Jeova Ej Kaenõm̦m̦ane Kõj ilo Aolep Wãween ko Reppen Jej Iiooni

1, 2. Ewi wãween an Jeova kaenõm̦m̦ane kõj kõn apañ ko reppen jej iiooni, im ta eo Baibõl̦ ej kallim̦uri kõj kake?

JUON likao ejjel̦o̦k pãleen ear l̦õmn̦ak kõn eoon eo ilo 1 Korint 7:28, me ej ba bwe ro em̦õj aer m̦are “enaaj wõr eñtaan ippãer ilo kanniõk” ak apañ ko. Likao in jeid im jatid ear kajjitõk ippãn juon em̦m̦aan ej lale eklejia me em̦õj an m̦are, im ba: “Ta ‘eñtaan’ in ilo kanniõk’, im ewi wãween aõ naaj kõm̦adm̦õde ñe inaaj m̦are?” Ak m̦okta jãn an kar em̦m̦aan eo uwaake, ear ba ñan likao in bwe em̦m̦an en l̦õmn̦ak kõn bar juon men me Paul ear je. Ta in? Eñin bwe Jeova ej ‘Anij in aenõm̦m̦an otemjej, Eo ej kaenõm̦m̦ane kõj ilo ad jorrããn otemjej,’ ak eñtaan otemjej.​—2 Ko. 1:3, 4.

² Jejel̦ã bwe Jemãdwõj ilañ, Jeova, ej yokwe kõj im ej kaenõm̦m̦ane kõj ñe jej iiooni wãween ko reppen. Bõlen kwõj keememej iien ko kwaar kile an jipañ im tõl eok ikijjeen Naan eo an. Jemaroñ lõke bwe ekõn̦aan men eo em̦m̦antata ñan kõj, ãinwõt an kar bar ãindein ñan rũkarejar ro an ilo iien ko etto.​—Riit Jeremaia 29:11, 12, UBS.

3. Ta kajjitõk ko jenaaj etali ilo katak in?

³ Ekkã wõt an pidodol̦o̦k ad kijenmej kõn apañ ko ad im men ko jej eñtaan kaki ñe jejel̦ã unin an men kein wal̦o̦k. El̦aptata an aorõk men in ñe ewõr apañ im wãween ko reppen rej wal̦o̦k ilo mourin pãlele eo ad ak ilowaan baam̦le eo ad. Innem, ta ‘eñtaan eo ilo kanniõk’ me Paul ear ba enaaj wal̦o̦k ippãn rippãlele ro? Im ta waanjoñak ko ilo Baibõl̦ im ilo raan kein ad, me remaroñ lukkuun kaenõm̦m̦an kõj ñe jej iiooni wãween kein? Eokwe jen kiiõ etale uwaak ko ñan kajjitõk kein, im lale ewi wãween ad maroñ kijenmej wõt ñe wãween ko reppen rej wal̦o̦k ñan kõj.

APAÑ KO AK ‘EÑTAAN EO ILO KANNIÕK’

4, 5. Ta apañ ko ak ‘eñtaan eo ilo kanniõk’ me ej wal̦o̦k ippãn rippãlele ro?

⁴ Ãlikin an kar Jeova kõm̦anm̦an kõrã eo m̦oktata, ear bõkl̦o̦ke ñan em̦m̦aan eo im ear kõm̦areik erro. Innem Jeova ear ba: ‘Juon em̦m̦aan enaaj likũt jemãn im jinen im koba ippãn lio pãleen, im erro naaj juon wõt.’ (Jen. 2:24, UBS) Ilo m̦ool, kõj aolep jejjab weeppãn. (Rom 3:23) Kõn men in, ñe juon em̦m̦aan im juon kõrã rej m̦are, rej kõtmãne bwe renaaj iioon apañ ko im wãween ko reppen. Ñan waanjoñak, m̦okta jãn an juon kõrã m̦are emaroñ kar aikuj pokake jinen im jemãn. Ak Naanin Anij ej ba bwe ãlikin an ruo armej m̦are, eo enaaj bõran lio ej l̦eo pãleen. (1 Ko. 11:3, UBS) Bõlen ilo jinoin, l̦eo emaroñ kile bwe elukkuun pen an tõl kõrã eo pãleen. Im kõrã eo emaroñ lo bwe epen an kõttãiki im l̦oore tõl eo an l̦eo pãleen jãn jinen im jemãn. Bareinwõt, rippãlele ro ej kab m̦õj aer m̦are, emaroñ wõr apañ ko rej wal̦o̦k ikõtaer ippãn jinen im jemãn eo pãleer, im men in emaroñ bar juon apañ ak ‘eñtaan ilo kanniõk.’

