Kwalok Lemnak Eo An Christ
“Anij, eo ej unin kijenmij im kainemõn en kõmman bwe en wõr ibwiljimi ejja lemnak eo wõt ear bed ibben Christ Jesus.”—ROMANS 15:5, New World Translation.
1. Ewi wãwen lemnak an juõn armij emaroñ jelet mour eo an?
ATTITUDE (wãwen eo an juõn lemnak) ej kõmman juõn oktak elap ilo mour. Juõn lemnak in jab kea ak juõn eo ej kate, juõn eo ej lemnak ilo emõn ak juõn ilo nana, juõn lemnak in akwel ak juõn eo ej mõnõnõ in jerbal ibben don, juõn lemnak in aol ak juõn eo ej kwalok kamolol emaroñ lap an jelet wãwen eo an juõn jerbali wãwen ko rej walok im ewi wãwen ro jet renaj uake. Kin juõn lemnak emõn, juõn emaroñ mõnõnõ meñe ej bed iumin wãwen ko rebin. Ñan juõn armij eo ej lemnak ilo nana, ejelok juõn men ej emõn, meñe—ñe watõke ilo juõn wãwen ejelok kalijeklok ie—mour ej emõn wõt.
2. Ewi wãwen an juõn armij katak kin attitude ak lemnak ko?
2 Attitude ak lemnak ko—emõn ak nana—jemaroñ katak kaki. Ilo mol, jej aikwij katak kaki. Ilo an konono kin juõn niñniñ eo ej kab lotaktok, Collier’s Encyclopedia ej ba: “Jabdewõt lemnak ko ewõr ibben ej aikwij bõki ak katak kaki, einwõt an aikwij katak kin juõn kajin ak jabdewõt kabel ko jet.” Ewi wãwen ad katak kin attitude ak lemnak ko? Meñe elõñ men ko rej jelete, wãwen ko ibelakin im ro ej tel an ibbeir rej men ko elap an wõr kilan. Encyclopedia eo ear wõnmanlok im ba: “Jej katak ak jorome, einwõt ikijen osmosis (jorome ilo am jab kõmman jabdewõt), attitude ak lemnak ko an ro elap ad tel ad ibbeir.” Elõñ thousand yiõ ko remotlok, Bible eo ear ba juõn men einlok wõt: “Kwon etetal iben ro dri meletlet, inem kwo naj meletlet; a eo ej komao iben ro dri bwebwe, e naj jorran kake.”—Jabõn Kennan Ko 13:20; 1 Dri Korint 15:33.
Juõn Joñok kin Lemnak eo Ekkar
3. Wõn eo ear juõn joñok emõn ikijen attitude ak lemnak eo an, im ewi wãwen jemaroñ anõke?
3 Einwõt ilo men ko jet otemjej, eindein lok ikijen wãwen lemnak, Jesus Christ ear likit joñok eo emõntata. Ear ba: “Bwe I ar lewoj ñõn kom juõn joñok, bwe komin bareinwõt kõmõn einwõt I ar kõmõn ñõn kom.” (Jon 13:15) Bwe jen einwõt Jesus, jej aikwij katak mokta kin e.a Jej katak kin mour eo an Jesus ilo ad kõnan kõmman men eo ri jilek Peter ear rejañ kake: “Im emwij kir kom ñõn men in: bwe Kraist e ar iñtan kin kom, im likit joñok ñõn kom, bwe komin anõke jenkwõn ne ko neen.” (1 Piter 2:21) Mejenkajjik eo ad ej bwe jen einlok wõt Jesus ilo joñan ad maroñ. Men in ekoba ad kaddek wãwen lemnak eo an.
4, 5. Wãwen et eo kin lemnak eo an Jesus Dri Rom 15:1-3 ej kalikare, im ewi wãwen ri Christian ro remaroñ anõk e?
4 Ad bõk lemnak eo an Christ Jesus ej kitibuj ta? Chapter 15 ilo letter eo an Paul ñan ri Rome ro ej jibañ kij ñan uake kajitõk in. Ilo eon ko jinoin ilo chapter in, Paul ej konono kin juõn kadkad elap kadkadin Jesus ke ear ba: “Inem emõn bwe kij je kajur jen bõk mõjino ko an ro re jab kajur, im jab mõke kabuñburuer. Kij otemjej jen kabuñburuen dron ilo emõn, ñõn kalek ir. Bwe Kraist bareinwõt E ar jab mõke kabuñburuen: a einwõt emwij je, Kajirere ko an ro r’ar kajirere kake Yuk, r’ar buñõt Iõ.”—Dri Rom 15:1-3.
