova. (Luk 11:28) Jeova ej letok ñan kõj “men ko otemjej bwe jen m̦õn̦õn̦õ kaki.” Elukkuun alikkar bwe el̦ap an jouj im ej lukkuun yokwe kõj.​—1 Timote 6:17; Sam 145:16.

JEOVA EJ KATAKIN KÕJ M̦OOL EO

8. Etke jekõn̦aan bwe Jeova en katakin kõj?

⁸ El̦ap an jemãn ajri ro yokwe ajri ro nejier im rejjab kõn̦aan bwe ren jebwãbwe. Ak elõñ ro jinen im jemãn ajri ro rejjab kõn̦aan l̦oore kien ko ilo Baibõl̦ kõn ta ko rejim̦we im ta ko rebõd. Kõn men in, eban jim̦we wãween aer tõl ajri ro nejier im men in ej kõm̦m̦an bwe ajri ro ren jab lo m̦õn̦õn̦õ im ren jebwãbwe ilo aer rũttol̦o̦k. (Jabõn Kõnnaan 14:12, UBS) Bõtab, Jeova ej lel̦o̦k naanin tõl ko rem̦m̦antata ñan ro nejin kõnke ej “Anij in m̦ool.” (Sam 31:5) Em̦õn̦õn̦õ in katakin kõj m̦ool eo kõn e im wãween ad maroñ kabuñ ñane. Bareinwõt, ej kwal̦o̦k ñan kõj wãween mour eo em̦m̦antata. (Riit Sam 43:3.) Ak ta ko Jeova ej katakin kõj kaki me rej kaalikkar joñan an yokwe kõj?

9, 10. (1) Etke Jeova ej katakin kõj kõn e make? (2) Ewi wãween an Jeova katakin kõj kõn karõk ko an?

⁹ M̦oktata, Jeova ej katakin kõj kõn e make. Ekõn̦aan bwe jen jel̦ã kajjien im epaake e. (Jemes 4:8) Eñin unin ej kwal̦o̦k ñan kõj kõn ãt eo etan. Ilo m̦ool, elõñl̦o̦k alen an wal̦o̦k etan Anij ilo Baibõl̦ jãn ãt ko jet. Jeova ej bar katakin kõj kõn kain Anij rot e. Ñe jej lali menin kõm̦anm̦an ko an, jej katak bwe ej juon eo ekajoor im mãlõtlõt. (Rom 1:20, UBS) Im ñe jej riit Baibõl̦, jej katak kõn joñan an yokwe kõj im bwe ejjab kalijekl̦o̦k. Ilo ad jel̦ãl̦o̦k kajjien Jeova im men ko rem̦m̦an kõn e, jenaaj kile ad epaakel̦o̦k e.

¹⁰ Jeova ej bar katakin kõj kõn karõk ko an. Ej kwal̦o̦k ñan kõj bwe jej m̦õttan baam̦le eo an. Bareinwõt, ej kõmel̦el̦eik kõj kõn ta ko jej aikuj kõm̦m̦ani bwe jen maroñ bõrokuk im aenõm̦m̦an ippãn ro ilo baam̦le eo an. Baibõl̦ ej lukkuun kaalikkar bwe Anij ear jab kõm̦anm̦an kõj bwe jen tõl kõj make. (Jeremaia 10:23) Jeova ejel̦ã ta ko rem̦m̦antata ñan kõj. Kõn men in, el̦aññe jej m̦õn̦õn̦õ in pãd ium̦win tõl eo an im pokake e, jenaaj lo m̦õn̦õn̦õ im aenõm̦m̦an ilo mour ko ad. Em̦õj an Jeova katakin kõj kõn men in kõnke el̦ap an yokwe kõj.

11. Ta kallim̦ur eo an Jeova me ej kaalikkar an yokwe im kea kake kõj?

¹¹ Ñe juon jemãn ajri ej lukkuun yokwe ajri ro nejin, enaaj lukkuun l̦õmn̦ak kõn ilju im jekl̦aj eo an ajri ro nejin. Ekõn̦aan bwe ñe renaaj rũttol̦o̦k en em̦m̦an wãween aer mour im ren lo m̦õn̦õn̦õ. Ekabũrom̦õjm̦õj bwe enañin aolep armej ro rainin rej inepata kõn ilju im jekl̦aj, im elõñ rej jol̦o̦k el̦ap iien ñan kõm̦m̦ani men ko me rej ñan jidik wõt iien. (Sam 90:10, UBS) El̦ap ad m̦õn̦õn̦õ bwe Jemãd Jeova ear jab baj katakin wõt kõj wãween ad maroñ lo juon mour elem̦õn̦õn̦õ kiiõ, ak ear bar kallim̦uri kõj kõn juon ilju im jekl̦aj em̦m̦an!