⁵ Bareinwõt, l̦õmn̦ak m̦õk kõn wãween an rippãlele ro eñjake ñe rej kab jel̦ã bwe ej pojak in wõr nejier! Meñe remaroñ lukkuun m̦õn̦õn̦õ, ak ekkã wõt aer bar inepata. Remaroñ inepata kõn ãjmour eo an kõrã eo im bar niñniñ eo. Rebar jel̦ã bwe enaaj l̦apl̦o̦k aer aikuj jol̦o̦k jããn. Ãlikin an ajri eo l̦otak, rippãlele ro renaaj aikuj kõm̦m̦an oktak ilo mour eo aer. Kõrã eo enaaj aikuj jol̦o̦k el̦ap iien ippãn niñniñ eo im lale. Kõn men in, eban lukkuun l̦ap aerro l̦eo iien ippãn doon ãinwõt kar m̦okta. Em̦m̦aan eo ebar l̦apl̦o̦k kiiõ eddo ko ej ineeki. Enaaj aikuj kate e bwe en kabwe aikuj ko an kõrã eo pãleen kab niñniñ eo nejierro.

6-8. Ewi wãween an rippãlele ro eñjake el̦aññe ejjab maroñ wõr nejier?

⁶ Ebar wõr juon apañ ak eñtaan ilo kanniõk me jet rippãlele rej iioone. Relukkuun kõn̦aan bwe en wõr nejier ak rejjab maroñ. Ñe epen an juon kõrã bõro̦ro, men in emaroñ kõm̦m̦an bwe en lukkuun bũrom̦õj. (JK. 13:12, UBS) Ilo iien ko etto, el̦ap an kar aorõk bwe en wõr nejin juon kõrã. Eñin unin Rejel, lio pãleen Jekob ear lukkuun bũrom̦õj ke lio jein ear maroñ bõro̦ro ak e ear jab. (Jen. 30:1, 2, UBS) Ilo jet aelõñ ko ilo raan kein, elõñ rej l̦õmn̦ak bwe elukkuun aorõk bwe en bool̦ nejier ajri. Elõñ armej ro ilo aelõñ kein ekkã aer kajjitõk ippãn rippãlele ro me rej mijinede, etke ejjel̦o̦k nejier ajri. Meñe em̦õj an mijinede rein kajjioñ kõmel̦el̦eik er kõn unin an ejjel̦o̦k nejier, ak jet rej wõnm̦aanl̦o̦k wõt im ba, “Eokwe jenaaj jar kake eok!”

⁷ L̦õmn̦ak kõn bar juon waanjoñak. Juon jeid im jatid kõrã ilo Iñlen ear lukkuun kõn̦aan bwe en wõr nejin. Bõtab, kiiõ ear jab maroñ neji kõnke em̦õj an tõpar iiõ eo me ejjab maroñ bar neji. Ear lukkuun bũrom̦õj kõnke ejel̦ã ke eban jejjet kõn̦aan in an bwe en wõr nejin ilo jukjukun pãd in. Kõn men in, erro ar l̦eo ippãn pepe in kaajjiririiki juon nejierro ajri. Ak ewõr jet iien ear bũrom̦õj wõt. Im ear ba: Iar jel̦ã ke aõ kaajjiririiki juon ajri me ejjab bõtõktõkũ, eoktak jãn ñe in kar make kõl̦otake juon nejũ ajri.”

