Kiõ Ej Ien ñan Kwalok Nan!

1. Etke kiõ ej ien ñan kwalok nan?

¹ “Komin mijõk Anij im lelok aibujuij ñõn E.” Iumin tel eo an enjel ro, jej keañ kin ennan in “ñõn ailiñ im bwij im konono im driloabjen otemjelok.” Etke? “Bwe auõ in ekajet eo An [Anij] e mottok.” Rainin, jej bed ilo ‘awa in ekajet eo,’ me enaj jemlok ilo jeebeplok eo an jukjuk im bed in. Eaorõk bwe armij ren “kabuñ ñõn Eo e ar kõmõnmõn lõñ, im ene, im lometo, im un ko unin dren.” Ejelok bar juõn jerbal rainin eaorõklok jen jerbal in keañ eo ad kin “gospel ej in drio.” Aet, kiõ ej ien ñan kwalok nan!​—Rev. 14:6, 7.

2. Ewi wãwen an ro ri karejaran Jehovah kwalok bwe rej kile aorõkin ien kein ad?

² Iumin yiõ ko joñoul rej kab motlok, ri karejar ro an Jehovah rar kajerbal 12 billion awa ko ilo jerbal in kwalok nan kin Ailiñ eo im ñan kõmman ri kalor ro. Elõñ rar kõmman oktak ko ilo air mour bwe ren maroñ kalaplok ijo kunair ilo madmõd in ilo jitõb. (Mat. 9:37, 38) Ñan wanjoñok, yiõ eo lok enañin 850,000 ri kwalok ro rar bed ilo jerbal in pioneer kajjojo alliñ. Ikijen regular pioneer ro, rej aikwij kajerbal 70 awa ko kajjojo alliñ ilo jerbal in kwalok nan. Ñan auxiliary pioneer ro, rej aikwij 50 awa ko.

3. Ta oktak ko ri kwalok ro ekkã air aikwij kõmmani bwe ren maroñ pioneer?

³ Ta eo Ej Men in Aikwij ñan Pioneer: Kin air kile bwe “e karu ien,” pioneer ro rej kate ir bwe en lamwan wãwen air mour. (1 Kor. 7:29, 31) Rej kabukõt wãwen ko ñan kadiklok expenses ko bwe ren jab aikwij jolok elap ien ilo jerbal ko air. Ñan wanjoñok, jet rar emmakit ñan jikin jokwe ko rediklok. Ro jet rar jolok mweiuk ko rejjab men in aikwij. (Mat. 6:19-21) Elõñ alen, rej aikwij bareinwõt kadiklok jibadbad ko air make. Rej kõmmane men kein kin mejenkajjik eo ñan air kalaplok ien ilo jerbal in kwalok nan. (Ep. 5:15, 16) Kin kate, juõn jitõb in karmijeteik kõnan ko air make, im air liki Jehovah ilo air jar kin jibañ eo an, elõñ ri kwalok ro rar maroñ kõmman juõn schedule ekeie eo ej kamaroñ ir ñan air pioneer.

4. Ta buñten nee ko rekeie remaroñ jibañ yuk ñan jibadõk mejenkajjik eo kin pioneer?

⁴ Kwomaroñ ke pioneer? Etke kwojjab kajitõk ibben pioneer ro kin ewi wãwen rar maroñ kõmmane? Jerbal ibbeir ilo jerbal in kwalok nan, im lo lañliñ eo rej lañliñ kake. Etale katak ko kin jerbal in pioneer me rej walok ilo book ko ad. Likit mejenkajjik ko rekeie ñan kwe make me remaroñ jerbal einwõt buñten nee ko ñan am maroñ pioneer. Elañe ewõr abañ ko me rej bõprae yuk jen am maroñ pioneer kiõ, bõkmantak men kein ñan Jehovah ilo jar, im kajitõk ibben bwe en jibañ yuk ñan kamadmõdi.​—Ken. 16:3.

5. Ewi wãwen pioneer ej jibañ kij ñan kakõmanmanlok kabel ko ad ilo jerbal in kwalok nan?

⁵ Jerammõn ko im Lañliñ ko: Pioneer ej kakõmanmanlok kabel ko ad ñan kajerbal Nan eo an Anij, ko im rej bõktok elap lañliñ. “Ilo aõ maroñ kõmman bwe en jimwe wõt aõ katakin kin nan in mol men in ear juõn jerammõn elap,” juõn pioneer sister ear ba. “Ñe kwoj pioneer, emakijkij am kajerbal Bible eo. Kiõ ñe ij etal jen em ñan em, I maroñ lemnak kin eon ko me rejejjet ñan kajjojo ri mweo.” ​—2 Tim. 2:15.

6. Kaminene et eo jerbal in pioneer ej letok ñan kij?

⁶ Pioneer ej bareinwõt katakin kij elõñ kabel ko me remaroñ kakõmanmanlok wãwen ad mour. Emaroñ jibañ jodikdik ro kilen karõk ien ko air ilo meletlet, ewi wãwen budget money ko air, im ewi wãwen emaroñ emõn kõttair ibben ro jet. Elõñ rar kaddeklok juõn lemnak ekajurlok ilo jitõb kin mour itok wõt jen air pioneer. (Ep. 4:13) Bareinwõt, pioneer ro ekkã air lo an pein Jehovah jerbal ilo an jibañ im kajerammõn ir.​—Jerbal 11:21; Pil. 4:11-13.

7. Ewi wãwen pioneer ej jibañ kij ruaklok ñan Jehovah?

⁷ Bõlen juõn ian jerammõn ko elaptata kin pioneer ej bwe ej jibañ kij ruaklok ñan Jehovah. Men in emaroñ kejbãrok kij iumin melejoñ ko. Juõn sister eo ear kijenmij kin juõn ien elap an bin ñan e ear ba: “Kõtan eo ebak me iar maroñ kaddeklok ibben Jehovah ikijen aõ pioneer ear jibañ iõ kijenmij iumin aolep melejoñ ko aõ.” Ear kobaik: “Elap aõ mõnõnõ bwe iar kajerbal mour eo aõ ilo aõ karejar ñan Jehovah full-time. Ear kamaroñ iõ ñan lelok ña make ilo wãwen ko iar jab lemnak kaki.” (Jerbal 20:35) Jemaroñ bareinwõt iion jerammõn ko relap ke jej kõmman joñan wõt ad maroñ ilo jerbal eo eaorõk ñan kwalok nan.​—Ken. 10:22.