“Kwolukkun Ekkar ñõn Jerbal in Pioneer!”

1. Ewi wãwen kar iñjake eo an juõn jeer im jãter kõra kin jerbal in pioneer?

¹ Juõn kõra etan Kathe B. Palm ear ba: “Ejelok bar juõn jerbal iar lo emõnlok im emaroñ bõktok mõnõnõ im juburu ñõn iõ ak emaroñ kar bõktok jerammõn ko relap.” Kõra in ear karmijete kõnan ko an mõke im jolok elõñ yiõ ko ilo an jerbal einwõt juõn pioneer ñõn an kwalok nan ñõn armij ro jen jabõn ñõn jabõn ilo Chile, South America. Ilo an kalomonlokjen kin jerammon ko pioneer ro rej iioni, bwelen juõn armij ear ba ñõn yuk nan kein: “Kwolukkun ekkar ñõn jerbal in pioneer!”

2. Kemelele kin etke jej bõk mõnõnõ eo emol ñe jej bõk kwonad ilo makõtkit ko rej ekkejel iben kabuñ eo ar ñõn Jeova.

² Juõn Wãwen Mour Ekajuburu: Jisõs, Joñok eo ar, ear lo mõnõnõ im juburu eo emol ilo an kõmõnmõn ankilan Jemen. (Jon 4:34) Kin men in, ear lukkun katakin dri kalor ro an bwe mõnõnõ im juburu eo emol ej itok jen an juõn boub im bõk kwonan ilo makõtkit ko rej ekkejel iben ar kabuñ ñõn Jeova. Jej lo mõnõnõ ñe mour ko ar rej obrõk kin jerbal ko rej kamõnõnõik buruen Jeova. Bareinwõt, ñe jej lelok ien, maroñ, im men ko mweier ñõn jibõñ ro jet, men in ej kalaplok mõnõnõ eo ar.​​—Jerb. 20:31, 35.

3. Ta jerammõn ko jemaroñ loi ñe jej kalaplok ien ar kwalok nan?

³ Ilo ar kalaplok ien ko ar ilo jerbal in kwalok nan, men in enaj kalaplok lõñliñ eo ar ilo ar jino im bareinwõt katak Baibel iben armij ro. Meñe ilo jikin eo im einwõt elõñ armij ro rejjab mõnõnõ in roñjake, elikin ar jino iminenelok im laplok kabel eo ar ilo jerbal in kwalok nan, jemaroñ lo bwe elõñ armij ro rej mõnõnõ in roñjake. Pioneer ro remaroñ kajerbal kabel im jelalokjen eo rej bõk jen Pioneer Service School eo. Remaroñ ber ilo jikuul in elikin air pioneer iomin juõn yiõ. (2 Tim. 2:15) Ilo ar kate im wõnmanlok wõt, jemaroñ jeor ine in mol ko me remaroñ jebar leir tokelik.​​—Ekk. 11:6.

4. Ta eo jodrikdrik ro rej pojõk in drioijlok jen jikuul rej aikwij lemnok kake?

⁴ Jodrikdrik ro: Ilo ien in kwoj pojõk in drioijlok jen high school, kwonañin ke kalomõnlokjen kin ilju im jeklaj eo am? Ilo tõrein, katak ko ilo jikuul rej kobrõk ien ko am. Bõtab, elikin am drioijlok jen jikuul, ewi wãwen am naj kajerbal ien kein im kwoj kajerbali ñõn jikuul? Jen am jibarek bwe kwon bõk juõn jerbal eo im enaj bõk aolep ien ko am, etke kwojjab lemnok im jar kin mejenkajik eo ñõn am bõk jerbal in regular pioneer? Kabel ko kwonaj bõk jen am pioneer einwõt, jela kilen kwalok ñõn elõñ kain armij ro, anjo ion abañ ko am mõke, kadrek karkarin jadõr, kabel eo ñõn jela katakin, renaj jet men ko kwonaj kajerbali im bõk tokjeir ilo aolepen mour eo am.

5. Ewi wãwen ro jemen im jinen im congregation eo remaroñ rejañ jodrikdrik ro ñõn bõk jerbal in pioneer?

⁵ Kom ro jinen im jemen, komij ke jibõñ ajiri ro nejimi ñõn air jibarek jerbal in kwalok nan full-time? Nan im joñok ko ami remõn remaroñ jibõñ ajiri ro nejimi ñõn air likit jerbal ko an Ailiñ eo imantata ilo mour eo air. (Matu 6:33) Ray, eo ear jino pioneer elikin an kar drioijlok jen jikuul ear ba: “Ien otemjej jinõ ear kile bwe jerbal in pioneer ej bõktok juburu im mõnõnõ eo elap ilo mour.” Aolep ro ilo congregation eo remaroñ rejañ ro jet ñõn air bõk jerbal in pioneer ikijen nan im ilo air rejetak ir. Jose, jen ailiñ Spain, ej ba: “Ro ilo congregation eo aõ rar watõk jerbal in pioneer bwe ej jerbal eo emõntata ñõn ajiri im jodrikdrik ro. Nan ko air im air kaurõk jerbal in pioneer, bareinwõt jibõñ ko air, men kein rar kõmõn bwe en biruru aõ jino pioneer.”

