Jibañ Ir Bwe Ren Bar Bõk Ijo Kwonair
1. Wõn ro ilo congregation eo rej aikwij jibañ?
1 Dri jilik Paul ear inebata kin ro im rar bwijrak jen air jerbal ñan Jeova. (Rom 13:11) Einwõt Paul, jej inebata kin ro jeid im jatid me rar bwijrak jen air jerbal ñan Jeova. Ewi wãwen jemaroñ jibañ ir bwe ren bar bõk ijo kwonair im jerbal ñan Jeova?
2. Ta ko elder ro remaroñ kõmmani ñan jibañ ro im rar bwijrak jen air jerbal ñan Jeova?
2 Wãwen ko Elder ro Remaroñ Jibañ: Enañin aolep ro im rar bwijrak jen air jerbal ñan Jeova jiljino aliñ ko ak aitoklok rar jab ellok jen mol eo. Bõtab, ekkã an rein ro jeid im jatid jenliklik kinke rej ebwer ak ewor abañ ko ilo mour eo air ak rej mad kin mweiuk ko ak kin inebata ko an lal in. (Luk 21:34-36) Elañe elder ro remaroñ, emmõnlok bwe ren jibañ rein moktalok jen air bwijrak. Elder ro remaroñ kõmman karõk in lolok ir im kõketak ir. Bareinwõt, rej aikwij kajeoñ in melele unin air kar bwijrak im bukot kilen ñan jibañ ir.
3. Ta ko jemaroñ kõmmani ñan jibañ ro jeid im jatid me rar bwijrak jen air jerbal ñan Jeova?
3 Wãwen ko Ro Jet Remaroñ Jibañ: Enañin aoleper jejelã kajen juõn eo me ear bwijrak jen an jerbal ñan Jeova. Bwelen kar juõn eo im jaar lukkun ebake kar mokta. Ta ko jemaroñ kõmmani ñan jibañ e kiõ? Enaj emmõn ñan lolok e im kõketak e. Jemaroñ ba bwe jej lukkun oñ kake e. Jemaroñ bar kwalok ad lañliñ im mõnõnõ ibben. Ijellokin am ba bwe emõjinolok, emmõnlok am ba bwe kwar lemnak kake. Kwomaroñ kõmao kin bwebwenato ko me renaj kõketak e ak kin tõbrak ko remmõn rar walok ilo congregation eo. Elaplok jen men otemjej, kobatok ibben congregation eo emaroñ jibañ e. Kwomaroñ ba bwe komro jimor en itok ibben dron ñan kwelok ko. Jab meloklok in kennanik elder ro kin am kar kõmao ibben.
4. Elañe ro im rar bwijrak jen air jerbal ñan Jeova rej bar jeblaktok ñan kwelok ko, ta ko jemaroñ kõmmani ñan kõketak ir?
4 Ekkã an ro im rar bwijrak jen air jerbal ñan Jeova ãliklik ak jook ñe rej bar jeblaktok ñan kwelok ko im lo ro im rar jelã kajeir moktalok. Jen karuwaineneik e ilo yokwe im jen jab ba, “Etke eto ad jab loe yuk?” Jen kobaiktok e ñe jej kõmao ibben ro jet im kwalok kajen ñan ro ejaje kajeir. Jemaroñ bareinwõt jijõt iturin, im elañe ejelok an book in al ak book ko jet, jemaroñ lelok an. Jen rejañ e bwe en bar jeblak im jen ba ñan e bwe jemõnõnõ in jibañ e elañe ej aikwij jibañ.
5. Ta eo enaj walok ñe jej jibañ juõn bwe en bar bõk ijo kwonan ilo jerbal ko ñan Jeova?
5 Jeova im Jisõs jimor rej kaurõk im yokwe ro im rar jebwãbwe, eñin unin, rej lañliñ ñe rein rej bar jeblak. (Mal. 3:7; Matu 18:12-14) Elañe jej jibañ ro im rar bwijrak jen air jerbal ñan Jeova im lo tõbrak, jenaj lañliñ einwõt Jeova im Jisõs.