Ad Kwal̦o̦k Ineem̦m̦an Ej Kaalikkar Ad Mãlõtlõt

KE EAR bar ro̦o̦ll̦o̦k, kõrã eo ear bar illu ippãn im bũroñe. Ta eo Antonia ear kõm̦m̦ane? Ej ba: “Ear lukkuun pen kõnke ejjel̦o̦k unin an kar luuki eõ im bũroñe eõ.” Meñe ãindein, ak Antonia ear bar jol̦o̦k an bõd im ba ñan kõrã eo bwe emel̦el̦e bwe unin an illu ej kõnke elõñ apañ ko ej iiooni.

Ñe en kar kwe Antonia, ta eo kwõnaaj kar kõm̦m̦ane? Kwõnaaj ke kar kate eok ñan kwal̦o̦k wõt ineem̦m̦an? Enaaj ke kar pen ñan am̦ dãpij am̦ illu? Ejjel̦o̦k pere bwe emaroñ jab pidodo ñan ad kwal̦o̦k wõt ineem̦m̦an ñe jej iioon wãween rot in. Ñe jej inepata im ro jet rej ba ak kõm̦m̦ani men ko rej kalluuk kõj, elukkuun pen ñan ad kwal̦o̦k wõt ineem̦m̦an.

Bõtab Baibõl̦ ej rõjañ Kũrjin ro ñan kwal̦o̦k ineem̦m̦an. Ilo m̦ool, Naanin Anij ej kaalikkar bwe ineem̦m̦an ej ekkejell̦o̦k ippãn mãlõtlõt. Jemes ear ba: “Wõn iaami emãlõtlõt im jel̦ãl̦o̦kjen̦? En kwal̦o̦k, kõn an kõm̦m̦an em̦m̦an, jerbal ko an ilo ineem̦m̦an in mãlõtlõt.” (Jemes 3:13) Ñe juon ej kwal̦o̦k ineem̦m̦an, ewi wãween an men in kaalikkar an mãlõtlõt? Im ta eo emaroñ jipañ kõj bwe jen jel̦ã kwal̦o̦k ineem̦m̦an?

TOKJÃN AD KWAL̦O̦K INEEM̦M̦AN

Ñe jej kwal̦o̦k ineem̦m̦an, men in emaroñ jipañ kõm̦m̦an bwe en wõr aenõm̦m̦an. Baibõl̦ ej ba: “Juon uwaak eo emera ej kadikl̦o̦k illu, ak naan ko reddo rej poktake illu.”​—Jabõn Kõnnaan 15:1, UBS.

Ñe juon ej ba men ko reddo kõn an illu im jej bar ukotl̦o̦k ilo illu, men in emaroñ kõm̦m̦an bwe en l̦apl̦o̦k wõt apañ eo. Ej ãinwõt ñe jej anõkkaane juon kijeek bwe en l̦apl̦o̦k an urur. (Jabõn Kõnnaan 26:21) Bõtab ñe jej kwal̦o̦k wõt ineem̦m̦an, ekkã an men in kõm̦m̦an bwe en wõr aenõm̦m̦an. Emaroñ kõm̦m̦an bwe en med bũruon armej eo ej illu.

Antonia ear loe an m̦ool men in. Ke kõrã eo ear loe an kwal̦o̦k wõt ineem̦m̦an, ear jino jañ. Ear kõmel̦el̦eiki Antonia bwe elõñ apañ im inepata ko ej iiooni ilo mour eo an im jãn baam̦le eo an. Kõn men in, Antonia ear kwal̦o̦k naan ñan kõrã in, im kõrã in ear jino katak Baibõl̦ ippãn. Men in ear wal̦o̦k itok wõt jãn an kar kwal̦o̦k ineem̦m̦an.

Ñe jej kwal̦o̦k ineem̦m̦an, men in ej kõm̦m̦an bwe jen m̦õn̦õn̦õ. Baibõl̦ ej ba: “Em̦õn̦õn̦õ ro ettã bũrueer [rej ineem̦m̦an, NW]; bwe renaaj jolõt lal̦.”​—Matu 5:5.

