Julo̦k Jabdewõt Mel̦el̦e ko Rej N̦ae Jel̦ãl̦o̦kjen̦ eo an Anij!

1. Ta naanin kakkõl ko rijjilõk Paul ear jei ñan Kũrjin ro rar rũkkapit?

RIJJILÕK PAUL ear kakkõl im ba: “Bõjrak jãn ami l̦oor armej in lal̦ in.” (Rom 12:2) Paul ear je naan kein ñan Kũrjin ro ilo raan ko an rijjilõk ro. Etke ear lel̦o̦k naanin kakkõl kein rekajju ñan em̦m̦aan im kõrã ro me em̦õj aer ajel̦o̦k mour ko aer ñan Anij im kar kapit er kõn jetõb kwõjarjar?​—Rom 1:7.

2-3. Ewi wãween an Setan kajjioñ in kõm̦m̦an bwe jen el̦l̦o̦k jãn Jeova, ak ewi wãween ad maroñ julo̦k l̦õmn̦ak ko rebõd me “elukkuun pen aer jako” jãn l̦õmn̦ak ko ad?

² Paul ear inepata kõn er kõnke jet iaan Kũrjin ro rar po ilo l̦õmn̦ak im mel̦el̦e ko rekauwõtata an lal̦ in an Setan. (Ep. 4:17-19) Men in emaroñ bar wal̦o̦k ñan jabdewõt iaad. Setan, eo ej anij in lal̦ in, elukkuun kõn̦aan bwe jen el̦l̦o̦k jãn Jeova, im ej kõjerbal elõñ wãween ko reoktak jãn doon ñan kõm̦m̦ane men in. Ta juon iaan wãween ko ej kõjerbali? Juon iaaer ej kõn̦aan eo bwe jen utiej im buñbuñ. Emaroñ bar kõjerbale jet iaan men ko jaar dik im rũttol̦o̦k kaki, jaar imminene jãn m̦anit eo ad, ak jaar katak ilo jikuul̦, ñan kõm̦m̦an bwe jen l̦oore wãween an l̦õmn̦ak.

³ Jemaroñ ke julo̦ki l̦õmn̦ak ko me “elukkuun pen aer jako”? (2 Kor. 10:4) Lale wãween an kar Paul uwaak. Ear ba: “Kõmij julo̦k mel̦el̦e ko im jabdewõt l̦õmn̦ak ko reutiej im rej n̦ae jel̦ãl̦o̦kjen̦ eo an Anij, im kõmij kõm̦akokoik aolep l̦õmn̦ak ko bwe ren maroñ pokake Christ.” (2 Kor. 10:5) Alikkar bwe ikijjeen jipañ eo an Jeova, jemaroñ jol̦o̦k jabdewõt l̦õmn̦ak ko rebõd. Ãinwõt an uno maroñ jol̦o̦k ad nañinmej ñe jej bõk juon nañinmej ekauwõtata, ãindein Naanin Anij emaroñ jipañ kõj ñan jol̦o̦k l̦õmn̦ak ko rebaijin an lal̦ in an Setan.

“UKOT L̦ÕMN̦AK KO AMI”

4. Ta oktak ko elõñ iaad jaar aikuj kõm̦m̦ani ke jaar jino katak im jel̦ã m̦ool eo?

⁴ Reilikl̦o̦k m̦õk im l̦õmn̦ak kõn oktak ko kwaar aikuj in kõm̦m̦ani ilo mour eo am̦ ke kwaar jino katak im jel̦ã m̦ool eo jãn Naanin Anij im kããlõt ñan karejar ñan Jeova. Ñan karejar ñan Jeova, elõñ iaad jaar aikuj bõjrak jãn ad kõm̦m̦ani men ko rebõd. (1 Kor. 6:9-11) El̦ap ad kam̦m̦oolol kõn an kar Jeova jipañ kõj bwe jen bõjrak jãn ad kõm̦m̦ani m̦anit ko renana!