⁸ Baibõl̦ ej ba bwe juon kõrã ‘enaaj bõk lo̦mo̦o̦r ilo an keotak.’ (1 Ti. 2:15, UBS) Bõtab, ejjab mel̦el̦ein eoon in bwe juon kõrã enaaj bõk mour indeeo kõnke ewõr nejin. Innem ta lukkuun mel̦el̦ein eoon in? Eokwe, el̦ap an juon kõrã poub in lale ajri ro nejin im karreo im kõm̦m̦ani jerbal ko jet ilo m̦weo im̦õn. Wãween in enaaj bõbraik e jãn an itoitak im bwebwenato bajjek ak ruruwe. (1 Ti. 5:13, UBS) Meñe enaaj kate wõt e ñan kajejjet jerbal ko an, ak enaaj baj wõr wõt apañ ko enaaj iiooni ilo mourin pãlele im baam̦le eo an.

9. Bar ta apañ eo juon rippãlele ro remaroñ iioone?

⁹ Juon bar apañ rippãlele ro remaroñ iioone ej ñe ej mej eo pãleer. Meñe remaroñ kar jab kõtmãne bwe men in enaaj kar wal̦o̦k, ak elõñ rar aikuj kijenmej wõt ke rar iioone wãween in epen ke ear mej eo pãleer. Kũrjin ro rej lukkuun tõmak kallim̦ur eo bwe ro remej renaaj bar mour, im men in el̦ap an kaenõm̦m̦an er. (Jon 5:28, 29) Ilo Baibõl̦, elõñ kallim̦ur ko me em̦õj an Jemãd Jeova, likũti ñan kaenõm̦m̦an kõj ilo iien kein reppen. Kiiõ jen lale ewi wãween an kar Jeova kaenõm̦m̦ane jet iaan rũkarejar ro an, im ewi wãween an kar men in jipañ er.

BÕK KAENÕM̦M̦AN ÑE JEJ IIOONI WÃWEEN KO REPPEN

10. Ewi wãween an kar Hanna bõk kaenõm̦m̦an? (Lale pija eo ilo jinoin katak in.)

¹⁰ Jen lale ta eo ear wal̦o̦k ñan Hanna, kõrã eo pãleen Elkena me el̦ap an kar yokwe. Ear kõn̦aan bwe en wõr nejin ak ear jab maroñ neji. Bõtab, lio juon pãleen Elkena etan Penina, ear lõñ nejin. (Riit 1 Samuel 1:4-7, UBS.) Men ko Penina ear kõm̦m̦ani im ba, rar bar kõm̦m̦an bwe en l̦apl̦o̦k an Hanna inepata im bũrom̦õj. Kajjojo iiõ Penina ekõn kakũtõtõik Hanna kõn an ejjel̦o̦k nejin. Men in ear lukkuun kõmetak bũruon Hanna. Innem, ta eo Hanna ear kõm̦m̦ane bwe en bõk kaenõm̦m̦an? Ear jar ñan Jeova. Hanna ear etal ñan im̦õn kabuñ eo an Jeova im ekõn aetok an jar. Ear kajjitõk bwe Jeova en lel̦o̦k juon nejin l̦addik, im ear lõke bwe Enaaj jipañe. Ke ej m̦õj an jar, ear jino em̦m̦anl̦o̦k an mour im “turin mejãn ear jab bar bũrom̦õj.” (1 Sa. 1:12, 17, 18) Ear jel̦ã bwe Jeova emaroñ lel̦o̦k juon nejin l̦addik ak kaenõm̦m̦ane ilo bar jet wãween.

11. Ewi wãween jar emaroñ kaenõm̦m̦an kõj?

¹¹ Kõnke jejjab weeppãn im jej mour ilo jukjukun pãd in an Setan, jej naaj baj iioon wõt apañ im men ko renana. (1 Jon 5:19, UBS) Bõtab, el̦ap ad jeraam̦m̦an bwe ewõr juon eo ej jipañ kõj. Jemaroñ jar ñan Jeova eo me ej “Anij in aenõm̦m̦an otemjej.” Eñin men eo Hanna ear kõm̦m̦ane. Ear kwal̦o̦k eñjake eo an ñan Jeova im akwel̦ap bwe en jipañe. Ãinwõt Hanna, el̦aññe jej iioon apañ ko reppen, jen jab baj kwal̦o̦k wõt apañ eo ad ak jen lukkuun akwel̦ap im kwal̦o̦k aolepen bũruod ñan Jeova bwe en jipañ kõj.​—Pil. 4:6, 7.

