“En Laplok Ami Kate Kom”
1 Ke jaar wujleplok ad mour ñõn Jehovah, jaar kallimur ñõn lelok men ko remõntata ñõn e. Ilo ekkar, ri jilek Peter ear rejañ Christian ro ilo ebeben eo kein kajuõn ñõn kate wõt ir ñõn kõmmõn bwe jutak eo air iman Jehovah en bin. (2 Pet. 1:10) Jekõnan kate wõt kij ñõn kabuñburuen Jehovah ilo ad karejar ñõn e rainin. Ta eo men in ej kitibuj? Ke kõtan eo ad ibben Jehovah ej mwilõllok im jej kalmenlokjen kin aolep men ko ear kõmmõni ñõn kij, burued ej kamakit kij ien otemjej ñõn kate wõt kij ilo jerbal eo an. Jekõnan kakõmõnmõnlok emõnin im, ijo emaroñ, kalaplok joñan jej jerbal ilo jerbal in kwalok nan eo ad.—Sam 34:8; 2 Tim. 2:15.
2 Juõn brother jodikdik eo ear kõnan kalaplok an jerbal ilo jerbal in kwalok nan ear lo bwe an keini an katak Nan eo an Anij ear kamwilõllok kamolol eo an kin Jehovah im kalaplok kijejeto eo an. Men in ear kammakit e ñõn kanne juõn application in jerbal in pioneer. Juõn sister eo ear lo bwe ebin an konono ibben ruamaejet ro ear kamelmel kin jet ennan ko ilo book in Reasoning (Kammanwa) im ejjabto tokelik ear jino lõñliñ kin elaplok tõbrak ko ilo jerbal eo an. Ear maroñ kõmmõne juõn katak kin Bible ibben ruo ri belele ro me rar bõk mol eo.
3 Lõñliñ ilo Ta eo Kwomaroñ Kõmmõne: Jet iar jej iion wãwen ko rebin einwõt jab ejmour, jumae eo jen ro uan family eo, jeramel, ak jab kea an armij ilo territory eo. Elõñ abañ ko jet me ekkã an walok ilo ran kein eliktata remaroñ kautameik jerbal eo ad. (Luke 21:34, ftn.; 2 Tim. 3:1) Ej melelen ke bwe jaar likjap ilo wujleplok eo ad ñõn Jehovah? Jab elañe jej karejar ñõn e kin joñan wõt ad maroñ.
4 Ejjab juõn men in meletlet ñõn ekajete kij make ion bedbed in ta eo ro jet remaroñ kõtõbrake. Ijellokin men in, Jeje ko rej rejañ kij bwe “jabrewõt armij en mõke melejoñ jerbal eo an.” Lelok kij make ilo joñan eo jemaroñ ej kabuñburuen Jehovah im ej letok ñõn kij “unin kimjãje ilo e mõke.”—Gal. 6:4; Kol. 3:23, 24.
5 Jen eoroñ nan ko an Peter ‘komin kate kom bwe En lo kom ilo ainemõn im ejelok ami mãr ak notami iman mejen.’ (2 Pet. 3:14) Jitõb rot in enaj kõmmõn ad eñjake ad jokane im enaj letok ñõn kij ainemõn ilo lemnak me Jehovah wõt emaroñ letok.—Sam 4:8.