5. Ta men ko ruo Rom 12:2 ej kwal̦o̦k bwe jej aikuj kõm̦m̦ani?

⁵ Ijoke, jejjab aikuj in l̦õmn̦ak bwe jeban aikuj wõnm̦aanl̦o̦k wõt im kõm̦m̦an oktak. Meñe jaar bõjrak jãn ad kõm̦m̦ani jerawiwi ko rel̦l̦ap me jekõn kõm̦m̦ani m̦okta jãn ad kar peptaij, ak jej aikuj kate wõt kõj ñan kõjparok kõj jãn jabdewõt wãween ko remaroñ tõl kõj ñan bar jepl̦aak im kõm̦m̦ani m̦anit kein renana. Ewi wãween ad maroñ kõm̦m̦ane men in? Paul ej uwaak im ba: “Kom̦win bõjrak jãn ami l̦oor armej in lal̦ in, bõtab kom̦win kõm̦m̦an oktak ilo ami ukot l̦õmn̦ak ko ami.” (Rom 12:2) Ewõr ruo men ko jej aikuj kõm̦m̦ani. Kein kajuon, jej aikuj ‘bõjrak jãn ad l̦oor,’ ak po, ippãn armej in lal̦ in. Kein karuo, jej aikuj “kõm̦m̦an oktak” ikijjeen ad ukot wãween ad l̦õmn̦ak.

6. Ta eo jej katak jãn mel̦el̦e eo jej bõke jãn naan ko an Jesus ilo bokin Matu 12:43-45?

⁶ Oktak in me Paul ear kõnono kake ekar jab jitõñl̦o̦k wõt ñan ad ukot wãween paotokid. Ak ej kitibuj aolep wãween ko ippãd. (Lale bo̦o̦k eo etan, “Jej Lukkuun Oktak Ke ak Jej Ukot M̦õrad?”) Jej aikuj ukot l̦õmn̦ak ko ad, mel̦el̦ein l̦õmn̦ak ko ilo bũruod, eñjake ko ad, im kõn̦aan ko ad. Kõn men in, kõj aolep jen kajjitõk ippãd make, ‘Oktak ko ij kõm̦m̦ani bwe in juon Kũrjin rej ke alikkar wõt itulik, ak ij ke bar kõm̦m̦an oktak ilo bũruõ im l̦õmn̦ak ko aõ bwe in juon Kũrjin eo em̦ool?’ Eaorõk bwe jen jel̦ã oktak eo ikõtaan men kein ruo. Ilo naan ko an Jesus ilo bokin Matu 12:43-45, ear kaalikkar ta eo jej aikuj in kõm̦m̦ane. (Riit.) Mel̦el̦e eo jej bõke jãn naan kein rej kaalikkar men in eaorõk im em̦ool: Ejabwe wõt ñan ad julo̦k l̦õmn̦ak ko rebõd. Jej aikuj bar kannetok l̦õmn̦ak ko ad kõn l̦õmn̦ak ko an Anij ñan bõk jikin l̦õmn̦ak kein rebõd.

“KÕKÃÃL L̦ÕMN̦AK KO AMI”

7. Ewi wãween ad maroñ ukot l̦õmn̦ak ko ad ak lukkuun kain armej rot kõj itulowa?

⁷ Jemaroñ ke ukot l̦õmn̦ak ko ad ak lukkuun kain armej rot kõj itulowa? Ekkar ñan Naanin Anij ej ba: “Kom̦ij aikuj wõnm̦aanl̦o̦k wõt im kõkããl l̦õmn̦ak ko ami, im kom̦ij aikuj kõn̦ak mour eo ekããl, eo kar kõm̦anm̦ane ekkar ñan ankilaan Anij, im ej pedped ioon wãnõk eo em̦ool im tiljek eo em̦ool.” (Ep. 4:23, 24) Innem aet, ewõr ad maroñ ñan ukot lukkuun kain armej rot kõj, ijoke ejjab pidodo ñan kõm̦m̦ane men in. Ijello̦kun ad tarin̦aeik wõt kõn̦aan im kõm̦m̦an ko renana, ebar wõr men ko jet jej aikuj kõm̦m̦ani. Jej aikuj ukot ‘l̦õmn̦ak ko ad,’ ekitibuj kõn̦aan ko ad, men ko eitok wõt bwe jen kõm̦m̦ani, im unin ad kõm̦m̦ani men ko jej kõm̦m̦ani. Mel̦el̦ein men in bwe jej aikuj wõnm̦aanl̦o̦k wõt im kõm̦m̦an oktak.

8-9. Ewi wãween an waanjoñak eo an juon jeid im jatid em̦m̦aan kaalikkar bwe jej aikuj lukkuun ukot kain armej rot kõj itulowa?

