3 Wãween ñan Kijenmej kõn Apañ Ko

Elõñ apañ ko me jejjab maroñ el̦l̦ã ioer im ejjel̦o̦k ad maroñ ñan julo̦ki. Ñan waanjoñak, el̦aññe ewõr juon eo ejitõnbõro ippam̦ im em̦õj an jako ak ewõr juon am̦ nañinmej el̦ap, ejjel̦o̦k jabdewõt men kwõmaroñ kõm̦m̦ane ñan julo̦k men kein. Men eo dein kwõmaroñ kõm̦m̦ane ej pukot wãween ko ñan am̦ kijenmej kaki. Baibõl̦ eo emaroñ ke jipañ eok kõn apañ kein rel̦l̦ap?

JUON NAÑINMEJ EL̦AP

Rose ej ba: “Ewõr juon aõ nañinmej me ij bõdañe jãn baam̦le eo aõ im ej kõm̦m̦an bwe in eñtaan im metak aolep raan. Nañinmej in ear ko̦kkure ãjmour eo aõ im kõm̦m̦an bwe in jab m̦õn̦õn̦õ ãinwõt kar m̦okta.” Juon iaan men ko el̦aptata an jiroñ in inepata kaki ej bwe jet iien epen an l̦õmn̦ak kõn men ko ej katak jãn Baibõl̦ im an kabuñ ñan Anij. Ak naan ko an Jesus ilo Matu 19:26 (UBS) rar lukkuun jipañe. Eoon in ej ba: “Anij emaroñe men otemjej.” Rose ear lo bwe elõñl̦o̦k jãn juon wãween emaroñ kõm̦m̦ane ñan an katak Baibõl̦. Kõn an metak ãnbwinnin aolep iien, men in ear kõm̦m̦an bwe en pen an riit. Innem ear jino roñjake ainikien ko em̦õj rekoote an juon armej riiti jebta ko jãn Baibõl̦ im bok ko rej pedped ioon Baibõl̦.a (Lale kõmel̦el̦e eo itulal̦.) Ej ba: “Ñe en kar jab men kein, ijaje enãj kar elemen bwe en kajoor wõt tõmak e aõ.”

Ñe Rose ej bũrom̦õj kõn an jab maroñ kõm̦m̦ani men ko ekõn kar kõm̦m̦ani m̦okta, ej ba bwe naan ko ilo 2 Korint 8:12 (UBS) el̦ap aer kaenõm̦m̦ane. Eoon in ej ba: “El̦aññe kom̦ij m̦õn̦õn̦õ in lel̦o̦k, Anij enaaj bõk menin lel̦o̦k ko ami, ekkar ñan joñan ami maroñ, im jab ñan joñan eo kom̦ij jab maroñe.” Naan kein rar kakeememej Rose bwe Anij ej m̦õn̦õn̦õ kõn men ko ej kõm̦m̦ani, kõnke ej kõm̦m̦ani aolep men ko emaroñi im ekkar ñan joñan maroñ eo an.

BŨROM̦ÕJ KÕN MEJ EO AN EO EJITÕNBÕRO

Delphine, eo kar kwal̦o̦k kake m̦oktal̦o̦k, ej ba: “Ãlikin an kar mej ledik eo nejũ me 18 an iiõ, iar lukkuun kãlo̦k kake. Joñan aõ kar lukkuun bũrom̦õje iar jab kõn̦aan wõnm̦aanl̦o̦k im mour. Mour e aõ eban ãinwõt m̦okta.” Bõtab naan ko ilo Sam 94:19 (UBS) rar lukkuun kaenõm̦m̦an bũruon, ijo rijeje sam ej ba ñan Anij: “Ñe ij inepata im jorrããn kwõj kaenõm̦m̦an eõ im kalañlõñ eõ.” Kõrã in ej ba, “Iar jar ñan Jeova bwe en jipañ eõ ñan pukot men ko imaroñ kõm̦m̦ani me renaaj kaenõm̦m̦an bũruõ.”

Innem Delphine ear poub ilo jerbal eo ñan katakin armej ro kõn Baibõl̦ eo. Tokãlik, ear keidi e make ñan kein color ko an ajri me meñe rebwilo̦k ak rej em̦m̦an wõt ñan color kaki. Kar ejja ãindein eñjake eo an kõn e make. Ej ba bwe meñe ear ãinwõt kein color ko rebwilo̦k ak ej maroñ in wõt jipañ ro jet. Ej ba: “Iar kile bwe ñe ij kõjerbal Baibõl̦ im naanin kakapilõklõk ko ie ñan kaenõm̦m̦an rũkkatak Baibõl̦ ro aõ, eñin ej wãween eo Jeova ej kaenõm̦m̦an im kalañlõñ bũruõ.” Kõrã in ear je etan aolep armej ro ilo Baibõl̦ me rar lukkuun bũrom̦õj im rup bũrueer ke ear mej juon eo ejitõnbõro ippãer. Ej ba: “Iar lo bwe ejjel̦o̦k juon iaaer ear jab jar ñan Anij. Aolepeer rar jar.” Ear bareinwõt katak im kile bwe “jeban maroñ kijenmej ñe jejjab riiti Baibõl̦ eo ad.”