5 Ilo air kajeoñe wãwen lemnak eo an Jesus, ri Christian ro rej bõk rejañ bwe ren bojak in karejar kin aikwij ko an ro jet jen air kõnan kabuñburueir make. Emol, mõnõnõ rot in ñan karejar ñan ro jet ej kadkadin ro “re kajur.” Jesus, eo ear kajurlok ilo jitõb jen jabdewõt ro jet rar mour, ear ba kin e make: “Im einwõt Nejin armij e ar jab itok bwe armij ren jerbal ñõn E, a bwe En jerbal ñõn ir, im lelok An mour bwe En binmour ñõn ro relõñ. (Matu 20:28) Einwõt ri Christian ro, kij bareinwõt jekõnan karejar ñan ro jet, ekoba ro “re jab kajur.”
6. Ilo wãwen et eo jemaroñ anõk Jesus ikijen wãwen an kar emmakit ke rar naruõn im matõrtõr e?
6 Bar juõn kadkad emõn me Jesus ear kwaloke kar juõn wãwen lemnak im jerbal me ien otemjej ear men in kõketak. Ear jab kõtlok bwe lemnak nana an ro jet en jelet lemnak emõn eo an ñan karejar ñan Anij; im en eindein bareinwõt kij. Ke kar naruõn im matõrtõr e kin an kar kabuñ ñan Anij ilo tiljek, ilo meanwõd Jesus ear kijenmij ilo an jab aol. Ear jelã bwe ro rej kate ir ñan kabuñburuen ro ri turiir “ñõn kalek ir” rej aikwij kõtmene air bõk jumae jen juõn lal ejjab tõmak im ejajelokjen.
7. Ewi wãwen Jesus ear kwalok an meanwõd, im etke ej aikwij eindein ad kõmmane?
7 Jesus ear kwalok juõn lemnak ekkar ilo wãwen ko jet bareinwõt. Ear jab kwalok ñan Jehovah an atebar ak ilo meanwõd ear kõttar an jejjet kitien karõk ko An. (Sam 110:1; Matu 24:36; Jerbal 2:32-36; Dri Hibru 10:12, 13) Bareinwõt, Jesus ear jab kwalok an atebar ibben ri kalor ro an. Ear jiroñ ir: “Katak iba”; bwe “Ij inemõn,” im nan in jiroñ ko an renaj kar kõketak ir im renaj kar lo air kakije. Im kin an kar kwalok an “etã buru,” ear jab jãjjãj ak wãlok. (Matu 11:29) Paul ej rejañ kij ñan kajeoñe wãwen kein in lemnak ko an Jesus ke ej ba: “Lemnok in en ber ilo kom, eo e ar bareinwõt ilo Kraist Jisõs: Eo, ke Ej ilo wãwen Anij, E ar jab lemnok An einwõt Anij men in nibiji, A E ar mõke kejeramel E, im bõk wãwen korijer, im erom nememen armij.”—Dri Pilippai 2:5-7.
8, 9. (a) Etke jej aikwij kate kij ñan kaddek juõn lemnak in jab kibbon? (b) Etke jen jab ebwer elañe jej likjap in lori joñok eo Jesus ear likiti, im ewi wãwen Paul ear juõn joñok emõn kin men in?
8 Ebidodo ñan ba wõt bwe jekõnan karejar ñan ro jet im ñan likit aikwij ko air iman aikwij ko ad. Ak juõn etale emol kin wãwen lemnak eo ad emaroñ kalikar bwe buruõd ejjab lukkun lor wãwen eo. Etke jab? Mokta, kinke jaar jolet kadkad ko rekibbon jen Adam im Eve; kein karuo, kinke jej jokwe ilo juõn lal eo ej kowõnmanlok jitõb in kibbon. (Dri Epesõs 4:17, 18) Ñan kaddek juõn lemnak ejelok kibbon ie ekkã an melelen ad kaddek juõn wãwen lemnak eo ej jumae wãwen jab wãppen eo jaar jolete. Men in ej aikwiji ad kõmman juõn bebe ebin im ñan kakkõt.