12. Ta eo ear jipañ Anna ñan lo wõt m̦õn̦õn̦õ meñe ear iiooni wãween ko reppen?

¹² Emaroñ lukkuun l̦ap ad bũrom̦õj el̦aññe ejjel̦o̦k nejid ak kõnke emej juon eo ejitõnbõro ippãd. Bõtab, jemaroñ bõk wõt kaenõm̦m̦an. L̦õmn̦ak kõn waanjoñak eo an Anna, eo me ear mour ilo tõre ko an Jijej. Ãlikin 7 iiõ ãlikin an m̦are, l̦eo pãleen ear mej. Im Baibõl̦ ejjab kwal̦o̦k el̦aññe ear wõr nejin. Ak ta eo ear jipañ im kaenõm̦m̦ane? Eokwe, Baibõl̦ ej ba bwe “ear jab ilo̦k jãn tampel̦ eo.” Jekdo̦o̦n ñe ear 84 an Anna iiõ, ak ekõn etal wõt ñan tampel̦ eo bwe en jar im kabuñ ñan Jeova. (Luk 2:37, UBS) Eñin men eo ear lukkuun kaenõm̦m̦ane im jipañe ñan lo wõt m̦õn̦õn̦õ meñe ear iiooni wãween ko reppen.

13. Ewi wãween an ro jeid im jatid ilo eklejia eo kaenõm̦m̦an kõj, ñe ro ilo baam̦le ko ad rej kabũrom̦õje kõj?

¹³ Jemaroñ bar bõk kaenõm̦m̦an jãn ro jeid im jatid me jepaake er ilo eklejia eo. (JK. 18:24, UBS) Ear 5 wõt an Paula iiõ ke jinen ear bõjrak jãn an karejar ñan Jeova. Men in ear pen ñan Paula im ear lukkuun kabũrom̦õje. Bõtab juon jeid im jatid bainier etan Ann ear rõjañe im jino katak Baibõl̦ ippãn. Paula ej ba: “Meñe Ann ear jab nukũ, ak yokwe eo ear kwal̦o̦k ñan ña ear lukkuun jipañ eõ. Ear jipañ eõ bwe in wõnm̦aanl̦o̦k wõt im karejar ñan Jeova.” Ãlikin kar iien eo, jinen Paula ear bar jepl̦aak ñan eklejia eo im men in ear lukkuun kam̦õn̦õn̦õik Paula. Ann ear bar m̦õn̦õn̦õ kõn an kar maroñ jipañ Paula ñan wõnm̦aanl̦o̦k wõt im karejar ñan Jeova.

14. Ta tokjãn eo jej loe ñe jej kaenõm̦m̦an ro jet?

¹⁴ Ñe jej poub wõt im kõm̦m̦ani men ko rem̦m̦an ñan ro jet, ekkã ad mel̦o̦kl̦o̦k kõn apañ ko ad make. Ñan waanjoñak, elõñ kõrã ro jeid im jatid me em̦õj aer m̦are kab ro rejjañin m̦are, rej lo m̦õn̦õn̦õ ilo aer jerbal ippãn Jeova, im kõm̦anm̦an ankilaan ke rej kwal̦o̦k kõn nuuj eo em̦m̦an kõn Aelõñ eo ñan ro jet. Ilo m̦ool, kõj aolep jej kwal̦o̦k ad kea kõn ro jet ilo ad kwal̦o̦k kõn nuuj eo em̦m̦an ñan er. Im el̦aññe jej kwal̦o̦k jouj im kõm̦m̦ani men ko rem̦m̦an ñan ro jeid im jatid, men in enaaj kõm̦m̦an bwe jen epaakel̦o̦k er. (Pil. 2:4) Rijjilõk Paul ear likũt juon joñak em̦m̦an kõn men in. Ear kwal̦o̦k an yokwe im kea kõn ro jet “ãinwõt an juon jinen jouj ñan ro nejin.” Ear bar kaenõm̦m̦an im rõjañ ro jein im jatin ilo eklejia eo “ãinwõt an juon jemãn lale ro nejin.”​—Riit 1 Tessalonika 2:7, 11, 12, UBS.