Etke jemaroñ ba bwe ro reineem̦m̦an rej lo m̦õn̦õn̦õ? Elõñ ro im rar lukkuun lãj m̦okta, bõtab kiiõ rej lo m̦õn̦õn̦õ ilo mour ko aer itok wõt jãn aer kwal̦o̦k ineem̦m̦an. Em̦m̦an wãween aer mour kiiõ, im ewõr aer kõjatdikdik kõn juon ilju im jekl̦aj em̦m̦an. (Kolosse 3:12) Adolfo, juon em̦m̦aan ej lol̦o̦k eklejia ko ilo Jipein, ej kwal̦o̦k wãween kar mour eo an m̦okta ke ejjañin kar lo m̦ool eo.

Adolfo ej ba, “Iar jab m̦õn̦õn̦õ ilo mour eo aõ m̦okta. Iar lukkuun jaje dãpij aõ illu, joñan jet iaan ro m̦õtta rar mijak eõ kõn aõ lãj im nana. Juon iien iar ire im rar n̦ate eõ 6 alen im ibaj wõt kar mej. Jãn kar iien in, iar kile bwe ij aikuj oktak.”

Bõtab, kiiõ Adolfo ej katakin ro jet ñan kwal̦o̦k ineem̦m̦an ilo wãween an kõnnaan im kõm̦m̦an. Elõñ rem̦õn̦õn̦õ in kepaake im m̦õttãiki kõn an jouj im ineem̦m̦an. Adolfo ej ba bwe em̦õn̦õn̦õ kõn oktak kein ear kõm̦m̦ani. Im el̦ap an kam̦m̦oolol Jeova kõn an kar jipañe bwe en jel̦ã kwal̦o̦k ineem̦m̦an.

Ñe jej kwal̦o̦k ineem̦m̦an, men in ej kam̦õn̦õn̦õik Jeova. Baibõl̦ ej ba: “Nejũ, kwõn mãlõtlõt, im kam̦õn̦õn̦õik bũruõ, bwe in uwaak ñan eo ej kinaak eõ.”​—Jabõn Kõnnaan 27:11.

Kõnke el̦ap an Tepil̦ eo kõjdate Jeova, ej kwal̦o̦k naan ko reriab n̦ae E. Jeova emaroñ kar kwal̦o̦k an illu kõn an Tepil̦ eo kananaik E, bõtab Baibõl̦ ej ba bwe Jeova “erum̦wij an illu.” (Exodus 34:6) Ñe jej kate kõj ñan anõke Anij ilo an ineem̦m̦an im rum̦wij an illu, men in ej kaalikkar ad mãlõtlõt im el̦ap an kam̦õn̦õn̦õik bũruon Jeova.​—Epesõs 5:1.

Elukkuun l̦ap an armej ro ilo jukjukun pãd in lãj. Jemaroñ iioone armej ro eutiej bũrueer, relãj, im ejjel̦o̦k aer tũriam̦o. (2 Timote 3:2, 3) Meñe ãindein, ak men in ejjab aikuj bõbraik Kũrjin ro jãn aer kwal̦o̦k wõt ineem̦m̦an. Naanin Anij ej kakeememej kõj bwe ‘mãlõtlõt jãn lañ eaenõm̦m̦an im jouj.’ (Jemes 3:17) Ñe jej aenõm̦m̦an wõt im kwal̦o̦k jouj, jej kaalikkar bwe mãlõtlõt eo jãn Anij ej pãd ippãd. Mãlõtlõt in jãn Anij enaaj kõm̦akũt kõj bwe jen kwal̦o̦k wõt ineem̦m̦an meñe ro jet rej ba ak kõm̦m̦ani men ko remaroñ kallu kõj. Bareinwõt, enaaj jipañ kõj bwe jen epaakel̦o̦k wõt Jeova, eo ej letok mãlõtlõt ñan kõj.