Jerbal in Pioneer—Ej Jejjet Ñan Kwe ke?
1 “Ijjab maroñ lemnak in kõmman jabdewõt men ko jet. Ijjab maroñ lemnak kin jabdewõt men me emaroñ bõktok ejja lañliñ eo wõt.” Wõn eo ear ba men in? Juõn ian buki thousand Ri Kennan ro an Jehovah me ear kõmman bwe jerbal in kwalok nan full-time en jerbal eo eaorõktata ilo air mour. Kwar jar ke ilo am lemnak elañe jerbal in pioneer ej jejjet ñan kwe? Ilo ad kar wujleplok ad mour ñan Jehovah ilo ejelok jabdewõt men jej debdebiji, emol jej aikwij lemnak elañe jemaroñ kalaplok ijo kunad ñan kajededlok news eo emõn kin Ailiñ eo. Kin men in, joij im lemnak kin jet kajitõk ko me elõñ armij rar kajitõk kaki kin jerbal in pioneer.
KAJITÕK 1: “Jet rej ba bwe jerbal in pioneer ejjab ñan aolep. Ewi wãwen I maroñ jelã elañe ej jejjet ñan ña?”
2 Uak eo ej wawa ion wãwen ko ibbam im eddo ko am ekkar ñan Bible eo. Ejmour ko an elõñ ak wãwen ko ibbeir rejjab kõtlok air maroñ kajerbal 90 awa ko ilo jerbal in kwalok nan. Bõk einwõt juõn wanjoñok elõñ sister ro retiljek me rej Christian limaro ri belele im ro jinen. Rej bõk kunair ilo jerbal in kwalok nan ilo joñan eo wãwen ko ibbeir rej kamelim. Ñe ewõr ien, rej auxiliary pioneer juõn ak elõñlok jen juõn alliñ ilo kajjojo yiõ, im madmõde lañliñ eo ej itok jen air kalaplok ijo kunair ilo jerbal in kwalok nan. (Gal. 6:9) Meñe wãwen ko ibbeir rejjab kõtlok air jerbal kiõ einwõt pioneer ro rej full-time, rej kwalok jitõb in pioneer eo im rej juõn jerammõn ñan congregation eo einwõt ri kwalok ro kin news eo emõn rekijejeto.
3 Ijo tu-rãjet, elõñ brother im sister ro me rej anemkwoj jen eddo ko rar najikin jerbal in pioneer ilo air ukõt men ko raorõk ibbeir. Ta kin kwe? Kwoj juõn jodikdik eo ear kadedelok an school ke? Kwoj juõn lio ri belele me leo belen emaroñ kabwe aikwij ko an family eo ke? Emwij am mare ke ak ejelok nejõm ajiri? Kwar retire ke jen jikin jerbal eo am? Ñan pioneer ke ak jab ej juõn bebe kajjojo armij ej aikwij make kõmmane. Kajitõk eo ej, Kwomaroñ najikin ke jerbal in pioneer ilo mour eo am?
4 Satan ej kajerbal men ko ilo jukjuk im bed in ñan kobrak mour ko ad kin men in kamad ko im ñan keboub kij ilo juõn wãwen mour ekibbon. Elañe ej bin bebe eo ad ñan kejbãrok ad jab mõttan lal in, Jehovah enaj jibañ kij ñan kõmman bwe men ko an Ailiñ eo ren men ko moktata ilo ad mour im ñan jibadõk im bõk aolep jerammõn ko kin jerbal eo ej theocratic me rej bellok ñan kij. Elañe kwomaroñ ukõt wãwen ko ibbam bwe kwon maroñ jerbal einwõt juõn pioneer, etke kwojjab kõmmane?
KAJITÕK 2: “Ewi wãwen I maroñ jelã bwe I naj maroñ kabwe aikwij ko aõ ilo jerbal in full-time?”
5 Ej mol bwe ilo elõñ ailiñ ko joñan awa ko kwoj aikwij joloke ilo jikin jerbal eo ilo kajjojo week ñan bõk men in aikwij ko an mour ear laplok ilo yiõ ko rej kab motlok. Bõtab, elõñ rar pioneer iumin elõñ yiõ ko, im Jehovah ear wõnmanlok im kabwe aikwij ko air. Ñan lo tõbrak einwõt juõn pioneer, ej aikwij wõr am tõmak im juõn jitõb in karmijete kõnan ko am make. (Mat. 17:20) Jemaroñ liki nan ko ilo Psalm 34:10 me ej ba bwe ‘ro rej bukõt Jeova rejamin aikwij jabrewõt men emõn.’ Jabdewõt eo ej deloñ ilo jerbal in pioneer ej aikwij kõmmane ilo an liki bwe Jehovah enaj kabwe aikwij ko an. Eñin men eo ej kõmmane ñan pioneer ro rej tiljek ilo aolep jikin ko! (Sam 37:25) Emol, ilo errã ibben nan in kakabilek ko ilo 2 Thessalonica 3:8, 10, im 1 Timothy 5:8, pioneer ro rejjab kõtmene bwe ro jet renaj kabwe aikwij ko air.