KAENÕM̦M̦AN RO ILO BAAM̦LE EO

15. An wõn eddo eo ñan katakin ajri ro kõn Jeova?

¹⁵ Ewi wãween ad maroñ kaenõm̦m̦an baam̦le ko ilo eklejia eo? Jet iien, ro rekããl tok ñan m̦ool eo remaroñ kajjitõk ippãd bwe jen jipañ er ilo aer katakin ro nejier kõn Jeova ak kajjitõk bwe jen katak Baibõl̦ ippãer. Baibõl̦ ej kwal̦o̦k bwe Jeova ear lel̦o̦k eddo eo ñan ro jemãn im jinen ajri ro ñan lale im katakin er. (JK. 23:22; Ep. 6:1-4) Meñe ewõr iien ko me ro jet remaroñ jipañ ajri ro, ak elukkuun aorõk bwe rũtto ro ren wõnm̦aanl̦o̦k wõt im make katakin ro nejier. Rũtto ro rej aikuj kõnono ippãn ajri ro nejier im kal̦apl̦o̦k aer jel̦ã kajjier.

16. Ta eo jej aikuj keememeje ñe jej jipañ ajri ro?

¹⁶ Ñe ro jemãn im jinen ajri ro rej kajjitõk ippãd ñan katak Baibõl̦ ippãn ro nejier, eaorõk ñan keememej bwe jen jab kajjioñ in bõk eddo eo aer. Jet iien jemaroñ katak ippãn ajri ro me jineer im jemãer rejjab pãd ilo m̦ool eo. Ñe jej katak ippãn ajri ro me rejjab nejid, em̦m̦an ñe jej katak ippãer ilo m̦weo im̦weer ilo iien ko jineer im jemãer ak juon eo erũtto ilo tõmak ej pãd, ak ilo juon jikin me elõñ armej ie. Ilo wãween in, jej bõbrae an naaj bõd an ro jet l̦õmn̦ak. Im bõlen tokãlik, jinen im jemãn ajri ro renaaj kããlõt bwe en er eo rej katakin ro nejier kõn Jeova.

17. Ewi wãween an ajri ro maroñ kaenõm̦m̦an ro ilo baam̦le ko aer?

¹⁷ Ajri ro em̦õj aer katak bwe ren yokwe Jeova remaroñ kaenõm̦m̦an im rõjañ ro uwaan baam̦le ko aer. Ewi wãween? Ilo aer kautiej jemãer im jineer im jipañ er ilo elõñ wãween ko. Bareinwõt, ñe ajri ro rej kate er bwe ren tiljek ñan Jeova men in emaroñ rõjañ im kõkajoor aolep ro ilo baam̦le eo aer. M̦okta jãn an kar wal̦o̦k ibwijleplep eo, Lemek ear kabuñ ñan Jeova. Ear kwal̦o̦k kõn l̦eo nejin etan Noa, im ba: “E in enaaj kaenõm̦m̦an kõj kõn ad jerbal im kõn eñtaan ko an peid, eo ej itok kõnke Jeova ear ko̦o̦le ãneo.” Ear jejjet kũtien kanaan in ãlikin kar ibwijleplep eo ke Jeova ear jab bar ko̦o̦le ãneo, ak ilo kõkkar ke ear jol̦o̦k men ko renana. (Jen. 5:29; 8:21) Ilo raan kein, ajri ro me rej tiljek wõt ñan Jeova remaroñ bar kaenõm̦m̦an baam̦le ko aer. Remaroñ jipañ aolep ro uwaan baam̦le ko aer ñan kijenmej wõt ium̦win apañ ko rej iiooni kiiõ im ilju im jekl̦aj.

18. Ta eo enaaj jipañ kõj ñan kijenmej wõt ium̦win apañ ko jej iiooni?

¹⁸ Armej ro an Jeova ilo raan kein rej bõk kaenõm̦m̦an ikijjeen aer jar, kõl̦mãnl̦o̦kjen̦ kõn waanjoñak ko ilo Baibõl̦, im ilo aer epaake im m̦õttãik ro jeier im jatier ilo eklejia eo. (Riit Sam 145:18, 19.) Jejel̦ã bwe Jeova epojak aolep iien ñan kaenõm̦m̦an kõj, im enaaj jipañ kõj bwe jen kijenmej wõt ium̦win apañ im wãween ko reppen jej iiooni!