JEOVA EJ KATAKIN IM KAUWEIK AJRI RO NEJIN

12. Ewi wãween an Jeova kar kajjioñ jipañ Kein im Baruk?

¹² Ke Jeova ear loe bwe Kein ear itõn kõm̦m̦ane juon men enana, ear kajjioñ jipañ Kein ilo an kajjitõk im ba: “Etke kwõj illu? Im etke ejememe mejam̦? El̦aññe kwõj kõm̦m̦an em̦m̦an, ejãmin alikkar ke?” (Jenesis 4:6, 7) Kein ear jab kõn̦aan bwe Jeova en jipañe. Kõn an kar jab roñjake Jeova, ear eñtaan. (Jenesis 4:11-13, UBS) Bar juon iien, Jeova ear kile bwe l̦õmn̦ak ko an Baruk rar kõm̦m̦an bwe en m̦õk im jino ebbeer. Kõn men in, Jeova ear ba ñan Baruk bwe ejjab jim̦we l̦õmn̦ak ko an im ej aikuj kõm̦m̦an oktak. Baruk ear roñjake naanin kakapilõk ko an Jeova im men in ear lo̦mo̦o̦rene.​—Jeremaia 45:2-5.

13. Ta ko rũkarejar ro retiljek an Jeova rar katak jãn mãlejjoñ ko rel̦l̦ap rar iiooni?

¹³ Jeova ej katakin im kauweik kõj kõnke ej yokwe kõj. Ejjab baj kajim̦we wõt kõj ñe ej menin aikuj, ak ej bar katakin im kammineneik kõj. (Hibru 12:6) Ñe jej riit Baibõl̦, jej riit kõn rũkarejar ro retiljek an Jeova me ear katakin im kammineneik er bwe ren jet armej ro rem̦m̦an. Ñan waanjoñak, Josep, Moses, im Devid rar iioon mãlejjoñ ko rel̦l̦ap. Ke rar iioon mãlejjoñ, Jeova ear pãd ippãer. Im men ko rar katak ilo iien kein reppen rar jipañ er ke rar bõk eddo ko rel̦l̦apl̦o̦k me Jeova ear lil̦o̦k ñan er. Ilo ad riit ilo Baibõl̦ kõn wãween an Jeova jipañ im katakin armej ro an, jej lukkuun kile bwe Jeova el̦ap an yokwe kõj.​—Riit Jabõn Kõnnaan 3:11, 12.

14. Ñe jej kõm̦m̦an bõd, ewi wãween an Jeova kwal̦o̦k an yokwe kõj?

¹⁴ Meñe jej kõm̦m̦an bõd, ak Jeova ej wõnm̦aanl̦o̦k wõt im kwal̦o̦k an yokwe kõj. Ñe Jeova ej kauwe ak kajim̦weik kõj im jej roñjake ilo ad oktak jãn bõd eo jaar kõm̦m̦ane, enaaj “kanooj wũjlep in jol̦o̦k bõd ko” ad. (Aiseia 55:7) Ta mel̦el̦ein men in? Eokwe, naan ko an Devid kõn an Jeova jol̦o̦k ad bõd ej kwal̦o̦k ñan kõj bwe ej juon Jemãd eo el̦ap an tũriam̦o. Ear ba: “Ej jeorl̦o̦k jerawiwi ko am̦ otemjej, Eo ej kãjmour eok jãn nañinmej ko am̦ otemjej. Eo ej wiaik am̦ mour jãn lõb eo; Eo ej kõpãlpel eok kõn jouj im tũriam̦okake ko ãinwõt rear ettol̦o̦k jãn kapilõñ, ãindein Ear likũt bõd ko am ettol̦o̦k jãn kõm.” (Sam 103:3, 4, 12) Jeova ej tõl im kauweik kõj ilo elõñ wãween ko. Kwõj ke m̦õkaj ñan kõm̦m̦an oktak ñe ej kajim̦we eok? Aolep iien jej aikuj keememej bwe Jeova ej kauwe im kajim̦weik kõj kõnke ej yokwe kõj.​—Sam 30:5, UBS.