⁸ Jen lale waanjoñak eo an juon jeid im jatid em̦m̦aan me m̦okta ekar juon armej elãj. Ãlikin an kar jol̦o̦k an kadek im ire ippãn ro jet, ear maroñ peptaij. Men in ear juon wãween em̦m̦an ñan kwal̦o̦k naan ñan bukwõn jidikdik eo ear jokwe ie. Ak juon jota, ãlikin wõt an kar peptaij, ear jelm̦ae juon mãlejjoñ ear jab kõtmãne kake. Juon ri-kadek ear etal ñan m̦weo im̦õn im ear kõn̦aan ire ippãn. Ilo jinoin, em̦m̦aan in jeid im jatid ear dãpij an kõn̦aan ire ippãn l̦eo. Bõtab, ke l̦eo ear jino kõnanaik etan Jeova, ear jab maroñ dãpijl̦o̦k wõt an illu. Ear diwõjl̦o̦k im m̦an l̦eo. Ta apañ eo? Meñe an kar katak Baibõl̦ ear jipañe ñan jum̦ae kõn̦aan eo an ñan ire ippãn ro jet, ak ejjañin kar maroñ lukkuun ukot l̦õmn̦ak ko an. Mel̦el̦ein bwe ejjañin kar lukkuun ukot kain armej rot e itulowa.

⁹ Bõtab, em̦m̦aan in ear jab bõjrak jãn an kajjioñ kõm̦m̦an oktak. (JK. 24:16) Kõn jipañ eo jãn em̦m̦aan ro rej lale eklejia, ear wõnm̦aanl̦o̦k wõt ilo an kõm̦m̦ani wõnm̦aanl̦o̦k ko rem̦m̦an. Tokãlik, ear maroñ erom juon iaan em̦m̦aan ro rej lale eklejia. Innem juon jota, ke ear pãd ilo nabõjin Im̦õn Kweilo̦k eo, ear bar jelm̦ae juon mãlejjoñ me ãinl̦o̦kwõt eo ear iioone iiõ ko m̦oktal̦o̦k. Juon ri-kadek ear itõn m̦ane juon iaan em̦m̦aan ro rej lale eklejia. Ta eo em̦m̦aan in jeid im jatid ear kõm̦m̦ane? Ilo ineem̦m̦an im ettã bõro, ear kõmmaanwa wõt ippãn l̦eo ekadek, kadikl̦o̦k an illu, innem jipañe l̦eo ejepãppãp bwe en maroñ ro̦o̦l ñan m̦weo im̦õn. Ta oktak eo ippãn eo jeid im jatid? Em̦õj an lukkuun ukot l̦õmn̦ak ko an. Ilo tulowa, ear lukkuun ukot armej eo m̦okta bwe en erom juon eo eineem̦m̦an im ettã bũruon. Men in ear bõktok nõbar ñan Jeova.

10. Ta eo jej aikuj in kõm̦m̦ane ñan ukot kain armej rot kõj itulowa?

¹⁰ Oktak kein rejjab kajju wal̦o̦k ilo m̦õkaj im rejjab bar make pãd im wal̦o̦k. Jemaroñ naaj aikuj lukkuun kate kõj kõn ‘aolepen ad maroñ’ ium̦win elõñ iiõ. (2 Pit. 1:5) Ejjab mel̦el̦ein bwe kõnke eto ad pãd ilo m̦ool eo innem oktak kein renaaj kajju wal̦o̦k. Jej aikuj kõmaat joñan ad maroñ ñan ukot kain armej rot kõj itulowa. Elõñ buñtõn ne ko jemaroñ kõm̦m̦ani me renaaj jipañ kõj ñan kõm̦m̦an oktak rot in. Jen kiiõ etale jet iaaer.