Kõn an kar Delphine riit im katak Baibõl̦, men in ear jipañe ñan reim̦aanl̦o̦k ñan ilju im jekl̦aj im jab reilikl̦o̦k ñan men ko rekabũrom̦õjm̦õj rar wal̦o̦k. Kõjatdikdik eo me Jerbal 24:15 (UBS) ej kwal̦o̦k kake el̦ap an kaenõm̦m̦ane. Ekkar ñan eoon in: “Ro rem̦m̦an im ro renana, renaaj jerkak jãn mej.” Ewi joñan an Delphine tõmak bwe Jeova enaaj bar kõmour ledik eo nejin em̦õj an jako? Ej ba: “Ij pijaik aõ lo ledik eo nejũ ilju im jekl̦aj. Em̦õj kadede aõ karõke juon raan in am̦ro bwebwenato ippãn doon ilo kõl̦õn̦ta eo an Jema ilañ ilo kõkkar. Ij loe am̦ro pãd ilo jikin kallib eo ammim ãinwõt aõ kar loe im yokwe e jãn raan eo jinointata in an kar l̦otak.”

a Ewõr Baibõl̦ im katak ko kar rekoote ainikien aer riiti me em̦õj likũti ilo weepjait eo jw.org.

Baibõl̦ emaroñ jipañ im kaenõm̦m̦an eok ilo iien ko reppen

EWI WÃWEEN AN ANIJ JIPAÑ KÕJ?

Elukkuun alikkar an Baibõl̦ uwaake kajjitõk in. Ej ba: “Ej epaak ñan ro otemjej rej kũr ñane, ro rej kũr ñane kõn bõro em̦ool. Ej kõke aikuj ko an ro otemjej rej kautieje; Ej roñjake aer kũr, im ej lo̦mo̦o̦ren er.” (Sam 145:18, 19, UBS) Men in ejjab ke kaenõm̦m̦an bũruod? Bõtab, ewi wãween an Anij uwaaki jar ko an armej ro rej reilo̦k ñane bwe en tõl er?

Ekkã an apañ ko jej iiooni kõm̦m̦an bwe jen m̦õk im ebbeer. Im men kein rej jelõt ãjmour eo ad, eñjake ko ad, im bareinwõt tõmak eo ad. (Jabõn Kõnnaan 24:10, UBS) Bõtab Jeova ej “kõkajoor ro rem̦õjn̦o̦ im ro rem̦õk.” (Aiseia 40:29, UBS) Rijjilõk Paul, eo im ear kijenmej ium̦win apañ ko reppen, ear ba: “Imaroñ in kõm̦m̦an men otemjej ilo Eo ej kõkajoor eõ.” (Pilippai 4:13) Jetõb kwõjarjar eo an Anij ear jipañ im kõkajoor Paul. Innem kwe bareinwõt kwõmaroñ kajjitõk ippãn Anij bwe en lewaj jetõb kwõjarjar eo an ñan kwe.—Luk 11:13, UBS.

Ta el̦aññe kwõj aikuj jipañ ñan mel̦el̦e im l̦oore naanin kakapilõklõk ko ilo Baibõl̦? Ta eo kwõmaroñ kõm̦m̦ane? Rũkal̦oor eo Jemes ear ba: “Ak el̦aññe ewõr iaami elikjab ilo mãlõtlõt, en jar ñan Anij, eo enaaj lel̦o̦k ñane; bwe Anij em̦m̦ool im jouj ñan aolep.” (Jemes 1:5, UBS) Alikkar bwe kwõj aikuj jar im bareinwõt mour ekkar ñan men ko kwaar jar kaki ilo am̦ riit Baibõl̦ im l̦oore men ko Baibõl̦ ej ba. (Jemes 1:23-25, UBS) Ilo am̦ kõm̦m̦ane men in, kwõnaaj make loe an naanin kakapilõklõk ko ilo Baibõl̦ jipañ eok ilo mour n̦e am̦.

Ñe elukkuun l̦ap am̦ inepata, Jeova emaroñ jipañ eok bwe kwõn ineem̦m̦an. Naan ko an rej ba: “Kom̦win jab inepata kõn jabdewõt, a ilo men otemjej kõn jar im akwel̦ap kab kam̦m̦oolol, kajjitõk ko ami ren wal̦o̦k ñan Anij. Im aenõm̦m̦an jãn Anij, eo ej el̦l̦ã jãn jel̦ã otemjej, enaaj kõjparok bũruomi im l̦õmn̦ak ko ami ilo Christ Jesus.” (Pilippai 4:6, 7) Innem kajjitõk ippãn Jeova bwe en lewaj aenõm̦m̦an ñan kwe.

Ak ta el̦aññe erum̦wij an jako apañ ko kwõj iiooni? Eokwe, jouj im jab l̦õmn̦ak bwe Anij ej kõjekdo̦o̦n eok. Meñe kwõj iiooni wõt apañ ko, ak Anij emaroñ kaperan im kõkajoor eok bwe kwõn jel̦ã kijenmej. (1 Korint 10:13, UBS) Baibõl̦ ej bar kallim̦ur bwe m̦õttan jidik aolep apañ ko jej iiooni renaaj jako ñan indeeo!