6. Ta eo jemaroñ kõmõne elañe ejelok iber kõnan eo ñõn bõk jerbal in pioneer?

⁶ Anjo ion Abañ ko: Ak ta elañe kwonaj ba, ‘Ejelok iba kõnan eo ñõn pioneer.’ Elañe eñin kar wãwen am iñjake, jar ñõn Jeova kin iñjake eo am im ba ñõn e, ‘Ijjab jela elañe jerbal in pioneer ej ekkar ñõn iõ, ak ikõnan kõmõne men eo ej kabuñburuõm.’ (Sam 62:8; Ken. 23:26) Inem bukot ial in tel eo an ilo Nan eo im rolul eo an. Elõñ regular pioneer ro rar jino ‘erjoñe’ jerbal in pioneer ilo air kar jerbal einwõt juõn auxiliary pioneer, im lõñliñ eo rar loe ear kamakõt ir ñõn air jibarek jerbal in kwalok nan full-time.​​—Sam 34:8.

7. Ewi wãwen ar maroñ anjo ion lemnok in berre ko bwe jejjab maroñ kõtõbrõk 70 auõ ko?

⁷ Ta elañe kwoj lemnok bwe kwojjab maroñ kõtõbrõk 70 auõ ko ilo juõn aliñ? Etke kwojjab kennan iben pioneer ro im wãwen ko ibeir renañin einlok wõt wãwen ko ibõm? (Ken. 15:22) Inem elikin am kõmõne men in, kwon kõmõne jet lajrõk ko kin makõtkit im ien ko am. Kwomaroñ lo bwe am bõk ien jen makõtkit ko ejelok tokjeir ñõn kalaplok am ien ilo jerbal in kwalok nan ejjab juõn men ebin ñõn kõmõne.​​—Ep. 5:15, 16.

8. Etke jej aikwij jen ien ñõn ien etale wãwen ko ilo mour eo ar?

⁸ Bar Etale Wãwen ko Ibõm: Wãwen ko ilo mour eo ar rej oktõk jen ien ñõn ien. Inem ej juõn men emõn ñõn ar bõk ien im bar lale im etali. Ñõn wanjoñok, kwo pojõk ke in retire jen am jerbal? Randy, eo ear mõkõj an retire jen jerbal eo an ej ba: “Bebe in iar kõmõn ear kamaroñ iõ ñõn aõ regular pioneer iben lio beleiõ, im ear letok juõn ien emõn ñõn amro emakõtkit im jerbal ilo jikin eo elap aikwij jibõñ ie. Im men in ear bõktok lõñ jerammõn ko, ak jerammõn eo elaptata ej kin an erreo im emõn bõklikõt eo aõ.”

9. Ta eo dri belele ro ren kar aikwij lemnok kake?

⁹ Jet dri belele rar lo bwe elikin air lukkun etale wãwen ko ilo mour eo air, rar kile bwe erro jimor rejjab aikwij jerbal full-time. Emol, bwelen baamle eo enaj aikwij kõmõn bwe wãwen mour eo air en lamwan, bõtab renaj bõk elaplok jerammõn ko. John ej ba: “Ejelok bar juõn iñjake emõnlok jen aõ jela bwe lio beleiõ ej boub ilo jerbal eo an Jeova.” Kõra in belen John ear bwijrõk jen an jerbal bwe en kalaplok ijo kwonan ilo jerbal in kwalok nan.

10. Ta eo ej kamakõt dri Kristian ro ñõn air bõk jerbal in pioneer?

¹⁰ Juõn Kein Kamol Yokwe im Tõmak eo Ar: Jerbal in kwalok nan ej jerbal eo eaurõktata Jeova ear letok ñõn kij bwe jen kõmõne. Jukjuk in ber in ej pojõk in joko, im ro wõt im rej kir etan Jeova renaj mour. (Rom 10:13) Juõn buru eobrõk kin yokwe im kamolol kin ta ko Jeova ear kõmõni ñõn kij, enaj kamakõt kij ñõn bokake nan in jiroñ eo an Nejin ñõn kwalok ilo kijejeto. (Matu 28:19, 20; 1 Jon 5:3) Bareinwõt, ar tõmak bwe jej lukkun mour ilo ran kein eliktata, enaj kamakõt kij ñõn ar kõmõn joñõn wõt ar maroñ ilo jerbal in kwalok nan ke ej or wõt ien, ijellokin ar jolok elap ien ilo jerbal ko an lõl in.​​—1 Kor. 7:29-31.

11. En kar ewi wãwen ar lemnok ñe juõn ej jiroñ kij bwe jelukkun ekkar ñõn jerbal in pioneer?

¹¹ Jerbal in regular pioneer ej juõn wãwen jej kalikar yokwe im tiljek eo ar ñõn Anij, im ejjab baj juõn men jej kõmõne ñõn kalaplok auõ ko jej julok ilo jerbal in kwalok nan. Kin men in, elañe juõn ej jiroñ yuk bwe kwolukkun ekkar ñõn jerbal in pioneer, kwon watõke einwõt juõn nan in nebar. Im kwon jar im etale im lale elañe kwomaroñ kobalok iben ro im rej bõk kwonair ilo jerbal in ej bõktok elap lõñliñ.

[Kamelele ilo peij 4]

Kom ro jinen im jemen, komij ke bõk ijo kwonami ilo ami jibõñ ro nejimi ñõn air bõk jerbal in kwalok nan full-time?

[Kamelele ilo peij 5]

Jerbal in kwalok nan ej jerbal eo eaurõktata Jeova ear letok ñõn kij bwe jen kõmõne.