6 Jabdewõt eo ej lemnak kin jerbal in pioneer en kõmman men eo Jesus ear ba, bwe en: “Jijõt mokta, im bebe kin wõnan.” (Luke 14:28) An kõmman eindein ej kwalok an meletlet. Konono ibben ro rar lo tõbrak ilo jerbal in pioneer iumin elõñ yiõ ko. Kajitõk kin ewi wãwen Jehovah ear kabwe aikwij ko air. Circuit overseer eo am ej juõn pioneer eo ewõr an iminene me enaj mõnõnõ in lewõj nan in rejañ ko kin ewi wãwen kwomaroñ lo tõbrak ilo jerbal in kwalok nan full-time.
7 Juõn armij emaroñ jab lukkun lo mol in kallimur eo an Jesus ilo Matthew 6:33 mae ien ej likit emake iumin pein Jehovah. Juõn pioneer etiljek ear ba: “Ke kimro mõtta kar tõbartok ilo jikin jerbal eo ekãl einwõt pioneer ro, kar wõr ibbemro jejjo wõt leen wijki ko, jidik wõt butter, im ejelok jen. Kim ad kamaat mõñã ko ilo ien mõñã in jota im ba, ‘Kiõ ejelok jabdewõt men ñan ilju.’ Kim ar jar kake, im kim ar kiki. Ilo jibboñtata juõn ri Kennan ilo bukwon eo ear kir im kwalok e make, im ba, ‘I ar jar bwe Jehovah en jilkintok pioneer ro. Kiõ I maroñ jerbal ibbemirro enañin aolepen rainin, ak kinke ij jokwe ilo bar juõn jikin, ij aikwij mõñã mõñã in raelep ibbemi, inem iar bõktok kijed mõñã.’ Kar juõn joñan elap kin kanniekin cow im leen wijki.” Eñin unin Jesus ear kamol ñan kij bwe jemaroñ ‘jab inebata buruõd kin ad mour’! Inem ear kobaiktok: “Wõn iami kin inebata buruen e maroñ in kaitoklok an mour ilo juõn mokwõj in pã?”—Mat. 6:25, 27.
8 Lal in ibelakid ej laplok an arõk mweiuk. Ej jibed kij ñan bõk ejja jitõb eo wõt. Bõtab, elañe ewõr ad kamolol kin jerbal in kwalok nan full-time men in enaj kõmman bwe jen juburu meñe ejjab lap mweiuk ko ibbed. (1 Tim. 6:8) Pioneer ro me rej kõmman bwe mour ko air en lamwan im kwon ewõr elaplok ien ñan kwalok nan im rej bõk elaplok lañliñ im kajur ilo jitõb jen air katakin ro jet kin mol eo. Meñe rejjab mour einwõt juõn eo ej karmijete aolep men in kamõnõnõ ko, lemnak eo air ejokkin wõt juõn kin wãwen eo ibbeir ear kamaroñ ir ñan lañliñ kin jerammõn ko rej itok jen jerbal in pioneer.
9 Elañe kwoj eñjake bwe jej mour ilo ran ko eliktata im bwe ej maatlok ien an lal in enana, kwonaj bõk kakajur ilo jitõb ñan karmijete kõnan ko am kwoj aikwiji ñan kwalok kin news eo emõn ilo jabdewõt ien emõntok. Ilo am bar lale wãwen eo ibbam ikijen money im ilo am likit men ko ilo pein Jehovah, kwomaroñ kile bwe kwomaroñ karejar ñan E full-time. Meñe kwoj aikwij karmijete jet kõnan ko ilo kanniek bwe kwon maroñ pioneer, kwonaj lañliñ kin jerammõn ko jen Jehovah.—Sam 145:16.
KAJITÕK 3: “Einwõt juõn jodikdik, etke ij aikwij lemnak kin jerbal in pioneer einwõt juõn jokãlet in jerbal inaj kõmmane?”