9 Jab wãppen eo ad ealikar, eo ej lukkun einjuõn jen joñok wãppen eo Jesus ear likite, jet ien emaroñ kabbwer kij. Jemaroñ bere ad maroñ bõk ejja lemnak eo wõt ear bed ibben Jesus. Ak lale nan in kõketak ko an Paul: “Bwe I jela bwe ilo ña, ilo kõniekiõ, emõn e jab jokwe: bwe kõnan ej ber iba, a in kõmõn men eo emõn e jab ber iba. Bwe men eo emõn I kõnan, I jab kõmõne: a nana eo I jab kõnan, eñin ij kõmõne. Bwe ij lõñliñ ilo kien Anij ekar ñõn armij eo iloan: A ij lo bar juõn kien ilo raõ, ej tõrinaek kien aõ lolãtãt, im kajibokweik iõ ñõn kien jerawiwi eo ej ber ilo raõ.” (Dri Rom 7:18, 19, 22, 23) Emol, jab wãppen eo an Paul elõñ alen an kar bõpraek e jen an kajejjet ankil an Anij ilo joñan eo ear kõnan, ak lemnak eo an—wãwen lemnak im eñjake eo an kin Jehovah im kien ko An—kar juõn joñok elukkun emõn. Emaroñ eindein kij bareinwõt.
Kajimwe Wãwen Lemnak ko Rebwid
10. Paul ear rejañ ri Philippi ro ñan kaddek lemnak rot eo?
10 Emaroñ ke bwe jet rej aikwij kajimwe juõn lemnak ebwid? Aet. Alikar men in ear mol ikijen jet ri Christian ro ilo ebeben eo kein kajuõn. Ilo letter eo an ñan ri Philippi ro, Paul ear konono kin aorõkin an wõr juõn lemnak ejimwe. Ear je: “Jab einwõt emwij aõ jibarek [mour ilañ ikijen jerkakbiji eo mokta] kiõ, ak emwij aõ wãppen kiõ; a ij kõtõbar, elañe I maroñ in bõk wõt men eo Jisõs Kraist e ar bareinwõt bõk iõ kake. Ro jãtiõ, I jab watõk iõ emwij aõ bõk; a juõn aõ kõmõn, ke ij meloklok men ko rej ber ilikiõ, im mõllok ñõn men ko rej ber imaõ, Ij kõtõbarlok ñõn kakõle, ñõn mejenkajik eo an kir eutiej an Anij ilo Kraist Jisõs. Inem kijeo je wãppen, jen lemnok ein drein.”—Dri Pilippai 3:12-15.
11, 12. Ilo wãwen ta ko Jehovah ej kwalok juõn lemnak emõn ñan kij?
11 Nan ko an Paul rej kwalok bwe jabdewõt armij, eo emwij an erom juõn ri Christian, im ej lemnak bwe ejjab aikwij kõmman wõnmanlok, ewõr juõn lemnak ebwid. Ear likjap in bõk lemnak eo an Christ. (Dri Hibru 4:11; 2 Piter 1:10; 3:14) Wãwen eo an armij eo ejelok kejatdikdik ke? Jaab. Anij emaroñ jibañ kij ñan ukõt wãwen lemnak eo ad elañe jekõnan. Paul ej wõnmanlok im ba: “Im elañe ilo jabrewõt komij lemnok ein juõn, Anij e naj kwalok men in ñõn kom.”—Dri Pilippai 3:15.
12 Bõtab, elañe jekõnan bwe Jehovah en kwalok ñan kij lemnak eo ekkar, jej aikwij kõmman ijo kunad. Elañe ej mol ad katak Nan in Anij ilo bõk jibañ jen book ko in Christian letok in “dri korijer e tiljek im meletlet” men in enaj kamaroñ ro rej “lemnok ein juõn” ñan kaddek juõn lemnak ekkar. (Matu 24:45) Christian elder ro, me emwij jitõñ ir kin jitõb kwojarjar “ñan shepherd e congregation an Anij,” renaj mõnõnõ in lelok jibañ. (Acts 20:28, NW) Elap ad kamolol bwe Jehovah ej lemnak kin jab wãppen ko ad im ilo yokwe ej letok jibañ! Jen mõnõnõ in bõke.
Katak Jen Ro Jet
13. Jej katak ta kin juõn wãwen lemnak ekkar jen bwebwenato eo ilo Bible ikijen Job?
13 Ilo Dri Rom chapter 15, Paul ej kwalok bwe ilo ad kalmenlokjen kin joñok ko etto men in emaroñ jibañ kij ñan kajimwe wãwen lemnak ko ad. Ej je: “Bwe jabrewõt men ko ar jeje mokta, ar jeje ken katakin kij, bwe kij kin kijenmij, im kin ainemõn jen Jeje ko, en or ar kejatrikrik.” (Dri Rom 15:4) Jet ri karejar ro retiljek an Jehovah ilo ien ko remotlok rar aikwij kajimwe jet wãwen ko in lemnak ko air. Ñan wanjoñok, ear wõr juõn lemnak emõn ibben Job. Ear jab naruõn Jehovah kin nana ko rej walok, im ear jab kõtlok bwe eñtan ko an en kokkure an liki Anij. (Job 1:8, 21, 22) Ak, ear kowãnik e make. Jehovah ear jitõñ Elihu ñan jibañ Job kajimwe wãwen in. Jen an lõkatip, ilo ettã buru Job ear bõk kajimwe eo ñan ukõt wãwen lemnak eo an im ilo mõkaj ear kõmmane.—Job 42:1-6.