WÃWEEN BWE JEN MAROÑ UKOT L̦ÕMN̦AK KO AD

11. Ewi wãween an jar jipañ kõj ñan ukot l̦õmn̦ak ko ad?

¹¹ Jar ej buñtõn ne eo m̦oktata im eaorõk. Jej aikuj jar ãinwõt kar ri-jeje sam, eo me ear ba: “O Anij, kwõn kõm̦anm̦an juon bõro erreo ilo ña Im likũt juon jetõb ekããl im m̦ool ilo ña.” (Sam 51:10, UBS) Jej aikuj kile bwe ej menin aikuj ñan ad ukot l̦õmn̦ak ko ad im kajjitõk ippãn Jeova bwe en jipañ kõj. Ewi wãween ad maroñ jel̦ã bwe Jeova enaaj jipañ kõj ñan kõm̦m̦an oktak? Jemaroñ bõk kaenõm̦m̦an jãn men eo Jeova ear kallim̦ur bwe enaaj kõm̦m̦ane ñan ri-Israel ro ekijñeñe bũrueer ilo kar raan ko an Ezekiel. Ear ba: “Inaaj kõkããl bũrueer kab l̦õmn̦ak ko aer . . . im lel̦o̦k ñan er bõro ko rekipliie.” (Ezk. 11:19, UBS) Jeova ear m̦õn̦õn̦õ in jipañ ri-Israel ro ñan kõm̦m̦an oktak, im em̦õn̦õn̦õ in bar jipañ kõj.

12-13. (1) Ekkar ñan bokin Sam 119:59, ta eo jej aikuj in kõl̦mãnl̦o̦kjen̦ kake? (2) Ta kajjitõk ko kwõn kajitũkin eok make kaki?

¹² Kõl̦mãnl̦o̦kjen̦ ej buñtõn ne eo kein karuo me eaorõk. Ñe jej liñõri Naanin Anij kajjojo raan, jej aikuj bõk iien ñan kõl̦mãnl̦o̦kjen̦, ak ñan lukkuun l̦õmn̦ak, kõn men ko jej riiti bwe jen maroñ jel̦ã ta l̦õmn̦ak im eñjake ko jej aikuj in julo̦ki. (Riit Sam 119:59; Hib. 4:12; Jem. 1:25) Ñe jej kõl̦mãnl̦o̦kjen̦ jen lukkuun lale el̦aññe ewõr jabdewõt kõn̦aan ippãd ñan l̦oore l̦õmn̦ak ko an armejin lal̦ in. Innem, jej aikuj m̦ool ñan kõj make im kile bwe ewõr ad m̦õjn̦o̦, im lukkuun kate kõj ñan julo̦ki m̦õjn̦o̦ kein.

¹³ Ñan waanjoñak, kajjitõk ippam̦ make: ‘Ewõr ke jidik eñjake in ebbanban ilo bũruõ?’ (1 Pit. 2:1) ‘Ewõr ke jidik utiej bõro ippa kõn aõ l̦õmn̦ak bwe em̦m̦anl̦o̦k ijo ij itok jãne, el̦apl̦o̦k jel̦ãl̦o̦kjen̦ eo ippa, ak ewõr aõ jããn?’ (JK. 16:5) ‘Ij ke reilal̦l̦o̦k ñan ro im ejjel̦o̦k aer men ko me ewõr ippa ak eoktak aelõñ eo aer jãn ña?’ (Jem. 2:2-4) ‘Ij ke reel kõn men ko lal̦ in an Setan ej kajjioñ karreelel kaki?’ (1 Jon 2:15-17) ‘Em̦m̦an ke ippa kein kam̦õn̦õn̦õ ko me rej kwal̦o̦k kõn l̦õñ im lãj?’ (Sam 97:10; 101:3; Amos 5:15) Uwaak ko am̦ ñan kajjitõk kein remaroñ kaalikkar ta ko kwõj aikuj in jerbali ak kakõm̦anm̦anl̦o̦k. El̦aññe jenaaj julo̦k l̦õmn̦ak kein me emaroñ ‘lukkuun pen aer jako’ jãn bũruod, jenaaj kabuñbũruon Jemãdwõj ilañ.​—Sam 19:14.

14. Etke elukkuun aorõk bwe jen kããlõt ñan aetõl ro rem̦m̦an?

¹⁴ Kããlõt ñan aetõl ro rem̦m̦an ej buñtõn ne eo kein kajilu me ebar aorõk. Meñe jej kile ak jaab, ak ro jej aetõl er el̦ap aer jelõt kõj. (JK. 13:20) Ilo jikin jerbal ak jikuul̦, ekkã ad pãd ibwiljin armej ro me reban jipañ kõj ñan bõk l̦õmn̦ak ko an Anij. Ijoke, jemaroñ lo armej ro rem̦m̦antata ñan aetõl er ilo kweilo̦k ko ad. Eñin ijo jemaroñ bõk naanin rõjañ im kõketak ko ñan kwal̦o̦k “yokwe im jerbal ko rekanooj in em̦m̦an.”​—Hib. 10:24, 25, ftn.

“PEN WÕT ILO TÕMAK”

15-16. Ewi wãween an Setan kajjioñ ukot l̦õmn̦ak ko ad?