10 Ñe kwoj kadedelok yiõ ko eiet eliktata ilo am school, ekkã am naj lemnak kin ilju eo am. Kwo kõnan bwe en jokane, mõnõnõ, im kajuburu. Ri kakabilek ro ilo school remaroñ kajeoñ in jitõñ yuk ñan juõn jerbal elap wõnãn ri jerbal me ej aikwiji am school ilo college iumin elõñ yiõ ko. Bõklikit in Christian eo am emwij kamineneiki ej jiroñ yuk bwe kwon bojak ñan karejar ñan Jehovah ilo joñan eo kwomaroñ. (Ekl. 12:1) Kwomaroñ bareinwõt lemnak in mare im jino juõn family. Ta eo kwonaj kõmmane?
11 Bebe ko kwoj kõmmani ilo ien in ilo am mour emaroñ jelet aolepen ilju eo am. Elañe kwoj juõn Ri Kennan an Jehovah emwij wujleplok am mour im baptais, kwar lelok aolepen mour eo am ñan Jehovah. (Hib. 10:7) Ien eo moktata kwomaroñ, kajeoñ in auxiliary pioneer iumin juõn ak elõñlok jen juõn alliñ. Men in enaj kamaroñ yuk ñan edjoñ lañliñ im eddo ko rej itok jen am regular pioneer, im lemnak eo kin ta eo kwon kõmmane kin mour eo am enaj alikarlok. Inem, jen am kabuk juõn jerbal full-time elikin kwoj kadiojlok jen school, etke kwojjab regular pioneer? Jet ro me rar kõttar ñan ien ko tokelik ñan deloñ ilo jerbal in pioneer rar ajlok bwe ear jab mõkaj air ijjino.
12 Einwõt juõn jodikdik, kortokjen ien ko remõn ñan jibadõk am make lok iam im lañliñ kin tokjen ko ej itok jen jerbal in kwalok nan full-time. Elañe ej kõnan eo am ñan mare, ejelok bar juõn bedbed emõnlok ñan mour in belele jen am jerbal mokta ilo jerbal in regular pioneer. Ñe kwoj eddeklok ilo am ritto ilo lemnak im jitõb, kwomaroñ kãlet bwe jerbal in pioneer ibben juõn beleõm eo ewõr ejja lemnak eo wõt en jerbal eo am. Jet ri belele ro me rar pioneer ibben don rar deloñ ilo jerbal in circuit ak missionary. Ejelok bar juõn mour elap an kajuburu!
13 Jekdon ewi toan kwoj wõnmanlok im pioneer, kwonaj kar kowãppenlok education eo am im bõk kaminene eo eaorõk me ejelok bar juõn jerbal ion lal emaroñ letoke. Jerbal in pioneer ej katakin yuk kin kate, karõk men ko am, wãwen eo kwomaroñ jerbal ibben armij, atartar ion Jehovah, im ewi wãwen kwomaroñ kaddek meanwõd im joij—kadkad ko me renaj kamaroñ yuk ñan bõk eddo ko relaplok.
14 Wãwen mour ej laplok ad jab jelã kake ñan armij. Ejjab lukkun lõñ men ko ej mol air bin, ijellokin ta eo Jehovah ear kallimur kake. Kinke ilju eo am ej bellok imam, ewõr ke bar juõn ien emõnlok jen kiõ ñan lukkun lemnak kin ta eo kwonaj kõmmane kin mour eo am ilo yiõ ko renaj itok? Lukkun etale jerammõn eo kin jerbal in pioneer. Kwo jamin buromõj kwar kãlet jerbal in pioneer einwõt jerbal eo am.
KAJITÕK 4: “Ejjab juõn ijjibed elap ke ñan kauñ awa ko? Ta elañe ij rumij in kabwe awa ko aõ?”
15 Ñe kwoj kanne juõn application ñan regular pioneer, kwoj aikwij uak kajitõk eo: “Kwar karõk ke men ko am bwe kwon maroñ tõbar men in aikwij eo kin 1,000 awa ko ilo kajjojo yiõ? Ñan tõbare, kwoj aikwij kwalok nan enañin jilu awa ko ilo juõn ran. Alikar, men in ej aikwiji juõn schedule emõn im kwoj aikwij kate yuk. Enañin aolep pioneer ro rej kõmman juõn schedule ekeie iloan wõt jejjo wõt alliñ ko.
16 Bõtab, Ecclesiastes 9:11 ej mol an ba, ‘Ien im men in walok rej itok ñõn ir otemjej.’ Nañinmij ko relap ak wãwen ko jet ear jab kõtmene kaki remaroñ kõmman bwe juõn pioneer en rumij an kauñ awa ko an. Elañe abañ eo ejjab to an bed im ej walok ilo jinoin yiõ in jerbal eo, juõn schedule elaplok emaroñ men eo wõt kwoj aikwiji ñan kajejjet awa ko. Ak ta elañe juõn abañ elap ej walok jejjo wõt alliñ ko mokta jen ej jemlok yiõ in jerbal eo im pioneer eo ejjab maroñ kauñ awa ko?