14. Ewi wãwen jemaroñ einwõt Job elañe jej bõk kakabilek kin lemnak eo ad?
14 Enaj kar eindein ad emmakit ke einwõt Job elañe juõn ian ri Christian ro mõttad ear jiroñ kij ilo joij bwe jej kwalok juõn wãwen lemnak ebwid? Einwõt Job, jen jab “naruõn Anij kin bwebwe.” (Job 1:22) Elañe jej eñtan ilo jab jejjet, jen jab aol ak naruõn Jehovah kin abañ ko ad. Jej aikwij bõprae ad kowãnik kij make, im kememej bwe jekdon ta jerammõn ko ad ilo jerbal eo an Jehovah, jej “ro dri korijer bãt” wõt.—Luk 17:10.
15. (a) Lemnak ta eo ebwid jet ian ri kalor ro an Jesus rar kwaloke? (b) Ewi wãwen Peter ear kwalok juõn wãwen lemnak emõn?
15 Ilo ebeben eo kein kajuõn, jet ro rar roñjake nan ko an Jesus rar kwalok juõn lemnak ebwid. Juõn ien, Jesus ear ba juõn men me ear bin air melele kake. Ilo uak, “elõñ ian ro dri kaloran, ke emwij air roñjake, re ba, Nan in konono kein rebin; wõn e maroñ in roñjake?” Alikar bwe ro ear eindein air konono kar wõr juõn lemnak ebwid ibbeir. Im wãwen lemnak eo air ebwid ear tellok ir ñan kabõjrak air roñjake ñan Jesus. Bwebwenato eo ej ba: “Jen ien eo, elõñ ian ro dri kaloran rej jeblak, im jab bar etetal iben.” Ir otemjej kar kwalok juõn wãwen lemnak ebwid ke? Jaab. Bwebwenato eo ej wõnmanlok: “Inem Jisõs e ba ñõn joñoul im ruo, Kom bareinwõt kõnan ilok ke? Saimõn Piter e uak E, Iroij, kim naj ilok ñõn wõn? ibõm nan ko nan in mour in drio.” (Jon 6:60, 66-68) Kar juõn wãwen lemnak elap an emõn! Ñe jej bõk kamelele ak kajimwe ko ñan melele kin Jeje ko me ear bin ad bõke ilo jinoin, ejamin juõn men emõn ke ñan kwalok ejja lemnak eo wõt Peter ear kwaloke? Enaj lap an bwebwe elañe jej kabõjrak ad karejar ñan Jehovah ak ñan konono nae “wãwen nan ko remol” kin wõt an kar bin melele jet men ko ilo jinoin!—2 Timote 1:13.
16. Lemnak ta eo ekailbõkbõk ri tel in kabuñ ko an ri Jew ro rar kwaloke ilo ran ko an Jesus?
16 Ri tel ro in kabuñ an ri Jew ro ilo ebeben eo kein kajuõn rar likjap in kwalok ejja lemnak eo wõt Jesus ear kwaloke. Bebe eo air ebin ñan jab roñjake ñan Jesus ear alikar ke ear kajerkakbijik Lazarus jen an kar mij. Ñan jabdewõt ro ejimwe wãwen lemnak eo air, men in kabwilõñlõñ in en kar men in kamol eo emol bwe Anij ear jilkintok Jesus. Bõtab, jej read: “Inem pris ro relap im Parisi ro rej kokweloklok ro dri bebe, im ba, Ta eo jej kõmõne? bwe armij in Ej kõmõnmõn elõñ kakõle. Elañe jej likit E einwõt, armij otemjej re naj tõmak E; im dri Rom re naj itok im kokkure jiker im bwijer.” Mejelan eo air? “Inem jen ran eo im elikin rej bebe iben dron bwe ren mõn E.” Ijellokin karõk eo air ñan mõn Jesus, rar karõk ñan kokkure men in kamol eo emour bwe ej juõn ri jerbal in men in kabwilõñlõñ ko. “A pris ro relap rej bebe bwe ren bareinwõt mõn Lazerõs.” (Jon 11:47, 48, 53; 12:9-11) Elap an kõmatõrtõr elañe jaar bõk juõn wãwen lemnak einwõt in im kwalok ad inebata ak abõnõnõ kin men ko jen kar lañliñ kaki! Aet, im elap an kauwatata!