¹⁵ Bõtab, keememej bwe Setan ej lukkuun kate ñan ukot l̦õmn̦ak ko ad. Ej kõjerbal elõñ kain l̦õmn̦ak ko ñan ko̦kkure l̦õmn̦ak ko rem̦m̦an Naanin Anij ear tõl kõj ñan bũki.

¹⁶ Setan ej wõnm̦aanl̦o̦k im kõjerbal ejja kajjitõk in wõt ear kajjitõk ippãn Iv ilo kar jikin kallib Iden: “Em̦ool ke Anij ear ba . . . ?” (Jen. 3:1) Ilo lal̦ in me ej pãd ium̦win tõl eo an Setan, ekkã ad roñ kajjitõk kein me remaroñ kõm̦m̦an ad pere tõmak eo ad, ãinwõt: ‘M̦ool ke Anij ejjab kamãlim an em̦m̦aan ñan em̦m̦aan ak kõrã ñan kõrã m̦areik doon? M̦ool ke Anij ejjab kõn̦aan bwe kwõn Kũrijm̦õj im birthday? M̦ool ke Anij eo am̦ ej kõtmãne bwe kwõn jab bõk bõtõktõk? M̦ool ke juon Anij in yokwe ejjab kõn̦aan bwe kwõn kõm̦m̦ao ippãn ro kwõj yokwe er me rebukwel̦o̦k?’

17. Ta eo jej aikuj kõm̦m̦ane ñe jej jelm̦ae kajjitõk ko me remaroñ kõm̦m̦an ad pere tõmak eo ad, im ta eo Kolosse 2:6, 7 ej kwal̦o̦k bwe emaroñ wal̦o̦k ñe jej kõm̦m̦ane men in?

¹⁷ Jej aikuj lukkuun tõmak bwe em̦ool men ko jej tõmaki. El̦aññe jej likũt wõt kajjitõk ko ilo l̦õmn̦ak ko ad me jejjab mel̦el̦e kaki im jejjab pukot uwaakier, men in emaroñ oktak im lukkuun kõm̦m̦an bwe jen pere tõmak eo ad. Ad pere emaroñ kõm̦m̦an bwe jen jujen bõk l̦õmn̦ak ko rebõd im emaroñ ko̦kkure tõmak eo ad. Innem, ta eo jej aikuj in kõm̦m̦ane? Naanin Anij ej jiroñ kõj bwe jen ukot l̦õmn̦ak ko ad bwe jen maroñ kam̦ool ñan kõj make “ta ankilaan Anij, eo em̦m̦an im ekkar im eweeppãn.” (Rom 12:2) Ñe jej niknik ilo ad katak, jenaaj maroñ kam̦ool ñan kõj make bwe em̦ool men ko jaar katak kaki jãn Baibõl̦. Im jenaaj lukkuun tõmak bwe kien ko an Jeova rejim̦we. Innem ãinwõt juon wõjke me epen okran, jenaaj tõt im “pen wõt ilo tõmak.”​—Riit Kolosse 2:6, 7.

18. Ta eo enaaj jipañ kõj bwe jen jol̦o̦k l̦õmn̦ak ko rebaijin an lal̦ in an Setan?

¹⁸ Ejjel̦o̦k bar juon emaroñ kõm̦m̦an bwe en kajoor im pen tõmak eo ad. Kõj wõt jemaroñ kõm̦m̦an men in. Innem, jen wõnm̦aanl̦o̦k wõt im kõkããl l̦õmn̦ak ko ad. Jen niknik ilo ad jar, im akwel̦ap im kajjitõk kõn jetõb eo an Jeova bwe en jipañ kõj. Lukkuun kõl̦mãnl̦o̦kjen̦ im wõnm̦aanl̦o̦k wõt im etale l̦õmn̦ak ko ad im bũruod. Jen kããlõt ñan aetõl ro rem̦m̦an im aetõl wõt armej ro me renaaj jipañ kõj ñan ukot l̦õmn̦ak ko ad. Ilo ad kõm̦m̦ani men kein, jemaroñ jol̦o̦k l̦õmn̦ak ko rebaijin an lal̦ in an Setan im lo tõprak ilo ad julo̦k “mel̦el̦e ko im jabdewõt l̦õmn̦ak ko reutiej im rej n̦ae jel̦ãl̦o̦kjen̦ eo an Anij.”​—2 Kor. 10:5.