17 Elañe kwoj nañinmij iumin jet alliñ ko ak elañe kin un ko jet ele jen am maroñe kwojjab maroñ kauñ awa ko, kwomaroñ kebak juõn uan Congregation Service Committee eo im kameleleik e kin abañ eo. Elañe elder rein rej lemnak bwe ej men in meletlet ñan kõtlok am wõnmanlok ilo jerbal in pioneer ilo am jab aikwij inebata ñan kauñ awa ko, remaroñ kõmman bebe in. Secretary eo enaj kakõlleik Congregation’s Publisher Record card eo ñan kwalok bwe kwojjab aikwij kauñ awa ko. Men in ejjab juõn leave of absence (juõn melim ñan jako) ak, jen men in, ej juõn lemnak ejoij kin wãwen ko ibbam.—Lale August 1986 Ad Jerbal Ñõn Ailiñ Eo peij eo iloa, paragraph 18.
18 Pioneer ro ewõr air iminene rej kalõñlok awa ko ilo jinoin yiõ in jerbal eo. Jerbal in pioneer eo air ej men eo moktata, inem jet ien rej lo bwe ej men in aikwij ñan kadiklok makitkit ko rejjab men in aikwij. Elañe juõn pioneer ejjab maroñ kauñ awa ko an kin an wõr juõn schedule enana ak ejjab kate e ñan kajejjete, ej aikwij eñjake bwe ej eddo eo an ñan kauñ awa ko im jab kõtmene an elder ro aikwij kwalok joij ejej uan.
19 Ewõr ien ko ñe juõn pioneer ej iion oktak ko ejjab maroñ bõpraiki ilo wãwen ko rej walok ñan e. Emaroñ lo bwe ejjab maroñ kauñ awa ko iumin juõn ien eaetok kin juõn abañ in ejmour ej wõnmanlok wõt ak eddo in family ko relaplok, im men ko eierlok wõt. Ilo case in, ial in meletlet ej ñan jeblak ñan lajrak in publisher im bõk kunan ñe ewõr ien ilo jerbal in auxiliary pioneer. Ejelok juõn karõk ej kõtlok juõn armij ñan bedwõt ilo lajrak in pioneer elañe wãwen ko ibben ejjab kõtlok an kauñ awa ko.
20 Kimij kejatdikdik bwe karõk eo ñan kwalok joij ñan ro ej tellokiir naj rejañ elõñlok armij ñan deloñ ilo jerbal in pioneer ilo air jab aikwij inebata. Ej aikwij bareinwõt rejañ ro rej bed kadede ilo jerbal in full-time ñan wõnmanlok ilo jerbal in pioneer. Kimij kõnan bwe pioneer ro ren lo tõbrak ilo jerbal eo air ej full-time.
KAJITÕK 5: “I kõnan kõtõbrak juõn men im mõnõnõ ilo aõ kõmmane. Jerbal in pioneer enaj kajuburu iõ ke?”
21 Mõnõnõ eo emol ej wawa ion juõn kõtan ebak ibben Jehovah im juõn tõmak bwe jej karejar ñan e ilo tiljek. Jesus ear kijenmij ilo alal in kaeñtan eo “kin lõñliñ ar likit e iman.” (Hib. 12:2) Mõnõnõ eo an ear itok jen an kõmanmõn ankil an Anij. (Sam 40:8) Ilo jukjuk im bed in kiõ, jemaroñ lañliñ kin mõnõnõ eo emol elañe enañin aolep makitkit in mour ko ad ewõr kõtan ñan kabuñ eo ad ñan Jehovah. Jibadbad ko ilo jitõb ej letok ñan kij juõn unin mour kinke ilo tumũlal in buru jej jelã bwe jej kõmanmõn men ko rejimwe. Mõnõnõ ej itok jen ad lelok, im ejelok bar juõn wãwen lelok kin kij make ej emõnlok jen ad katakin ro jet kin ewi wãwen remaroñ bõk mour indio ilo lal eo ekãl an Anij.—Jerbal 20:35.
