Wãween ko Kwõmaroñ Kõm̦m̦ani bwe Am̦ Katak Baibõl̦ En Kãitoktoklimo im En L̦ap Am̦ Bõk Tokjãn Jãne

JOSHUA ear aikuj kõm̦m̦ane juon jerbal epen. Ear aikuj tõl aelõñin Israel ñan Ãneen Kallim̦ur eo meñe ekar iiooni apañ ko reppen. Bõtab, Jeova ear kallim̦ur bwe Joshua emaroñ lo tõprak ilo an kõm̦m̦ane jerbal in im ear rõjañe im ba: ‘Kwõn kajoor im kanooj peran. Kwõn lale im kõm̦m̦an ekkar ñan aolepen kien ko aõ. Kõl̦mãnl̦o̦kjen̦ kõn e, raan im boñ, bwe kwõn lali im kõm̦m̦an men ko otemjej em̦õj jeiki ilowaan; innem kwõnaaj kõm̦m̦an bwe en em̦m̦an ial̦ eo am̦, im kwõnaaj jeraam̦m̦an.’​—Jos. 1:7, 8.

Kõnke jej mour ilo raan kein ãliktata, jej iiooni apañ ko reppen kõn an “kanooj pen mour.” (2 Ti. 3:1, UBS) Bõtab ãinwõt Joshua, jemaroñ bar lo tõprak ilo mour ko ad ñe jej l̦oori naanin kakapilõklõk ko Jeova ear lel̦o̦k ñane. Jej aikuj riiti Baibõl̦ aolep raan im lukkuun kate kõj ñan l̦oori naanin kakapilõklõk ko ie ñe jej iiooni apañ ko.

Bõtab elõñ iaad jemaroñ jab itoklimo in katak Baibõl̦ kõnke katak ej juon men epen ñan ad kõm̦m̦ane. Ak kõnke katak Baibõl̦ ej juon men ekanooj in aorõk, jouj im lale bo̦o̦k eo etan, “Kajjioñe Wãween Kein” ñan lale ta ko kwõmaroñ kõm̦m̦ani bwe en l̦apl̦o̦k am̦ itoklimo in katak Baibõl̦ im bõk tokjãn jãne.

Rijeje sam ear al im ba: ‘Kwõn tõl eõ ilo ial̦ in kien ko am̦, kõnke ij lo aõ m̦õn̦õn̦õ ie.’ (Sam 119:35, UBS) Aet, kwõmaroñ lo m̦õn̦õn̦õ ilo am̦ riit im katak Baibõl̦. Elõñ katak ko raorõk kwõnaaj loi ñe kwõnaaj lukkuun kõl̦mãnl̦o̦kjen̦ kõn men ko kwõj katak kaki ilo Baibõl̦.

Meñe kwõjjab aikuj tõl juon aelõñ ãinwõt kar Joshua, ak ewõr men ko reppen kwõj bar iiooni. Innem ãinwõt Joshua, kwõn katak im l̦oori naan ko kar jei ilo Baibõl̦ ñan jipañ eok ilo mour eo am̦. Ñe kwõj kõm̦m̦ane men in, kwõnaaj bareinwõt lo tõprak im kwõnaaj mãlõtlõt ilo aolep men ko kwõj kõm̦m̦ani.