JEOVA EJ KÕJPAROK KÕJ

15. Ta eo ej kwal̦o̦k bwe armej ro an Jeova relukkuun aorõk ippãn?

¹⁵ Juon em̦m̦aan eo el̦ap yokwe ippãn ej kõjparok baam̦le eo an jãn men ko rekauwõtata. Eñin ej men eo Jemãd Jeova ej kõm̦m̦ane ñan kõj. Juon iaan ro rar je bokin Sam ear ba men in kõn Jeova. Ear ba: “Ej kõjparok mour an ro rem̦m̦an An; Ej kõtl̦o̦k er jãn pein ro rijjerawiwi.” (Sam 97:10) Ñan waanjoñak, ñe juon men ej itõn del̦o̦ñe mejam̦, kwõj m̦õkaj im kilõke im kõjparoke kõnke eaorõk ippam̦. Ejja ãindeinl̦o̦k wõt an Jeova m̦õkaj in kõjparok armej ro an kõnke relukkuun aorõk ippãn.​—Riit Zekaraia 2:8.

16, 17. Ewi wãween an kar Jeova kõjparok armej ro an m̦okta im ilo raan kein ad?

¹⁶ Juon iaan wãween ko Jeova ear kõjparok armej ro an m̦okta im raan kein ej ikijjeen enjel̦ ro. (Sam 91:11) Ñan waanjoñak, juon enjel̦ ear m̦ane 185,000 rũttarin̦ae ro an Assiria ilo juon wõt boñ im lo̦mo̦o̦ren armej ro an Anij. (2 Kiiñ 19:35) Ilo tõre ko an rijjilõk ro, enjel̦ ro rar lo̦mo̦o̦ren Piter, Paul, im ro jet jãn ilowaan kalbuuj. (Jerbal 5:18-20; 12:6-11) Ilo raan kein, ear wal̦o̦k juon tarin̦ae el̦ap ilo aelõñin Africa. Aelõñ in ear lukkuun jorrããn kõn an l̦ap an armej ro m̦an doon, ko̦o̦t, an em̦m̦aan ro rape ak ko̦kkure kõrã ro, im elõñ armej rar mej. Bõtab, ejjel̦o̦k juon iaan ro jeid im jatid ear mej, ak elõñ iaaer rar luuji men ko m̦weieer. Rar aolep kile yokwe eo an Jeova im rar jel̦ã bwe ear lale im kõjparok er. Meñe ear l̦ap aer eñtaan ak rar m̦õn̦õn̦õ wõt. Ke juon iaan em̦m̦aan ro jãn ra eo ad el̦ap ear lol̦o̦k er im lale ejet an rein jeid im jatid pãd, rar ba: “Kam̦m̦oolol Jeova bwe aolep men im em̦m̦an!”

¹⁷ Jet iien rũkõjdat ro ak ro rej jum̦ae kõj rej m̦an jet iaan rũkarejar ro an Jeova ñan mej kõn wõt aer tiljek ñan Jeova. Im juon iaan rein ej rũkal̦oor Stipen. Ejjab aolep iien Jeova ej kabõjrak an men in wal̦o̦k. Bõtab, ej kõjparok aolep armej ro an ilo an kakkõl er kõn wãween ko Setan ej kõjerbali ñan m̦on̦e er. (Epesõs 6:10-12) Jej lo naanin kakkõl kein ilo Baibõl̦ im ilo bok ko ad jãn doulul in an Jeova. Ñan waanjoñak, jej katak kõn men ko rekauwõtata rej wal̦o̦k jãn ad kõjerbal Internet im arõk jããn. Jej bar katak kõn men ko rekauwõtata rej wal̦o̦k jãn pija ko, bok ko, im mijjin ko el̦ap lãj ie im rej kwal̦o̦k kõn mour ettoon. Elukkuun alikkar bwe Jeova el̦ap an yokwe kõj im ekõn̦aan kõjparok kõj.

JUON JERAAM̦M̦AN EL̦AP

18. Ta l̦õmn̦ak n̦e am̦ kõn yokwe eo an Jeova ñan kwe?

¹⁸ Ke Moses ear kõl̦mãnl̦o̦kjen̦ kõn iiõ ko ear karejar ñan Jeova, men in ear kõm̦m̦an an tõmak bwe el̦ap an Jeova yokwe e. Ear ba: “Jibboñ otemjej kwõn kobrak kõm kõn jouj im yokwe eo am̦ el̦ap, bwe kõmin al im m̦õn̦õn̦õ toon wõt am mour.” (Sam 90:14, UBS) Jelukkuun jeraam̦m̦an bwe jemaroñ mel̦el̦e im kile yokwe eo an Jeova ñan kõj. Ej juon jeraam̦m̦an el̦ap bwe Jeova ej yokwe kõj! Jej kile men in ãinwõt kar rijjilõk Jon, ke ear ba: “Lale m̦õk joñan an Jemãd yokwe kõj!”​—1 Jon 3:1, UBS.