22 Nan ko an pioneer eo rar eliji ilo paragraph eo moktata ear kameleleike ilo wãwen in: “Emaroñ wõr ke juõn lañliñ ej laplok jen am lo juõn armij kwar katak ibben ej erom juõn ri karejar ekijejeto an Jehovah? Ej men in kairujruj im kakajurlok tõmak ñan lo ewi joñan kajurin Nan in Anij ñan kamakit armij ñan kõmman oktak ko ilo air mour bwe ren kamõnõnõik Jehovah.” (Lale May 1, 1998, Imõniaroñroñ, peij 13-18.) Inem, ta eo ej kamõnõnõik yuk? Elañe kwoj kaorõk jerbal ko rej to air bed im ewõr tokjeir, jen mõnõnõ ko rejarkaju me lal in ej litoki, jerbal in pioneer enaj lewõj juõn eñjake bwe ewõr tõbrak ko ilo mour me enaj mol an kamõnõnõik yuk.
KAJITÕK 6: “Elañe ejjab juõn men in aikwij ñan bõk mour indio, ejjab jokãlet eo aõ ke elañe inaj pioneer ak jab?”
23 Emol, bebe eo ñan pioneer ej am make. Jehovah wõt emaroñ ekajete wãwen ko ilo mour eo am. (Rom. 14:4) Ilo jimwe ej kõtmene am karejar ñan e kin aolepen buruõm, am, am lolãtãt, im am kajur. (Mark 12:30; Gal. 6:4, 5) Ej yokwe eo e mõnõnõ in lelok, juõn eo ej karejar ñan e ilo lañliñ, jab kin kelmarok ak makoko. (2 Kor. 9:7; Kol. 3:23) Inem un eo unin am pioneer ej aikwij ikijen men ko lor jitõb. Elañe jab, ñan kwe, enaj jako am itoklimo ilo jerbal in pioneer. Unin am jerbal full-time ej aikwij kinke kwoj yokwe Jehovah im armij ro ilo territory eo am. (Mat. 9:36-38; Mark 12:30, 31) Elañe ej eindein am lemnak, inem jerbal in pioneer ej tellokin am lemnak kake.
24 Kimij kejatdikdik bwe men ko kim ar kõlajrake ijin naj jibañ yuk ñan etale mejenkajjik ko am ñan pioneer. Kwomaroñ ke ukõt wãwen ko ibbam ñan regular pioneer? Emwij print ilal ej juõn calendar naetan “Pioneer Service Schedule eo Aõ Kajjojo Week.” Lale elañe kwomaroñ kanne juõn schedule ekeie ñan kwe make me enaj kõtlok am jerbal enañin 23 awa ko ilo kajjojo week ilo jerbal in kwalok nan. Inem, likit am tõmak im liki ilo Jehovah. Kin jibañ eo an kwomaroñ lo tõbrak! Ear kallimur: “I naj . . . lutõk iomi men ko remõn otemjej mae ien emaat am kõnan.”—Mal. 3:10.
25 Inem kimij kajitõk, “Jerbal in Pioneer—ej jejjet ñan kwe ke?” Elañe kwomaroñ ba “Aet,” karõk juõn ran ñan jino regular pioneer im kwon liki bwe Jehovah enaj kajerammõn yuk kin juõn mour elañliñ!
[Jaat ilo peij 6]
(Ñan lale pija eo, jouj im lale ilo bok eo)
Pioneer Service Schedule eo Aõ Kajjojo Week
MONDAY: Jibboñ kwalok nan
TUESDAY: Jibboñ kwalok nan
WEDNESDAY: Jibboñ kwalok nan
THURSDAY: Jibboñ kwalok nan
FRIDAY: Jibboñ kwalok nan
SATURDAY: Jibboñ kwalok nan
SUNDAY: Jibboñ kwalok nan
MONDAY: Elikin Raelep kwalok nan
TUESDAY: Elikin Raelep kwalok nan
WEDNESDAY: Elikin Raelep kwalok nan
THURSDAY: Elikin Raelep kwalok nan
FRIDAY: Elikin Raelep kwalok nan
SATURDAY: Elikin Raelep kwalok nan
SUNDAY: Elikin Raelep kwalok nan
MONDAY: Jota kwalok nan
TUESDAY: Jota kwalok nan
WEDNESDAY: Jota kwalok nan
THURSDAY: Jota kwalok nan
FRIDAY: Jota kwalok nan
SATURDAY: Jota kwalok nan
SUNDAY: Jota kwalok nan
Kajerbal juõn pencil ñan je schedule eo am kajjojo ran ilo juõn week.
Schedule enañin 23 awa ko ilo kajjojo week ilo jerbal in kwalok nan.
Aolep awa ko ilo juõn week ․․․․․․․․․․․․․․․․․․․․