Anõk Lemnak Emõn eo an Christ
17. (a) Iumin wãwen ta ko Daniel ear kwalok juõn lemnak eberan? (b) Ewi wãwen Jesus ear kwalok an beran?
17 Ri karejar ro an Jehovah rej kejbãrok juõn lemnak emõn. Ke ri kijirãt ro an Daniel rar karõk ñan kowãppen juõn kien ñan kemo an armij kajitõk kin jabdewõt men ibben anij im armij ran ijellokin king eo iumin 30 ran, Daniel ear jelã bwe men in enaj kar jelet kõtan eo an ibben Jehovah Anij. Enaj kar kabõjrak an jar ñan Anij iumin 30 ran ke? Jaab, ilo beran ear wõnmanlok im jar ñan Jehovah jilu alen ilo juõn ran, einwõt ekin kõmmane ien otemjej. (Daniel 6:6-17, NW) Jesus bareinwõt ear jab kõtlok bwe ri kijirãt ro an ren kamijak e. Ilo juõn ran in Sabbath, ear iion juõn emaan emõrã pein. Jesus ear jelã bwe elõñ ri Jew ro rar bed ie renaj kar lõkatip elañe ear kemour juõn armij ilo ran in Sabbath. Ear kajju im kajitõk ibbeir ñan kwalok lemnak ko air kin men in. Ke rar makoko, ear etal im kemour emaan eo. (Mark 3:1-6) Jesus ear jab jenlik jen an kajejjet jerbal eo an ke ear lemnak bwe ear jimwe.
18. Etke jet armij rej jumae kij, ak en ewi wãwen ad emmakit ñan lemnak nana eo air?
18 Ri Kennan ro an Jehovah rainin rej kile bwe ir bareinwõt rej aikwij jab kõtlok bwe emmakit ko renana an ri kijirãt ro ren kamijak ir. Elañe jab, rejamin kwalok wãwen lemnak eo an Jesus. Elõñ rej jumae ri Kennan ro an Jehovah, jet kinke ejelok jelãlokjen eo ejimwe ibbeir im ro jet kin air dike ri Kennan ro ak ennan eo air. Ak jen jab kõtlok bwe lemnak nana eo air en jelet lemnak emõn eo ad. Jen jab kõtlok bwe ro jet ren bebe kin wãwen ad kabuñ.
19. Ewi wãwen jemaroñ kwalok juõn wãwen lemnak einlok wõt eo an Jesus Christ?
19 Ien otemjej Jesus ear kwalok juõn wãwen lemnak emõn kin ri kalor ro an im kin karõk ko an Anij, jekdon ewi joñan an kar bin ñan an kõmmane. (Matu 23:2, 3) Jej aikwij anõk joñok eo an. Emol, ro jeid im jatid rejjab wãppen, ak bar eindein kij. Im ia eo jemaroñ lo ro mõttad remõnlok ak ro jerad emol air tiljek jen iloan dolul in jimjãn jimjatin eo ad ibelakin lal? Jehovah ejañin letok juõn melele eyu kin Nan eo an, ak kumi in kabuñ et eo emõn lok an melele kake? Ien otemjej jen kejbãrok juõn wãwen lemnak emõn, lemnak eo ear bed ibben Jesus Christ. Ibwiljin men ko jet, men in ekoba ad jelã kõttar Jehovah, einwõt jenaj etale kake ilo katak in tok.
[Kamelele eo itulal]
a Book eo The Greatest Man Who Ever Lived, jeje in Watchtower Bible and Tract Society of New York, Inc., ej etale kin mour im jerbal in kwalok nan eo an Jesus.
Kwomaroñ Ke Kamelele?
• Ewi wãwen lemnak eo ad ej jelet mour eo ad?
• Kwalok kin wãwen lemnak eo an Jesus Christ.
• Ta eo jemaroñ katak jen wãwen lemnak eo an Job?
• Kain lemnak rot eo ejimwe jen bõke ñe jej jelmae jumae?
[Pija ilo page 17]
Juõn ri Christian eo ewõr juõn lemnak emõn ibben ej kabuk wãwen ko ñan jibañ ro jet
[Pija ilo page 19]
Kate in katak Nan in Anij ej jibañ kij ñan bõk lemnak eo an Christ